Surat ber tomwat
Ibranyar
Ratu natanuk ber tomwatar nalyole Anaky
1:1-4
1 Wangur mir kateman!
Luryain e,
Ratu natanuk lain yadin ber empninrar nusninrar.
I natanuk ber sir nor matan ribun nalyole nabyar.
2 Nempa na ler famudi ye Ratu natanuk ber kit nalyole Anaky lo.
Ma luryain e,
Ratu nose langit ma saryamprene numur ni mparetar nalyole Anaky a nbal.
Ma I ntetak ma nal kuase ber Anaky ma nonri safe-safe monuk a ne.
3 Ma Anaky a ne ma nfatutu Ratu Ni kuase ma nlie nlengan.
Ma Anaky a ne Ni adat ma Ni kuase feleles farlan Ratu nbal.
Ma nor Ni ngribatnir ma nfen ber kuase ne,
I najake saryamprene ye nor ni mparetar ma nangafel.
Ma lama I nalin tomwatar nof nir salar,
I nfangat far surga.
Ne I nti namtoran Ratu ma Ni kuase ma nlie nlengan a ne seriny fiana ma radu a rfarete.
4 Mpa Ratu Anaky a ne silai I nlengan nof malaektar.
Ma Ratu nafneni ngare na I ma nangafel a nlengan nof ngare ma nal ber malaektar a ne.
Ratu Anaky Ni kuase nlie nlengan nof malaektar
1:5-14
5 Ratu nfalak ber Anaky farye:
“Ko ye Yakw Anaky;
ma nof lere ye Yakw kweluk Ame ma ber Ko.”
Ma Ratu nfalak a nbal ber Anaky feti,
“Keta kweluk Ame ma ber Ko,
ma keta Ko mweluk Anakw.”*
Ma kit tafai feti to lain sa nbal ma Ratu nfalak farane ber Ni malaektar.
6 Ma kit tafai feti Ratu Anaky a ne ma neluk keyai ber tomwatar monuk na saryamprene.
Noak ma Ratu nsiduk Anaky keyai ne ma nma saryamprene,
I nfalak farye:
“Ningw malaektar monuk ka rsatngur ber Anakw a ne.”*
7 Ma Ratu nfalak na malaektar farye:
“Yakw kose Ningw malaektar a ne farlan mnaur uman,
ma Ningw mangkaryayar e,
farlan au ma nfolur.”*
8 Nempa na Anaky e,
I nfalak farye:
“Yakw Anaky Ko,
Ko ye Ratu ma keta mfwarete terik ma dedesar!
Ma Ko mfwarete na Nim ain farete mor malonri.*
9 Ko mkwamis tomwatar ma rose kabain malondyar ma to mpweang tomwatar ma rose kabain yatkar.
Iane nwayat ma kweluk Nim Ratu ma kfwair Ko,
nema tomwatar ralang Ko,
ma dalamy a nsenang,
ma dalamy senange ne nlengan nof tbwarim monuk.”
10 Ratu nfalak ber Anaky a nbal:
“Ko ye Mangnrure,
Ko ye ma luryain e mose langit,
ma saryamprene ye koko Ko a mose nbal.*
11 Safe-safe monuk a ne keta rlie,
ma keta rayatak farlan rabtyar ma rayatak lo,
nempa keta Ko e,
mumin dedesar.
12 Ma keta Ko myebas langit ma saryamprene ma rayatak a ne,
farlan ma mlulun rabtyar ma rayatak a ne ma myebas sir.
Ma keta mlikur ma mufbweberi safe-safe monuk ma rayatak a ne.
Nempa Ko e mwon dedesar,
ma mworip terik ma dedesar.”
13 Ratu nfalak ber Anaky farye:
“Mumtoran seringw fian ye,
terik ma kose ma Nim muswar rsatngur ber Ko.”*
Ma kit tafai feti to lain sa nbal ma Ratu nfalak farane ber Ni malaektar.
14 Mpa malaektarb monuk a ne,
iane smwangtar ma rlangun Ratu.
Ma Ratu nsiduk sir ma rtulung tomwatar ma keta nfair sir a ne.