Dioso itapetsi-ata judíowi pijajiwinexa, ayaibitsaëto itsiata ayaibitsaëto jume-aeba Jesús peliwaisi
9
Tasiwanajamatabëcuenecopatsixae Cristojawabelia, xaniajanë pacuenia majota yaquinajë tawënajudíowi yabaraje. Aponajumetsënëtsinë cajena. Biji rajane, Espíritu Santo tanejamatabëcuenematacaponaexae, neyapëtaeya-exana taxaniajaijawa bajaraxua yabara.
2 Bitso siwanajamatabëxainaponaponajë tawënajudíowi, Israel-pijinë pemomoxi yabara. Belia, beta-ajamatabëtanea tsaponaponae tasiwanajamatabëxainaejawa bajarapamonae.
3 Bajarapamonae pejume-aebixae Jesús peliwaisi, bitso siwanajamatabëxainajë. Nexata, bajarapamonae yabara jamatabëjumaitsinë: «Itsa Dioso netocopatsipa xanë tanaxuabinexa Cristowecua, nexata bajarapacuenia nacaewetsipajë, bajarapamonae juya pecapanepaenexatsi», jamatabëjanë, bitso ta-asiwaxae.
4 Bajarapamonae Israel-pijinëb pemomoxixae, Dioso bajayata picani itapetatsic pexi pexanaenexatsid daxitawiriawiwecua. Nexata, bajarapamonaemijawabelia bajayata picani Dioso ayaicuenia yawenonabiaba itsamonaewecua. Pitapetsixae pexi pexanaenexa, tsitanaitajëtabiabatsi pijapeniweniwenaecotiata.e Bajarapamonaemijawabelia Dioso namata-enetsia najumecapanepaeya najumeliwaisicajoneyabiabanua.f Orijibia, Dioso rajutatsi penajumecopatsiliwaisi Moisés-pijinëta pejumecowënëtawanapaenexa. Itorobatsinua pexanaenexa templobo, itsa pabota najamatabëcuene-itajëtabiabijitsia Diosojawabelia asiwaya peyaiyataejawa pitorobicueniatsi. Orijibia, Dioso baja najumecapanepaeya jumaitsinua bajarapamonaemijawabelia, pexaniacuenia peyawenonabiabinexa, peto-itorobinexatsicanua, pecapanepaenënexatsi.
5 Bajarapamonaemi pijasalinaiwimi,g pewënëjonewimi, Dioso pejume pejumexaniataexae, Dioso itapeta daxita judíowi, Cristo-ata pijasalinaiwinexa. Nexata, Cristo itsa naexana mapanacuataje, judíonëcuenia naexana. Bajaraxuata, naexana judíowiyajuwënënë. Bajaraponë Cristo, Diosonë baja cajena. Daxitacuene pewetsinënua. Nexata, bajaraponëjawabelia jiwi jumaitsi tsabiabi tsane: «Xamë Cristomë, bitso baja cajena, ayaijamatabëcuenenëmë», jai tsabiabi tsane daxitamatacabijawabelianexa. Bajara-itsi tsane. Daxita bajarapapexaniacuenejawanë Dioso to-exanae-atatsi, tawënajudíowi jume-aeba Jesús peliwaisi, pesiwanajamatabëcuenecopabiyaniwa bajaraPonëjawabelia.
6 Ayaibitsaëto judíowi jume-aebi-ata daxita Dioso najumecapanepaeya pejumaitsijawami bajarapapexaniacuene yabara, bajarapamonae apojume-amatamobiaya-exanae Dioso pejumaitsijawami. Biji rajane, yapëtanetsi pacuenia daxita Abraham-pijinë pemomoxi Dioso apo-itapetsi pijajiwinexa.
7 Bajaraxua yabara, Dioso pejumeliwaisibaxutota nacayapëtaeya-exana pacuenia bajayata Abraham-pijinë pemomoxi ayaibitsaëto xainae-ata, daxita itsiata Dioso apototaetsi Abraham-pijinë pepopemomoxicuenia. Bajayatami Dioso jumaitsi bajaraponëjawabelia:h «Caenë nexënato, Isaac, pemomoxi itapetajë peponemomoxicuenia tacatotaenexa, daxita itsamonae nemomoxiwecua», jai Dioso Abraham-pijinëjawabelia.
