Espíritu Santo nacajamatabëcueneyawenona wajajumexaniataewi Jesús peliwaisi
8
Tajamonae, Cristo Jesúsa pejamatabëcueneta Dioso aneconijibia wajanacataexae, Espíritu Santo-ata wajanaca-exanaexae becaeperabëto Jesucristojawabelia, Dioso aponacananeconitsia-exanae tsane.b
2 Bajarapacuenia paxamë-ata Cristo papecawecua-ajibia-exanaexae panijaneconi, Espíritu Santo pesaëta pacajamatabëcueneyawenona, caejamatabëcuene panexainawanapaenexa Cristojawabelia. Pacawecua-ajibia-exananua panijapibisiajamatabëcuene papecanamatacaitorobisaë, xua picani pacamatacapona Diosowecua, naxuabiaya panetëpaejawanexa.
3 Canaëjëtsianatsi xua Dioso nacato-exana. Xua Dioso penajumecopatsiliwaisi Moisés-pijinëta apocuenecaëjëpaetsi wajanacato-exanaenexa, pibisiajamatabëcuene wajayajawanaitajëtsixae, bajaraxua baja Dioso nacato-exana. Pibisiajamatabëcuene wajayajawanaitajëtsixae, nacato-acuenebi waxaitsi wajacuata wajajumecowënëtsicapanepaejawa bajarapaliwaisi, Dioso aneconijibia wajanacataenexa. Itsiata, Dioso pexaniacuene nacato-exana. Waja-ajamatabëcuenesaëjibixae, nacato-itorobica pepocaenë pexënato mapanacuataje, penaexanaenexa jiwitonëcuenia, daxita wajaneconimi wajanacatomatamotsinexa wajanacasiwatëpaejawata. Nexata baja, Dioso aponacananeconitsia-exanae tsane wajaneconi pejamatabëcueneta, tsipaji Cristo naneconitsia-exanatsi bepibisiacuene pexanaenë, waxaitsi wajajamatabëcueneta. Wajanacasiwatëpaejawata, nacawecua-ajibia-exananua papibisiajamatabëcuene yajawanaitajëtatsi wajanacanamatacaitorobisaëmi.
4 Bajarapacuenia Dioso nacato-exana Cristo pejamatabëcueneta, xaniawaetsia wajajumecowënëtawanapaenexa daxita Dioso penajumecopatsiliwaisi Moisés-pijinëta wajanaca-itorobicuenia, Espíritu Santo wajanacajamatabëcuenecaëjëpaeya-exanaecuenia. Nexata, maparucaeje apojinawanapaetsi papibisiajamatabëcuene yajawanaitajëtatsi wajanacanamatacaitorobicuenia. Biji rajane, jamatabëcuene-ewetsiaya jinawanapatsi Espíritu Santo wajanacanamatacaitorobicuenia.
5 Tajamonae, bajarapacuenia jinawanapatsi, tsipaji pamonae abaxë jamatabëcuene-ewetsiaya jinawanapa peyajawanaitajëtsijamatabëcuene pejitsipaecuenia pexanabiabinexa, bajarapamonae jamatabëcuene-enabiabatsi ëpibisiacuene pexanaenexa. Pamonae pijinia, jamatabëcuene-ewetsiaya jinawanapa Espíritu Santo pejitsipaecuenia pexanabiabinexa, bajarapamonae jamatabëcuene-enabiabatsi Espíritu Santo pejitsipaecuenia pexanawanapaenexa.
6 Bajarapabitsaëtobeje aponacuenejëpaebeje pexanaecuenejawanë. Nexata, pamonae jamatabëcuene-enabiabatsi pexanaenexa peyajawanaitajëtsijamatabëcuene pejitsipaecuenia, bajarapamonae bepejamatabëcuenetëpaewi Dioso pitabarata. Pamonae pijinia, jamatabëcuene-enabiabatsi, pexanaenexa Espíritu Santo pejitsipaecuenia, bajarapamonae ajamatabëcuenesaë tsawanapae, jamatabëcuenexanepananua Diosojawabelia. Xainaenanua matacabi apopewerewerecaejawa.
