Romanos
Mapabaxutoje apóstolnë Pablo toyaquina Jesús peliwaisi pejumexaniataewi, Roma tomarata pejinawanapaewijawabelia
Pablo pebajacobiliwaisi, penawajunupaebijawa-ata apóstol-nëcuene
1
Xanë, Pablonë, Jesucristo pijajiwitonënë. Dioso nejunata, nitapetanua apóstol-nënexanë.a Nexata, nitoroba tatotsipaebaponaenexa jiwijawabelia pexanialiwaisi, Jesucristo peliwaisi, Diosojawabelia pecapanepaeliwaisinexatsi.
2 Dioso baja cajena tajëwelia najumecapanepaeya pejumaitsijawa pijaprofetawijawabelia, Jesús penaexanaejawanexa mapanacuataje, jiwi pecapanepaenënexa. Nexata, bajarapapexanialiwaisianë yaquinapona Dioso pejumeliwaisibaxutonexa, tajëwelia Dioso peyapëtaeya-exanaponaecueniatsi.
3 Bajarapapexanialiwaisi jumaitsi wajatuxanenë Jesucristo, Dioso Pexënato yabara. Jesucristo pacujinae naexana mapanacuataje, penaexanaexae David-pijinë pemomoxiyajuwënëwata,b yapëtanetsi pepojiwitonëcuene.
4 Orijibia, yapëtanetsi Espíritu Santo pecuene-itajëtsijawa wajatuxanenë Jesucristo, Dioso pexënatocuene, pesaëta petëpaejawawecua icatsia penamatacotsia-exanaexaetsi. Daxita bajarapaliwaisi tsipaebanajetarucajë Jesús peliwaisi, Dioso pexënato yabara.
5 Wajatuxanenë Jesucristo pejamatabëcueneta, Dioso bitso pexaniacuene neto-exana. Tane-asiwaxae, nitapetac apóstolnënexanë, tatsipaebaponaenexa daxitanacuanëjawa Jesús peliwaisi. Nexata, pamonae nejumetane, Jesús peliwaisi tatsipaebijawa, jumexaniataepona siwanajamatabëcuenecopabaponanua Jesús-jawabelia. Bajarapacuenia itsa jumecowënëta bajarapaliwaisi, Dioso bitso tojitsipa jiwi pewënëxaniatabiabinexad Pexënato papexaniacuene to-exanatsi.
6 Bajarapijinia pacuenia, paxamë-ata, Roma tomarata Jesús peliwaisi panejumexaniataewi, Dioso baja cajena pacajunata Jesucristo papijajiwinexamë.
7 Nexata, bajaraPonë bitso ayaicuenia paca-asiwa. Paca-itapetanua, aneconijibia panejinawanapaenexa mapanacuapijiwiwecuaje, Dioso ëpijacuene pane-exanawanapaenexa. Bajaraxuata, xanë pexaniacuenia pacatojitsipatsi waxa Dioso, wajatuxanenë Jesucristobeje, papecajamatabëwënëtsinexa papeca-itaxutotsoniataejamatabëcuene,e papeca-asiwajamatabëcuene, papecabarajamatabëxanepanaejamatabëcuene-ata, jamatabëcuenexanepanaeya panenajuajinawanapaenexa.
Pablo yapëtaeya-exana pacuenia picani jamatabëponabiaba Roma tomarapijiwijawabelia
8 Jesucristo pejamatabëcueneta,f paxamë yabara copiaya pexaniajamatabëcuene rajutabiabajë Diosojawabelia patacatowajëcaejawata, tsipaji daxitanacuanëpijiwi pexaniacuenia pacawënëliwaisicacuaicuaijai, Jesucristojawabelia panesiwanajamatabëcuenecopabijawa yabara.
9 Dioso baja cajena yapëtane paxamë yabara patacatowajëcabiabijawa, apopacatae-atatsi abaxë. BajaraPonë daxita tajamatabëcuenesaëta tonacuenebaponaponajë tatsipaebabiabijawata pexanialiwaisi, pexënato peliwaisi.
10 Diosojawabelia wajëcabiabajë taponaenexa paxamëjawabelia, pacuenia picani tsiwajënaenajamatabëcueneweretajë ta-exanaejawanexa. Nexata, Dioso itsa netojitsipa taponaenexa paxamëjawabelia, paepatota netocopatsiana, matapania jane baja, ponaenajë.
