Jesús-jawabelia pesiwanajamatabëcuenecopatsijiwi benajamatabëcuenerajuta Diosojawabelia, petonacuenebinexa pijajiwitonëcuenia
12
Tajamonae, daxita bajarapacueniaa Dioso asiwaya wajanacato-exanaexae wajanaca-itaxutotsoniataejamatabëcuene, ayaicuenia pacawajëtatsi panenajamatabëcuenerajutsinexa Diosojawabelia, paneto-exanawanapaenexa ëpapecatojitsipaecuenia daxita pane-asaëtsawanapae-epato. ¡Pacuenia dajubinë altar-jumata pebuatsinëtsi apocuenecaëjëpaetsi pijacuata penatojitsipaecuene pexanaejawa, bajarapijinia pacuenia panataema Dioso pitabarata, pane-exanawanapaejawa papecatojitsipaecuenia, papecasiwabarëyanexa! Bajarapacuenia bitso pacatoxanepana paneto-exanawanapaejawa, panenajamatabëcuene-itajëtsinexa Dioso pane-asiwajawa, panenajamatabëcuenerajutsixae bajaraPonëjawabelia.
2 ¡Pëtsa panacopatame panejamatabëcuenejëpaejawa itsamonae mapanacuapijijamatabëcuene pecajinawanapaewi, papecajamatabëcuenematacaponaeyaniwa, panecuenejëpaeyaniwa-ata! ¡Biji rajane, panajamatabëcuenerajure Diosojawabelia, papecajamatabëcuene-itothianaponaenexa,b ëpejanajamatabëcuene panexainaejawabelia! Nexata, bajarapapejanajamatabëcuene panexainaexae, saicayacuenia pacanaëjëtsianame daxitacuene yabara, mapanacuapijijamatabëcuene pexainaewije pecanaëjëtsijawawecua. Bajarapapejanajamatabëcueneta itsa pacanaëjëtaponaename, payapëtaename pane-exanaenexa xua Dioso pacatojitsipa, xua Dioso tsitaxanepanatsi, xua-ata yabara Dioso pacasiwabarëyajitsia, xaniawaetsia panejinawanapaenexa ëDioso papecatojitsipaecuenia.
Pacuenia Espíritu Santo pejamatabëcuenecaëjëpaeya-exanaejawanë canacuenebijitsia pejanajamatabëcuene pexainaewi, yabara peliwaisi
3 Dioso raja tane-itaxutotsoniataexae, nitoroba tatonacuenebinexa, apoxainae-atanë picani xua yabara nitapeta bajaraxuanexa. Bajarapacuenia Dioso tane-itorobixae, pacaejiwimë canacujitsia pacajumaitsitsi mapacueniaje: ¡Pëtsa paxamëyajuwënëjiwi natane be-ayaijamatabëcuenejiwi, itsa jume, beweliajamatabëcuenejiwi, Dioso papecajamatabëcuenecaëjëpaeya-exanaejawa yabara! ¡Biji rajane, pacuenia Dioso pacajamatabëcuenecaëjëpaeya-exanapona pacaejiwimë canacujitsia, panesiwanajamatabëcuenecopatsixae Cristojawabelia, bajarapacuenia saya baja panataema!
4 Jiwi itsa naexana, peperabëto yajawanaexana. Itsiata, caeperabëtota saicaya xainapona pewënëanë caewito canacujitsia. Saicaya xainaponanua pexanabiabijawanexa.
5 Bajarapijinia pacuenia, waxaitsi-ata itsitsi, Jesucristojawabelia wajasiwanajamatabëcuenecopabiwi. Ayaibitsaëto-atatsi, itsiata caenë Cristo bepeperabëtotsi. Nexata, namata-enetsia benayawenonabiabatsi, be-ayaijamatabëcuenewicuenia nataenejewatsi itsamonaewecua.
