Noak ma betno talele Yesus,
tomwatar raftutu anftutwar ma baluan desar na Yesus ninr Ray Silai ber kit.
Nempa ka kete dedesar ma tfalak lan anftutwar ma baluan desar a ne.
Ma ka taloran anftutwar a ne,
ma tfalak anftutwar ma nlengan nof anftutwar a ne nbal.
Iane anftutwar na Yesus ma nose ma tafal ma tamkoran ma talele I.
Tomwatar ma betno ralele Yesus a ne ka raftutu sir na anftutwar ma baluan desar feti ka rtate nir salar,
ma ralele Ratu.
Iane nangafel nempa ka kete dedesar ma tfalak lan kabanir a ne,
fali kabanir a ne ma raftutu baluan desar ber kit lo noak ma betno talele Yesus.
2 Ma anftutw walyetar a nbal ma raftutu baluan desar ber kit a ne iane feti radiris tomwatar,
rsaup limnir a na tomwatar ulnir,
Ratu keta nafmorip a nbali mangmwatar,
nre Ratu keta ntetak ma nukun tomwatar dedesar.
3 Mpa wangur,
ka kete tafter ma tfalak lan kabanir a ne nempa farlan Ratu nal dalamten ngamone ma ber kit,
mya ma tareke ma tafai anftutwar ma nose ma tafal ma tamkoran ma talele Yesus ninr Ray Silai.
4 Fali tomwatar ma ratliur Yesus ninr Ray Silai ne keta to tomwate fen lese ma bise ma nrure sir ma rtate rbali nir salar lo.
Sir a ne ma rafai Ratu Ni anftutw botunar lo,
ma Ratu nal berkat ma ber sir,
ma nal Ni Smwangtany ber sir a nbal.
5 Ma sir rase desar feti Ratu Ni ngribatnir a ne nangafel.
Ma sir rsalan kabain mpasalnar ma Ratu nose nor Ni kuase na nir momorip lo.
Ma Ratu keta nfatutu Ni kuase ne na are ma nma ne.
6 Mpa ka rajake sir nema kete ratliur Yesus fali keta to tomwate fen lese ma bise ma nrure sir ma rtate nir salar a ne nbal.
Sir ratliur Yesus iane feleles farlan rsangwalu rbali Ratu Anaky ma rafmweat I a na tomwatar sonirlury.
7 Contoh far ompak.
Noak ma udan tompur dedesar keta ompak nsosap weye ma nose ma kabanir a ratrump e rangafel.
Iane nwayat ma ubany desar ber mangosboar,
fali Ratu nberkat ompak a ne.
8 Nempa farlan ompak a ne nose lan ma skiki kakari ma riar ratrump,
keta ompak a ne to ubany sasaf.
Ma famudi e,
Ratu nangoak ompak a ne ma napu.
Ka talele Ratu ma tdaf dedesar safe ma nyoding ber kit a ne
6:9-12
9 Wangur mir kateman ma mkamis a kmi,
boloka kam mfalak farane nempa malele feti kmi to feleles farlan ompak ma Ratu nangoak a ne.
Kam mafai feti kmi myose kabain ngamonar ma nlengan nof a ne nbal.
Kabain ngamonar a ne iane feti Ratu nfair tomwatar nof nir salar.
10 Fali ni botuan e,
Ratu to nasalan sou.
I dedesar ma nanremi safe ma myose ber I.
Iane feti mkyamis Ni tomwatar ma mlyangun sir nof luryain terik lere ye.
11 Nempa kam mtak desar mof a kmi nema kmi mfyatutu mir dalam ngamone terik ler famudi.
Kmi myose farane e,
mifai desar feti keta myonri safe ma mdyaf dedesar a ne ma Ratu nyoding ber a kmi lo.
12 Ma kete msyisrat.
Nempa kam mpeang ma ka myorip a mlyarat tomwatar ma ralele Ratu ne nir momorip.
Sir a ne ma rsabar ma rdaf dedesar safe ma Ratu nyoding ber sir a ne terik ma ronri monuk kabanir a ne.
Ratu dedesar ma nafdiat safe ma I nyoding ber Ni tomwatar
6:13-20
13 Wangur,
luryain e Ratu nose Ni yoyoding ber Abraham.
Noak a ne Ratu nal ngarany la nafkoran safe ma nyoding a ne.
Ma fali to kekes ma silai i nlengan nof Ratu mpa nal koko I ngarany ma nafkoran Ni yoyoding a ne.
14 Noak ma Ratu nose Ni yoyoding ber Abraham e I nfalak,
“Ni botuan e,
keta kal berkat ma nlie nlengan ber ko ma kose ma nim dasdalam yadin desar.”
15 Ne Abraham nsabar la ndaf safe ma Ratu nyoding ber i,
terik ma nonri safe ma Ratu nyoding ber i a ne.
16 Farlan tomwatar rose ma rafkoran nir yoyoding e,
biase sir ral tomwate ma silai i nlengan nof sir a ne ngarany.
Sir rose farane la rafkoran safe ma ryoding a ne,
nema to tomwate fen lese ma nbangal sir lo.
17 Feleles farlan Ratu nbal.
I nal ngarany la nafkoran Ni yoyoding nema tomwatar rafai botuan feti la nafdiat safe ma nyoding a ne.
18 Ratu to nlepusuk na yoyoding ma I nose ne,
ma to nlepusuk a nbal fali nal koko I ngarany la nafkoran yoyoding a ne.
Mpa nof ngriar du ye I dedesar ma nafmpwane.
Iane nwayat ma Ratu nal ngarany la nafkoran Ni yoyoding nema kit dedesar ma tanriak I ma najake kit.
Ma nof Ni yoyoding a ne kit bise ma tamkoran ma talele I feti keta tonri safe ma nyoding ber kit na are ma nma ne.
19 Safe ma kit talele tof Ratu ne nose ma kit tamkoran ma to tayeban.
Iane feleles farlan kabal ni soar ma natkyal melaman desar.
Iane nwayat ma kit bise ma ti takmat Ratu na Ain ma nlerap desar na Ni Das.
Ain a ne rteri ror maloly melabar.
20 Yesus ye ma nbalun ain a ne ma neluk dalamtene ber kit.
Ma I neluk Mangsomp Silai ber kit a nbal terik ma dedesar farlan luryain ma Melkisedek neluk mangsompe.