Wajabanajiwi Jesucristo pejamatabëcueneta, pacuenia betocanaëjëtatsi wajajamatabëcueneyawenonaenexa
15
Waxaitsi wajajamatabëcueneliwaisinaweretsiwi Dioso pijacuenelia, asiwaya betanetsi pamonae abaxë jamatabëcuenefaefaena pitaxutuajamatejemajawa Cristo. Bajarapamonae cujunawabiaba bepiacuenebejewicuenia penacopatsijawa Dioso pitabarata, itsacuene pexanaejawa yabara. Nexata, apobetsita-exanaetsi waxaitsi wajacuata wajanatojitsipaecuenia, wajajamatabëcuenebijianaeyaniwa wajamonaejiwiyo.
2 Biji rajane, caejiwitsi canacujitsia becanaëjëtatsi wajabananë Jesucristo pejamatabëcueneta, wajajamatabëcueneyawenonaenexa. Betsita-exanawanapatsi pacuenejawata ajamatabëcuenesaëjitsia, bajaraxua beto-exanawanapatsi pejamatabëcuenefaefaenaejiwiyo pejamatabëcuenewitsabinexa Diosojawabelia.
3 Bajarapacuenia bejinawanapatsi, tsipaji wajatuxanenë Cristo abaxë itsa ponapona mapanacuataje, pijacuata penatojitsipaecuenia apo-exanaponaponae. Biji rajane, nacopata pebejiobia-exanaenexatsi pacuenia Dioso tojitsipatsi. Cristo bajarapacuenia pexanaejawanexa yabara Dioso pejumeliwaisibaxutota tajëwelia jumaitsi mapacueniaje: «Xamë, pibisiacuenia jiwi pecabaracuaicuaijaitsabiabijawa, bajaraxua xanë juya netsijumajopaena»,a jai Dioso pejumeliwaisibaxutota, Cristo pejumaitsijawa paxa Diosojawabelia.
4 Paliwaisi bajayata yaquina Dioso pejumeliwaisibaxutota, bajarapaliwaisi waxaitsi-ata nacacujaruba wajacuenejëpaenexa pacuenia Wajatuxanenë nacatsita nacuene-itajëta. Bajaraxuata, bajayajebi nacabejiobia-exanabiabi-ata Dioso pijajiwixaetsi, itsiata ajamatabëcuenesaë tsawanapae tsanetsi, tsipaji yapëtanetsi pacuenia Dioso najumecapanepaeya jumaitsi, bajarapaliwaisita wajanacato-exanaenexa.
5 Tajamonae, bitso pacatojitsipatsi Dioso papecajamatabëcueneyawenonaenexa, najamatabëcuenejëpaeya daxita panejinawanapaenexa, namata-enetsia panenato-exanawanapaejawata pacuenia Cristo Jesúsb exanaponapona mapanacuataje, tsipaji bajaraPonë wajanacajamatabëcueneyawenonaenë, wajanacajamatabëcuene-asaëya-exanaponaenënua wajanacajamatabëcuene-ëjëbijawata.
6 Bajarapacuenia nexata daxita paxamë najamatabëcuenejëpaeya pawënëxaniatsianame wajatuxanenë Jesucristo paxa Diosojawabelia mapacueniaje: «¡Diosomë, bitso ayaijamatabëcuenenëmë!», pajamë tsabiabi tsane.
7 Pajudíowinë, apopajudíowi-atamë, najëpaeya Cristo nacajunata pijajiwinexatsi. ¡Bajaraxuata, najëpaeya xaniawaetsia namata-enetsia panacopiapitabiabare! Bajarapacuenia itsa pa-exanabiabianame, daxitajiwi Dioso yaiyataena. Nexata, daxitajiwi jumaitsi tsabiabi tsane Dioso yabara: «Dioso cajena bitso ayaijamatabëcuenenë, tsipaji pijajiwi yawenona xaniawaetsia petojinawanapaenexatsi», jai tsabiabi tsane.
8 Mapacuenia pacajumaitsitsije. Cristo Jesús athëbëwetsica patsica mapanacuayabetsicaje peyawenonaenexa judíowi, pacuenia bajayata Dioso najumecapanepaeya jumaitsi judíowi pijasalinaiwijawabelia. Bajarapacuenia Dioso pexaniajainëcuene najamatabëcuene-itajëta judíowijawabelia.
