Petiriwa tsitaxu-epana Jesús bitso penamatamotsituxujuwi-aceiterata
12
Itsa saica seis pamatacabibeje pejonenexa baja Pascuafiesta, Jesús baja pona Betania tomarabelia, itsajota ponapona Lázaro, ponë Jesús asaëya-exana petëpaenëmi.
2 Bajarajota, Jesús pexaejawa to-exanatsia yaiyataeya, caniwiyopijipexaejawa. Bajarapapexaejawa Marta tsanaponapona. Jesús pamesata xayeca, Lázaro bajarajota na-eca.
3 Nexata, María carena epatuabotellabëyota petuxujuwi-aceitera, nardowënëra. Bajarapora bitso namatamota. Nexata, bajarapa-aceitera María tsitaxu-epanaxuaba Jesús. Bajaraxuacujinae, icatsia pematana̱ta taxutsewiapa. Daxita bo-ënëtuatuajë petuxujuwijawa tuxuyacaëjëpa.
4 Bajarapacuene petaejawata, Jesús pijajiwiyajuwënënë, Judas Iscariote, ponë itsamatacabi Jesús canajetsijitsia pijawajabitsaë pecobeyabelia, jumaitsi:
5 —¿Detsa xuajitsia apocanajetsi bajarapatuxujuwira, pematamopitsinexa trescientos padenariobeje? Bajarapapalata rajutsipa bepejiobiwi, bajarapacuenia peyawenonaenexa —jai Judas.
6 Bajarapacuenia Judas jumaitsi apopesiwanajamatabëcuenebëjaixae bepejiobiwi. Biji rajane, bajaraponë penacobetoxotsinë. Bajaraponë Jesús-bana pijapalatadoro pewetsia-exanaenëtsi, bajarapapalata yajuwënënacobetoxotabiaba.
7 Nexata Jesús jumaitsi Judas-jawabelia:
—¡Cuenecopare saya bajarapowa xanëjawaberena bajarapacuenia pexanaenexa, tsipaji mapowaje xaniawaeta picani bajarapora tanetsiperabë-epanaenexa, tatëpaenë tanemëthëtsiwajënaeya!
8 Daxitamatacabi raja bepejiobiwi jinawanapa itsaxuayo pajinawanapame, paneyawenonaenexa. Itsiata baitsi jane, xanë daxitamatacabi apoponaponaenë tsane paxamëjawata —jai Jesús Judas-jawabelia.
Judíowi penamatacaitorobiwi najamatabëxaina pebeyaxuabinexatsi Lázaro
9 Ayaibitsaëtoxaneto judíowi wënëliwaisitanetsi Jesús pepatsijawa Betania tomarata. Nexata, bajarapamonae ponalia Betania tomarabelia, petaenexatsi Jesús. Itsiata, apoponae ëJesús petaenexa. Ponalianua petaenexa Lázaro, ponë Jesús asaëya-exana, petëpaenëmi.
10 Nexata, sacerdotewi penamatacaitorobiwi, daxita baja siwanajamatabëjëpa pebeyaxuabinexatsi Lázaro, Jesús yajawa.
11 Lázaro, petëpaenëmi piasaëya-exanaexaetsi, judíowi ayaibitsaëto natsanapona sacerdotewiwecua, pejumexaniataexae Jesús, Dioso pitorobinëtsicuenetsica.
Jesús nacua-ewetsinëcuenia pecopiapitsijawatsi, itsamonae Jerusalén tomarapijiwi
12 Jiwi ayaibitsaëtoxaneto pepatsicujinae Pascuafiesta petaewinexa Jerusalén tomarata, merawia pitsijawata, Jesús wënëliwaisitanetsi pepatsijawanexa bajarapatomarata.
13 Bajarapamonae Jesús pewajënae becotsibotonë baxu-ucubaba, penotsinexa. Bajaraxuacujinae, ponalia baja panamutowerena Jesús najetarucaejitsia, pecopiapitsinexa ayaijamatabëcuenenëcuenia. Bajarapamonae pecopiapitsijawata, wawajai tsabuataponae mapacueniaje:
«¡Dioso panecapanepae!b ¡Dioso pexaniacuenia yawenonaetsi, maponë penajetarucaenëje, wajatuxanenë pewënëta, peyanacua-ewetsinexa pijajiwi, Israel nacuapijiwi!», jai tsanajetarubenae bajarapamonae Jesús yabara.