11 Bitso jitsipabiabajë patacataeyabiabijawa, xua pacatsisajina patacajamatabëcueneyawenonaenexa Espíritu Santo tanejamatabëcuenecaëjëpaeya-exanaecuenia, bajarapacuenia paxamë Dioso peliwaisita pane-ajamatabëcuenesaëtsaponaenexa panewajënaeyabelia.
12 Jitsipajënua namata-enetsia wajanajamatabëcueneyawenonaejawa wajawajënaeyabelia asaëyata wajanajua-itaxutuajamatejematsawanapaenexa Cristojawabelia. Ëxanë apojitsipaenë pataca-ajamatabëcuenesaëya-exanaenexa Diosojawabelia. Jitsipajë paxamë-ata bajarapacuenia patanejamatabëcueneyawenonaenexamë. Bajaraxua yabara picani jamatabëpacataeyabiabatsi.
13 Patajamonaemë Cristo pejamatabëcueneta, pacatojitsipatsi paneyapëtaenexa mapacueneje. Bajayajebi picani jamatabëponabiabajë paxamëjawabelia patacataenexa, patacayawenonaenexa panejamatabëcueneliwaisinaweretsijawa Dioso pijacuenejawata. Itsiata, aponecuenecaëjëpabiabi. Itsacueneliwaisianë abaxë neyacaranatabiaba taponaeyaniwa. Pacuenia yawenonajë itsamonae apojudíowi panacuanëjawa tsipaebanajetarucajë Jesucristo peliwaisi, bajarapijinia pacuenia, jitsipajë tanacujumataenexag paxamëjawata-ata.
14 Jamatabëponabiabajë apo-ëtajitsipaejamatabëcuene yabara. Dioso baja, nitoroba tatsipaebaponaenexa Jesús peliwaisi daxitajiwijawa. Bajaraxuata, netsicaruca Jesús peliwaisi tatsipaebaponaenexa pinijitomaranëjawa, sasawia pe-enaewijawa-ata, pamonae-ata mapanacuapijiliwaisi bitso peyapëtaewijawa, apopeyapëtaewijawa-ata. Netsicaruca paxamëjawabelia-ata patacatsipaebinexa.
15 Nexata picani, bitso naxanetajë jamatabëcuenebëjaiya bepijiayo paxamë patacatsipaebinexa bajarapapexanialiwaisi, Roma tomarata panejinawanapaewijawabelia.
Pablo yapëtaeya-exana pacuenia Dioso aneconijibia jiwi taejitsia
16 Bajaraxuata apo-ajume-uranë tsabiabi tatsipaebabiabijawa pexanialiwaisi, Jesús peliwaisi, tsipaji xaina Dioso pesaë jiwi pecapanepaenexatsi, daxita pamonae, jumexaniatane bajarapaliwaisi. Bajaraxuata, jamatabëcuenebarëyaya tsipaebanajetarucajë bajarapaliwaisi daxitanacuanëjawa, judíowijawa, apojudíowijawa-ata.
17 Bajarapapexanialiwaisi nacatsitajëta Dioso pijapianeconijibicuene. Nacatsitajëtanua pajiwi siwanajamatabëcuenecopata Jesucristojawabelia, Dioso aneconijibia petaejawatsi. Bajarapajamatabëcuene yabara, Dioso pejumeliwaisibaxutota jumaitsi mapacueniaje: «Pajiwi siwanajamatabëcuenecopatsiana Diosojawabelia peto-exanaejawatsi najumecapanepaeya pejumaitsicueniatsi, bajarapajiwi Dioso aneconijibia taenatsi. Xainaenanua matacabi apopewerewerecaejawa»,h jai, profetanë, Dioso pejumeliwaisibaxutota.
Pacuenia Dioso naneconitsia-exanaena daxita mapanacuapijiwi, judíowi, apojudíowi-ata, tsipaji daxitajiwi najëpaeya naneconita Diosojawabelia, Dioso peliwaisi apoxainae-ata
(Rom. 1:18—3:23)
18 Jesús peliwaisi tsipaebanajetarucajë, tsipaji Dioso, athëbëtatsia pe-ecaenë, najamatabëcuene-itajëta pebara-anaepanaejawai daxita xua jiwi exanawanapa pibisiacuenejawanë, apopexanepanaecuenejawanë-ata. Bajarapapexanaecuenejawanëta cuenematayata Dioso pijapianeconijibicuene. Jumematayatanua Dioso pijapexaniajailiwaisi.