9 Patsicanua peyawenonaenexa apojudíowi-ata. Bajarapamonae-ata, Jesucristo pejamatabëcueneta, wënëxaniatabiaba Dioso mapacueniaje: «¡Diosomë, bitso ayaijamatabëcuenenëmë!», jai tsabiabi, bajaraPonë pitaxutotsoniataexaetsi, pacuenia exana judíowijawabelia. Bajaraxua yabara Cristo paxa Diosojawabelia pejumaitsijawanexa, Dioso pejumeliwaisibaxutota tajëwelia jumaitsi mapacueniaje:
«Daxita panacuanëjawa apojudíowi jinawanapa, xanë cacuenewënëxaniatsianatsi bitso ayaijamatabëcuenenëmë yabara. Cawënëxaniatsianatsinua tacatonaxëanaejawata wajianë bajaraxua yabara»,c jai Dioso pejumeliwaisibaxutota, Cristo pejumaitsijawanexa paxa Diosojawabelia, apojudíowi-ata pitaxutotsoniataexaetsi.
10 Itsabaxutota pijinia, Dioso pejumeliwaisibaxutota jumaitsi mapacueniaje apojudíowi yabara:
«¡Pajamatabëcuenebarëyamëre apopajudíowimë Dioso papijajiwimë, judíowi yajawa!»,d jai Dioso pejumeliwaisibaxutota apojudíowi-ata Dioso pijajiwi pexanaejawanexatsi yabara.
11 Itsabaxutota pijinia, Dioso pejumeliwaisibaxutota David-pijinë yaquina mapacueniaje:
«¡Paxamë apopajudíowimë, Diosojawabelia pajumaitsimëre: ‘Diosomë, bitso ayaijamatabëcuenenëmë’, pajamëre! ¡Padaxitamë, itsamonaejawabelia pajumaitsimëre: ‘Caenë Dioso bitso ayaijamatabëcuenenë’, pajamëre!»,e jai Dioso pejumeliwaisibaxutota, David-pijinë peyaquinaebaxutota.
12 Isaías-pijinë pijinia, itsabaxutota tajëwelia yaquina Jesucristo yabara. Jumaitsi mapacueniaje:
«Panacuetonëyo naexanaena, Isaípijinë pemomonëyo tsane. Itsa witsabiana bajarapanacuetonëyo, Dioso tocopatsiana pewetsinexa daxita panacuanëjawa apojudíowi jinawanapa. Nexata, bajarapamonae-ata siwanajamatabëcuenecopabiana bajaraPonëjawabelia»,f jai Isaías-pijinë peyaquinaebaxutota Jesucristo yabara, wajayapëtaenexa pacuenia apojudíowi-ata Jesucristojawabelia siwanajamatabëcuenecopabijitsia, peyawenonaenexatsi.
13 Bajarapacuenia judíowitsi, apojudíowi-ata, najëpaeya wajanacayawenonaexae, pacatowajëtabiabatsi Diosojawabelia, papecajamatabëcueneyawenonabiabinexa, paxamë, pane-itaxutuajamatejemawi Diosojawabelia. Yapëtanetsi pacuenia Dioso wajanacajamatabëcuenecaëjëpaeya-exanaenë wajajamatabëcuene-ewetawanapaejawanexa. Nexata, pacatowajëtatsi Diosojawabelia, Espíritu Santo pesaëta, ayaicuenia papecajamatabëcuenebarëyaya-exanaenexa, jamatabëcuenexanepanaeya panenajuajinawanapaenexanua, panejamatabëcuene-ewetawanapae-epato papecacapanepaematacabijawabelianexa.
Pablo yapëtaeya-exana petonacuenebicuene Dioso
14 Patajamonaemë Cristo pejamatabëcueneta, paxamë cajena xaniawaetsia pacayapëtanetsi bitso pexaniajamatabëcuene panexainaewi, bitso paneyapëtaewinua Cristo peliwaisi. Bajaraxuabeje papecatsijamatabëwënëcaexae, nexata pacacuenecaëjëpa xaniawaetsia namata-enetsia panenamuxujiobabiabinexa.