8 Bajaraxuata, yapëtanetsi mapacueneje: Daxita pamonae Abraham-pijinë pemomoxi naexanae-ata, itsiata Dioso apotaetsi Abraham-pijinë pepopemomoxicuenia. Matapania pajiwi jumexaniatanei pacuenia Dioso najumecapanepaeya jumaitsi, bajarapajiwi jane baja, Abraham-pijinë pepopemomoxicuenia tanetsi.
9 Dioso tajëwelia najumecapanepaeya jumaitsi Abraham-pijinëjawabelia mapacueniaje: «Icatsia, caewaicujinae patsianajë. Nexata, bajarapamatacabijawa nijawa, Sara, xainaena pexënatonëyo»,j jai Dioso Abraham-pijinëjawabelia, Isaac-pijinënexa yabara.
10 Orijibia, yapëtanetsi daxita Abraham-pijinë pemomoxi, Dioso apopitapetsijawa pepopemomoxicuenia petaenexatsi, tsipaji bexëajawabelia bajaraponë pexënato Isaac-pijinë baja pepuanacojiobi, Dioso icatsia tajëwelia jumaitsi Isaac-pijinë pijawa Rebecajawabelia. Bajarapamatacabijawa bajarapowa baja yacotaponapona sapalanëbeje.k
11-13 Itsa abaxë bajaraponëbeje aponaexanaebeje, pexaniacuene, pibisiacuene-ata, abaxë itsa apo-exanaebeje, bajarapamatacabi Dioso tajëwelia jumaitsi Rebecapijiwajawabelia mapacueniaje: «Panacuetonëyo copiaya cawecuanaexanaena, bajaraponëyo jamatabëcuene-ewetsiana pejuyapijinë pitorobabiabinexatsi pijajiwitonëcuenia»,l jai Dioso tajëwelia Rebecapijiwajawabelia. Bajarapacuenia Dioso pejumaitsijawa Rebecapijiwajawabelia, najumejëpabeje pacuenia jumaitsi Dioso pejumeliwaisibaxutota pexënatobeje yabara: «Asiwanë juyapijinë Jacob, matapijinë Esaú matatoxenetsia»,m jai Dioso pejumeliwaisibaxutota bajaraponëbeje yabara. Nexata, bajaraponëbeje tocopiapatatsibeje pacuenia Dioso tajëwelia jumaitsi pitapetsijawanexa pijajiwitonënexa juyapijinë, matapijinëwecua. Nexata, bajarapacuenia yapëtanetsi mapacueneje: Dioso cajena ba-itapeta pajiwi jamatabë-itapeta pijajiwitonënexa. Dioso apo-itapetsi bajarapajiwi pexaniacuene pexanaejawa yabara. Bajarapacuenia penaexanaewajënaeyabeje Dioso tajëwelia itapeta juyapijinë, matapijinëwecua.
14 Dioso pajiwi jitsipa pitapetsinexa, itapetabiaba. Nexata, bajaraxua yabara waxaitsi apobejumaitsitsi mapacueniaje: «Dioso baja cajena pacuenia exana, apoxanepanae», apobejaitsi, tsipaji Dioso ëpexaniacuene pexanaenë.
15 Dioso bajayata jumaitsi Moisés-pijinëjawabelia: «Pajiwi jamatabë-itaxutotsoniataniji, itaxutotsoniataenajë»,n jai Dioso.
16 Nexata, pajiwi Dioso jamatabë-itaxutotsoniatane, itaxutotsoniataeyabiaba, itsacuenejawayo-ata bajarapajiwi Dioso pejitsipaecuenia apo-exanabiabi-ata. Dioso apo-itaxutotsoniataetsinua, bajarapajiwi pijacuata penatojitsipaejamatabëcuene yabara.
17 Dioso, pejumeliwaisibaxutota, nacayapëtaeya-exana pacuenia bajaraPonë bajayata jumaitsi Egipto nacua pewetsinëjawabelia: «Xanë catocopatatsi newetsinexa nijanacua, tacatsitajëtsinexa pinijicuenesaë taxainaenëcuene, daxitanacuanëpijiwi tanewënëyapëtaenexanua tasaënëcuene, pinijicuene ta-exanaejawa paxamëtuatuajëta»,o jai tsarucae Dioso Egipto nacua pewetsinëjawabelia.