19 Daxitajiwi baja cajena picani, yapëtanej Dioso yabara, tsipaji bajaraPonë pijacujaya tsitanajamatabëcuene-itajëtabiaba bajarapamonaejawabelia. Bajarapacuenia exanabiabi-ata itsiata bajarapamonae apoyaiyatae bajaraPonë.
20 Bajaraxuata jiwi apocuenecaëjëpaetsi Dioso apopayapëtaenë pejaijawa. Jiwi yapëtane baja, Dioso pitsijamatabëcuene xaina, petaejawata daxita xua pexanaecuene, apopesaëwerewerecaejawanexa, apopetaecapanepaecuene-ata pitaxutota. Bajarapacuenia cuene-itsi tsaponaponae pepobajayajawawerenacujinae daxita pexanaewajënaeya, daxitamatacabijawabelianexa-ata. Orijibia, jiwi pijacuata yapëtane pepoDiosonëcuene, daxitamatacabi peyamatacabiatsitecaenëcuene.k
21 Bajarapamonae yapëtae-ata Dioso peponaponaejawa, itsiata apoyaiyatae pacuenia picani beyaiyatane. Nexata, caeto-ata apowënëxaniatae bajaraPonë ayaijamatabëcuenenëcuenel pexainaejawa yabara daxitawecua. Pexaniajamatabëcuene aporajutsinua bajaraPonëjawabelia, yawenonabiabi-atatsi. Biji saya caranata, Dioso yabara najamatabëxainabiaba ënatsiquejemacuenia.m Nexata, bajarapacuenia penajamatabëxainaexae, pewajënaeyabelia ajamatabëcuene-itaquiri tsaponae pexaniajailiwaisiwecua.
22 Nexata, bajarapamonae nataeyabiaba bepeyapëtaewi. Itsiata, saya piajamatabëcuenecowëbiwin Dioso pitabarata naexana.
23 Bajarapamonae yapëtae-ata penawajëcaejawanexa Diosojawabelia, pepo-ayaijamatabëcuenenë, apopetëpaenënexa-ata daxitamatacabijawabelia, itsiata apowënëxaniatabiaba. Caranata saya bajarapapewënëxaniatsicuene itothiana pepoDiosowecua,o juya siwanajamatabëcuenecopatsiaya penawajëcaenexa jiwi pecobeta jumapecataeya pexanaenëanëjawabelia pepoDiosowecua. Nexata, itsamonae asiwaya nawajëcabiaba jiwi pecobeta jiwi jumapecataenëjawabelia. Nawajëcabiaba pepunaewi jumapecataenëjawabelia. Nawajëcabiaba jomo jumapecataenëjawabelia. Nawajëcabiabanua cuatro pataxutabeje pejinawanapaewi jumapecataenëjawabelia. Bajaraxuanë saya natsiquejemajawanë, tsipaji cuene-itajëta petëpaecuenejawanë.
24 Bajaraxuata, Dioso penaneconitsia-exanaecuenia tocopata bajarapamonae pia-uracuenejawanë, pewitota pibisiacuene namata-enetsia penato-exanawanapaenexa. Nexata, daxita papibisiacuenejawanë najamatabëxainawanapa pexanabiabinexa, exanawanapa copabinejewa.
25 Orijibia, bajarapamonae pepoDiosojawabelia yaiyataeya penawajëcabiabijawami itothiana. Juya Diosowecua nawajëcabiaba yaiyataeya natsiquejema diosowijawabelia,p Dioso pecobecowëjawanëjawabelia-ata peyawenonaenexatsi. Nexata, Dioso pexaniajailiwaisiwecua, jumecowënëtawanapa penajumetsënëtsiliwaisi.q Daxita bajarapacuene pexanaejawata, cuene-itothiana pepoDiosojawabelia pexanaejawaminexa. Dioso ayaijamatabëcuenenëxae daxitawecua, pexanaenëxae-ata daxitacuene, nexata daxita pecobecowëjawanë toxanepanatsi Diosojawabelia pejumaitsitsabiabinexa: «¡Diosomë, bitso ayaijamatabëcuenenëmë!», pejainexa wënëxaniatsiaya daxitamatacabijawabelianexa. Itsiata, bajarapacuenia bajarapamonae apo-exanae. Caranata, saya Diosowecua yaiyataeya, asiwayanua, siwanajamatabëcuenecopaba Dioso pecobecowëjawabelia peyawenonaenexatsi.