7 Pamonae jamatabëcuene-enabiabatsi pexanaenexa peyajawanaitajëtsijamatabëcuene pejitsipaecuenia, bajarapamonae naexana Dioso pitoyawi, tsipaji apojamatabë-exanae Dioso pejitsipaecuenia. Orijibia, apojamatabëcuenecaëjëpaetsi, pejumecowënëtsinexa Dioso penajumecopatsiliwaisi Moisés-pijinëta.
8 Pamonae najamatabëcuenecaeweta pejumecowënëtsinexa peyajawanaitajëtsijamatabëcuene pejitsipaecuenia pexanaenexa, bajarapamonae apocuenecaëjëpaetsi pesiwajamatabëcuenebarëyajawa Dioso.
9 Paxamë baja, maparucaeje apopa-exanawanapaemë pejitsipaecuenia papibisiajamatabëcuene payajawanaitajëtame, tsipaji Dioso pija-Espíritu Santo pacatsijamatabë-eca panesiwanajamatabëcuenecopabixae Jesucristojawabelia, bajaraPonë juya pejitsipaecuenia pane-exanawanapaenexa. Yapëtanetsi baja cajena pajiwi Espíritu Santo apotsijamatabë-ecaetsi, bajarapajiwi Cristo apopijajiwitonë.
10 Itsiata, paxamë, Cristo paneyajawajinawanapaewi, paneperabëto tëpae-ata tsane pibisiajamatabëcuene paneyajawanaitajëtsixae, itsiata, pepopanejamatabëcuene aitawa tsane Diosojawabelia, daxitamatacabijawabelianexa, aneconijibia papecataexae Jesucristo pejamatabëcueneta.
11 PaEspíritu Santo pejamatabëcueneta Dioso namatacotsia-exana Cristo Jesús petëpaejawawecua, bajarapa-Espíritu Santo pacatsijamatabë-eca. Nexata, pacuenia Espíritu Santo asaëya-exana Jesucristo petëpaejawawecua, bajarapijinia pacuenia, paxamë-ata, papecatsijamatabë-ecaexae, pacaperabë-asaëya-exanaena panetëpaecujinae.
12 Tajamonae, bajarapacuenia Dioso wajanacato-exanaexae tsane, nexata apobe-exanawanapaetsi wajayajawanaitajëtsijamatabëcuene pejitsipaecuenia. Biji rajane, exanawanapaenatsi pacuenia Dioso nacatojitsipa.
13 Itsiata, paxamë itsa jamatabëcuene-ewetsiaya pa-exanawanapaejitsipame paneyajawanaitajëtsijamatabëcuene pejitsipaecuenia, nexata naxuabiaya Diosowecua patëpaejitsipame daxitamatacabijawabelianexa. Itsiata baitsi jane, Espíritu Santo pesaëta itsa panawecuacopabaponame paneyajawanaitajëtsijamatabëcuene panejumecowënëtsijawa, juya Espíritu Santo pejitsipaecuenia pa-exanawanapaename. Nexata, apopawecuanaxuabimë tsane Dioso. Paxainaenamenua matacabi apopewerewerecaejawa.
14 Daxita pamonae Espíritu Santo jamatabëcuenenamatacaponatsi, bajarapamonae raja Dioso pexi.
15 Paxamë baja Espíritu Santo pacatsijamatabë-eca. Nexata, Dioso papeximë paca-exana. Apopaca-exanae bepapijajiwimëcuenia papeca-itorobinexa, cujunawiayac panetonacuenebawanapaeyaniwa. ¡Jume baja cajena! Biji rajane, pepacuene Dioso papeximë paca-exana. Nexata, pexixaetsi, Espíritu Santo pejamatabëcueneta: «¡Axa!», nacajaiya-exana Diosojawabelia wajawajëtsijawata.
