Jesús pijajiwi namata-enetsia benayaiyatane pena-asiwaxaea
14
¡Tajamonae, asiwaya, yaiyataeyanua, pacopiapire bepanacaemonaemëcuenia, pamonae, paxamëyajuwënëwi, abaxë jamatabëcuenefaefaenab pitaxutuajamatejemajawa Jesucristo! ¡Xua itsajiwi tsitapibisiacuenetsi, caejamatabëcuene apopanajuaxainae-atamëbeje, pëtsa bajaraxua yabara namata-enetsia panajume-anaenotamebeje!
2 Mapacuenia namata-enetsia pa-exanawanapaenameje. Itsamonae Jesús pijajiwi paxamëyajuwënëwi, canaëjëta Dioso petocopatsijawatsi daxitacuene pexaenexa.c Itsamonae pijinia, canaëjëta Dioso pejani-itawetsijawatsi itsawirianëanë pewid pexaeyaniwa, jumapecataeya pexanaenëjawabelia perajutsiyajuwënëwi-ata. Nexata, ëpe-ubijawanë bajarapamonae xaeyabiaba, itsawirianëanë pewi pexaeyaniwa.
3 ¡Nexata, pajiwi itaxutejema xaeyabiaba daxitawiriawi pewi, pëtsa bijiaya tane pajiwi apoxae bajarapawi! ¡Pajiwi pijinia, na-ewetabiaba paxaeyaniwa itsawiriayajuwënënëanë pewi, pëtsa neconitsiaya jumaitsi daxitacuene pexaewijawabelia: «Pibisiacuene raja pa-exaname, bajarapawi itsa paxaneme», jai pëtsa, tsipaji Dioso jamatabëcuenebarëyaya nacoxitanee bajarapamonae itaxutejema xae-ata, Cristojawabelia pesiwanajamatabëcuenecopabixae!
4 Daxitatsi, Jesús pijajiwitsi, xainatsi caenë wajatuxanenënexa. Bajaraxuata, apopacatoxanepanae cajena paneneconitsijawa panetonajuanacuenebiwi Dioso pijacuene, bepapijatuxanenëmëcuenia. Caenë cajena, Dioso, toxanepanatsi bajarapacuenia pexanaenexa pijajiwitonëjawabelia. Nexata, pijajiwitonë xaniawaetsia itsa tonacueneba, itsa jume, xaniawaetsia itsa apotonacuenebi, caenë, Dioso, toxanepanatsi, pacuenia jamatabëjumaitsi, pejumaitsinexa pijajiwitonëjawabelia. Nexata, yapëtanetsi Dioso pijajiwitonë pacuenia ajamatabëcuenesaëjitsia pijatuxanenë pitabarata, tsipaji Dioso caëjëpatsi cajena peyawenonaenexa pijajiwi, pejitsipaecuenia xaniawaetsia petojinawanapaenexatsi, pesiwabarëyanexa.
5 Itsajawa xua yabara namata-enetsia bepanayaiyataneme: Itsamonae, Jesús pijajiwiyajuwënëwi, yaiyataeyabiaba caematacabi itsamatacabianëwecua, penajamatabëcuene-itajëtsinexa peyaiyataejamatabëcuenef Diosojawabelia. Itsamonae pijinia, najëpaeya tane daxitamatacabianë. Bajaraxuata, caejiwiyo canacujitsia pijacuata beyapëtane pajamatabëcueneliwaisi yabara yaiyataeyabiaba caematacabi itsamatacabianëwecua, penajamatabëcuene-itajëtsinexa Diosojawabelia peyaiyataejawa. Itsa jume, pajamatabëcueneliwaisi yabara najëpaeya tane daxitamatacabianë.
6 Pajiwi nato-itapeta caematacabi itsamatacabianëwecua, najamatabëcuene-itajëta peyaiyataejawa pijatuxanenë, Dioso. Pajiwi pijinia, itaxutejema xaeyabiaba daxitacuene, najamatabëcuene-itajëta peyaiyataejawa pijatuxanenë, tsipaji pexaniajamatabëcuene rajutabiaba Diosojawabelia pexaejawa yabara. Bajarapijinia pacuenia, pajiwi na-eweta pexaeyaniwa itsawiriayajuwënëanë pewi, bajarapacuenia exana penajamatabëcuene-itajëtsinexa peyaiyataejawa pijatuxanenë, tsipaji bajarapajiwi-ata pexaniajamatabëcuene rajutabiaba Diosojawabelia, ëpe-ubijawanë xaeyabiabi-ata.
7 Bajarapacuenia yaiyataeya namata-enetsia bepajinawanapame, tsipaji itsajiwi-ata Jesús pijajiwiyajuwënëjiwi apoponaponae ëpijacuata penatojitsipaecuenia pexanaponaponaenexa. Biji rajane, exanaponapona pacuenia pijatuxanenë Cristo tojitsipatsi. Bajarapijinia pacuenia, itsajiwi-ata pijacuata aponato-itapetsi petëpaematacabinexa, pacuenia-ata tëpaejitsia.
