Pejanajamatabëcuene pexainaewi beyaiyatane peyanacua-ewetsiwitsi
13
¡Daxita pamonae gobierno pijajiwi, papecayanacua-ewetsiwi, pacuenia bajarapamonae paca-itoroba, xaniawaetsia jamatabëcuene-ewetsiaya pajumecowënëtabiabare, tsipaji bajarapamonae, caenë canacujitsia, Dioso pejamatabëcueneta pacayanacua-eweta! Daxita pamonae nacua pewetsiwi, paca-eweta Dioso petocopatsixaetsi.a Bajaraxuata, daxitatsi bejumecowënëtatsi wajanacayanacua-ewetsi.
2 Nexata, pajiwi apojumecowënëtsi pacuenia nacua-ewetsinë itorobatsi, bajarapajiwi Dioso-ata apojumecowënëtsi.b Pamonae apojumecowënëtsi pewetsiwitsi, nexata bajarapamonae naneconitsia-exanaenatsi pamonae Dioso copata nacua pewetsiwinexa, tsipaji Dioso tocopata bajarapajamatabëcuene daxita nacua-ewetsiwijawabelia.
3 Dioso apotocopatsi nacua pewetsiwi, pejunawia-exanaenexa pamonae pexaniacuene exanawanapa. Biji rajane, tocopata pecujunawinexatsi pamonae pibisiacuene exanawanapa. ¡Nexata, paxamë ajunawijibia itsa jamatabëpajinawanapame, pexaniacuene pa-exanawanapare! Nexata, pacasiwabarëya tsane papecayanacua-ewetsiwi. Pexaniacuenia pacawënëxaniatsiananua, pexaniacuene pane-exanawanapaecuene yabara.
4 Nexata, daxita pamonae, nacua pewetsiwi, Dioso tonacuenebawanapac pewetsijawata, peyanacua-ewetsiwi pexaniacuenia peyawenonaenexa. Bajaraxuata, pibisiacuene itsa pa-exaname, papecayanacua-ewetsiwi bepacujunawame, tsipaji bajarapamonae Dioso tocopatatsi, pibisiacuene pexanaewi penaneconitsia-exanaenexa, jamatejema aliwaisijibia peyanacua-ewetsiwi pejinawanapaenexa.
5 Bajaraxuata, bejumecowënëtatsi pamonae wajanacayanacua-ewetsiwi. Apojumecowënëtsitsi saya wajanacananeconitsia-exanaeyaniwa. ¡Jume baja cajena! Biji rajane, jumecowënëtatsi waxaitsi, Jesús pijajiwitsi, tsipaji nacatoxanepana wajayaiyataejawa bajarapamonae nacua-ewetsiwi.
6 Bajaraxuata, nacua-ewetsiwijawabelia impuestomatamod pamatamotabiabame panematamotsipalatata pena-ewetsinexa, tsipaji bajarapamonae Dioso pejamatabëcueneta nacua-ewetawanapa. Nexata, cuene-enatsi ënacua pewetsicuene.
7 ¡Bajaraxuata, pacaejiwimë canacujitsia parajure gobierno pejamatabëcueneta penacuenebiwijawabelia, papecatsicarucaecuenia! ¡Bajarapamonaeyajuwënëwi itsa caetuata impuestomatamo, xuawajëto pa-amoneyabame, pamatamotabiabare! ¡Pamonae peyaiyataewitsi, payaiyataeyabiabare! ¡Bajarapijinia pacuenia, payaiyataema pamonae ayaitaxunae pewetsiwi!
Pablo muxujioba Jesús pijajiwi pacuenia namata-enetsia benato-exanawanapa
8 ¡Pëtsa baja pa-amoneyabame itsacuenejawayo-ata itsajiwijawabelia, pamatamotsinejewamë! ¡Caejawa yabara, bepane-amoneyabiwicuenia pajinawanapare! ¡Namata-enetsia pana-asiwamëre tsawanapae Jesús peliwaisi panenajuajumexaniataewi, pacuenia Cristo paca-asiwa! Bajarapacuenia itsa pana-asiwamë tsawanapae tsane, pajumecowënëtsicapanepaenamee Dioso penajumecopatsiliwaisi Moisés-pijinëta.
