1 Corintios
Mapabaxutoje apóstolnë Pablo copiaya toyaquina Jesús peliwaisi pejumexaniataewi, Corinto tomarata pejinawanapaewijawabelia
Pablo pebajacobiliwaisi Jesús pijajiwi, Corinto tomarapijiwijawabelia
1
Xanë, Pablonë, Dioso pejitsipaecuenia nitapeta, Jesucristo pija-apóstolnënexanë. Nexata, nitoroba tatsipaebaponaenexa bajaraPonë peliwaisi daxitanacuanëpijiwijawa. Wajabananë Sóstenes-beje, pacabajacobatsibeje padaxitamë Jesús papijajiwimë, Corinto tomarata panejinawanapaewi. Bajaraponë neyawenona mapaliwaisije patacatoyaquinaejawa paxamëjawabelia.
2 Mapabaxutoje pacatoyaquinatsibeje Jesús papijajiwimë, Corinto tomarata panejinawanapaewi. Paxamë rabaja Dioso aneconijibia pacatane, Cristo Jesús pejamatabëcueneta. Paca-itapetanua papijajiwinexamë, xaniawaetsia panejinawanapaenexa pejitsipaecuenia, pacuenia tocaëjëta pexanawanapaenexa daxita pamonae pijatuxanenë Jesucristojawabelia siwanajamatabëcuenecopaba, daxitanacuanëjawa pejinawanapaewi. Jesucristo raja wajatuxanenë. Pijatuxanenë-ata daxita pamonae siwanajamatabëcuenecopaba bajaraPonëjawabelia.
3 Pexaniacuenia pacatojitsipatsi, waxa Dioso, wajatuxanenë Jesucristobeje, papecajamatabëwënëtsinexa papeca-asiwajamatabëcuene, papecabarajamatabëxanepanaejamatabëcuene-ata, jamatabëcuenexanepanaeya panenajuajinawanapaenexa.
Pablo pexaniajamatabëcuene rajuta Diosojawabelia Jesús pijajiwi yabara, Corinto tomarata pejinawanapaewi
4 Paxamë yabara, pexaniajamatabëcuene rajutabiabajë Diosojawabelia, ayaicuenia papeca-itaxutotsoniataexae, Jesucristo pejamatabëcueneta.
5 Nexata, Jesucristo pejamatabëcueneta, Dioso ayaicuenia daxitacuenejawalia pacajamatabëcueneyawenonabiaba, xaniawaetsia jiwi panetsipaebinexa Dioso pejumeliwaisi, panejumeyapëtaeya-exanaenexanua pepopexaniajailiwaisi.
6 Bajarapacuenia pacajamatabëcueneyawenona, tsipaji paliwaisi pajumetaneme Cristo yabara, xaniawaetsia baja pajumexaniataneme.
7 Bajarapacuenia panejumexaniataexae, apopacatosajinae caejawayo-ata, Dioso papecajamatabëcuenecaëjëpaeya-exanaejawa, paneto-exanawanapaenexa daxita pacuene bajaraPonë pacatojitsipa, paepatojebi abaxë pacopia-ewetawanapame wajatuxanenë Jesucristo, icatsia pepatsimatacabijawabelianexa.
8 Nexata, Dioso pacajamatabëcueneyawenonaena ajamatabëcuenesaëya pane-itaxutuajamatejematsawanapaejawa, itsajiwi-ata papecaneconitsiyaniwa bepibisiacuene pane-exanaewi yabara, wajatuxanenë Jesucristo icatsia pepatsimatacabijawabelianexa.
9 Dioso cajena exanabiaba najumecapanepaeya pejumaitsicuenia. BajaraPonë pacajunatanua, caejamatabëcuene panexainawanapaenexa pexënato, Jesucristojawabelia, Ponë wajatuxanenë.
