Pacuenia judíowi, Israel nacuapijiwiyajuwënëwi, Dioso capanepaejitsiatsi, yabara peliwaisi
11
Bajarapacuenia judíowi apopejumecowënëtsixaea Dioso, apopejumexaniataexaenua Jesús peliwaisi, ¿Dioso tsabaja nexata, pijajiwi, judíowi, nawecuaxuaba, pematatsënëa piasiwayaniwa pijajiwicuenia? ¡Jume raja! Aponawecuaxuabi cajena. Xanë-ata rabaja judíonënë, Israel nacuapijinënë. Tajasalinainë cajena Abraham-pijinë. Benjamin-atab pemomoxibitsaëtoyajuwënënënë, itsiata Dioso asiwaya necapanepa.
2 Bajayata baja cajena, wajawajënaeyami, Dioso itapeta judíowi pijajiwinexa, Israel-pijinë pemomoxi. Nexata, Dioso daxita bajarapamonae apojumecowënëtsi-atatsi, itsiata aponawecuaxuabi tsane daxita bajarapamonae, apojumecowënëtsi-ata. Bajaraxua yabara Dioso pejumeliwaisibaxutota jumaitsi profeta Elíasc pewajëtsijawata Diosojawabelia neconitsiaya mapacueniaje:
3 «Tajatuxanenë, mapamonaeje, Israel nacuapijiwi, catobepona daxita pecajumeliwaisipaebiwimi profetawi. Toxobabianua altar-jawanë, itsajota tajuitabiaba dajubiwi pecarajutsinexa pijaneconijamatabëcuene. Nexata baja, xanë, caenënë, nijajiwitonënë, nacopatajë. Xanë-ata baja jamatabënebeyaxuaba»,d jai profeta Elías Diosojawabelia Israel nacuapijiwi yabara.
4 Itsiata baitsi jane, Dioso jumaitsi profeta Elías-jawabelia mapacueniaje: «Apocaenëmë raja. Xainajë baja tajajiwi, siete mil ponëbeje, Israel nacuapijiwiyajuwënëwi. Bajarapamonae xaniawaetsia nejumecowënëtawanapa. Pematabacabëta apotonubenae, asiwaya penawajëcaenexa Baal-wënë, jumapecataeya pexanaenë pitabarata»,e jai Dioso bajayata profeta Elías-jawabelia.
5 Bajarapijinia itsi maparucae-ataje. Caejiwiyobeje pijinia, Dioso itapetatsi pijajiwinexa, pitaxutotsoniataexaetsi, daxita bajarapamonae apojumecowënëtsi-ata.
6 Bajarapamonae Dioso apo-itapetsitsi, pexaniacuene peto-exanawanapaejawa yabara. Biji rajane, itapetatsi pitaxutotsoniataexaetsi. Dioso itsa itapetsipa bajarapamonae, ëpexaniacuene peto-exanawanapaejawa yabara, nexata amatamobi tsipae pitaxutotsoniataecuene.
7 Nexata, mapacueniaje natotaewanapa Israel nacuapijiwije: Pamonae, ayaibitsaëtoxaneto, natocanaëjëta Dioso pecapanepaejawanexatsi, pexaniacuene peto-exanawanapaejawata, bajarapamonae Dioso apocapanepaetsi. Apopitsi bajarapacuene pejumecowënëtawanapaejamatabëcuene Dioso penajumecopatsiliwaisi Moisés-pijinëta. Biji rajane, saya naexana piajamatabëcuenetajawi, pejumexaniataeyaniwa Jesús peliwaisi. Itsiata baitsi jane, Israel nacuapijiwiyajuwënëwi, caejiwiyobeje, Dioso itapetatsi pijajiwinexa, pejumexaniataexae pexaniajailiwaisi, Cristo peliwaisi, pecapanepaeliwaisinexatsi Diosojawabelia.
8 Nexata, judíowi, maparucaeje pejinawanapaewi, cuenejëpa saya pijasalinaiwimi, pamonae yabara profeta Isaías-pijinë jumaitsi Dioso pejumeliwaisibaxutota mapacueniaje: «Dioso copata bajarapamonae bepejamatabëcuenemajitsiwicuenia pejinawanapaenexa. Bajarapamonae jinawanapanua bepena-itaxuto-acabiwi, penatsiwajënaetaeyaniwa xua pexaniacuene, Dioso pejitsipaecuene. Jinawanapanua bepenamuxu-acabiwi, pejumetaeyaniwa Dioso peliwaisi. Bajarapacuenia jamatabëcuene-itsi tsawanapae bajarapamonae mapamatacabijawaberena-ataje»,f jai Dioso pejumeliwaisibaxutota, Israel nacuapijiwi, bajarapejamatabëcuene-itsijawa yabara.