15 Tajamonae, bajarapanecuene-itsiwi-ata, ajume-urajibia pacatoyaquinatsi mapabaxutotaje, patacanajamatabënapitsia-exanaenexa bajarapayajuwënëliwaisi. Dioso nitoroba bajarapaliwaisi tatsipaebanajetarucaenexa, pacujinae asiwaya nitapetag apóstol-nënexanë.
16 Nexata, Jesucristo pijajiwitonënë, tatsipaebaponaenexa Jesucristo peliwaisi apojudíowijawa. Nexata, apojudíowi tsipaebabiabajë pexanialiwaisi, Jesucristo peliwaisi, pecapanepaeliwaisinexatsi Diosojawabelia, jamatejema bajarapamonae pejumexaniataecujinae bajarapaliwaisi, penacopatsinexa Diosojawabelia bepexania-ofrendacuenejawa,h Espíritu Santo petsatsixaetsi Jesús pijajiwinexa.
17 Cristo Jesús pijajiwitonëxaenë, xanë bitso nasiwajamatabëcuenebarëyanë itsa tonacuenebabiabajë Dioso pijacuene. BajaraPonë neyawenonabiaba itsa tonacuenebabiabajë. BajaraPonë neyawenonabiaba tatsipaebaponaenexa itsamonaejawabelia Cristo peliwaisi.
18 Apotsipaebabiabinë tajacuata ta-exanaejawa yabara. Biji rajane, rowialia tsipaebabiabajë ajume-urajibia Cristo taneyawenonabiabijawa, tatonacuenebinexa Dioso pijacuene apojudíowijawa, bajarapacuenia pejumexaniataenexa Jesús peliwaisi. Nexata, apojudíowi, itsa jumetane tatsipaebabiabiliwaisi, itsa tanenua Dioso pesaëta pinijicuene ta-exanaponaejawanë, bajarapamonae jumexaniatane baja Jesucristo pesiwatëpaejawatsi pibisiacuene pexanaeneconi yabara.
19 Daxita bajarapacuenia pinijicuenejawanë exanaponajë Espíritu Santo pesaëta tanejamatabëcueneyawenonaejawata. Bajaraxuata, tsipaebaponajë pexanialiwaisi, Cristo peliwaisi, Diosojawabelia pecapanepaeliwaisinexatsi, Jerusalén tomarajawawerenacujinae, tajënacuajawabelia, tapatsinexa Ilírico nacuajawabelia.
20 Bajaraxuata itsa tsipaebaponajë pexanialiwaisi, Jesucristo peliwaisi, jitsipajë tatsipaebaponaenexa itsaxuayo abaxë jiwi apowënëliwaisipaebi Cristo. Apojitsipaenë tatsipaebaponaejawa itsaxuayo baja copiaya tawajënaeyai itsamonae tsipaebapona, tsipaji jitsipajë tanejumetaewi xaniawaetsia pejumexaniataenexa Jesús peliwaisi. Bajarapacuenia itsa exanaejitsipajë, cuenejëpaejitsipajë copiaya bo pexanaenë petsiwajënaebuatsijawa piatajawa betatsimatatsënëcatsanaejawa itsanë pejebijawajumawereca, yapëtaenejewanë itsa pexaniacuenia tsiwajënaejeba.j
21 Bajaraxuata, itsa tsipaebaponajë Jesucristo peliwaisi apojudíowijawa, jitsipajë ta-exanaponaejawa pacuenia Diosojumepaebinëmi, profeta Isaías-pijinë, tajëwelia yaquinaruta Dioso pejumeliwaisibaxutota, mapacueniaje:
«Pamonae abaxë apowënëliwaisitaek Ponë athëbëwetsica Dioso itorobijitsiatsica jiwi pecapanepaenexa, bajarapamonae taena bajaraPonë. Nexata, bajarapamonae jumeyapëtaena, itsa tsipaebianatsi bajaraPonë peliwaisi», jai tajëwelia Dioso pejumeliwaisibaxutota Dioso pitorobinëtsica yabara peliwaisi apojudíowijawa mapamatacabitaje petsipaebaponaejawanexatsi.
