Mya tose tlarat fen ngamone Ratu Ni anftutwar ma tdengar a ne
2:1-4
1 Wangur,
Ratu nose safe-safe monuk a ne ber kit,
mpa ka tose tlarat fen ngamone safe ma tdengar a ne,
nema kete tlarat anftutw walyetar ma nwayat ma to talele Ratu lo.
2 Fali tetetkar ma luryain e Ratu nal ber empninrar nusninrar nalyole malaektar a ne,
sir lolone rafmpwane terik lere ye.
Mpa ise ma to nose nlarat tetetkar a ne,
keta rukun i a rlarat safe ma i nose.
3 Iane feleles farlan ibar ma nlie nlengan na Ratu ma nfair tomwatar ma Yesus nafwibar a ne.
Mpa farlan to tfaduli tor ibar a ne,
botuan feti keta rukun kit.
Fali ni botuan e,
Yesus ninr Mangnrure koko I ma luryain e nafwibar ibar a ne.
Ma kit tdengar ibar a ne tof tomwatar ma rdengar desar rof Yesus.
Ma sir rfalak feti ibar a ne ma botuan desar.
4 Ratu koko I a nafdiat safe ma tomwatar a ne rfalak.
I nafdiat safe ma sir rfalak a ne nor fanikar ma ngrimpasalnar ma nlie nlengan.
Ma Ratu nose nbal ma tomwatar ronri fakoran nof Smwangtany nlarat Ni mpempeang nema sir bonir ral ma rkaryae Ratu Ni karyayar.
Yesus nma saryamprene neluk tomwate ma nfair kit nof ninr salar
2:5-18
5 Wangur,
Ratu nal kuase ber tomwatar kit ma tfarete saryampren beberi ma keta nma ye.
Ma I to nal kuase ber malaektar ma rfarete saryamprene ne.
6 Nempa na Kitap Lelerap dalam e rarengi farye:
“O Ratu,
tomwatar a ne mpear sir mampe Ko munremi desar sir ye.
Ma tomwatar motak sir a ma safe ma Ko mswalan sir.”*
7 Ko mose ma tomwatar ubnir lan rufuky nof malaektar,
nempa to dodo.
Nempa famudi e,
Ko mose ma sir ubnir silai,
ma tomwatar ralang sir farlan rayar.*
8 Ko mufufu nir muswar monuk,
ma mose ma rsatngur ber i.
Ko mufufu nir muswar monuk ma mose ma rsatngur ber i,
ma iane feti to fen lese nbal ma to rsatngur ber i.
Nempa lere ye kit to tsalan ma i nkuase safe-safe monuk a ne fuky.*
9 Botuan feti Ratu nose ma malaektar far medase sir nlengan nof Yesus nempa to dodo.
Ma iane noak ma lolone namin saryamprene.
Nempa lere ye tsalan ma Ratu nose ma tomwatar rdangin ma ralang I fali I nkoman suse terik ma nmat.
Ratu nose farane ma nfatutu Ni dalamy ngamone ber tomwatar kit,
nalyole susar monuk ma Yesus nkoman a ne terik ma nmat ber tomwatar monuk.
10 Ratu ye ma nose safe-safe monuk,
ma I nose safe-safe monuk a ne nema tomwatar rdangin I.
Yesus ye ma neluk dalamtene ber tomwatar monuk nema Ratu nfair sir.
Ma fali I nkoman suse terik ma nmat mpa I nafai botuan ma nfair tomwatar kit ma to tamkoran ye.
Ma Ratu nose farane nema tomwatar yadin rlarat I ma tomwat walyetar rdangin sir ror Ratu.
11 Yesus ye ma nfil a nkese kit ma teluk Ratu Ni tomwatar.
Ma taktem Yesus Amninrar lese I a ne Ratu.
Iane nwayat ma Yesus to nmeat ma nyoding feti wanir ber kit.
12 Yesus nfalak ber Ratu farye:
“O Amo,
Yakw ye Yesus,
Yakw kmpweang ma kufbwotin na Ko ber wangur,
ma noak ma kufbwurat Yakw kor sir e,
kmpweang ma kdwangin Ko.”
13 Yesus nfalak a nbal,
“Keta dedesar ma ktwikloi ma kulele Ko.”
Ma nfalak a nbal,
“Amo,
Yakw ye lo ma kor tomwatar ma mwal ber Yakw ne.”
14 Ratu Ni tomwatar ma Yesus nfil a nkese sir a ne tomwate motak sir.
Mpa Yesus neluk tomwate ma nmorip feleles farlan sir a nbal.
I nose farane nema nof Ni mamate ne I bise ma nafufu smwangat yatkar nir ulun ma ni kuase ma nose ma tomwatar monuk rmat.
15 Luryain e,
kit farlan kawar ber mamate nwayat ma dedesar e tamtaut ma tmat.
Nempa nof Yesus Ni mamate ne I nalin kit nof mamate.
16 Ma botuan feti Yesus ntulung Abraham ni dasdalam kit ma to ntulung malaektar a ne.
17 Iane nwayat ma ka Yesus nmorip e,
feleles farlan tomwatar kit na safe kabain.
I nose farane nema neluk Mangsomp Silai ma nfatutu Ni lolompang ber kit,
ma dedesar ma nkarya ber Ratu nlarat Ni mpempeang.
Ma nof safe ma I nose ne Ratu nlure tomwatar monuk nir salar.
18 Fali koko I a nkoman suse lo noak ma rateman I.
Mpa I boany nal ma ntulung tomwatar ma rateman sir a ne nema kete rose sale.