9 Orijibia, bajayata nacua-ewetsinëmi-ata, David-pijinë, jumaitsi bajarapamonaemi yabara mapacueniaje:
«Xuanëjawabelia Israel nacuapijiwi itaxutuajamatejemag tsabiabi, Dioso pesiwabarëyanexatsi picani, bajaraxuanë tonaexanatsi bepetsi-ayailiwaisinexatsi. Pafiestajawanë exanabiaba Dioso pewënëta, caranata bajaraxuanë tonaexanatsi Diosojawabelia penaneconitsia-exanaejawanënexatsi.
10 »Bajarapamonae naexana bepitaxutotsëcënaewi, penatsiwajënaetaeyaniwa papiayaicuene tocopiapatsijitsiatsi pijaneconijamatabëcuene. Pacuenia bitso piarewejawa pecaponaewi bacanajumafuruta, bajarajamatabëcuene-itsi pijaneconi yabara»,h jai bajayata David-pijinë Israel nacuapijiwi yabara, bajarapamonae ëpexanaecuenejawata pitaxutuajamatejemaxae Dioso pesiwabarëyanexatsi.
Pacuenia apojudíowi-ata Dioso capanepaejitsiatsi, yabara peliwaisi
11 BajarapaDiosojumepaebiwi pejumaitsicueniai judíowi maparucaeje nacopatsi-ata apopejumexaniataejawanexa Cristo pesiwatëpaejawatsi, ¿bajarapacuenia nacopatsiana meta, naxuabiaya pejinawanapaenexa daxitamatacabijawabelia? ¡Jume cajena! Cae-epatoyonexa saya. Judíowi apopejumexaniataexae Jesús peliwaisi, Dioso juya tocopata apojudíowi, pejumexaniataenexa bajarapaliwaisi, pecapanepaenexatsi, pacuenia tocaëjëta picani judíowi. Bajarapacuenia exana, judíowi pecuenecaëbia-exanaenexa, Dioso pecapanepaejawa yabara apojudíowi.
12 Dioso itsiata apotocopatsi tsane judíowi bepitaxutotsëcënaewicuenia pejinawanapaejawa pijaneconi yabara daxitamatacabijawabelianexa. Itsamatacabi bajarapamonae-ata, jumexaniataena Jesús peliwaisi pecapanepaenexatsi Diosojawabelia. Paxamë apopajudíowimë pacaxitajarabame baja pexaniacuene, panejumexaniataexae Jesús peliwaisi, papecapanepaenexa Diosojawabelia, judíowi apopejumexaniatae-epato bajarapaliwaisi. Bajaraxua matatoxenetsia bitso pexaniacuene panatoyapëtaename pacujinae ayaibitsaëto judíowi pacayajawajumexaniataena Jesús peliwaisi.
13 Aeconoxae paliwaisi pacatsipaebatsi, bajarapaliwaisi picani apopajudíowinexamë. Dioso itsiata nitapeta, tatsipaebaponaponaenënexa Cristo peliwaisi daxita apojudíowijawa. Bajaraxuata, bitso siwabarëyanë patacatsipaebijawa yabara bajarapaliwaisi. Nexata, Dioso tane-itorobicuenia, daxita tajamatabëcuenesaëta tsipaebabiabajë Jesús peliwaisi apojudíowijawa,
14 tsipaji bitso jitsipajë tajitsipaeya-exanaenexa tajawiriawi, judíowi, pejumexaniataenexa Jesús peliwaisi, pecapanepaenexatsi Diosojawabelia. Bitso jitsipajë Dioso peto-exanaenexatsi tajawiriawi, pacuenia paxamë pacato-exana papecacapanepaenexa.