16 Bajarapacuenia jumaitsitsi Diosojawabelia, tsipaji Espíritu Santo caejamatabëcuene xaina wajajamatabëcuenejawaberena wajanacanayapëtaeya-exanaenexa Dioso pexicuenetsi.
17 Nexata, Dioso pexixaetsi, itsamatacabi Jesucristo yajawa Dioso nacatsicobetsanaena daxita xua toxaina pexi perajutsinexa. Yapëtanetsi pepacuene Cristo yajawa bajaraxuanë wajanajuanacobenaxainaenexa, tsipaji pacuenia Jesucristo bejiobia-exanatsi, bajarapijinia pacuenia, waxaitsi-ata itsamonae nacabejiobia-exanapona.d Nexata jane baja, pacuenia Dioso Pexënato Jesucristo tocopata ayaijamatabëcuenenëcuenia petaenexatsi, bajarapacuenia waxaitsi-ata nacatocopatsiana Pexënato yajawa Dioso pijapeniweniwenaenacuatatsia.
Daxita Dioso pecobecowëjawanë mapanacuataje copia-ewetawanapa pamatacabi Dioso tsitajëtsiana daxitanacuapijiwijawabelia pamonae pepacujiru pexi tsawanapae
18 Tajamonae, xaniawaetsia benatoyapëtanetsi xua pepacuene nacatonamatamota. Daxita apowajajitsipaejawanë,e xua nacatocopiapata mapanacuataje wajajinawanapae-epato, apobesiwabëjaitsi, tsipaji saya bajaraxuanë nacatocopiapata cae-epatoyonexa. Itsiata, xua Dioso nacatoxaina wajanacarajutsijawanexa itsamatacabijawabelia, bitso pexaniajawanë daxitawecua. Bajaraxuanë cabarëyatsi tsawanapae tsane daxitamatacabijawabelianexa. Bajarapapexaniajawanë, bitso penamatamotsijawanë nabejiobitsiacuenia wajajinawanapaejawawecua mapamatacabianëtaje.
19 Itsiata, ëwaxaitsi itatsacajinaeya apocopia-ewetawanapaetsi pamatacabi Dioso naca-itajëtsijitsia daxitanacuanëpijiwi pitabarata, pepacuene pexitsi wajanaca-exanaejawa. Orijibia, daxita Dioso pecobecowëjawanë-ata itatsacajinaeya wajënae-ewetawanapa bajarapamatacabi,
20 tsipaji mapanacuataje Dioso pexanaejawanë, maparucaeje natoyapëtaewanapa pecopiarucaejawanexa, bepejiobicuenia-ata pejinawanapaejawa. Bajarapabejiobicuene Dioso apotocopatsi picani pexanaejawawerenacujinae, penaneconitsicuenia penacopatsinexa. Biji rajane, bajarapaneconi canacopata Adán-pijinë pijaneconijamatabëcueneta.f Itsiata baitsi jane, itsamatacabi Dioso copiarucaeya-exanaena daxitacuene pewerewerecaponaejawa.
21 Pamatacabi Dioso pexitsi pepacuene nacawecua-ajibia-exanaena daxita xua nacatocopiapata Adán-pijinë pibisiacuene pexanaejamatabëcuene. Nexata jane baja, jamatabëcuenebarëya tsawanapae tsanetsi, bajarapajamatabëcuenewecua wajanacacapanepaexae. Bajarapamatacabitanua, Dioso wecua-ajibia-exanaena pewerewerecaecuene daxita pecobecowëjawanë, bepejiobicuenia pejinawanapaejawa. Bajaraxuata, daxita Dioso pecobecowëjawanë yajawa itatsacajinaeya copia-ewetawanapatsi bajarapapexaniacuenejawanë wajanacato-exanaenexa.