Corinto tomarata Jesús pijajiwi nawecuanatsanapona, pepaebiwi pejamatabëcuene
10 Itsiata baitsi jane, paxamë caejamatabëcuene apopaxainawanapaemë Cristojawabelia. Bajaraxuata, patajamonaemë Cristo pejamatabëcueneta, ayaicuenia pacawajëtatsi Jesucristo pewënëta, najamatabëcuenejëpaeya panenajuajinawanapaenexa. ¡Pëtsa paxamëjawata itsamonae peliwaisita panawecuanatsanaponame!a !Biji rajane, najamatabëcuenejëpaeya caeliwaisi panajuaxainawanapare!
11 Bajarapacuenia pacatoyaquinatsi, tsipaji Cloé pijajiwi netsipaeba najamatabëcuenejëpaeya apopanenajuajinawanapaejawa yabara. Biji rajane pina, paxamëtuatuajëta nabijataeyabiaba namata-enetsia, najume-anaenotabiabanua, caenë wajatuxanenë Jesucristo papijajiwi-atamë.
12 Penajume-anaenotsijawata pina, itsamonae jumaitsi tsabiabi mapacueniaje: «Xanë raja saicaya Pablo pijajiwitonënë», jai pina. Itsamonae, «Xanë raja saicaya Apolos pijajiwitonënë», jai pina. Itsamonae, «Xanë raja saicaya Pedrob pijajiwitonënë», jai pina. Itsamonae, «Xanë raja saicaya Cristo pijajiwitonënë», jai pina tsabiabi.
13 Apoxanepanae picani bajarapacuenia paxamëyajuwënëwi nabijataeya namata-enetsia panenajume-anaenotabiabijawa, panenawecuanatsanaponaenexa, tsipaji baja cajena Cristo caenë tsaponaponae. Aponawitsanae baja cajena. Nexata, pamonae-ata Cristo pijajiwi, caebitsaëto rabaja tsawanapae. Pacayanijobatsi: ¿«Xanë, Pablonë, itsajiwiyo meta siwanabeyaxuabia-exanajë cruzata, pijaneconi tatomatamotsinexa?» ¿«Detsa pajiwi paxamëyajuwënëjiwi nabautizabia-exana tawënëta, tajajiwitonë penaexanaenexa?» ¡Ajibi cajena!
14 Orijibia, xanë pexaniajamatabëcuene rajutajë Diosojawabelia, tsipaji baja cajena apobautizabinë jiwi ayaibitsaëto paxamëtuatuajëta. Saya bautizabajë anijanëbeje Cristo pewënëta, Crispo, Gayobeje. Bajaraponëbeje apobautizabinë tawënëta.
15 Nexata, acuenebi itsajiwi-ata pejumaitsijawa: «Xanë raja nebautizaba Pablo pewënëta, pijajiwitonë tanaexanaenexa», pejaijawa.
16 Jemajanë tsaena. Bautizabajënua Estéfanas pijamonae. Pematatsënëa baja aponajamatabënapitsinë pajiwiyo bautizabajë Corinto tomarata.
17 Cristo aponitorobi bitso jiwi tabautizabaponaenexa. Biji rajane, nitoroba pexanialiwaisi tatsipaebaponaenexa, jiwi pecapanepaeliwaisinexatsi Diosojawabelia. Nexata, pacuenia Dioso nejamatabëcuenecaëjëpaeya-exanapona, bajarapacuenia pacatsipaebaponatsi. Apopacatsipaebaponaetsi bajarapaliwaisi, pacuenia ma-ëpanacuapijiliwaisi peyapëtaewije. Bajarapacuenia itsa pacatsipaebaponaejitsipatsi Jesús peliwaisi, nexata Jesucristo wajanacasiwatëpaejawa cruzata tsipaebi-atanë tsipae jiwijawabelia, ajumematamobinë tsipae.