15 Dioso nawecua-itaweta ayaibitsaëto judíowi, apopejumexaniataexae Cristo peliwaisi. Nexata juya, apojudíowi maparucaeje Dioso barajamatabëcuenexanepana, pesiwajamatabëcuenecaewixae pebara-anaepanaejawa pijaneconi yabara, Cristo pejamatabëcueneta. Bajarapacuenia Dioso itsa barajamatabëcuenexanepana daxita mapanacuapijiwi, judíowi penawecua-itawetsijawata, matatoxenetsia cajena siwajamatabëcuenebarëya tsane, pamatacabi judíowi-ata jumexaniataena Cristo peliwaisi. Bajarapamatacabi Dioso caewëalia pitsiana, asiwaya petaenexa pijajiwicuenia. Aeconoxae abaxë Dioso tane judíowi bepetëpaewi, apopejumexaniataexae Cristo peliwaisi. Nexata, pamatacabi judíowi jumexaniataena Cristo peliwaisi, Dioso taena bepiasaëya-exanaewitsi petëpaecujinae.
16 Xaniawaetsia wajayapëtaenexa, ayaibitsaëto judíowi pejumexaniataejawanexa Cristo peliwaisi, canaëjëtsianatsi mapaliwaisibeje. Jiwi itsa pitsipa pan-matabëyajuwënëjawa panbë pesebinexa, nexata itsa rajutsipa copiaya pexanaepanbë ofrendacuenia Diosojawabelia, penacopatsi pan-matabë Dioso taejitsipa pijajawacuenia. Bajarapacuenia itsi tsipae naejawajawabelia-ata. Itsa jiwi rajutsipa petabunepe ofrendacuenia Diosojawabelia, nexata daxita pemaxërananë-ata Dioso taejitsipa pijamaxërananëcuenia. Bajarapijinia itsi judíowijawabelia-ata. Dioso pitapetsixae judíowi pijasalinainëmij pijajiwitonënexa, nexata tane pemomoxi-ata pijajiwicuenia.
17 Nexata, Dioso petaexae pijasalinainë bepexaniawiria olivonae, tane pijinia pemomoxi bepemaxërananë bajaraponae. Apopajudíowimë pijinia pacatane besaicayawiria olivonaemaxërananë. Bajaraxuata, pexaniawiria olivonae pecuaik xaniawaetsia apopecapitsapaexae, pexainaenë pejitsipaecuenia, nexata itsamaxëranajawanë caucuba, juya saicayawiria olivonaemaxëranaxi perubinexa bajarapamaxërananëcowëta. Nexata, pexaniawiria olivonae-ënëtuatuajëpijimeral junua bajarapacatsanarubimaxërana-ënëtuatuajëjawa, bajarapacuenia pecapitsapaenexa pexaniacuai. Bajarapijinia pacuenia, Dioso pacato-exana paxamë apopajudíowimë. Judíowi apopejumexaniataexae Cristo peliwaisi, paxamë juya Dioso papijajiwimë paca-exana, pane-exanaenexa xua judíowi apo-exanae.m
18 ¡Bajaraxuata, pëtsa bepa-ayaijamatabëcuenewimë panataneme judíowiwecua, tsipaji panijacuata apopana-itapetsimë Dioso papijajiwinexamë panenaexanaenexa! Pacuenia naejawa, petabunepen pejamatabëcueneta, xaniawaetsia nuca. Aponucae xaniawaetsia pemaxërananë pejamatabëcueneta. Pacuenianua naemaxërananë-ënëtuatuajëpijimera aponasaërajutsi petabunepejawabereca, bajarapijinia paxamë-ata pa-itsimë. Apopajudíowimë apopacacaëjëpae cajena paneyawenonaenexa judíowi pijasalinainëjawabelia. Biji rajane, judíowi pijasalinainë pacanasaërajutao apopajudíowi-atamë. Judíowi apopejumexaniataexae Cristo peliwaisi, pacuenia pijasalinainë jumexaniatane Dioso, bajarapacuenia apopejumexaniataexae, nexata juya paxamë Dioso paca-itaxutotsoniatane. Pacatocopatanua paxamë-ata Cristo peliwaisi panejumexaniataenexa, jiwi pecapanepaeliwaisinexatsi.
19 Bajarapacuenia Dioso papecato-exanaexae, belia apopajudíowimë pajumaitsimë tsipae: «Waxaitsi wajanacarajutsinexa bajarapamonaemi pijataxunae,p judíowiyajuwënëwi wecuatsatatsi pijataxunaemiwecua. Nexata, bajarapataxunaecowëta nacanuba», pajamë meta tsipae.