18 Bajaraxuata, yapëtanetsi pacuenia pajiwi Dioso jamatabë-itaxutotsoniatane, itaxutotsoniataeyabiaba. Pajiwi pijinia, Dioso jitsipa pejamatabëcuene-atajaya-exanaejawa, pejumecowënëtsiyaniwatsi, ajamatabëcuenetajaya-exanabiaba.
19 Nexata, meta, Dioso yabara pajumaitsimë tsipae: «Itsa Dioso jiwi ajamatabëcuenetajaya-exana pejumecowënëtsiyaniwatsi, nexata bajarapajiwi Dioso apobenaneconitsia-exanae, tsipaji bajarapajiwi apojumecowënëtsi Dioso piajamatabëcuenetajaya-exanaexaetsi», pajamë meta tsipae Dioso yabara.
20 ¡Tajamonae, pëtsa bajarapacuenia pajumaitsimë Dioso yabara, tsipaji bajaraPonë paca-exana! Canalito itsa caëjëpaejitsipatsi pecuaicuaijainexa, itsacanalitowecua saicayacuenia faratsi-atatsi, pefaratsiwatsijawabelia apojumaitsi tsipae: «¿Detsa xuajitsia nefaratame saicayacuenia itsacanalitowecua?», apojai tsipae pefaratsiwatsijawabelia,
21 tsipaji atsananitota pefaratsiwa caëjëpatsi canalito pefaratsinexa pacuenia jamatabëfarata. Nexata, caëjëpatsi pefaratsinexa pexaniacanalito, botuatuajëta itabëtsiaya pe-etsinexa. Caëjëpatsinua pefaratsinexa beweliacanalito, saya pecajayababiabinexa. Cae-atsananitota caëjëpatsi pefaratsinexa pitsicanalito jamatabëfarata, bajarapananito cuene-itawetsinejewatsi.
22 Bajarapijinia pacuenia, Dioso baja exana jiwijawabelia pacuenia tsitaxanepanatsi. Ayaicuenia Dioso jamatabënaneconitsia-exana daxita pamonae naneconita bajaraponëjawabelia. Jamatabëtsitajëtanua pesaë bajarapamonaejawabelia. Itsiata baitsi jane, abaxë bajayajebi Dioso najamatabëcuenecataita pewerebiabiwijawabelianexa, toxanepanae-atatsi picani bajarapacuenia pexanaenexa.
23 Bajarapacuenia Dioso najamatabëcuenecataita, jamatejema nawënëxaniatsiaya penajamatabëcuene-itajëtsinexa ayaicuenia pitaxutotsoniataejawa pamonae jamatabëcapanepa. Bajarapacuenia Dioso jamatabë-exana waxaitsijawaberena, petsitanajamatabëcuene-itajëtsinexa daxitanacuapijiwijawabelia ayaijamatabëcuene pexainaejawa, tsipaji baja cajena wajanaexanaewajënaeya-ata, Dioso naca-itapeta wajayajawajinawanapaenexa athëbëtatsia.
24 Dioso nacajunata daxitatsi pijajiwinexatsi, paxanë pajudíowiyajuwënëwinë, paxamë apopajudíoyajuwënëwimë-ata.
25 Bajaraxua yabara profeta Oseas-pijinë tajëwelia yaquinaruta peyaquinaebaxutota Dioso pejumaitsijawa apojudíowi yabara. Jumaitsi mapacueniaje:
«Pamonae picani apotajajiwi,p bajarapamonae yabara jumaitsinë tsane: ‘Tajajiwi raja mapamonaeje’, janë tsane. Bajarapamonae picani apojitsipaenë. Itsiata, bajarapamonae yabara jumaitsinë tsane: ‘Tajajiwi raja mapamonaeje, ta-asiwawi’, janë tsane.
26 Panacuapijiwijawabelia picani jumaitsinë tsane: ‘Paxamë raja apopatajajiwimë’, janë tsane picani, itsiata bexëa bajarapanacuapijiwi yabara itsamonae jumaitsi tsane: ‘Mara pamonaeje Dioso piasaëtsaponaponaenë pexije’, jai tsane, jai Dioso»,q jai profeta Oseas-pijinë bajayata peyaquinaebaxutota, pamonae apojudíowi-ata, Dioso pijajiwi pexanaejawanexatsi yabara.
