Hechos
Pacuenia exanawanapa apóstolewi, Jesús peliwaisi pepaebanajetarubenaejawata
Jesús tajëwelia wajunupaeba Espíritu Santo pepatsijawanexatsica
1
Teófilo, xanë Lucasnë, catoyaquinatsi mapabaxutoje. Copiayapijibaxutotaa baja cajena catoyaquinatsi daxita Jesús pexanaejawanë peliwaisi, xuamaxëto exana, paliwaisi-ata cujarubaponapona, petaxuxuabijawaweliacujinae, abaxë itsa ponapona mapanacuataje.
2 Matapania weretajë tayaquinaejawa pamatacabi Jesús athëbëabetsia Dioso caponatsi. Pecaponaewajënaetsi Jesús athëbëabetsia, Espíritu Santo pejamatabëcueneta,b tonajumecopatac pitapetsiwijawabelia apóstolewi pacuenia exanaejitsia pewecuaponaecujinae.
3 Jesús pebeyaxuabicujinaetsi, icatsia itsa namatacota petëpaejawawecua, Dioso athëbëabetsia pecaponaewajënaeyatsi, pijajiwijawabelia tsitanaitajëtabiaba,d cuarenta pamatacabibejejawa. Bajarapamatacabianëjawa cujarubapona itsaliwaisianë Dioso peyanacua-ewetsijawanexa yabara.e Nawitsiacuenianua tsitanacuene-itajëtabiaba peyapëtaenexatsi pijajiwi pepacuene piasaëjawa petëpaecujinae.
4 Nexata, bajarapamatacabianëjawa, Jesús, pijajiwi itsa abaxë yajawaponapona,f jumaitsi pijajiwijawabelia mapacueniaje:
—¡Pëtsa abaxë paponame mapaJerusalén tomarawecuaje! Pacopia-ewetawanapaename abaxë taxa papecato-itorobinexatsica Espíritu Santo najumecapanepaeya pejumaitsicuenia. Xanë-ata baja cajena bajaraponë yabara pacatsipaebatsi.g
5 Juan-pijinë baja cajena bautizabanajetaruca ëmerata penajamatabëcuenepënëyorobiwi Diosojawabelia. Itsiata, paxamë caematacabibejecujinae Dioso pacabautizabiana Espíritu Santotah —jai Jesús pijajiwijawabelia.
Jesús baja pona athëbëabetsia
6 Itsamatacabi, Jesús pijajiwi pebarënacaetuatsijawata, bajarapamonae yanijobatsi mapacueniaje:
—Patajatuxanenë, ¿xaniajai tsabaja? ¿Mapamatacabianëjawa xamë juya jane baja paneyanacua-ewetsianame,i itsanacuapijiwi wajanacayanacua-ewetsijawawecua? —jai Jesús pijajiwi.
7 Nexata, Jesús jumaitsi pijajiwijawabelia:
—Xua yabara paneyanijobame, taxa Dioso apopacatocopatsi paneyapëtaenexa. Caenë taxa Dioso, daxitacuene pewetsinëxae,j yapëtane pamatacabita, paepatota-ata, bajaraxua copiapatsijitsia.
8 Itsiata, mapaliwaisije taxa Dioso pacatocopata paneyapëtaenexaje. Espíritu Santo itsa pacatsijamatabëpatsianica paxamëjawabetsica, bajaraPonë pesaëta pacajamatabëcuenecaëjëpaeya-exanaena, ajumejunawijibia panepaebanajetarubenaenexa xanë taliwaisi.k Nexata, paneliwaisipaebanajetarubenaename Jerusalén tomarajawa, Judea nacuajawa, Samaria nacuajawa, tajënacuatabujawa-ata —jai Jesús pijajiwijawabelia.
9 Bajarapacuenia Jesús pejumaitsicujinae, pijajiwi petaenubenaejawatatsi, pitabënejewa jane baja athëbëabetsia Dioso caponatsi. Itarërëbota baja Jesús pepëcaewicujinae, Jesús pijajiwi icatsia baja apotae.
10 Nexata, Jesús pijajiwi itsa abaxë pëtaenubena athëbëabetsia Jesús pepëcaewijawatsia, ángel-nëbeje, penioponaejawa penaxatatsinëbeje, jemata bajarajota tsitanaitajëtatsi.
11 Nexata, ángel-nëbeje jumaitsibeje Jesús pijajiwijawabelia:
—PaGalilea nacuapijiwimë, ¿detsa xuajitsia athëbëabetsia pataenubename? Jesús, ponë pataneme paxamëjawawetsia Dioso pecaponaejawatsi athëbëabetsia, bajara-icatsia pacuenia itsamatacabi pataename bajaraPonë pepatsijawatsical —jai ángel-nëbeje Jesús pijajiwijawabelia.
Jesús pijajiwi natsicueya-itapeta Matías apóstol-nënexa
12 Nexata, Jesús baja peponaecujinae athëbëabetsia, pijajiwi apóstolewi, nawiabaponarena Jerusalén tomaraberena, olivonaenë penubenaetsutojawawerena. Bajarapatsuto eca caekilómetrocueniam Jerusalén tomarawecua.