20 Paxaniajamë rabaja. Bajarapamonae baja cajena pijataxunanaemi Dioso wecuatsatatsi apopejumexaniataexae Cristo peliwaisi. Paxamë, apopajudíowimë, bajarapamonaemi pijataxunaemita Dioso pacanuba, panejumexaniataexae Cristo peliwaisi. ¡Bajaraxua Dioso papecato-exanaexae, pëtsa panataneme bepa-ayaijamatabëcuenewimë bajarapamonaewecua! ¡Biji rajane, bajaraxua, panayajiwitaema! Belia, Dioso paxamë-ata pacawecuatsatsipa bajarapataxunaewecua, itsa paxamë-ata pacopatsipame pane-exanaejawa papexaniacuenejawanë Dioso pacatojitsipa pane-exanaenexa.
21 Itsa Dioso apo-itaxutobejiobiatae judíowi, copiaya pitapetsiwi-ata pijajiwinexa, bitsoyo biji, apopajudíowimë apopaca-itaxutobejiobiatae tsipae bajarapamonae pecowëta panenubenaetaxunaetami papecawecuaxuabinexa, itsa pacopabijitsipame pane-exanawanapaejawa Dioso pejitsipaecuenia.
22 ¡Pacuenecanaëjëre papexaniacuene Dioso pacato-exana! ¡Pacuenecanaëjërenua pacuenia Dioso naneconitsia-exanabiaba apopejumecowënëtsiwitsi! Bajaraxuata, paxamë apopajudíowimë, tsiteca panewajënaeyabelia itsa pa-exanawanapaename Dioso pejitsipaecuenia, bajaraPonë asiwaya pexaniacuene pacato-exanaena judíowi pecowëta. Itsiata, itsa pacopatsipame pane-exanawanapaejawa bajaraxuanë, paxamë-ata Dioso pacananeconitsia-exanaejitsipa, pacuenia exana judíowijawabelia.
23 Nexata, judíowi itsa copabiana Dioso pejume-aebijawa, pejumexaniataenexa Cristo pesiwatëpaejawatsi, pecapanepaenexatsi Diosojawabelia, nexata bajaraPonë icatsia caewëarena capatsianatsi pijataxunaemijawaberena, pexainaenexatsi pijajiwicuenia. Dioso cajena cuenecaëjëpatsi bajarapacuenia peto-exanaenexa judíowijawabelia.
24 Paxamë, apopajudíowimë Dioso pacanuba, judíowi pijataxunaemita, besaicayawiria olivonaejawawerena papeca-ucutsiwi, pecatsatarutsiwinexa pexaniawiria olivonaejawaberena. Bajarapacuenia itsa pacato-exana paxamë, Dioso bitsoyo biji, jitsipaena pijajiwi judíowi peto-exanaenexa. Nexata, itsa jumexaniataejitsipa Cristo peliwaisi, icatsia caewëarena capatsipa pepopijataxunaeta, bepexaniawiria olivonaemaxërana petaewitsi.
Dioso itsamatacabijawabelia capanepaejitsia judíowi, Israel nacuapijiwi
25 Tajamonae, jitsipajë paneyapëtaenexa mapaliwaisije, panejamatabëjumaitsiyaniwa mapacueniaje: «Waxaitsi cajena bitso wajayapëtaewi»,q panejamatabëjaiyaniwa, tsipaji Dioso caenë bitso peyapëtaenë waxaitsi jiwitsiwecua. Bajaraxuata, jitsipajë paneyapëtaenexa Dioso muetsia pexainabuatsiliwaisimi. Itsiata, maparucaeje Dioso nacayapëtaeya-exana pacuenia apojudíowi-ata capanepaejitsia,r petaenexa pijajiwicuenia pacuenia copiaya taeyabiaba Israel nacuapijiwi. Bajaraxuata, ayaibitsaëto judíowiyajuwënëwi baja cajena ajamatabëcuenetaja maparucaeje, pejumexaniataeyaniwa Cristo peliwaisi. Bajarapacuenia Dioso tocopata piajamatabëcuenetajanexa abaxë judíowi, pecaxinaejawabelia pabitsaëtowajëto natocaëjëta apojudíowi, pejumexaniataenexa Cristo peliwaisi. Bajaraxuacujinae jane baja, judíowi matapania copatsiana piajamatabëcuenetajajawa, pejumexaniataenexa Cristo peliwaisi.