6 Be-ayaijamatabëcuenewi apobenataetsi, tsipaji caejiwitsi canacujitsia, pacuenia Dioso nacatojitsipa, saicaya nacajamatabëcuenecaëjëpaeya-exanaponac wajato-exanabiabinexa, wajanaca-asiwaxae. Nexata, Dioso betonacuenebawanapatsi pacuenia nacajamatabëcuenecaëjëpaeya-exanapona. Dioso itsa nacajamatabëcuenecaëjëpaeya-exana jiwi wajatsipaebabiabinexa Dioso pejumeliwaisi, nexata betsipaebabiabatsi xaniawaetsia pacuenia nacajamatabëcuenecaëjëpaeya-exana.
7 Itsa pijinia, Dioso nacajamatabëcuenecaëjëpaeya-exana wajayawenonabiabinexa itsamonae wajanajuajumexaniataewi Jesús peliwaisi, nexata xaniawaetsia beyawenonabiabatsi bajarapamonae. Pajiwi pijinia, Dioso jamatabëcuenecaëjëpaeya-exanatsi Dioso pejumeliwaisi jiwi pecujarubabiabinexa, xaniawaetsia becujarubabiaba daxita pejamatabëcuenesaëta.
8 Pajiwi pijinia, Dioso jamatabëcuenecaëjëpaeya-exanatsi pemuxujiobijawata pejamatabëcuenebarëyaya-exanaenexa itsamonae Jesús peliwaisi pejumexaniataejawa, bajarapajiwi bejamatabëcuenebarëyaya-exanabiaba xaniawaetsia pemuxujiobijawata bajarapamonaejawabelia. Pajiwi pijinia, Dioso jamatabëcuenecaëjëpaeya-exanatsi perajutabiabinexa pexainaeyajuwënëjawa penamatawenonaejiwijawabelia penamatawenonaecuenia, berajutabiaba itsajamatabëcuene xainaenejewa. Pajiwi pijinia, Dioso jamatabëcuenecaëjëpaeya-exanatsi Jesús pijajiwi peto-ewetsinexa, betonamatacapona xaniawaetsia. Pajiwi pijinia, Dioso jamatabëcuenecaëjëpaeya-exanatsi pitaxutobejiobiataenexa penamatawenonaewi, beyawenonabiaba barëyaya.
Pacuenia pejanajamatabëcuene pexainaewi exanawanapaejitsia, yabara peliwaisi
9 ¡Dioso pejanajamatabëcuene papecarajutsixae, xaniawaetsia namata-enetsia pana-asiwamëre tsawanapae! ¡Ayaicuenia panawecua-ataejitsibimëre pibisiacuenejawa! ¡Paca-asaëmëre tsawanapae ëpexaniacuene pane-exanaejawa!
10 ¡Pacuenia nacae-enapijiwi bitso na-asiwa, bajarapacuenia pana-asiwamëre tsawanapae Cristo papijajiwixaemë! ¡Pamonae panenajuajumexaniataewi Jesús peliwaisi, patojitsipare itsamonae petaenexatsi ayaijamatabëcuenewi paxamë matatoxenetsia! ¡Namata-enetsia panayaiyataeyabiabarenua!
11 ¡Pëtsa pafaetabimë Dioso pijacuene panetonacuenebawanapaejawa! ¡Biji rajane, paca-asaëmëre tsawanapae! ¡Daxita panejamatabëcuenesaëta patonacuenebabiabare Dioso pijacuene!
12 ¡Paneyapëtaexae pepacuene Jesús pijajiwi pepitsijawanexa, jamatabëcuenebarëyayad pacopia-ewetawanapare bajarapamatacabi pecopiapatsijawanexa! ¡Nexata, apopanejitsipaecuene pacatocopiapatsi-ata itsacuenejawa yabara, itsamonae apopanejitsipaecuene pacato-exanae-ata, pajamatabëcuenesaëmëre Diosojawabelia! ¡Pa-itaxutuajamatejemamëre panewajënaeyabelia, bitso bajayajebi bajarapacuene pataewanapae-atamë! ¡Daxitamatacabi pawajëtabiabarenua Diosojawabelia pacopatsinejewamë!e
13 ¡Itsajota Jesús peliwaisi panenajuajumexaniataewi namatawenona, payawenonabiabare! ¡Pamonae pacasiwaxaina panijaboyaberena, xaniawaetsia pacopiapitabiabare!
