Pablo bitso tojitsipa daxita pewënajudíowi pejumexaniataejawa Jesús peliwaisi
10
Tajamonae, tawënajudíowi abaxë jume-aebi-ata Jesús pesiwatëpaejawatsi pijaneconi yabara, tojitsipajë bitso tajamatabë-ëthëtowetsina Dioso pecapanepaenexatsi. Bajaraxuata, towajëcabiabajë Diosojawabelia, bajarapamonae pejumexaniataenexa Jesús Peliwaisi, Dioso pecapanepaenexatsi.
2 Bajarapajudíowi picani ayaicuenia bitso jamatabëtonacueneba Dioso, pesiwabarëyanexatsi. Itsiata baitsi jane, bajarapamonae apoyapëtae pacuenia Dioso tojitsipatsi peto-exanawanapaenexa.
3 Bajarapamonae xaniawaetsia aponatoyapëtae pacuenia Dioso pepacuene aneconijibia taejitsiatsi. Bajaraxuata, jamatabëcuenenawëxaniabiaya pijacuata natocanaëjëta Dioso aneconijibia petaenexatsi, pejumecowënëtsijawata Dioso penajumecopatsiliwaisi Moisés-pijinëta. Pejume-aebixae Jesús peliwaisi, apojitsipae pexanaenexa pacuenia Dioso itorobatsi, aneconijibia petaenexatsi.
4 Mapacuenia Dioso caëjëta aneconijibia jiwi petaejawanexaje: Pajiwi siwanajamatabëcuenecopata Jesucristojawabelia, pijaneconi petomatamotsinëxaetsi, bajarapajiwi Dioso aneconijibia taenatsi. Bajaraxuata, bajarapajiwi pematatsënëa baja apobenajamatabëxainae, pejumecowënëtsinexa icatsia Dioso penajumecopatsiliwaisi Moisés-pijinëta, Dioso aneconijibia petaenexatsi, tsipaji baja Cristo tocopiarucaeya-exanatsi bajarapajumecowënëtsicuene.
5 Pamonae jitsipa Dioso aneconijibia petaenexatsi, pejumecowënëtsixae Dioso penajumecopatsiliwaisi Moisés-pijinëta, bajayata peyaquinaeliwaisi jumaitsi mapacueniaje: «Pajiwi jumecowënëtsicapanepaena daxita pacuenia bajarapaliwaisita itorobatsi, bajarapajiwi matapania Dioso aneconijibia taenatsi»,a jai Moisés-pijinë bajayata peyaquinaeliwaisita.
6 Nexata, pamonae pijinia, jumexaniatane Cristo pesiwatëpaejawatsi, pibisiacuene pexanaeneconi yabara, bajarapamonae pejume-itawetsinexatsi, Dioso jumaitsi mapacueniaje: «¡Pëtsa pajamatabëjumaitsimë: ‘¿Jipatsa meta athëbëabetsia ponaena mapanacuayabetsicaje, pebarëpatsinexatsica wajanacayawenonaenënexa?’ pajamatabëjamë pëtsa!
7 ¡Pëtsa pajamatabëjumaitsimënua: ‘¿Jipatsa meta ponaena, itsabereca petëpaewi jinawanapa, piasaëya-exanaenexa petëpaejawawecua wajanacayawenonaenënexa?’ pajamatabëjamë pëtsa!»,b jai Dioso jiwi pejume-itawetsijawa. Nexata, itsajiwi-ata apobejamatabëjumaitsi bajarapacuenia, tsipaji baja, Cristo athëbëwetsica patsica baja, wajanacasiwatëpaenexa mapanacuataje. Petëpaecujinae-ata baja, icatsia Cristo asaë petëpaejawawecua wajanacacapanepaenexa.
8 ¡Taema xua yabara, Dioso pejumeliwaisibaxutota jumaitsi mapacueniaje!: «Dioso rabaja pejumeliwaisi panatoxainame. Bajarapaliwaisi yabara panabarëcuaicuaijamë tsabiabi. Panejamatabë-ëthëtota-ata baja bajarapaliwaisi yabara panajamatabëxainabiabame»,c jai Dioso pejumeliwaisibaxutota. Bajarapaliwaisibeje naliwaisijëpabeje paliwaisi paxanë pacatsipaebatsi panejumexaniataenexa Cristo papecasiwatëpaejawa pibisiacuene pane-exanaeneconi yabara.
9 Itsa panawajunupaebianame itsamonaejawabelia paxamë paneyapëtaejawa Jesús petuxanenëcuene, Dioso pexënatocuene-ata, itsa pajumexaniatanemenua panejamatabë-ëthëtojawawetsina Jesús petëpaecujinae icatsia Dioso piasaëya-exanaejawatsi, nexata Dioso pacacapanepaena.
10 Pajiwi baja pejamatabë-ëthëtojawawetsina jumexaniatane Cristo pesiwatëpaejawatsi, pibisiacuene pexanaeneconi yabara, bajarapajiwi Dioso aneconijibia taenatsi. Nexata, bajarapajiwi nawajunupaebiana pecuaibowojotota, pejumexaniataejawa Cristo pesiwatëpaejawatsi pibisiacuene pexanaeneconi yabara. Bajarapacuenia nayapëtane bajarapajiwi Dioso pepacuene pecapanepaejawatsi.
11 Xaniajanë, tsipaji Dioso pejumeliwaisibaxutota jumaitsi mapacueniaje: «Pajiwi siwanajamatabëcuenecopata wajatuxanenëjawabelia, bajarapajiwi aponacueratsi tsane»,d jai Dioso pejumeliwaisibaxutota, Cristo jiwi pesiwatëpaejawanexa pibisiacuene pexanaeneconi yabara.