26 Nexata, itsa baja copabiana pejume-aebijawami, daxita judíowi, Israel nacuapijiwi, Dioso capanepaenatsi pacuenia baja Dioso pejumeliwaisibaxutota tajëwelia jumaitsi mapacueniaje:
«Jerusalén tomarawerena najetarucaena daxitajiwi pecapanepaenënexa. Bajaraponë daxita judíowi, pamonae Israel-pijinë pemomoxi, wecua-ajibia-exanaena pibisiacuene pexanaeneconimi.
27 Itsa bajaraponë wecua-ajibia-exanaena pibisiacuene pexanaeneconimi, nexata jane baja, to-exanaenajë pacuenia bajayata tajëwelia najumecapanepaeya jumaitsinë bajarapamonae pijasalinaiwimijawabelia»,s jai tajëwelia Dioso pejumeliwaisibaxutota, judíowi pecapanepaejawanexatsi, Cristo pejamatabëcueneta.
28 Ayaibitsaëto judíowiyajuwënëwi, pejume-aebixae Cristo peliwaisi, naexana Dioso pecueyawi, jamatejema paxamë juya, apopajudíowimë, panesiwanajamatabëcuenecopabinexa Cristojawabelia, panejumexaniataexae bajarapaliwaisi. Itsiata, abaxë tsiteca Dioso asiwa judíowi, tsipaji bajayata copiaya Dioso itapeta bajarapamonae pijasalinaiwimi pijajiwinexa.
29 Xuanë Dioso rajuta judíowijawabelia pecanacopabinexa,t bajaraxuanë apowecuacanawiabi tsane. Pamonae pijinia, Dioso junata pijajiwinexa, aponawecuaxuabi tsane.
30 Bajayata, Cristojawabelia panesiwanajamatabëcuenecopabiwajënaeya, paxamë, apopajudíowimë, apopajumecowënëtsimë picani Dioso. Itsiata, maparucaeje Dioso paca-itaxutotsoniatane, panejumexaniataexae Cristo peliwaisi. Bajarapacuenia Dioso pacato-exana, tsipaji judíowi apojitsipae pejumecowënëtsijawa Dioso, pejumexaniataejawanua Cristo peliwaisi.
31 Nexata, pacuenia bajayata paxamë apopajudíowimë apopajumecowënëtsimë Dioso, bajarapijinia pacuenia, maparucaeje judíowi apojumecowënëtawanapae, pacuenia paxamë Dioso paca-itaxutotsoniatane, panejumexaniataexae Cristo peliwaisi, bajarapacuenia bajarapajudíowi Dioso itaxutotsoniataenatsi itsa jumexaniataena Cristo peliwaisi.
32 Bajarapacuenia icatsia, Dioso to-exanaena judíowijawabelia, tsipaji Dioso najëpaeya tocaëjëta judíowi, apojudíowi-ata penaneconitsia-exanaenexau apopejumecowënëtsijamatabëcuene, bajarapijinia pacuenia najëpaeya-ata itaxutotsoniataena.v
33 Bajarapacuenia pexanaexae judíowijawabelia, apojudíowijawabelia-ata, Dioso najamatabëcuene-itajëta pitsijamatabëcuene pexainaenë waxaitsi jiwitsiwecua. ¡Dioso baja cajenaw pitaxutotsoniataenë daxitajiwi pecapanepaenexa! ¡Dioso cajena bitso peyapëtaenë! ¡Daxitaliwaisi bitso pejumeyapëtaenënua! Pacuenia Dioso pexanaenexa najamatabëcuenewereta, pacuenia-ata baja exanapona, waxaitsi bajaraxua Dioso apojamatabëcueneyapëtaetsi.
34 Dioso pejumeliwaisibaxutota jumaitsi mapacueniaje: «Waxaitsi apojamatabëcueneyapëtaetsi xua Dioso najamatabëxaina. Aponacacaëjëpaenua wajamuxujiobinexa-ata.
35 Dioso cajena itsajiwijawabelia-ata apo-amoneyabi. Nexata, xua Dioso rajuta itsajiwijawabelia, aporajutsi piamoneyabimatamo», jai Dioso pejumeliwaisibaxutota Dioso yabara.
36 Dioso cajena pijacuata pexanaenëxae daxitacuene, pewetsinëxaenua, nexata daxitacuene baja cajena Dioso pijajawa. Nexata, Diosojawabelia waxaitsi bejumaitsitsi tsabiabi mapacueniaje: «¡Diosomë, bitso ayaijamatabëcuenenëmë!», bejaitsi tsabiabi daxitamatacabijawabelianexa. Bajara-itsi tsane.