26 Bajarapamonae pewajënaeyabelia Dioso apopeyaiyataexae, bajaraPonë tocopata penaneconitsia-exanaecuenia bajarapamonae pijapibisiajamatabëcuene pejamatabëcuenenamatacaponaenexatsi, matatoxenetsia pia-uracuenejawanë pexanawanapaenexa. Nexata, pepacuene najamatabëcuenebijiana Dioso petojitsipaecuenemitsiwecua. Mapanacuataje picani Dioso tocopata petiriawi, pebi pejitsipaenexa. Itsiata baitsi jane, ayaibitsaëto ëpetiriawi namata-enetsia najitsipabiaba. Naperabëquenetsiataeyabiabanua.
27 Bajarapijinia pacuenia, Dioso tocopata picani pebijiwi, petiriwa pejitsipaenexa. Bajarapacuenia tocopatsi-ata, itsiata ayaibitsaëto ëpebijiwi namata-enetsia najitsipabiaba. Naperabëquenetsiataeyabiabanua. Nexata, Dioso tocopata bajarapamonae penatoyapëtaenexa peperabëtota penaneconitsia-exanaejawanexatsi,r bajarapitsipibisiacuene pexanaejamatabëcuene. Dioso naneconitsia-exanaena daxita bajarapapibisiacuenejawanë pexanaewi, pamatacabita naneconitsia-exanaena, pijaneconi pexainaewi.
Pablo pematatsënëa yapëtaeya-exana Dioso pijacuene apopejamatabënajinaewi xua exanawanapa
28 Bajarapamonae apopejitsipaexae peyapëtaejawa pepoDiosocuene, nexata Dioso naneconitsiaya tocopata piabejejamatabëcuene pexainawanapaenexa. Bajarapajamatabëcuene pitorobicueniatsi exanawanapa, Dioso apopetsixanepanaejawanëtsi.
29 Bajaraxua, petsijamatabëwënëcaexaetsi, najamatabëxainabiaba daxitacuenewiria pibisiacuenejawanë. Exanawanapa pibisiacuenejawanë peperabëtota. Nasiwanajamatabëxainabiaba ëpamonaenexa, cobecaëbiaya jamatabënaxainaeyababiaba itsamonae pecobecowë. Pibisiacuene jamatabë-exanabiaba itsamonaejawabelia. Cueneca-ëbabiaba itsamonaejawabelia. Jamatabëbeyabiaba jiwi. Jitsipabiaba nabijataeya namata-enetsia penajume-anaenotsijawa. Yamaxë-itojorobabiaba jiwi. Jamatabë-exanabiaba pibisiacuenejawanë. Najumetsënëtsiaya cuenebaracuaicuaijai tsabiabi itsamonae.
30 Itsamonae pepëya pibisiacuenia baracuaicuaijai tsabiabi. Bajarapamonae apojitsipae Dioso, pijacuene-ata itoya. Apoyaiyataeyabiabi itsamonae-ata. Naitaxutojematabiaba itsamonae. Ayaijamatabëcuenewi nataeyabiaba itsamonaewecua. Pejamatabë-ëthëtojawawetsinas pijacueneta pecapitsapaepibisiacuenejawanë exanabiaba. Apojumecowënëtabiabi paxajiwi, penajiwi-ata.
31 Naexana piajamatabëcuenecowëbiwi. Nexata, amuxujitsibi tsabiabi pemuxujiobijawatsi. Itsajiwijawabelia najumecapanepaeya pejumaitsijawa apo-exanabiabi. Asiwaya apotaeyabiabi itsajiwi-ata peyawenonaenexa. Bajarapamonae apojitsipabiabi icatsia pexaniabinexa pajiwi itsacueniabatsi. Apoxainaenua jiwi pebejiobiataejamatabëcuene. Daxita bajarapapibisiacuenejawanë exanawanapa najamatabëcuenecataitsinejewa, apopejamatabënajinaexae Dioso.
32 Bajarapamonae yapëtae-ata Dioso penaneconitsia-exanaejawatsi, petocaëjëtsijawatsinua pijaneconijamatabëcuene petëpaejawanexa, itsiata tsiteca pibisiacuene exanawanapa. Orijibia, siwabarëya tsabiabi itsamonae pibisiacuene pexanaejawa yabara.