13 Nexata, itsa pata Jerusalén tomarata, petsicopatsibojawatatsi, athëbëyo pexanae-irajawabetsia junaya, pejinawanapaenexa. Pamonae Jesús pijajiwi apóstolewi, mapewënëanëje: Pedro, Juan, Santiago,n Andrés, Felipe, Tomás, Bartolomé, Mateo, Santiago, Alfeo pexënato, Simón, ponë Zelotenë,o Judas-ata, Santiago pexënato.
14 Daxita bajarapamonae nacaetuatabiaba pabojawata najinawanapa, athëbëyopiji-irajawatatsia. Barënacaetuatabiabanua Jesús pena, María, Jesús pejuyapijiwi, itsapetiriawi-ata yajawa, pewajëcabiabinexa Diosojawabelia, caejamatabëcuene penajuaxainaexae.
15 Bajarapamatacabianëjawa daxita penacaetuatsiwi namata-ëjëta ciento veinte pajiwibeje, Jesús peliwaisi pejumexaniataewi. Nexata, bajarapamonae tuatuajëta Pedro nonotapuna. Jumaitsi penacaetuatsiwijawabelia:
16 —Tajamonae, copiapata rajane baja pacuenia jumaitsi Dioso pejumeliwaisibaxutota. Bajarajota, nacayapëtaeya-exana pacuenia bajayata David-pijinë, Espíritu Santo pejamatabëcueneta, tajëwelia wajunupaeba Judas-pijinë pexanaejawanexa,p ponë matacapona pamonae Jesús waetabijitsiatsi. Nexata, tocopiapatatsi jane baja, pacuenia David-pijinë tajëwelia jumaitsi.
17 Judas-pijinë picani paxanëyajuwënënëmi. Jesús picani bajaraponëmi itapeta patanajuanacuenebinexa.
18 Bajaraponëmi ira comuata pibisiacuene pexanaematamopalatata, itsajota pijacuata nabeyaxuaba.q Nexata, petëpaenë pematonono ira bejopaica. Nexata, cototitititicajunua. Daxita pënëmi pitsatajarabarena.
19 Daxita Jerusalén tomarapijiwi wënëliwaisitanetsi xua tocopiapatatsi Judas-pijinëmi. Nexata, bajaraponëmi pecomuatsi-ira, wënëruba Acéldama. Acéldama itsa jai, «Papalata pejamatabëcueneta jiwitonë beyaxuabatsi, bajarapapalatata pecomuatsi-ira», pejaijume judíowi pejumeta —jai Pedro.
20 Icatsia, Pedro jumaitsi penacaetuatsiwijawabelia:
—Bajaraxua yabara Salmos-baxutotar tajëwelia Judas-pijinë yabara comparación-cuenia jumaitsi mapacueniaje:
«Jema baja pijabo tonaxuabecaetsi.s Itsajiwi-ata apoponaponae tsane bajarapabota», jai.
»Itsajawata pijinia Salmos-baxutota jumaitsi mapacueniaje:
«Bajaraponëmi penacuenebijawami, itsanë pitsiana», jai Dioso pejumeliwaisibaxutota, itsanë icatsia apóstolnë penaexanaejawanexa yabara Judas-pijinë pecowëtaxunaeta.
21 »Nexata, bajarapacuenia pejumaitsixae Dioso pejumeliwaisibaxutota, namatawenonatsi itsanë waja-itapetsijawa, doce paponëbejenexanë. Nexata, bitapetatsi ponë patanajuapënajinawanapaewi wajatuxanenë Jesús, pamatacabi abaxë ponapona mapanacuataje.
22 Ponë paneyajawaponaponanua Juan-pijinë Jesús pebautizabimatacabijawaweliacujinaetsi, matapania athëbëabetsia Dioso patanewecuacaponaematacabitsijawabelia. Nexata, bajarapitsinë bitapetatsi Jesús petëpaecujinae, Dioso icatsia piasaëya-exanaejawatsi patataejawa patanajuapaebinexa —jai Pedro penacaetuatsiwijawabelia.
23 Nexata, bajarapamonae penacaetuatsijawata, itapeta anijanëbeje, Pedrobana jane baja Jesús penajuapënajinawanapaewinexa. Ponëbeje itapeta bajarapamonae, mapawënënëbeje. José, itsawënë Barsabás, ponë jiwi wënërubatsi Justo. Itsanë pijinia, pewënë Matías.
24 Bajaraponëbeje pitapetsicujinae, bajarapamonae wajëca Diosojawabelia, peyapëtaenexa ponë Dioso itapetsijitsiatsi apóstolenënexa. Diosojawabelia jumaitsi mapacueniaje: «Patajatuxanenë, daxitajiwi nejamatabëcueneyapëtaenë. Nexata, maponëbejeyajuwënënëje, ponë itapetame apóstol-nënexa, panetsitajëtsianame.
25 Nexata, ponë itapetame, pitsiana Judas-pijinë pecowëtaxunaemi, tsipaji bajaraponëmi pona panacuajawabelia tocaëjëtame pijaneconijamatabëcuene», jai bajarapamonae pewajëtsijawata Diosojawabelia.
26 Bajaraxuacujinae, bajarapamonae pijacujirucuenia exana,t peyapëtaenexa jane baja ponë apóstol-nënexa. Bajarapacuenia pexanaejawata, bajarapamonae yapëtane Matías apóstol-nënexa. Nexata baja, Matías najunua once ponëbeje apóstolewijawabelia. Nexata baja, apóstolewi icatsia doce ponëbeje naexana.