9 Dioso penajumecopatsiliwaisi Moisés-pijinëta, naca-itaweta mapacueniaje: «¡Panenacojiobiwi pëtsa pibisiacuene panewitota panawecua-exaname itsajiwijawabelia!f ¡Pëtsa beyaxuabame jiwitonë! ¡Pëtsa nacobetoxotame! ¡Pëtsa najumetsënëtsiaya baracuaicuaijamë itsajiwi! ¡Pëtsa itsajiwi pexainaejawa to-itajitsipame!», jai bajarapaliwaisita. Itsiata, itsa pajumecowënëtsipame mapejumaitsiliwaisiyo: «¡Asiwamëre itsajiwi-ata pacuenia xamë nijacuata nasiwamë!», pejailiwaisiyo, pajumecowënëtsicapanepaejitsipame daxita Dioso penajumecopatsiliwaisi Moisés-pijinëta papeca-itorobicuenia.
10 Nexata, pajiwi asiwa itsajiwi-ata, pibisiacuene apo-exanae bajarapajiwijawabelia. Bajaraxuata, itsa asiwatsi itsamonae-ata, nexata jumecowënëtsicapanepatsi daxita pacuenia Dioso naca-itoroba.
11 Daxita patacamuxujiobicuenia baja xaniawaetsia pa-exanawanapaename, tsipaji baja yapëtanetsi bitso imoxoyo pewajënae icatsia Jesucristo pepatsijawanexatsica, wajanacacapanepaenexa jane baja, mapapiabejenacuawecuaje. Pepacuene Jesucristo baja pepatsimatacabinexa, bitso matatoxenetsia imoxoyo pewajënae a̱jena̱ wajajumexaniataematacabiwecua Jesucristo peliwaisi. ¡Nexata, panamatacobare bepanejamatabëcuenemajitsijawawecua, mapanacuapijicueneje papecajamatabëcuene-enaejawawecua, juya panecopia-ewetawanapaenexa bajarapapamatacabi pecopiapatsijawa!
12 Pacuenia itsa ajibi tsaponae pitaquirijawami, yapëtanetsi imoxoyo pewajënae matacabijawanexa, pecopiarucaenexa pitaquirijawami, bajarapijinia pacuenia, yapëtanetsi baja imoxoyo pewajënae pecopiarucaenexa mapanacuapijiwije pibisiacuene pexanaejawa yabara, piajamatabëcuene-itaquirijawami, tsipaji baja imoxoyo pewajënae icatsia Jesucristo pepatsijawanexatsica. Bajaraxuata, becopabatsi pibisiacuene waja-exanaejawa, juya waja-exanawanapaenexa ëpexaniacuene Dioso pejitsipaecuenia. Benajamatabëcuenexatatatsi pexaniajailiwaisita, paliwaisita nacacueneyacaranatsijitsia pibisiacuene waja-exanaeyaniwa, pacuenia wajabitsaë xaniawaetsia banaxataba piatajawanëg matacabita penawajabitsaëtsiwajënaeya.
13 Aeconoxae baja waxaitsi Jesús peliwaisi wajanajuajumexaniataewi, bewajajinawanapaewi matacabita, Jesucristo pepatsicujinae. Bajaraxuata, wajawajënaeyabelia jinawanapaenatsi xaniawaetsia, wajayapëtaexae pexaniajailiwaisi. Nexata, apoponae tsanetsi pitajibiwijawa, fiestajawa-ata, itsajota pibisiacuene exanawanapa. Apo-exanae tsanetsi pibisiacuene wajawitota, itsacuenejawa-ata xua pibisiacuene. Nabijataeya aponajume-anaenotsi tsanetsi. Itsamonae-ata apocueneca-ëbi tsanetsinua pacuenia exana piajamatabëcuene-itaquiriwi.
14 Biji rajane, bajarapajamatabëcuenemi benawecuaxuabatsi, juya wajanajamatabëcuenexatatsinexa wajatuxanenë Jesucristo pijapexaniajamatabëcuene. Nexata, copatsianatsi waja-exanawanapaejawa wajaperujujamatabëcuene pejitsipaejawanë, juya waja-exanawanapaenexa xuanë siwajamatabëcuenebarëya wajatuxanenë.