12 Bajarapacuenia jumaitsi, tsipaji wajatuxanenë Cristo najëpaeya tane judíowi, apojudíowi-ata. Nexata, daxita pamonae siwanajamatabëcuenecopaba bajaraPonëjawabelia, bajarapamonaenexa najëpaeya pijatuxanenë tsaponaponae. Bajaraxuata, itsa wajëtae bajaraPonëjawabelia peyawenonaenexatsi, wajatuxanenë ayaicuenia itaxutotsoniataeyabiaba, najëpaeya yawenonabiabanua, judíowi, apojudíowi-ata.
13 Bajaraxua yabara Dioso pejumeliwaisibaxutota jumaitsi mapacueniaje: «Pajiwi pepopetuxanenëjawabelia nawajëta pecapanepaenexatsi, bajarapajiwi capanepaenatsi»,f jai Dioso pejumeliwaisibaxutota.
14 Itsiata, acuenebi itsajiwi-ata penawajëtsinexa Cristojawabelia pecapanepaenexatsi itsa abaxë apojumexaniatae Cristo pesiwatëpaejawatsi pibisiacuene pexanaeneconi yabara. Itsajiwi-ata acuenebi pejumexaniataenexa Cristo peliwaisi itsa abaxë apojumetae bajarapaliwaisi. Itsajiwi-ata acuenebi peyapëtaenexa Cristo peliwaisi itsa abaxë apotsipaebitsi.
15 Dioso pijajiwi itsa apo-itorobi tsipae daxitajiwijawa Cristo peliwaisi petsipaebaponaenexa, nexata itsajiwi-ata apoyapëtae tsipae bajarapaliwaisi. Dioso pejumeliwaisi jiwi petsipaebaponaewinexa yabara, Dioso pejumeliwaisibaxutota jumaitsi mapacueniaje: «Pexaniacuene bitso itsa jiwi najetarubena, pexanialiwaisi petsipaebanajetarubenaenexa»,g jai.
16 Pexanialiwaisi itsamonae tsipaebi-ata judíowijawabelia, itsiata bajarapamonae apojitsipae pejumexaniataenexa pexanialiwaisi pecapanepaeliwaisinexatsi picani Diosojawabelia. Bajayata, Isaías-pijinë-ata jiwi apojumexaniataetsi. Nexata, Isaías-pijinë Diosojawabelia jumaitsi mapacueniaje: «Tajatuxanenë, daxitajiwi aponejumexaniatae tatsipaebiliwaisi nijajiwitonë yabara. Caejiwiyobeje saya nejumexaniatane»,h jai bajayata Isaías-pijinë Diosojawabelia.
17 Nexata, jiwi itsa jumetane Cristo pesiwatëpaejawatsi, pibisiacuene pexanaeneconi yabara, matapania cuenecaëjëpatsi pejumexaniataenexa bajarapaliwaisi, pesiwanajamatabëcuenecopabinexa bajaraPonëjawabelia.
18 Xanë nayanijobajë: «¿Judíowi meta itsamonae apotsipaebitsi Cristo pesiwatëpaejawatsi pibisiacuene pexanaeneconi yabara?», jamatabëjanë. Bajarapamonae baja cajena jumetane picani. Itsiata, apojumexaniatae petsipaebiliwaisitsi. Bajaraxua yabara Dioso pejumeliwaisibaxutota jumaitsi mapacueniaje:
«Dioso pijajiwi tsipaebanajetarubena daxitanacuanëjawa Dioso pejumeliwaisi. Nexata, bajarapaliwaisi baja yacaëjëpa daxitanacuanëjawa»,i jai Dioso pejumeliwaisibaxutota.
19 Icatsia, nayanijobajë: «¿Judíowi meta apoyapëtae pajamatabëcuene yabara Cristo siwatëpatsi?», jamatabëjanë. Yapëtane baja picani. Itsiata, apojitsipae pejumexaniataejawa. Moisés-pijinë bajaraxua yabara yaquina mapacueniaje:
«Xanë, Diosonë, apojudíowi taenajë tajajiwicuenia. Bajarapacuenia exanaenajë panecueneca-ëbinexa, panecuenebara-anaepanaenexanua. Nexata, panecuenetaejawata asiwaya tataejawa bajarapamonae, caewëarena icatsia xanëjawaberena panajamatabëcuenepënëyorotsianame, asiwaya patajiwimëcuenia patacataenexa»,j jai Moisés-pijinë bajayata peyaquinaebaxutota Dioso tajëwelia pejumaitsijawa judíowi yabara.
20 Profeta Isaías-pijinë-ata bajayata ajumejunawijibia apojudíowi yabara Dioso tajëwelia pejumaitsijawa, jumaitsi mapacueniaje:
«Pamonae picani aponejaitsi tayawenonaenexa, bajarapamonaejawabelia itsamatacabi naitajëtsianajë tayawenonaenexa. Nexata baja, neyapëtaena. Pamonae aponewënëliwaisiyanijobi-ata, najamatabëcuene-itajëtsianajë bajarapamonaejawabelia»,k jai Dioso tajëwelia, jai bajayata Isaías-pijinë Dioso pejumaitsijawa apojudíowi yabara.
Bajaraxuata, nayapëtane tajëwelia Dioso penajamatabëcueneweretsijawa, pecapanepaejawanexa apojudíowi-ata.
21 Biji rajane, judíowi yabara Dioso pejumaitsijawa, Isaías-pijinë bajayata jumaitsi mapacueniaje:
«Daxitamatacabi asiwaya junatabiabajë picani, tayawenonaenexa pamonae apotanejumecowënëtsiwi. Itsiata, ajamatabëcuenetaja, pexanaenexa ta-itorobicuenia»,l jai bajayata Isaías-pijinë Dioso pejumaitsijawa judíowi yabara.