Wangur mir kateman,
kit tafai feti Ratu nfil mangsomp silayar monuk a ne nof Ni tomwatar.
Ma I nfil sir ma reluk lenre ber I nor Ni tomwatar.
Mangsomp silai ne ni karyae e nlangun tomwatar nir snyompar,
ma nloik ber Ratu nema I nlure tomwatar fali salar ma sir rose ne.
2 Ma i ma neluk mangsomp silai ne,
tomwate i motak ma bise ma nfufw far sale dalam.
Iane nwayat ma ni lolompang ber tomwatar ma rmpan sale ma to rafai feti impe ma botuan.
3 Mangsomp silai ne ni karyae e nloik tomwatar nir snyompe ber Ratu nema Ratu nlure nir salar.
Nempa mangsomp silai ne tomwate i motak ma bise ma nfufw far sale dalam,
mpa ka i nloik ni snyompe ber Ratu nema Ratu nlure koko i ni salar a nbal.*
4 Ma to tomwate fen lese ma bise ma nfair a nbali i ma neluk mangsomp silai.
Tomwate ma neluk mangsomp silai ne i a ne ma Ratu nfil i.
Ma iane farlan ma luryain e,
Ratu nfil Harun ma neluk mangsomp silai.
5 Feleles farlan Yesus ninr Ray Silai nbal.
I to nfair a nbali I ma neluk Mangsomp Silai,
nempa Ratu ma nfair I a ne ma nfalak ber I:
“Ko ye Yakw Anakw.
Ntabw nof lere ye Yakw kweluk Ame ma ber Ko.”*
6 Na ayat sa nbal e Ratu nfalak,
“Ko ye ma mweluk Mangsompe terik ma dedesar,
farlan luryain e aMelkisedek neluk mangsompe.”*
7 Noak ma Yesus nmorip a na saryamprene neluk tomwate,
I dedesar ma nsampayang ber Ratu.
Noak ma nsampayang e,
I ntasing ma naloloi I nor liriny silai,
fali nalele feti lan Ratu ma nfair I nof mamate.
Ma Ratu nlangun Ni tatakar a ne fali I dedesar ma nose nlarat Ratu Ni mpempeang.
8 Boloka Yesus ye Ratu Anaky I,
nempa I a nbal e nkoman suse nema nafai feti felan farpe ma nose nlarat Ratu Ni mpempeang.
9 Noak ma Yesus nsoru monuk Ni karyayar ma Ratu nal ber I a ne,
I neluk Mangsomp Silai ma nose nlarat monuk Ratu Ni mpempeang.
Iane nwayat ma lan I ma bise ma nfair tomwatar ma rose rlarat Ni mpempeang nema ronri momorip dedesar.
10 Ma Ratu nfair I ma ntetak ma neluk Mangsomp Silai farlan ma luryain e,
I ntetak Melkisedek ma neluk mangsompe.
Ka mireke ma mimkoran ma milele Yesus
5:11-14
11 Wangur,
lolone ngriar yadin na Yesus ma Melkisedek ma mpeang ma mafbotin ber a kmi.
Nempa masumput ma mfalyole,
fali kmi mpyeang ma mdyengar sapat motak,
ma to mireke ma mkyaul myal.
12 Kmi milele Yesus dodo lo mpa ni botuan e,
ni tewat lo ma miftutu tomwat walyetar na Ratu Ni anftutwar.
Nempa ngriar yadin ma kmi to mkyaul myal a fuky.
Mpa ka tomwat walyetar raftutu rbali kmi na Ratu Ni anftutwar ma raftutu baluan desar ber a kmi noak ma betno milele Yesus a ne.
Ma kmi farlan kanak darwewear ma lolone rsusw ma to bise ma rane tnyam makornar a fuky.
13 Tomwate ma to nafai feti mpe ma diat ma mpe ma sale i farlan kanak darwewear ma lolone rsusw.
14 Nempa tomwat mangaslyayar e,
rane tnyam makornar.
Sir a ne ma ramkoran ma ralele Yesus lo fali sir biase ma rtetak feti mpe ma diat ma mpe ma sale.