22 Yapëtanetsi baja cajena pacuenia Adán-pijinë pibisiacuene pexanaecujinae, daxita Dioso pecobecowëjawanë mapanacuataje nabejiobitsiaya nacopata mapamatacabijawaberena-ataje. Nabejiobitsiaya pejinawanapaexae, nexata pacuenia petiriwa itsa wixaepitatsi penacueto bayajamatabëcuenebëjai bepijiayo pewecuanaexanaenexatsi, bajarapijinia pacuenia, daxita Dioso pexanaejawanë bëjaiya copia-ewetawanapa, bepijiayo petocopiapatsinexatsi pewecua-ajibia-exanaejawatsi piawitanecuene, petëpaecuene itsa piabejecuenejawanë-ata.
23 Itsiata, ëmapanacuapijicuenejawanë bëjaiya apojinawanapae, bajarapacuene pewecua-ajibia-exanaenexatsi. Waxaitsi-ata, wajasiwanajamatabëcuenecopabiwi Jesucristojawabelia, jamatabëcuene-aitatsacaeya copia-ewetawanapatsi, bepijiayo wajanacawecua-ajibia-exanaenexa wajaperabëto petëpaejawa. Yapëtanetsi xaniajai bajarapapexaniacuene wajanacato-exanaejawanexa, tsipaji copiaya nacatsijamatabë-ecaeya-exana Espíritu Santo bajaraxuanë pewajënaeya, wajayapëtaenexa pitsipexaniacuene nacato-exanaejitsia. Bajaraxuata, bëpënëa jamatabëcuenenuatsi, bepijiayo wajanacatocopiapatsijawanexa Dioso wajanaca-itajëtsijawanexa pexicuenetsi daxitanacuanëpijiwijawabelia, wajanacaperabë-itothianaenexanua pacuenia Cristo perabë-itothianatsi.
24 Bajarapacuenia abaxë copia-ewetawanapatsi, Dioso wajanacato-exanaenexa bajarapapexaniacuenejawanë, wajasiwanajamatabëcuenecopatsijawata Jesucristojawabelia. Xua baja xainatsi, bajaraxua apocopia-ewetawanapaetsi wajapitsinexa.
25 Biji rajane, xua abaxë apoxainae-atatsi, itaxutuajamatejemaya copia-ewetawanapatsi, jamatabëcuenenaxanetsinejewatsi Dioso wajanacarajutsijawanexa.
26 Nexata, Espíritu Santo nacajamatabëcueneyawenonabiaba paepatota jamatabëcuenefaefaenatsi, siwanabejiobitsiaya jinawanapae-atatsi papexaniacuene Dioso nacarajutsijitsia. Nexata, paepatota apoyapëtaetsi pacuenia wajëtsijitsiatsi Diosojawabelia, bajarapaepatota, Espíritu Santo bëpënëa bitso nacasiwanajamatabëxainaeya, petsixanepanaecueniatsi nacatowajëtabiaba asaëyata Diosojawabelia. Xua picani apowënëjonecapanepaetsi, Espíritu Santo nacatowajëtabiaba.
27 Dioso baja cajena nacajamatabëcueneyapëtane xua najamatabëxainatsi. Nexata, xaniawaetsia apoyapëtae-atatsi xua yabara wajëcaejitsiatsi Diosojawabelia, itsiata, Espíritu Santo nacatowajëtabiaba,g daxitatsi Dioso wajanaca-itapetsiwi. Espíritu Santo, Diosobeje, caejamatabëcuene pexainaexaebeje, nacatowajëcabiaba ëDioso pejitsipaecuenia.