14 ¡Pamonae pibisiacuenia pacabejiobia-exanapona,f patowajëtabiabare Diosojawabelia, pexaniacuenia peyawenonaenexatsi! ¡Pëtsa patowajëtame pibisiacuene juya petocopiapatsinexatsi!
15 ¡Pamonae barëya, bajarapamonae paxamë-ata pajamatabëcueneyawenonaeyabarëyamëre! ¡Pamonae pijinia, najamatabëxaina, bajarapamonae paxamë-ata pajamatabëcueneyawenonaeyanajamatabëxainare!g
16 ¡Najëpaeya panataeyabiabareh daxita Jesús peliwaisi panenajuajumexaniataewi, asiwaya paneyawenonaenexa! ¡Pamonae beweliajamatabëcuenewi-ata, xaniawaetsia payajawajinawanapare yaiyataeya! ¡Nexata, pëtsa panataneme bepa-ayaijamatabëcuenewimë! ¡Pëtsa panatanemenua bitso bepaneyapëtaewii itsamonaewecua, xaniawaetsia panenajuajinawanapaenexa!
17 ¡Itsajiwij pibisiacuene itsa paca-exana, pëtsa juya pibisiacuene panamatamo-exaname! ¡Biji rajane, cuenecanawiatsiaya pa-exanabiabare ëpexaniacuene, xua jiwi tsitaxanepanatsi!
18 Pejanajamatabëcuene Dioso papecarajutsixae,k jamatabëcuenexanepanaeya panajuajinawanapaename daxita, itsaliwaisi paxainaenejewamë itsamonaejawabelia. Bajarapamonae cuenematapitsi-ata, tsiteca pajaitsianame icatsia panenasiwajamatabëcuenexanepanaenexa.l
19 ¡Tajamonae, bitso pataca-asiwawi, itsamonae pibisiacuene itsa paca-exana, pëtsa panamatamotame!m ¡Pacopare saya bajarapamonae Dioso penaneconitsia-exanaenexatsi, tsipaji Dioso pejumeliwaisibaxutota jumaitsi mapacueniaje!: «Pamonae pibisiacuene exana itsamonaejawabelia, Xanë, Diosonë, naneconitsia-exanaenajë, tsipaji ëXanë natocaëjëtajë daxitajiwi tayamatamotsijawa itsamonaejawabelia pibisiacuene pexanaejamatabëcuene»,n jai Dioso pejumeliwaisibaxutota.
20 Dioso pejumeliwaisibaxutota, itsabaxutota, pijinia, jumaitsi mapacueniaje: «¡Nijawajabitsaënë itsa piajani, rajure pexaejawa! ¡Mera itsa jitsipa, rajure mera piapaenexa! Bajarapacuenia itsa to-exanaename, bitso aura tsane. Nexata, pia-urajamatabëcuene bitso itabaratsobia tsane, benetsimata-othotajarabio tsane bepitatsajawi-ipumanata»,p jai Dioso pejumeliwaisibaxutota.
21 ¡Pëtsa panacopatame itsamonae pibisiacuene papecato-exanaejawata papecajamatabëcuenematatoxenetsinexa, panecuenecanawiatsiyaniwanua pibisiacuenia! Biji rajane, pexaniacuenejawata pacuenecanawiatsianame, panecuene-amoneyabinexa pibisiacuene. Nexata, bajarapacuenia pibisiacuene papecato-exanaejiwi-ata, pajamatabëcuenecaewia-exanaename.