8 Waxaitsi abaxë waja-asaëtsawanapae-epato, tojinawanapatsi wajatuxanenë. Bajarapacuenia itsa tëpaenatsi, wajatuxanenë pejitsipaecuenia tëpaenatsi. Nexata, abaxë waja-asaëtsawanapae-epato, wajatëpaecujinae-ata, tsiteca wajatuxanenë pijajiwitsi tsawanapae tsane, pejitsipaecuenia waja-exanawanapaenexa.
9 Bajaraxua yabara jane baja, Cristo nacasiwatëpa. BajaraPonë petëpaecujinae, icatsia namatacota piasaëtsaponaponaenexa, wajanacatonaexanaenexa wajatuxanenë daxita pamonaetsi wajasiwanajamatabëcuenecopabiwi bajaraPonëjawabelia, waja-asaëtsawanapaewi, petëpaewi-ata.
10 Nexata, Cristo wajatuxanenëxae, daxitatsi pijajiwitsi, aponacatoxanepanae namata-enetsia wajananeconitsijawa wajaxaejawa yabara, wajayaiyataematacabianë yabara, itsacuenejawayo-ata xua yabara exanatsi wajanajamatabëcuene-itajëtsinexa Dioso wajayaiyataejamatabëcuene yabara. Aponacatoxanepanae cajena. Bajaraxuata nexata, bijiaya apobetaetsi itsajiwi-ata Jesús pijajiwitsiyajuwënëjiwi bajaraxua yabara, tsipaji cajena itsamatacabi daxitatsi waxaitsi Cristo pitabarata nubenaenatsi, bajaraPonë wajanacawajunupaebinexa,g caejiwitsi canacujitsia, daxita waja-exanawanapaecuene yabara mapanacuataje itsa tsitapexaniacuenetsi, itsa jume, itsa tsitapibisiacuenetsi.
11 Bajaraxua yabara Dioso pejumeliwaisibaxutota tajëwelia jumaitsi mapacueniaje:
«Xanë, Diosonë, daxitamatacabijawabelianexa ta-asaëtsaponaponaenë. Xua jumaitsinë, xaniajanë cajena. Itsamatacabi daxitajiwi taitabarata pematabacabëta netonubenaena, taneyaiyataexae. Daxitajiwi newajunupaebiana Diosonëcuenenë»,h jai Dioso pejumeliwaisibaxutota daxitajiwi yabara.
12 Bajaraxuata, yapëtanetsi pacuenia waxaitsi itsamatacabi, caejiwitsi canacujitsia, nawajunupaebaponaenatsi Diosojawabelia daxita pacuenejawanë exanawanapatsi mapanacuataje.
Pablo cuene-itaweta Jesús pijajiwi Diosowecua pejopaeya-exanaeyaniwa petsita-exanaejawata xua itsajiwi tsitapibisiacuenetsi
13 Waxaitsi baja yapëtanetsi, itsamatacabijawabelia wajanubenaejawanexa wajatuxanenë Cristo pitabarata, wajanacawajunupaebaponaenexa pacuenia nacacuenetane wajato-exanawanapaejawa mapanacuataje. Bajaraxuata, aponacatoxanepanae wajaneconitsijawa itsajiwi pexanaecuene yabara Dioso peyaiyataejamatabëcuene. Biji rajane, bejamatabëjumaitsitsi: «Apotsita-exanaenë tsane itsacuenejawayo-ata Jesús pijajiwiyajuwënëjiwi xua tsitapibisiacuenetsi pexanaenexa, penajamatabëcuenebijianaeyaniwa», bejamatabëjaitsi. Itsa patsita-exanaejitsipame xua tsitapibisiacuenetsi, bajarapajiwi belia wecuajopaejitsipa pexaniacuenia petoponaponaejawami pijatuxanenë.
14 Xanë, Pablonë, yapëtaniji mapacueneje: Ajibi itsacuenejawayo-atai tanejamatabëcuenebijianaenexa, taxaejawa, tajayatsicuene-ata,j xua yabara Dioso netaejitsia beta-acuenebejenë. Yapëtaniji pexaniajaicuene bajaraxua, tsipaji xaniawaetsia wajatuxanenë Jesucristojawabelia itaxutuajamatejemanë daxitacuene yabara. Itsiata meta, itsanë Jesús pijajiwituatuajëta canaëjëtsipa Dioso pitawetsijawa bajaraxua. Nexata, tanecuenetaexae, itsa exanaejitsipa xua cujunawa Dioso pitawetsijawatsi, pibisiacuene exanaejitsipa Dioso pitabarata.
15 ¡Bajaraxuata, panijabananë Jesús pejamatabëcueneta pëtsa pajamatabëcuenebijianame! Bajaraponë pitabarata itsa patsitaxaejitsipamek xua cujunawa Dioso pitawetsijawatsi, belia pibisiacuene exanaejitsipa papecacuenetaejawata. Bajarapacuenia itsa pa-exaname, apopanajamatabëcuene-itajëtsimë pane-asiwajawa bajaraponëjawabelia. Nexata, panajamatabëcuenecataitsianame, panetsita-exanaeyaniwa xua yabara panijabananë cujunawa Dioso pitawetsijawatsi, Diosowecua panejamatabëcuenebijianaeyaniwa panijabananë, tsipaji rabaja wajatuxanenë Cristo siwatëpa bajaraponë-ata, penaxuabiyaniwa.
