Melkisedek silai i a nlengan nof Abraham
7:1-10
1 Wangur mir kateman!
Luryain e,
Melkisedek neluk rai na kote Salem.
Ma i neluk mangsompe nbal ma nlangun Ratu Mangamin medase.
Ma ler sa e,
Abraham nor ni tomwatar rti raprang ror rayar ror nir tomwatar.
Ne Abraham nor ni tomwatar rmenang.
Noak ma rbali sir e,
Melkisedek nti nakmat Abraham ma nberkat i.*
2 Ne Abraham nal sepersepuluh nof kabanir ma i nmenang nof rayar ma naprang nor sir a ne ber Melkisedek.
Melkisedek ngarany ye iane feti rai malonri.
Ma i neluk rai na kote Salem a nbal mpa rafngare i a nbal feti rai ma nonry maline.
3 Ma to tomwate fen lese ma nafai feti Melkisedek nof dasdalam mpeye,
ma enany amany ber mpear.
Ma to rafai nbal feti ramtoranbabe i bengfir nre nmat bengfir.
Mpa Melkisedek ye neluk mangsompe terik ma dedesar feleles farlan Ratu Anaky.
4 No msyalan fen ngamone ni botuan e,
Melkisedek ye tomwat silai i.
Ma empninrar Abraham a ne silai i a nbal.
Boloka farane i nalang Melkisedek ma nal sepersepuluh nof safe ma nmenang a na prang a ne ber Melkisedek.
5 Na tetetkar ma Ratu nal ber Musa ne nfalak feti tomwat Israelar ka ral sepersepuluh nof nir karya kotkir ber mangsompe.
Ma noak a ne sir ma reluk mangsompar a ne rof lan dasdalam Lewi.
Boloka sir monuk a ne nusnir ber Abraham nempa sir ma reluk mangsompar ye ka rabutin sepersepuluh nof wanir a ne nir karya dalmir.*
6 Ma Melkisedek ye to nof dasdalam Lewi.
Boloka farane i nlangun sepersepuluh nof Abraham.
Ma Abraham ye ma nlangun Ratu Ni yoyoding,
boloka farane i to nberkat Melkisedek,
nempa Melkisedek ma nberkat i.
7 Kit tafai feti tomwate ma nberkat tomwat walyetar,
silai i nlengan nof tomwate ma nonri berkat a ne.
8 Mangsompar ma rof dasdalam Lewi ma rlangun sepersepuluh nof wanir a ne nir karya dalmir,
sir a ne tomwatar sir motak ma bise ma rmat.
Ma Melkisedek ye nlangun sepersepuluh nbal nof Abraham,
nempa rarengi na Kitap Lelerap dalam feti Melkisedek ye to nmat.
9 Ni botuan e,
sir ma rof dasdalam Lewi ne ka ronri nir wayat sepersepuluh rof tomwat Israelar.
Nempa noak ma Abraham nal sepersepuluh nof kabanir ma nmenang a ne ber Melkisedek,
iane feleles farlan sir ma rof dasdalam Lewi ne,
ral nir wayat sepersepuluh ber Melkisedek a nbal.
10 Noak ma Melkisedek nti nakmat Abraham,
to ramtoranbabe Lewi nor ni dasdalam a fuky.
Boloka to ramtoranbabe sir a fuky nempa iane feleles farlan sir ror Abraham lo fali keta nait e,
Abraham krawan darany ber sir.
Yesus ye Mangsomp silai I ma nlie nlengan nof mangsomp walyetar
7:11-28
11 Ratu nal Ni tetetkar ber tomwat Israelar,
ma nfair Lewi ni dasdalam ma reluk mangsompar ber sir.
Nempa mangsompar ma rof dasdalam Lewi ne to bise ma rose ma tomwatar rmorip a rlarat Ratu Ni tetetkar.
Iane nwayat ma ka Ratu nsiduk mangsomp walyetar sa ma nbalak Melkisedek.
Mangsompe ne to nbalak Harun ma nof dasdalam Lewi.
12 Mpa farlan Ratu nfair mangsomp walyetar sa la nlikur mangsompar ma rof dasdalam Lewi ne,
iane feti ka rlikur tetetkar ma Ratu nal ber Musa ne nbal.
13 Mangsomp walyete ma tfalak I a ne,
iane Yesus ninr Mangnrure.
