Yesus ye silai I nlengan nof Musa
3:1-6
1 Wangur mir kateman ma Ratu nfil a kmi ma myeluk Ni tomwatar!
Ratu nfil a kmi lo ma miktem a mimin surga.
No mdyaun fen ngamone Yesus ma tyoding I a ne.
I ye ma neluk Ratu Ni mangsiduk ma neluk Mangsomp Silaia nbal.
2 Yesus ye ma Ratu nfil I.
Ma I dedesar ma nose nlarat safe ma Ratu nfalak ber I.
Iane feleles farlan Musa ma luryain e nose nlarat Ratu Ni mpempeang a nbal,
noak ma nkarya na Ratu Ni Das ma nrure Ratu Ni tomwatar.*
3 Ni botuan e tomwatar ka ralang Yesus nlengan nof ma ralang Musa.
Iane feleles farlan tomwatar sa ma nafdiri das.
Keta tomwatar ralang tomwate ne nlengan nof das ma nafdiri ne.
4 Botuan feti dasar monuk a ne tomwatar rafdiri,
nempa ma nose safe-safe monuk na saryamprene ye iane Ratu.
5 Botuan feti luryain e Musa nose nlarat Ratu Ni mpempeang,
noak ma neluk mangkaryae na Ratu Ni befak.
Safe ma Musa nose ne la nfatutu safe ma keta Ratu nafbotin na lere ma nma ne.
6 Ma Yesus ninr Ray Silai ne I to neluk lan mangkaryae.
Nempa I ye Ratu Anaky ma dedesar ma nose nlarat Ratu Ni mpempeang.
I ye ma nrure Ratu Ni tomwatar na Ratu Ni Das.
Ma kit ye ma teluk Ratu Ni tomwatar lan feti tamkoran ma talele I,
ma dedesar ma tdaf safe ma I nyoding ber kit a ne,
nwayat ma dalminrar rsenang resi.
Ka kete ulmir arwaluk farlan empnir nusnir noak ma ramin ain letkape
3:7-19
7 Mpa wangur,
ka myose mlyarat farlan ma Ratu Smwangtany nfalak farye:
“Lere ye farlan kmi mdyengar ma Ratu natanuk,
8 Ka kete ulmir arwaluk farlan empnir nusmir,
noak ma rbangal Ratu ma rateman I a na ain letkape.”
9 Na iano empnir nusnir rbangal desar Yakw ma rateman Yakw ma rsalan feti keta kose farpe sir.
Safo sir rsalan kabain mpasalnar yadin ma Yakw kose ber sir lo doan ngarak buty fat.
10 Mpa Yakw kurese desar tomwatar a ne,
fali sir rmpeang lan ma rmpan sale,
ma to rmpeang ma rlarat Ningw faretar.
11 Iane nwayat ma kurese desar sir ma kungoak ma kfwalak feti,
keta to bise ma rti ain sanari ma maktem a mamin.*
12 Wangur,
ka mijake kmi nema kete tomwatar sa nof a kmi ye ni andaun yatak ma to nalele Ratu nwayat ma mitliur Ratu ma nmorip a ne.
13 Mpa lerar monuk e ka sa nafkoran sa noak ma lolone let ber kmi a ne,
nema to tomwate fen lese nof a kmi ma ulun arwaluk ma natliur Ratu fali myinrang ma tomwatar rfule kmi nwayat ma myose sale.
14 Ma ni botuan e taktem Yesus ninr Ray Silai tkarya,
lan feti ka tamkoran ma talele I farlan ma luryain e talele I terik ma dedesar.
15 Iane feleles farlan ma rarengi na Kitap Lelerap dalam,
“Lere ye farlan kmi mdyengar ma Ratu natanuk,
Ka kete ulmir arwaluk farlan empnir nusmir,
noak ma rbangal Ratu.”*
16 Tomwatar ma rdengar ma Ratu natanuk nempa rbangal I,
sir a ne ma Musa nrure sir ma rbie rof Mesir.*
17 Iane nwayat ma Ratu narese sir doan ngarak buty fat,
mpa rmat ma raluat a na ain letkape fali nir salar a ne.
18 Ma sir a ne nbal ma Ratu nangoak sir ma nfalak feti keta sir to bise ma rti ain sanari ma nyoding ber sir a ne ma raktem a ramin.
Sir to bise ma rti ain a ne fali to rose rlarat Ratu Ni mpempeang.
19 Mpa kit tafai feti Ratu to ninrang ma rti ain ma keta raktem Ratu ramin a ne,
fali to ralele I.