16 Bajarapacuenia panajamatabëcuenecataitsianame, itsacuenejawa panetsita-exanaeyaniwa, xua yabara itsajiwi pacaneconitsiaya pacabaracuaicuaijai tsipae bepibisiacuene pane-exanaewi. Paxamë apopacatsitapibisiacuene-ata tsipae xua pa-exaname, itsiata pacabaracuaicuaijai tsipae pibisiacuene bepane-exanaewi, Jesús peliwaisi panejumexaniataewi-ata.
17 Tajamonae, wajanajamatabëcuene-itajëtaponaenexa wajayaiyataejawa wajatuxanenë Jesucristojawabelia, bajaraPonë aponaca-itawetsi wajaxaejawa, waja-apaejawa-ata yabara. ¡Jume baja cajena! Biji rajane, najamatabëcuene-itajëtatsi wajayaiyataejawa Cristo, pexaniacuene waja-exanawanapaejawata, jamatabëcuenexanepanaeya namata-enetsia wajanajuajinawanapaejawata, jamatabëcuenebarëyayanua wajajinawanapaejawata, Espíritu Santo wajanacajamatabëcuenecaëjëpaeya-exanaecuenia.
18 Pajiwi bajarapacuenia toponapona pijatuxanenë Cristo, siwajamatabëcuenebarëyatsi Dioso. Jiwi-ata xaniawaetsia yaiyatanetsi.
19 Asiwaya wajayaiyataexae wajabananë Cristo pejamatabëcueneta, nexata apobetsita-exanaetsi itsacuenejawa xua yabara jamatabëcuenebijianaejitsipatsi Diosowecua. Biji rajane, xua Dioso nacayawenona jamatabëcuenexanepanaeya wajanajuajinawanapaenexa, xua-ata nacayawenona namata-enetsia wajanajamatabëcuene-asaëya-exanaenexa Diosojawabelia, bajara-ëxua be-exanawanapatsi.
20 ¡Nexata, pëtsa patsitaxaneme xua panijabananë Jesucristo pejamatabëcueneta, tane bepitawetsijawatsi pexaeyaniwa, tsipaji bajarapacuenia panetsita-exanaejawata, belia pajamatabëcuenebijianaejitsipame Dioso pijajiwitonë! Baitsi, itsa pacajanitaejitsipa panexaejawa, bajarapajiwi-ata naxaejitsipa. Nexata, bepenaneconitsinë Diosojawabelia nataejitsipa. ¡Bajaraxuayaniwa, pëtsa patsitaxaneme xua cujunawa panijabananë! Xaniajai rabaja. Daxitacuene rabaja picani Dioso nacatocopata wajaxaenexa. Apopacatsitapibisiacuene-ata picani, itsiata pibisiacuene pa-exanaejitsipame, itsa patsitaxaejitsipame xua panijabananë Jesucristo pejamatabëcueneta tsitapibisiacuenetsi panexaejawata. Apoxanepanae pane-exanaejawa bajarapacuenia.
21 ¡Bajaraxuata, pëtsa patsita-exaname itsacuenejawa-ata, xua yabara panijabananë Jesucristo pejamatabëcueneta pajamatabëcuenebijianaejitsipame; pewi panexaejawata, piatanevinora-ata pane-apaejawata! ¡Bajarapacuenia, pëtsa pajamatabëcuenefaefaenaeya-exaname panijabananë Jesucristo pejamatabëcueneta, xaniawaetsia pijatuxanenë petoponaponaecuenemiwecua!
22 Xaniawaetsia nitaxutuajamatejemaxae Jesucristo, itsa xamë natocanaëjëtame neconi aponexainaejawanexa Dioso pitabarata nexaejawa, nexanaejawa-ata yabara, jamatejema exanaename. Jamatabëcuenebarëyamë tsane itsa apoxainaemë nenaneconitsijawanexa nexanaecuene yabara. ¡Itsiata, bajarapacuene xamë xainare bëpënëa Dioso pitabarata! ¡Pëtsa itaxutejema nawajunupaebame nexanaecuene yabara! ¡Pëtsa jaitamenua nijaliwaisita nenajamatabëjëpaeya-exanaenexa pajiwi cujunawa bajaraxua pexanaeyaniwa, tsitapibisiacuenexaetsi!
23 Pajiwi cuene-aeba Dioso bajarapapexaejawa petocopatsijawatsi, apobexae, nexata apobe-exanaenua, tsipaji xua jiwi exana itaxutuajamatejemanejewa Jesucristo,l pibisiacuene exana. Matapania, pajiwi pijinia xaniawaetsia itsa natoyapëtane pitaxutuajamatejemajawa Jesucristo, neconi apopexainaejawanexa, toxanepanatsi jane baja pexanaejawa.