Tomwatar ma ralele Ratu keta rsanari sir ror I
4:1-13
1 Wangur,
Ratu nyoding lo feti keta tomwatar ma ralele I a ne rti ain sanari ma raktem a ramin,
ma I lolone nomat Ni yoyoding a ne terik lere ye.
Mpa ka mijak fen ngamone nema nof a kmi ye to tomwate fen lese ma to nti ain sanari ma Ratu nyoding a ne.
2 Fali luryain e,
kit tdengar Ibar Ngamonea ne farlan empninrar nusninrar a nbal.
Ma ibar a ne to ubany ber sir fali rdengar motak nempa to ralele.
3 Lan tomwatar ma ralele Ratu ma rti ain sanari ne.
Ma sir ma to ralele Ratu,
I nfalak ber sir farye lo:
“Noak ma kurese desar sir e,
kungoak sir ma kfwalak feti,
keta to bise ma rti ain sanari ma maktem a mamin iane.”
Ratu nfalak farane nempa ni botuan e,
I nose monuk saryamprene ne lo betno I nau ain sanari ne.
4 Ma rarengi na Kitap Lelerap dalam na ler ketujuh farye,
“Ratu nose nsoru Ni karyayar betno na ler ketujuh e I nsanar.”
5 Ma ranremi nbal safe ma dine ayat a ne nfalak,
“Keta sir to rti ain sanari ne ma maktem a mamin.”
6 Mpa kit tafai desar feti sir to rti ain sanari ne fali sir to ralele Ratu,
safo sir rdengar ibar a ne baluan lo.
Nempa Ratu ntetak tomwatar ketnir ma ralele I a ne lo ma rti ain sanari ne.
7 Iane nwayat ma Ratu ntetak blerar sa nbal nema tomwatar bise ma raktem Ratu rsanari sir.
Lere ne ma kit tfalak feti,
“Lere ye.”
Ngarkar rose ngarkar rai Daud narengi na Ratu Ni ngribatnir farlan ma luryain rarengi farye:
“Lere ye farlan kmi mdyengar ma Ratu natanuk,
ka kete ulmir arwaluk.”
8 Fali farlan luryain e,
Yosua bise ma nor tomwat Israelar ma rti ain sanari ne,
mpe Ratu keta to nafbotin ler walyetar sa ma raktem a rsanar.
9 Iane nwayat ma lolone let ber Ratu Ni tomwatar ma raktem Ratu rsanari sir.
Ma iane farlan ma Ratu nsanari I a na ler ketujuh.
10 Tomwate ma nose nsoru ni karyae ne keta nsanar.
Ma i nsanar a ne,
iane farlan ma Ratu nsanari I a na ler ketujuh.
11 Mpa ka tareke ma ti ain sanari ne,
nema kete tomwatar sa nof kit ye to nalele Ratu nwayat ma to bise ma nti ain sanari,
farlan empninrar nusninrar ma to rose rlarat Ratu Ni mpempeang luryain a ne.
12 Ni botuan e,
Ratu Ni ngribatnir a ne Ni kuase ma nal momorip ber tomwatar.
Ma Ni ngribatnir a ne farlan smade ma matany ma waur nane.
Ma Ni ngribatnir a ne bise ma ntebak isninrar ma durninrar,
nwayat ma bise ma nafai ninr andanwar ma dalminrar yatak ma ngamone.
13 To tomwate fen lese ma bise ma namudim nof Ratu,
fali i nafai safe safe monuk na kit farlan ma tamlus a na sounlury.
Mpa keta nait e,
kit tyoding safe-safe monuk ma kit tose ber I a ne ma ka tabare.
Yesus neluk Mangsomp Silai ber kit
4:14-16
14 Wangur mir kateman!
Lere ye kit ninr Mangsomp Silai ma nlie nlengan iane Ratu Anaky.
I a ne ma nti surga ma namdir Ratu sounlury lo ma keta nafdiat kit.
Mpa ka dedesar ma tamkoran ma talele I.
15 Fali kit ninr Mangsomp Silai ye nafai desar feti tomwatar kit ye manrilak desar ma tfufw far sale dalam.
Ma noak ma I nmorip a na saryamprene I ntungan anteman yadin farlan kit a nbal.
Boloka farane I to nose sale.
16 Mpa kete tamtaut ma takmat Ratu na ninr sampayang.
Fali I ye Ratu Mangkuase ma dedesar ma nkamis kit.
Ratu keta nfatutu Ni dalamy ngamone ma Ni lolompang ber kit nema noak ma tak tulung tof I e,
keta ntulung desar kit.