14 Imoxoyo baja pepuapepatsijawanexa Jerusalén tomarata, Jesús caxitajarabaxuaba pejananaweretsinëc burro. Bajarapaburro Jesús jumaponatsi pepatsinexa Jerusalén tomarata. Bajarapacuenia itsa exana, copiapata jane baja, pacuenia tajëwelia Dioso pejumeliwaisibaxutota jumaitsi Cristo yabara, mapacueniaje:
15 «¡Pajunawame pëtsa baja, paJerusalén-tomarapijiwimë! ¡Pataema! ¡Najetaruca ra jane baja papecayanacua-ewetsinënexa! Pejananë burroyota yapatanajetaruca»,d jai tajëwelia Dioso pejumeliwaisibaxutota Cristo yabara.
16 Bajarapacuenia pecopiapitsijawatatsi Jesús, apoyapëtae pijajiwi pajamatabëcuene yabara bajarapacuenia to-exanatsi. Matapania, Jesús pepuaponae athëbëabetsia, bajarapacuenia petocopiapatsijawatsi yapëtane jane baja, pacuenia tajëwelia Dioso pejumeliwaisibaxutota jumaitsi Cristo yabara.
17-18 Jesús piasaëya-exanaejawata Lázaro petëpaenëmi, pamonae cuenetaenubenatsi wajunupaebatsi Jerusalén tomarapijiwijawabelia. Bajaraxuata, bajarapamonae pitsapa Jesús pecopiapitsinexa.
19 Nexata, fariseowi, itsa tane bajarapacuene, najumaitsi:
—¡Pataema! ¡Xaniajaitsi baja cajena! ¡Daxitajiwi pënaponatsi Jesús! Waxaitsi baja nexata acuenebi wajacuenecaranatsijawa Jesús jiwi pepënaponaejawatsi yabara —najai fariseowi.
Grecia nacuapijiwi Jesús jamatabëtanetsi
20 Bajarapamatacabijawa, itsamonae Grecia nacuapijiwi napata Jerusalén tomarata, Pascuafiesta pexanaejawata, peyaiyataejamatabëcuene penacuene-itajëtsinexa Diosojawabelia.
21 Nexata, bajarapaGrecia nacuapijiwi cujibaliatsi Felipe, Betsaida tomarapijinë, Galilea nacuata pe-ecaetomara. Nexata, bajarapamonae jumaitsi Felipejawabelia:
—Felipe, pajitsipajë raja Jesús patanataejawa —jai.
22 Nexata, bajaraponë pona Andrés-jawabelia, petsipaebinexa pacuenia Grecia nacuapijiwi jumaitsi. Xuacujinae, bajaraponëbeje najuaponabeje, petsipaebinexabeje Jesús-jawabelia.
23 Petsipaebicujinaetsibeje, Jesús jumaitsi bajaraponëbejejawabelia:
—Xanë, Daxitajiwi Pematapijinënë, netocopiapata jane baja, pamatacabi Dioso natocaëjëta daxita jiwijawabelia taneyapëtaeya-exanaenexa xaniajaiya Dioso tane-itorobinëtsicuene.e
24 Xaniajanë pacuenia pacatsipaebijitsiatsi. Trigoxuto itsa apo-ubitsi irabelia, saya tsitecanuca daxitaxutoyo. Itsiata, waja-ubicujinae irabelia, xutsabana pejuwinexa, pejanaboto pepitsapaenexa. Itsa nacuaita bajarapaboto, ayaijawa pexu capitsapa. Bajarapacuenia xanë netocopiapatsiana.f
25 Bajarapijinia pacuenia, pajiwi bitso jitsipa piasaëtsaponaponaejawa mapanacuataje, Diosowecua naxuabiana. Pajiwi pijinia nawecua-ataejitsibi mapanacuapijicuenewecua, bajarapajiwi xainaena matacabi apopewerewerecaejawa daxitamatacabijawabelia.
26 Pajiwi jitsipa tanetonacuenebijawa nepënaponae, nejumecowënëtsinua ta-itorobicuenia. Xanë, itsajota ponaponajë, bajarapajiwi bajarajota-ata ponaponaena. Pajiwi netonacuenebaponapona, bajarapajiwi taxa Dioso exanaenatsi peyaiyataejiwitsi —jai Jesús Felipe, Andrés-bejejawabelia.
Jesús tajëwelia nawajunupaeba pebeyaxuabijawanexatsi
27 Bajarapacuenia petëpaejawanexa penayabarajumaitsicujinae, Jesús jumaitsi:
—Aeconoxae jamatabëcuenebëjaiya najamatabëxainajë. ¿Detsa meta jumaitsinë tsane taxajawabelia? Jumaitsinë meta tsane: «¡Axa, necapanepare betajiobicueneta tanebeyaxuabijawaminexawecua!», janë meta tsane. ¡Jume raja! Bajarapacuenia apowajëtsinë tsane, tsipaji mapanacuayabetsicaje patajë betajiobicueneta tanebeyaxuabinexa.