Dioso pecopatsijawata Cristo cruzata pesiwatëpaenexa, najamatabëcuene-itajëta jiwijawabelia bitso peyapëtaenëcuene, piasaënëcuene-ata
18 Pamonae pijaneconi yajawa penaxuabiwinexa Diosowecua, tsipaebi-atanë tsipae Cristo pesiwatëpaejawatsi cruzata pijaneconi yabara bajarapamonae tsitatsi natsiquejemaliwaisi. Itsiata baitsi jane, waxaitsi Dioso wajanacacapanepaewinexa, bajarapaliwaisi nacayapëtaeya-exana Dioso piasaënëcuene.c
19 Bajaraxua yabara, Dioso baja cajena pejumeliwaisibaxutota tajëwelia jumaitsid mapacueniaje:
«Xanë raja itsamatacabi, liwaisi amatononobia-exanaenajë,e pamonae pecanaëjëtsiliwaisi pexainaewi, bitso peyapëtaewi-ata mapanacuapijicueneje. Nexata, daxitajiwi yapëtaenatsi bewelia peyapëtaewicuene», jai baja cajena tajëwelia Dioso pejumeliwaisibaxutota.
20 Bajarapacuenia Dioso pejumaitsixae, yapëtanetsi pacuenia mapanacuapijiliwaisi apoyawenonae jiwi peyapëtaenexa Dioso pijacuene. Mapanacuapijiwije, pamonae pecanaëjëtsiliwaisi pexainaewi, pamonae pecujarubiwi, pamonae-ata pexaniacuenia pebarënajumenotsiwi, naliwaisisaëtabiaba mapanacuapijiwiliwaisita. Itsiata, paliwaisita nasaëtabiaba bajarapamonae, Dioso to-exanatsi jemaliwaisi.
21 Dioso baja cajena bitso daxitajiwiwecua peyapëtaenëxae, apotocopatsi mapanacuapijiwije peyapëtaenexatsi mapanacuapijiliwaisi pecanaëjëtsicuenia. Biji rajane, bajaraPonë najamatabëcuenewereta, pecapanepaenexa pijaneconiwecua pamonae jumexaniatane Jesús peliwaisi, paliwaisi patsipaebanajetarubenajë, bajarapaliwaisi mapanacuapijiwi tsitanatsiquejemaliwaisi-atatsi.
22 Judíowi tsitanatsiquejemaliwaisitsi Jesús peliwaisi, tsipaji jitsipabiaba pepaebiwi petsita-exanaejawatsif Dioso pesaëta pinijicuenejawanë, petonamatamotsinexatsi bajarapaliwaisi. Griegowig juya jitsipabiaba petsipaebijawatsi pepaebiwi mapanacuapijiliwaisi pecujarubiwi pecanaëjëtsicuenia, petonamatamotsinexatsi Jesús peliwaisi.
23 Bajarapabitsaëtobeje, bajarapacuenia jitsipae-ata, itsiata paxanë pejitsipaecuenia apopapaebaponaenë Jesús peliwaisi. Biji rajane, payapëtaeya-exanabiabajë pacuenia Cristo nacasiwatëpa cruzata, wajanacacapanepaenexa wajaneconiwecua. Bajarapacuenia patatsipaebixae, judíowi anaepanabiaba, petsitapibisialiwaisixaetsi.h Apojudíowi juya saya tsitanatsiquejemaliwaisitsi.
24 Itsiata baitsi jane, pamonae Dioso junatatsi pecapanepaenexatsi, judíowi, apojudíowi-ata, Cristo pesiwatëpaejawata cruzata, bajarapamonaejawabelia Dioso tsitanajamatabëcuene-itajëta bitso piacuenesaënëcuene, peyapëtaenëcuene-ata, pecapanepaexaetsi pejumexaniataejawata Jesús peliwaisi.