27 Profeta Isaías-pijinë pijinia, bajayata tajëwelia judíowi yabara jumaitsi mapacueniaje: «Israel-pijinë pemomoxi bitso ayaibitsaëtoxaneto tsane. Pacuenia manuamenepijitajetabo-atsapërë aponacacuenecaëjëpae wajanamataëjëtsinexa, bajara-itsi tsane. Itsiata baitsi jane, bajarapamonaeyajuwënëwi, caejiwiyobeje saya, Dioso capanepaenatsi.
28 Daxita pamonae naneconita Diosojawabelia, naxatsiayo Dioso naneconitsia-exanaena»,r jai profeta Isaías-pijinë peyaquinaebaxutota.
29 Icatsia, wajayapëtaenexa Dioso pecapanepaejawanexa ëpamonae itaxutotsoniatane, itsajawata pijinia, Isaías-pijinë peyaquinaebaxutota, icatsia jumaitsi mapacueniaje:
«Itsa Dioso, ayaijamatabëcuenenë daxitawecua, aponaca-itaxutotsoniatae tsipae, nexata daxitatsi waxaitsi, Israel-pijinë pemomoxitsi, nacawerebiabijitsipa pacuenia bajayata werebiabatsi daxita Sodoma, Gomorra tomarapijiwimibeje, pijaneconijamatabëcuene»,s jai profeta Isaías-pijinë peyaquinaebaxutota.
Pacuenia judíowi jume-aeba Jesús peliwaisi, jiwi pecapanepaeliwaisinexatsi, tsipaji casaë pijacuata penacapanepaejawanexa, pejumecowënëtsijawata Dioso penajumecopatsiliwaisi Moisés-pijinëta, yabara peliwaisi
30 Bajarapaprofetanëmibeje nacayapëtaeya-exana mapacueneje, judíowi, apojudíowi-ata yabara: Pamonae apojudíowi, aposiwabëjai-ata pejumecowënëtsinexa Dioso penajumecopatsiliwaisi Moisés-pijinëta, bajarapamonae itsiata, Dioso aneconijibia tanetsi, pejumexaniataexae Jesucristo pesiwatëpaejawatsi pibisiacuene pexanaeneconi yabara, pesiwanajamatabëcuenecopabijawata Jesucristojawabelia.
31 Itsiata baitsi jane, pamonae judíowi, asaëyata jumecowënëtawanapae-ata Dioso penajumecopatsiliwaisi Moisés-pijinëta, Dioso aneconijibia petaenexatsi, itsiata aneconijibia apotaetsi pacuenia picani natocanaëjëta.
32 Bajarapamonae Dioso aneconijibia apotaetsi, tsipaji jume-aeba Jesucristo pesiwatëpaejawatsi pibisiacuene pexanaeneconi yabara. Aposiwanajamatabëcuenecopabinua Cristojawabelia, pacuenia picani Dioso tocaëjëtatsi. Biji rajane, natocanaëjëta Dioso aneconijibia petaenexatsi, pejumecowënëtsijawata Dioso penajumecopatsiliwaisi Moisés-pijinëta. Nexata, Jesús peliwaisi tonaexanatsi benamutota pebocae-iboto, pefirapanucaeya-exanaenexatsi bajarapaliwaisi pejumexaniataejawawecua. Bajaraxuata, judíowi Diosowecua naxuabiaya jinawanapa, pejume-aebixae Jesús peliwaisi.
33 Bajarapacuene yabara Dioso tajëwelia jumaitsi Cristo yabara pejumeliwaisibaxutota mapacueniaje:
«Puenetabuatsianajë Jerusalén tomarata bepefirapanucaeya-exanae-ibotocuenia ponë itorobijitsianë jiwi pecapanepaenexa. Pamonae aposiwanajamatabëcuenecopabi tsane bajaraponëjawabelia Dioso wecuanaxuabiana. Pacuenia jiwi bafirapanuca iboto pejamatabëcueneta, bajara-itsi tsane bajarapamonae. Itsiata baitsi jane, pajiwi siwanajamatabëcuenecopatsiana bajaraponëjawabelia, bajarapajiwi aponacueratsi tsane»,t jai tajëwelia Dioso pejumeliwaisibaxutota, Cristo jiwi pesiwatëpaejawanexa pibisiacuene pexanaeneconi yabara.