28 Bajaraxuata, jumaitsinë tsane Diosojawabelia: «¡Axa, najamatabëcuene-itajëre jiwijawabelia pecawënëyaiyataenexa!», janë tsane —jai Jesús.
Nexata bajarapaepatota, Jesús jumetane athëbëwetsica pejumaitsijawatsica mapacueniaje: «Jiwijawabelia rabaja najamatabëcuene-itajëtajë ayaijamatabëcuene taxainaejawa. Icatsia, orijibia nawënëyaiyataeya-exanaenajë ayaijamatabëcuene taxainaejawa yabara», pejaijawatsica.
29 Jiwibitsaëto, bajarajota penubenaewi, jumetane bajarapajume. Itsiata, apojumeyapëtae xua yabara jumaitsi. Nexata, bajarapamonaeyajuwënëwi jumaitsi:
—Yamaxë raeta najumeta —jai.
Itsamonae pijinia jumaitsi:
—Ángelnë raeta barëcuaicuaijaitsi Jesús —jai.
30 Nexata, Jesús jumaitsi bajarapamonaejawabelia:
—Xanë raja tajumetaenexa bajarapajume apojumaitsitsica, biji rajane, paxamë raja panejumetaenexa.
31 Aeconoxae rabaja copiapatsiana Dioso penaneconitsia-exanaematacabinexa daxita pijaneconi pexainaewi. Wecua-ajibia-exanaenanua dowathi penamatacaitorobisaë, ponë maparucaeje namatacaitorobaponapona mapanacuapijiwi.
32 Itsa nerutsiana athëbëyo cruzajawabelia tanebeyaxuabinexa, nexata daxitajiwi nitaxutuanacaetuatsiana, xanëjawaberena tanesiwanajamatabëcuenecopabinexa —jai Jesús.
33 Bajarapacuenia Jesús tajëwelia jumaitsi jiwijawabelia, peyapëtaeya-exanaenexa pitsicueneta tëpaejitsia.
34 Nexata, bajarapamonae jumaitsi bajaraPonëjawabelia:
—Dioso penajumecopatsiliwaisi Moisés-pijinëta tajëwelia nacayapëtaeya-exana pacuenia, Cristo, ponë athëbëwetsica Dioso itorobijitsiatsica, asaë tsaponaponaejitsia daxitamatacabijawabelianexa, jai bajarapaliwaisita. Itsiata, xamë, Cristomë, aitothia panejumaitsimë mapacueniaje: «Xanë, Daxitajiwi Pematapijinënë, nerutsiana athëbëyo cruzajawabelia, tanebeyaxuabinexa», panejamë. ¿Detsa nexata xamë ponëmë, Daxitajiwi Pematapijinëmë? —jai bajarapamonae.
35 Nexata, Jesús jumaitsi bajarapamonaejawabelia:
—Imoxoyo rabaja pewajënae, xanë, pecotia taxainaenë, patacawecuaponaematacabinexa. Nexata, pamatacabibeje abaxë pacayajawaponaponatsi, xaniawaetsia pajinawanapaename, pexaniajailiwaisita patacajamatabëcuene-itayotsicuenia. Yapëtaeya pajinawanapaename, tsipaji jemata pacatocopiapatsiana bepitaquirijawa ta-ajibitsarucaejawata. Nexata, apopayapëtaemë tsipae xua pa-exanaejitsiamë. Pacuenia pitaquirijawata jiwi xaniawaetsia aponatsiwajënaetae itsabelia ponaejitsia, bajarapaxamë pane-itsiyaniwa.
36 Xanë rabaja pecotia taxainaenë pacayajawaponaponatsi, pexaniajailiwaisita patacajamatabëcuene-itayotsinexa. ¡Nexata, panejumexaniataema patacatsipaebiliwaisi panenaexanaenexa panejamatabëcuenenaitayotsiwi! —jai Jesús bajarapamonaejawabelia.
Bajarapacuenia pejumaitsicujinae, Jesús baja pona, pewecuanamatayabinexa bajarapamonae.
Judíowi cuene-aeba Jesús Cristonëcuene
37 Jesús nawitsia tsita-exanaponae-ata ayaicuene pexanaejawa Dioso pesaëta judíowi pitabarata, bajarapamonae apojumexaniataetsi Cristocuene.