Pajiwi Diosojawabelia itaxutuajamatejema, jamatabëcuenematatoxenetabiaba daxitacuene, pibisiacuene tocopiapatsi-atatsi, Jesucristo peyawenonabiabixaetsi
28 Bajarapacuenia Espíritu Santo wajanacato-exanabiabixae, nexata apobejamatabëcuenefaefaenaetsi Diosojawabelia pacujinae nacatocopiapata apowajajitsipaecuenejawanë-ata. Biji rajane, bejamatabëcuenematatoxenetatsi daxita xua nacatocopiapata, tsipaji yapëtanetsi Dioso bajaraxuanë pecanacuenebijawa. Daxita xua nacatocopiapata pexaniacuenejawanë, pibisiacuenejawanë-ata, Dioso canacueneba pecapitsapaenexa papexaniacuene tsitaxanepanatsi, wajanacajamatabëcueneyawenonaenexa. Bajarapacuenia Dioso canacueneba petsiwajënaecanaëjëtsicuenia, petoxanepanaenexatsi daxita pamonae Dioso asiwa tsawanapae.
29 Tajamonae, tajëjawawerenacujinae wajanaexanaewajënaeya, Dioso yapëtane pexitsi wajanaca-exanaejawanexa. Nexata, nacasiwanajamatabëcuenewereta pacuenia Pexënato jamatabëcuene-itsi, bajarapacuenia waxaitsi-ata wajajamatabëcuene-itsinexa. Bajarapacuenia Dioso nacato-exana waxaitsijawaberena, Pexënato pecanacopatsinexa pepomatapijinëcuene pexitsituatuajëta ayaibitsaëto-atatsi.
30 Tajëjawawerenacujinae, nacasiwanajamatabëcueneweretanua, wajanacajamatabëcuenejëpaeya-exanaenexa pacuenia Pexënato jamatabëcuene-itsi. Nacajunatanua, pexitsi wajanaca-exanaenexa. Wajanacajunatsiwi pijinia, nacawecua-ajibia-exana pibisiacuene waja-exanaeneconimi, aneconijibia wajanacataenexa. Aneconijibia wajanacataewi nacatocaëjëta itsamatacabi ayaijamatabëcuenewi wajanacataenexah Pexënato yajawa, Dioso pijapeniweniwenaenacuatatsia.
Pajiwi Dioso itaxutuajamatejema, apocuenecaëjëpaetsi itsacuenejawa pejamatabëcuenematatoxenetsinexatsi, pewecuatsatsinexatsinua Dioso piasiwajawatsiwecua
31 Nexata, ¿debejamatabëjumaitsitsi bajaraxuanë yabara? Itsa waxaitsi Dioso nacayajawa tsaponaponae, ¿itsajiwi caëjëpatsi wajanacajamatabëcuenematatoxenetsinexa, wajanacacuenecaranatsinexanua Dioso wajanacayawenonaejawanexa? ¡Jume baja cajena!
32 Yapëtanetsi pepacujiru Dioso asiwaya wajawajënaeyabelia wajanacayawenonaejawanexa, tsipaji aponacawecua-asiwa pepoPexënato-ata. Caranata, copata Pexënato wajanacasiwatëpaenexa, daxita waxaitsi wajaneconi yabara. Itsa bajarapacuenia aponacawecua-asiwa Pexënato, ¿detsa pacuenia biji, aponacarajutsi tsipae daxita xua namatawenonatsi, wajatojinawanapaenexa pejitsipaecuenia? Nacayawenonaena cajena.
33 ¿Jipatsa cuenecaëjëpatsi, wajanaca-itapetsiwi wajanacaneconitsinexa Diosojawabelia? ¡Ajibi cajena! Dioso baja cajena pijacuata nacacuenewajunupaeba waja-aneconijibijawa,i Jesucristo pejamatabëcueneta.