Pacuenia picani Pablo jamatabëponabiaba Roma tomarabelia, yabara peliwaisi
22 Bajayajebi picani bitso jamatabëpacataeyabiabatsi. Itsiata aponecuenecaëjëpabiabi taponaenexa paxamëjawabelia, daxitanacuanëjawa Dioso pejumeliwaisi tatsipaebanajetarucaexae. Bajaraxua yabara cuenenajematajë taponaejawa paxamëjawabelia.
23 Aeconoxae baja taweretsixae tanacuenebijawa mapanacuajawaje, nexata jane baja, ponaenajë paxamëjawabelia, pacuenia picani bajayajebi jamatabëpacataeyabiabatsi.
24 Nexata, pamatacabi ponaenajë España nacuayabelia, patsianajë paxamëjawata, patacataenexa. Itsa baja nataenatsi, bitso jamatabëcuenebarëya tsawanapae tsanetsi. Bajaraxuacujinae, jitsipajë pataneyawenonaenexamë tajanamutonexa, taponaenexa jane baja, España nacuayabelia.
25 Itsiata, copiaya mapamatacabitaje ponaenajë Jerusalén tomarabelia, ofrenda tatocaponaenexa, pamonae jinawanapa bajarajota, Jesús peliwaisi pejumexaniataewi.
26 Bajarapa-ofrenda caetuata Jesús peliwaisi pejumexaniataewi Macedonia, Acaya nacuapijiwibeje, peyawenonaenexa pamonae jinawanapa Jerusalén tomarata, Jesús peliwaisi pejumexaniataewiyajuwënëwi, bepejiobiwi.
27 Bajarapanacuapijiwibeje apojudíowi-ata, caejamatabëcueneliwaisi xaina bajarapacuenia ofrenda peto-exanaenexa, peyawenonaenexa juya judíowijawabelia, Jerusalén tomarapijiwi, tsipaji judíowi copiaya peyapëtaexae pexanialiwaisi, tsipaeba apojudiowijawabelia Dioso peliwaisi, pecapanepaeliwaisinexatsi. Nexata, judíowi pejamatabëcueneta, pamonae apojudíowi-ata, yapëtane baja pecapanepaeliwaisinexatsi Diosojawabelia. Bajaraxuata, apojudíowi aeconoxae beyawenona judíowijawabelia, pamonae penajuajumexaniataewi Jesús peliwaisi, mapanacuataje penamatawenonaejawaxi yabara.
28 Bajarapa-ofrenda tatocaponaecujinae Jerusalén tomarapijiwijawabelia, matapania jane baja ponaenajë España nacuayabelia. Bajarapanamuto ta-exanaejawata, patsianajë paxamëjawata.
29 Itsa patsianajë paxamëjawabelia, yapëtaniji Cristo bitso pexaniacuenia wajanacajamatabëcuenebarëyaya-exanaejawanexa.
30 Tajamonae, daxitatsi, wajatuxanenë Jesucristo pijajiwitsi, bajarapacuenianua Espíritu Santo daxitatsi nacajamatabëcuenecaëjëpaeya-exanapona, namata-enetsia wajana-asiwanexa nacaemonaetsicuenia. Bajaraxuata, pexaniacuene pacawajëtatsi asaëyata patanetowajëtsinexamë Diosojawabelia taneyawenonaenexa,
31 tane-itsacueniabiyaniwal Judea nacuata pejinawanapaewi, Jesús peliwaisi pejume-aebiwi, piajamatabëcuenebejewi. Panetowajëtsianamenua Jesús peliwaisi pejumexaniataewi, Jerusalén tomarapijiwi, xaniawaetsia tanewecuapitsinexam pa-ofrenda tocaponaejitsianë.
32 Orijibia, panetowajëtsianamenua, barëyaya tapatsinexa paxamëjawabelia, bajarapacuenia Dioso itsa netojitsipa, paxamë patacayajawanexanua tanacuera-ewetaponaponaejawata.
33 Xanë pacatowajëtabiabatsi Diosojawabelia, Ponë wajanacarajutsinë jamatabëcuenexanepanaeya wajanajuajinawanapaenexa. Pacatojitsipatsinua bajaraPonë papecayajawaponaponaenexa. Bajara-itsi tsane.