25 Pamonae mapanacuapijiliwaisicuenia pecanaëjëtsiwi, tsitanatsiquejamecuenetsi, Dioso pacuene exana jiwi pecapanepaenexa pijaneconiwecua. pamonae pesiwacanaëjëtsiwi mapanacuapijiliwaisicuenia, tsitanatsiquejamecuenetsi. Itsiata, bajarapacuene bitso peyapëtaecuene matatoxenetsia mapanacuapijiwi daxita pecanaëjëtsijawawecua. Bajarapijinia pacuenia, Dioso pexanaejawa saëmatatoxeneta daxitacuene, mapanacuapijiwi pecanaëjëtsicuenia tsita-asaëjibi-atatsi. Bajaraxuata, Dioso itsa copata Cristo pebeyaxuabinexatsi cruzata, mapanacuapijiwi tae-atatsi piasaëjibinëcuenia, apopeyapëtaenëcuenia-ata, bajarapaepatota Dioso tsitanajamatabëcuene-itajëta pepopiasaënëcuene, pepopeyapëtaenëcuene-ata, jiwi pecapanepaexae pijaneconiwecua Cristo pesiwatëpaejawata.
26 ¡Patajamonaemë Cristo pejamatabëcueneta, pacanaëjëre mapacuene yabaraje! Paxamë Dioso pacajunata papijajiwinexamë, beweliajamatabëcuene panexainaewi-ata. Paxamëtuatuajëta jinawanapa caejiwibeje saya pecanaëjëtsiwi mapanacuapijiliwaisije, pamonae ayaijamatabëcuenewi, petuxanewi pexi-ata.
27 Paxamë panenacujarubiliwaisi apopanexainaewixae, itsamonae beweliajamatabëcuenewii pacatane. Itsiata, bajarapane-itsiwi-ata, Dioso paca-itapeta papijajiwinexamë pe-urabinexa pamonae picani natane bitso peyapëtaewi mapanacuapijiliwaisije. Mapanacuapijiwije pacatae-ata bewelianamatacaitorobisaëj panexainaewi, Dioso paca-itapeta pe-urabinexa pamonae picani natane ayaijamatabëcuenewi, ayainamatacaitorobisaë pexainaewi-ata.
28 Dioso baja cajena, paca-itapeta papijajiwinexamë, daxitajiwi bijiaya papecanaëcotsiwi, piamatamobiwicuenia papecataewi-ata, pe-urabinexa pamonae bitso ayaijamatabëcuenewi picani natane mapanacuataje. Nexata, paxamë panejamatabëcueneta, daxita xua mapanacuapijiwije tsitanamatamotatsi, peyaiyataexae, bajaraxuanë Dioso amatamobia-exanaena.
29 Bajarapacuenia Dioso paca-itapeta, mapanacuapijiwi apopapecayaiyataewimi-ata. Bajaraxuata, Dioso pitabarata caejiwi-ata jamatabëcuenenawëxaniabiaya apobenatae ayaijamatabëcuenewi, Dioso papeca-itapetsixae papijajiwinexamë.
30 Ajibi cajena itsacuenejawa xua yabara be-ayaijamatabëcuenewi panetaejawanexa, tsipaji raja Dioso papeca-itaxutotsoniataexae, paca-exana becaenë Cristo Jesústa, caejamatabëcuene panexainaenexa bajaraPonëjawabelia. Nexata, yapëtanetsi pacuenia Cristo Jesús pejamatabëcueneta, Dioso paca-exana bitso paneyapëtaewi, pacawecua-ajibia-exana panijaneconimi,k paca-itapeta papijajiwinexamë itsamonaewecua, pacaneconimatamotanual Cristo pejanata.
31 Bajarapacuenia Dioso wajanacato-exanaexae Jesucristo pejamatabëcueneta, nacatoxanepana waja-exanaenexa pacuenia jumaitsi Dioso pejumeliwaisibaxutota: «Pexaniacuenia pewënëxaniatsijawata, jiwi apobenacuenewënëxaniatsi pijacuata pexanaejawa yabara, itsamonae peyaiyataenexatsi. Biji rajane, pexaniacuenia bewënëxaniatabiaba wajatuxanenë Jesucristo, peto-exanaejawatsi yabara, jiwi peyaiyataenexa wajatuxanenë»,m jai Dioso, pejumeliwaisibaxutota.