38 Bajarapacuenia judíowi pecuene-aebijawatatsi, copiapata jane baja bajayata tajëwelia profeta Isaías-pijinë. Bajarapamonae yabara, Isaías-pijinë peyaquinaeliwaisita tajëwelia pejumaitsijawa mapacueniaje:
«PATAJATUXANENË, itsajiwi-ata apopanejumexaniatae patatsipaebiliwaisi. Patsita-exanaponae-atanë ayaicuenejawanë xamë, Diosomë, nesaëta, bajarapamonae tsiteca apopanejumexaniatae»,g jai bajayata tajëwelia profeta Isaías-pijinë, judíowi apopejumexaniataejawanexa Cristocuene.
39 Bajaraxuata, Cristo patsi-ata, judíowi apojumexaniatae Cristocuene. Orijibia, bajaraxua yabara profeta Isaías-pijinë tajëwelia jumaitsi mapacueniaje:
40 «Bajarapamonae Dioso itaxutotsëcënaeya-exana. Ajamatabëcuenetajaya-exananua. Bajarapacuenia exana, bajarapamonae tae-ata pinijicuene Dioso pesaëta pexanaejawa, xaniawaetsia apoyapëtae tsane pajamatabëcueneliwaisi xaina petaejawa. Bajarapamonae xanëjawaberena aponajamatabëcuenepënëyorotsi tsane perujujamatabëcuenewecua. Nexata, apojamatabëcuenexaniawaetsinë tsane»,h jai bajayata tajëwelia profeta Isaías-pijinë, judíowi pejume-aebijawanexa yabara Cristo.
41 Bajarapacuenia Isaías-pijinë yaquina, tsipaji bajayata bemajitsinaebota tane Cristo ayaijamatabëcuene pexainaenëcuene. Bajaraxuata, bajayata bajarapacuenia Cristo yabara wajunupaeba baja cajena.
42 Bajarapacuenia profeta Isaías-pijinë bajayata wajunupaebi-ata bajarapamonae yabara, itsiata ayaibitsaëto judíowiyajuwënëwi, pewetsiwiyajuwënëwi-ata, jumexaniatane Jesús Cristocuene. Itsiata, fariseowi pecujunawixae, aponawajunupaebi pejumexaniataejawa yabara, pecapitsapaeya-exanaeyaniwatsi judíowi pijasinagogabowecua.i
43 Bajarapacuenia aponawajunupaebi, tsipaji jitsipa pesiwabarëyajawatsi penajua-ewetsiwi, Dioso pesiwabarëyajawatsiwecua.
Dioso naneconitsia-exanaena jiwi, apopejumexaniataexae Jesús petsipaebiliwaisi
44 Nexata, Jesús jumaitsi ayaijumeta jiwijawabelia:
—Pajiwi nejumexaniatane Cristonëcuene, bajarapajiwi baja ëxanë yabara aponejumexaniatae. Biji rajane, jumexaniatanenua Ponë-ata nitorobica.
45 Pajiwi necueneyapëtane, bajarapajiwi tane-itorobinëtsica-ata cueneyapëtane.
46 Xanë rabaja pecotia taxainaenë, pexaniajailiwaisita tajamatabëcuene-itayotsinexa mapanacuapijiwije. Nexata, pajiwi nejumexaniataena Cristocuenenë, ajamatabëcuene-itaquiriaya apoponaponae tsane.
47 Pajiwi jumeyapëtae-ata tatsipaebiliwaisi, itsiata itsa apojumecowënëtsi tsane bajarapaliwaisi, bajarapajiwi abaxë aponaneconitsia-exanaenë tsane, tsipaji apopatsinëtsica tananeconitsia-exanaenexa mapanacuapijiwije. Biji rajane, xanë patsicajë tacapanepaenexa, Dioso penaneconitsia-exanaejawamitsinexawecua.
48 Itsiata, pajiwi nenayajiwi-itawetsiana, aponejumexaniataenua tsane tatsipaebiliwaisi-ata, bajarapajiwi taxa Dioso naneconitsia-exanaenatsi, pamatacabi naneconitsia-exanaena daxita pijaneconi pexainaewi, tatsipaebiliwaisi apopejumexaniataexae.
49 Xanë raja, tajamatabëcueneta apopaebinë bajarapaliwaisi. Taxa raja, ponë nitorobica, nerajuta bajarapaliwaisi jiwi tatsipaebinexa.
50 Yapëtaniji baja cajena paliwaisij taxa nitoroba jiwi tatsipaebinexa, bajarapaliwaisi pejamatabëcueneta jiwi pexainaejawanexa matacabi apopewerewerecaejawa. Bajaraxuata, bajarapaliwaisi tsipaebaponajë jiwijawabelia taxa Dioso ëtane-itorobicuenia —jai Jesús jiwijawabelia.