Ma I to nof dasdalam Lewi.
Ma to tomwate fen lese ma nof Ni dasdalam a ne ma neluk mangsompe ma nlangun Ratu na snyompe ain.
14 Ma kit tafai feti kit ninr Mangnrure ne nof dasdalam Yehuda.
Ma to lain sa ma Musa nfalak feti keta mangsompar sa nof dasdalam a ne.
Musa to nfalak farane desar.
15 Lere ye kit tafai mangsomp sa ma to nof dasdalam Lewi.
Kit tafai desar ngrie ne fali mangsomp sa nma ma feleles farlan Melkisedek.
16 Ratu nfair I ma neluk mangsompe to nof yayatrwar ma tetetkar ma tomwatar rose ne.
Nempa Ratu nfair I fali Ni kuase ma nmorip terik ma dedesar.
17 Fali na Kitap Lelerap dalam rarengi na I farye:
“Ratu nfil Ko ma mweluk mangsompe terik ma dedesar,
farlan luryain e,
Melkisedek neluk mangsompe.”*
18 Mpa tetetkar ma luryain e Ratu nal ber Musa ne to ubany lo,
fali tetetkar a ne to nose ma tafdiat kit a na Ratu sounlury.
19 Tetetkar ma luryain e Ratu nal ber Musa ne to nose ma Ratu nafdiat sir a na sounlury.
Nempa lere ye kit bise ma talele kabain ngamonar fali Yesus neluk dalamtene ber kit ma bise ma takmat Ratu.
20 Luryain e,
noak ma Ratu nfair mangsompar rof dasdalam Lewi,
I to nal ngarany ma nfair sir.
Nempa noak ma I nfair Yesus ma neluk Mangsompe e,
Ratu nal ngarany la nfair I.
21 Nempa noak ma Ratu nfair Yesus ma neluk Mangsompe e,
I nal ngarany ma nafkoran Ni yoyoding a ne ma nfalak farye,
“Yakw kose Ningw yoyoding lo feti
kfwil Ko ma mweluk Mangsompe terik ma dedesar.
Ma keta komat dedesar Ningw ngribatnir a ne.”*
22 Ratu nal ngarany ma nafkoran Ni yoyoding a ne lo mpa bise ma tafai feti Yesus ye ma nose ma Ratu Ni Yoyoding Beberi ne ntafal ma namkoran.
23 Ngriar sa nbal na mangsompar iane feti luryain e,
tomwatar yadin reluk mangsompar fali farlan mangsompar sa nmat ka tomwat sa nlikur i ma neluk mangsompe.
24 Nempa Yesus ye neluk mangsompe terik ma dedesar ma to tomwate fen lese ma nlikur I,
fali nmorip dedesar.
25 Iane nwayat ma I boany nal desar ma nfair tomwatar.
Sir a ne ma rakmat Ratu fali dalmir lese ror I lo.
Ma I namin dedesar ma neluk lenre ber sir ror Ratu.
26 Fali ni botuan e,
Yesus ye neluk Mangsomp Silai ma bise ntulung kit a na safe-safe.
I ye ma nafsenange Ratu dalamy ma to Ni sal sasaf.
Ma Ratu nfil a nkese I nof tomwat salar na saryamprene,
ma nfair I a na ain ma medase desar na surga.
27 I to nbalak mangsomp silai walyetar.
Lerar monuk e,
sir ka rfen binatngar ma neluk snyompe ber Ratu la ntebus nir salar betno rloik snyompe la ntebus tomwat walyetar nir salar a nbal.
Nempa Yesus e,
nanrenre koko I tenany ma neluk snyompe ber Ratu nema Ratu ntebus tomwatar nir salar.
Yesus nose farane lan lain lese nempa Ni snyompe ne ubany terik ma dedesar.
28 Farlan tlarat tetetkar ma Ratu nal ber Musa ne,
tomwatar ma rfair sir ma reluk mangsomp silai,
sir a ne tomwat biase motak sir ma rose sale.
Nempa noak ma Ratu nose Ni Yoyoding Beberi,
I nal ngarany la nafkoran Ni yoyoding a ne.
Ma Ratu nfair Anaky a ne ma neluk Mangsomp Silai ma nose nlarat monuk Ni mpempeang terik ma dedesar.