34 Dioso wajanaca-aneconijibia-exanaecujinae, ¿jipatsa cuenecaëjëpatsi wajanacananeconitsia-exanaejawa bajaraPonëjawabelia? ¡Ajibi cajena! Cristo baja wajanacasiwatëpaejawata, capanepaeya nacaneconimatamota. Xuacujinae, icatsia namatacota petëpaejawamiwecua, pe-ecaenexa athëbëtatsia Paxa Dioso pemuxuneneta, pecujuanenia. Bajarajotatsia, Jesucristo nacayapijiwicuaicuaijai tsecae Diosojawabelia. Itsa wajanacaneconimatamotsinë nacayapijiwicuaicuaijai, acuenebi itsamonae pejumeta wajanacananeconitsia-exanaejawa Diosojawabelia.
35 ¿Cuenecaëjëpatsi tsaja itsacuenejawa Cristo wajanaca-asiwacuene wajanacawecuatsatsinexa? ¡Ajibi cajena! Nexata, wajanabejiobitsicueneta ponaponae-atatsi, nacatonawitsi-ata wajanacatsi-ayapëbejecuene, itsamonae nacabejiobia-exanabiabi-ata, Jesús pijajiwixaetsi, janibocuene nacatocopiapatsi-ata, nacato-ajibi-ata wajanaxatatsicuene, itsacujirujawa nacatsi-ayai-ata, itsamonae itsacuenejawata nacabeyaxuabijitsia-ata, daxita bajaraxuanë nacatocopiapatsi-ata, aponacawecuatsatsi Cristo wajanaca-asiwajawa.
36 Pacuenia waxaitsi nacatocopiapatapona, bajarapijinia pacuenia bajayata, Dioso pijajiwi nawajunupaeba Diosojawabelia pacuenia itsamonae bejiobia-exanaponatsi, bajaraPonë pijajiwixae. Bajaraxua yabara Dioso pejumeliwaisibaxutota jumaitsi mapacueniaje:
«Xamë, Diosomë, panijajiwixaenë daxitamatacabi itsamonae jamatabëpanebeyejebabiaba picani. Pacuenia oveja pebeyaxuabinexa, caponabiaba pebetaxunaeyabelia, bajarapacuenia jamatabëpane-exanabiaba»,j jai Dioso pejumeliwaisibaxutota.
Bajarapijinia pacuenia, waxaitsi-ata aeconoxae jiwi nacato-exanapona Dioso pexixaetsi.
37 Bajaraxuanë nacatocopiapataponae-ata, aponacajamatabëcuenematatoxenetsi wajacuene-aebinexa Cristo wajanaca-asiwajawa. Caranata, bajaraxuanë jamatabëcuene-amoneyababiabatsi, tsipaji, Cristo, wajanaca-asiwanë, nacayawenonabiaba.
38 Bajaraxuata, xanë pexaniajaicuene natoyapëtaniji mapacueneje. Itsacuenejawayo-ata apocaëjëpaetsi Cristo wajanaca-asiwajawa wajanacawecuacopiarucaeya-exanaenexa. Pacuenia petëpaecuene, paliwaisi natsixainatsi abaxë waja-asaëtsawanapae-epato, ángelewi, dowathiwi,k daxita penamatacaitorobisaë pexainaewi-ata, pitsicuene maparucaeje wajajinawanapae-epato taewanapatsi, pitsicuene-ata taeponaenatsi itsamatacabijawabelia. Daxita bajaraxuanë apocaëjëpaetsi Cristo wajanaca-asiwacuene wajanacawecuacopiarucaeya-exanaenexa.
39 Bajarapacuenia ponae-atatsi tsipae athëbëabetsia, itsa jume, ira bëxëpanabereca, apowecuaponaetsi tsipae Cristo wajanaca-asiwajawawecua. Tajamonae, itsacuenejawayo-ata, Dioso pexanaeyajuwënëjawanë, apocaëjëpaetsi Dioso wajanaca-asiwajawa wajatuxanenë Jesucristo pejamatabëcueneta wajanacawecuacopiarucaeya-exanaenexa. Bajaraxuata, caejawayo-ata aponacajamatabëcuenematatoxenetsi tsane, wajanacacuene-aebia-exanaenexa bajaraxua.