Pablo najamatabënajinalia peyapëtaewitsi, Roma tomarapijiwi
16
Mapaliwaisijawataje pacatoyaquinatsinua, patacayapëtaeya-exanaenexa wajabanawa Febe yabara, diáconisawa.a Bajarapowa bitso pexaniajamatabëcuenewa. Yawenonabiabanua Jesús pijajiwi, Cencreab tomarata pejinawanapaewi.
2 Bajarapowa itsa ponaena paxamëjawabelia, pacopiapitsianame xaniawaetsia wajatuxanenë Jesucristo pejamatabëcueneta, pacuenia daxitatsi benacopiapitabiabatsi Jesús peliwaisi wajanajuajumexaniataewi. Xua namatawenona bajarapowa, payawenonaename, tsipaji bajarapowa yawenonabiaba ayaibitsaëto Jesús peliwaisi pejumexaniataewi. Xanë-ata bajarapowa neyawenonabiaba.
3 Nebajacobiana Priscila,c pamona Aquila-ata. Bajarapajiwibeje tayajawanacuenebijiwibeje Cristo Jesúsd pijacuene.
4 Bajarapajiwibeje tsi-ayai-atatsibeje, petëpaejawanexabeje picani taneyawenonaejawatabeje, itsiata necapanepabeje tanebeyaxuabijawaminexawecua. Nexata, pexaniajamatabëcuene rajutajë bajarapajiwibejejawabelia. Itsiata, ëxanë bajarapacuenia apojumaitsinë. Daxita pamonae apojudíowi, Jesús peliwaisi pejumexaniataewi, bajarapamonae-ata bajarapacuenia jumaitsitsibeje tanecapanepaexaebeje.
5 Jesús peliwaisi pejumexaniataewi, pamonae nacaetuatabiaba Priscila, Aquilabeje pijabota, bajarapamonae-ata nebajacobiana. Nebajacobiananua ta-asiwanë Epeneto. Bajaraponë daxita Asia nacuapijiwiwecua copiaya jumexaniatane Cristo peliwaisi.
6 Nebajacobiananua María, powa bitso tonacuenebabiaba Dioso pijacuene paxamëtuatuajëta.
7 Nebajacobiananua tajanacuapijinëbeje, Andrónico, Junias-beje. Bajayata, bajaraponëbeje panenajuajeba penaneconitsiwi pejebabiabibota. Bajaraponëbeje yaiyataeya baracuaicuaijaitsibeje apóstolewi-ata. Xanë-ata tajumexaniataewajënaeya Cristo peliwaisi, bajaraponëbeje baja jumexaniatanebeje.
8 Nebajacobiananua Amplias. Bitso ta-asiwanë, tsipaji bajaraponë-ata wajatuxanenë pijajiwitonë.
9 Nebajacobiananua Urbano. Bajaraponë-ata tonacuenebaponapona wajatuxanenë Cristo Jesús pijacuene, pacuenia waxaitsi tonacuenebawanapatsi. Nebajacobiananua Estaquis, bitso ta-asiwanë.
10 Nebajacobiananua Apeles, ponë dowathi jamatabëcuene-ëjëbi-atatsi, itsiata, ajamatabëcuenesaë pejumexaniataejawa Cristo peliwaisi yabara. Nebajacobiananua Aristóbulo pijamonae.
11 Nebajacobiananua tajanacuapijinë Herodión. Nebajacobiananua Narciso pijamonae, pamonae itaxutuajamatejema Cristojawabelia.
12 Nebajacobiananua Trifena, Trifosabeje, powabeje tonacuenebabiaba Dioso pijacuene. Nebajacobiananua waja-asiwawa Pérsida, powa bitso tonacuenebabiaba Dioso pijacuene.
13 Nebajacobiananua Rufo,e ponë bitso peyaiyataenëtsi wajatuxanenë pijajiwituatuajëta. Bajaraponë pena-ata nebajacobiana. Bajarapowa bepexënatonë netaeyabiaba.
14 Nebajacobiananua Asíncrito, Flegonte, Hermas, Patrobas, Hermes, itsamonae-ata, pamonae najinawanapa bajarapamonaejawata.
15 Nebajacobiananua Filólogo, Julia, Nereo, Nereo pejuyapijiwa-ata, Olimpas-ata, daxita itsamonae-ata, Jesús peliwaisi pejumexaniataewi, pamonae najinawanapa bajarapamonaejawata.
16 ¡Paxamë-ata Jesús peliwaisi panejumexaniataexae, xaniawaetsia namata-enetsia bitso nasiwaya panabajacobabiabare! Daxita pina Cristo peliwaisi pejumexaniataewi, majotaje pejinawanapaewi, pacabajacobalia.
