Yesus neluk Mangsomp Silai ma nlangun Ratu
8:1-13
1 Wangur,
ngrie ma ubany desar nof safe-safe monuk ma kfwalak a ne,
iane feti lere ye kit ninr Mangsomp Silai namin lo.
I ye Mangsompe ma nlie nlengan nof mangsomp luryanir a ne.
Ma I namtoran Ratu seriny fiana ma radu a rfarete na surga.
Ratu ye Ni kuase ma nlie nlengan.
2 I neluk Mangsomp Silai ma nlangun Ratu na ain ma nlerap desar na surga,
iane Ratu Ni Das ma botuan.
Ratu Ni das a ne koko I a nafdiri,
ma to feleles farlan Ni befak ma tomwatar rose luryain a ne.
3 Ratu nfil mangsomp silayar mpane ma rloik snyompar rof binatngar ma rfen sir a ne,
ma rloik snyomp walyetar a nbal ber Ratu.
Mpa Yesus ninr Mangsomp Silai ka nloik kabanir sa nbal,
neluk snyompe ber Ratu.
4 Farlan Yesus lolone namin saryamprene,
keta I to neluk mangsompe,
fali na saryamprene ye mangsompar ma rloik snyompar ber Ratu rlarat Musa ni tetetkar a ne ramin lo.
5 Mangsompar a ne rlangun Ratu na saryamprene,
ma iane ketla feleles farlan safe ma rose na surga.
Luryain noak ma Musa nose ma nafdiri Ratu Ni befak e Ratu nfalak ber i,
“Ka munremi ma mose kabanir monuk mlwarat safe ma kuftutu ber ko a na bubuar a ne.”*
6 Nempa lere ye Ratu nfair Yesus neluk Mangsompe.
Ma Ni karyae ne ubany ma nlie nlengan desar nof safe ma mangsomp luryanir a rose ne.
Ma iane fali Ratu nose Ni Yoyoding Beberi nor tomwatar nalyole Yesus.
Ratu Ni Yoyoding Beberi ne nangafel a nlengan nof yoyoding ma nose luryain nalyole Musa.
Ma nof Ratu Ni Yoyoding Beberi ne,
lere ye tomwatar bise ma ronri kabanir ma rangafel a rlengan nof Ni Yoyoding Wangim a ne.
7 Ratu Ni Yoyoding Wangim a ne to bise nose ma tangamon a tbali tor Ratu,
fali farlan Yoyoding Wangim a ne bise nose ma Ratu nlure ninr salar ma tangamon tor I,
ni botuan e I keta to nose Ni Yoyoding Beberi ne lo.
8 Nempa Ratu nsalan feti tomwat Israelar to rose rlarat tetetkar ma nof Ni Yoyoding Wangim a ne.
Iane nwayat ma Ratu nfalak ber sir,
“Mdyengar fen ngamone safe ma Yakw ma kweluk Mangnrure kfwalak ye!
Keta ni tewat e,
Yakw kose Yoyoding Beberi kor tomwat Israelar ma tomwat Yehudar.
9 Luryain a ne Yakw knrure empnir nusnir ma rbie rof nus Mesir.
Ma Yoyoding Beberi ye to feleles far ma kose kor empnir nusnir luryain a ne.
Ma fali sir to rose rlarat yoyoding ma kose ber sir a ne,
mpa to kfwaduli kor sir lo.
10 Nempa lere ye yakw kmpweang ma kose Yoyoding Beberi kor tomwat Israelar na lere ma nma ye.
Keta kose ma rdaun Ningw tetetkar,
ma kose nbal ma rnau tetetkar a ne na dalmir nema dedesar ma ranremi.
Ma keta kweluk Ratu ber sir
ma keta sir reluk Ningw tomwatar.
11 Ma keta sir to rperlu ma raftutu nir tomwatar lo,
nre to rperlu ma raftutu wanir ma rafai Ratu nbal,
fali tomwatar monuk,
silai,
marumat,
keta ryoding feti Yakw kweluk Ratu ber sir.
12 Ma boloka luryain e dedesar ma rose kabain yatkar nempa keta klwure nir salar a ne,
ma keta to kunremi nir salar lo.”*
13 Wangur,
noak ma Ratu nfalak feti I nmpeang ma nose Ni Yoyoding Beberi,
iane feti I nose ma Yoyoding Wangim a ne to rpaki ma to ubany lo.
Mpa kabanir ma to ubany ma tomwatar to rpaki ne keta to dodo nbal e rlai lo.