17 ¡Tajamonae, panayajiwitaema pamonaepenajumetsënëtsiliwaisita Jesús pijajiwi natsanaeya-exanapona, nacaemonaecuenia penataejawami, tsipaji bajarapamonae tsipaebapona jiwi peyamaxë-itojorobinexa pexaniajailiwaisi Jesús peliwaisiwecua! ¡Bajaraxuata, pawecuanatsare bajarapamonae, pejamatabëcueneta namata-enetsia panenajume-anaenotsiyaniwa bajarapamonae peliwaisita, najamatabëcuenejëpaeya panenajuajinawanapaejawamiwecua!
18 Bajarapamonae apotonacuenebi pacuenia jitsipa wajatuxanenë Jesucristo. Biji rajane, saya jamatabë-exana bajarapamonae pijacuata penatojitsipaecuenia.f Jiwijawabelia tsipaebapona bepexaniajailiwaisi itajara. Itsiata baitsi jane, bajarapamonae saya jamatabëyamaxë-itojoroba pamonae abaxë xaniawaetsia apojumeyapëtae pexaniajailiwaisi. Petsipaebijawata, canacuenebabiaba jiwi petsimuxuxanepanaeliwaisianëtsi peyamaxë-itojorobinexa.
19 Daxitajiwi Jesús peliwaisi pejumexaniataewi daxitanacuanëjawa, paxamë pacawënëliwaisitane xaniawaetsia panejinawanapaejawa Dioso pejitsipaecuenia. Bajaraxuata, pacasiwabarëyatsi. Pacatojitsipatsi paneyapëtaenexa bitso ëpexaniacuene pane-exanaenexa. ¡Pëtsa panacopatame itsajiwi-ata papecayamaxë-itojorobijawa pibisiacuene pane-exanaenexa!
20 Bajarapacuenia itsa panayajiwitaewanapaename bajarapitsiwi, nexata Dioso, ponë baja cajena wajanacajamatabëcuenexanepanaeya-exanaenë najamatabëcuenejëpaeya wajajinawanapaenexa, bajaraPonë bepijia pacayawenonaena, panejamatabëcuene-amoneyabinexa dowathi, itsajiwi-ata papecayamaxë-itojorobiyaniwa penajumetsënëtsiliwaisita. Pacatowajëtabiabatsi Diosojawabelia wajatuxanenë Jesucristo asiwaya papecayawenonabiabinexa.
21 Pabajacobianame pina Timoteo,g Dioso pijacuene patatonajuanacuenebinëbeje. Pabajacobianamenua pina tajanacuapijiwi Lucio,h Jasón,i Sosípater-ata.
22 Xanë, Tercionë, Pablo tajumeyaquinaponaenë mapabaxutotaje. Xanë-ata pacabajacobaliatsi, tsipaji Jesús peliwaisi xanë-ata tajumexaniataenë.
23 Pabajacobianame pina Gayo,j ponë pijabota naponaponajë. Bajaraponë tocopatabiaba daxita Jesús peliwaisi pejumexaniataewi penacaetuatabiabinexa pijabota. Pabajacobianamenua pina Erasto, ponë to-ewetabiaba Corinto tomarapijiwi pewetsiwi pijapalata.k Pabajacobianamenua pina wajabananë Cuarto.
24 Pacatojitsipatsi paneyapëtaeponaejawa Dioso, wajatuxanenë Jesucristobeje asiwaya papecayawenonabiabijawabeje. Bajara-itsi tsane.
Pablo xua yabara jumaitsi cotocaewiliwaisita
25 ¡Waxaitsi wënëxaniatsianatsi Dioso, bitso ayaijamatabëcuenenë yabara, daxitamatacabijawabelia peponaponaenë yabara, wajanacajamatabëcuene-asaëya-exanaenë-ata yabara! Pacatojitsipatsi nexata papecajamatabëcuene-asaëya-exanaenexa pejumeliwaisita, paliwaisi jiwi tsipaebaponajë, Jesucristo peliwaisi, jiwi pecapanepaeliwaisinexatsi Diosojawabelia. Bajarapaliwaisi bajayajebi picani Dioso muetsia xainabuata, nacua pexanaejawaweliacujinae.
26 Itsiata, muetsia pexainabuatsiliwaisimi, maparucaeje xaniawaetsia nacayapëtaeya-exana pajamatabëcuene yabara bajayata profetawi, tajëwelia yaquina Jesús peliwaisi yabara. Nexata, Dioso paxanë pane-itorobapona daxitanacuanëjawa, apojudíowi pejinawanapaenacuanëjawa, patatsipaebinexa Jesucristo peliwaisi, pamonae jumetane pejumexaniataenexa bajarapaliwaisi, pejumecowënëtsinexanua pacuenia tonajumecopatatsi pexanaenexa.
27 ¡Caenë rabaja Dioso daxitacuene peyapëtaenë! !Xaniawaetsia liwaisi pecanaëjëtsinënua! ¡Bajaraxuata, daxitamatacabijawabelianexa waxaitsi wajatuxanenë Jesucristo pejamatabëcuenetal Dioso wënëxaniatsianatsi! Bajara-itsi tsane.