Pablo canacueneba jiwi penacojiobiliwaisicuenia, petsitajëtsinexa pacuenia jiwi pejumecowënëtsijawata Dioso penajumecopatsiliwaisi Moisés-pijinëta, apowecua-ajibia-exanaetsi jiwi pijaneconi
7
Tajamonae, paxamë, paneyapëtaewi Dioso penajumecopatsiliwaisi Moisés-pijinëta, payapëtaneme pacuenia saya jiwi piasaëtsawanapae-epato bejumecowënëtawanapa bajarapaliwaisi. Itsiata baitsi jane, Cristo wajanacasiwatëpaejawata, nacawecua-ajibia-exana baja wajajumecowënëtsijawami bajarapaliwaisi, Dioso aneconijibia wajanacataenexa.
2 Canaëjëtsianatsi mapaliwaisije: Dioso penajumecopatsiliwaisi Moisés-pijinëta petiriwa, pamona pexainaewa, itawetatsi itsanëjawabelia penacojiobiyaniwa, itsa abaxë asaë tsaponaponae pamona. Itsiata baitsi jane baja, bajarapowa pamona itsa wecuatëpatsi, wecua-ajibitsi baja pejumecowënëtsijawa bajarapapitawetsiliwaisitsi. Matapania jane baja toxanepanatsi penacojiobinexa icatsia itsanëjawabelia, itsa jitsipa penacojiobijawa.
3 Itsiata, bajarapowa itsa nacojiobijitsipa itsanëjawabelia, itsa abaxë asaë tsaponaponae pamona, nexata bajarapowa ayaineconi natsi-exanaejitsipaa Diosojawabelia, tsipaji pamonawecua itsanëjawabelia naperabëquenetsiataeponaponaejitsipa. Itsiata baitsi jane baja, bajarapowa pamona itsa wecuatëpatsi, wecua-ajibitsi paliwaisi itawetatsi penacojiobijawa itsanëjawabelia. Nexata, nacojiobi-ata icatsia itsanëjawabelia, neconi apoxainae Diosojawabelia.
4 Tajamonae, bajarapacuenia picani paxamë-atab pa-itsimë tsawanapae. Copiaya paxainame Dioso penajumecopatsiliwaisi Moisés-pijinëta, bajarapaliwaisi bepapecanamatacaitorobinë tsaponaponae. Nexata, papeca-itorobicuenia pajumecowënëtawanapame. Itsiata, Cristo bepaneyajawatëpaexae, bepanewecuatëpae Dioso penajumecopatsiliwaisi Moisés-pijinëta papenamatacaitorobicuenemi. Nexata, pacawecuacopiaruca baja bajarapaliwaisi panejumecowënëtabiabijawami, xua yabara Dioso aneconijibia pacataejitsia. Nexata, Cristo bepaneyajawanamatacotsixae, pejanacuenia bepaneyajawajinawanapae, Dioso papeca-itorobicuenia panejumecowënëtabiabinexa.
Bajarapacuenia Cristo bewajanacayajawanamatacotsixae, capitsapabiabianatsi pexaniacuenejawanë, Dioso pesiwabarëyajawanë.
5 Itsiata, wajasiwanajamatabëcuenecopatsiwajënaeya Jesucristojawabelia, bajarapacujinaeta, wajapibisiajamatabëcuenec nacamatacaponabiaba, pibisiacuene waja-exanawanapaenexa, wajaperabëto pejitsipaecuenia. Orijibia, bajarapamatacabi, xua naca-itaweta Dioso penajumecopatsiliwaisi Moisés-pijinëta waja-exanaeyaniwa, bajarapaliwaisi aponacacuenecaranatsi. Caranata, bitsoyo nacajitsipaeya-exana bajarapapibisiacuene waja-exanaenexa. Bajarapapibisiacuene waja-exanawanapaexae, neconi natsi-exanaponatsi, Diosowecua naxuabiaya wajajinawanapaenexa.
6 Cristo bewajanacayajawatëpaexae, nacawecuacopiaruca baja Dioso penajumecopatsiliwaisi Moisés-pijinëta wajanacanamatacaitorobijawa, pexaniacuene waja-exanabiabinexa, Dioso aneconijibia wajanacataenexa. Ajibinua pematatsënëa baja bajarapaliwaisi wajanacajitsipaeya-exanaejawa pibisiacuene waja-exanaenexa. Bajaraxuata, maparucaeje tonacuenebawanapatsi Dioso pijajiwitsicuenia. Nexata, papexaniacuene exanawanapatsi maparucaeje, apo-exanaetsi Dioso penajumecopatsiliwaisi Moisés-pijinëta wajanaca-itorobixae. Biji rajane, exanawanapatsi bajaraxuanë Espíritu Santo wajanacajamatabëcuenecaëjëpaeya-exanaponaecuenia.d Nexata, aeconoxae pejanacuenia jinawanapatsi, copiayami wajajinawanapaecuenemiwecua.
Pablo natoyapëtane pexainaejawa pibisiajamatabëcuene Dioso penajumecopatsiliwaisi Moisés-pijinëta pejamatabëcueneta
7 Itsajiwi meta jamatabëcuenenawëxaniabiaya jamatabëjumaitsi tsipae: «Dioso penajumecopatsiliwaisi Moisés-pijinëta, itsacuenejawayonexa-ata apoxanepanae, tsipaji nejitsipaeya-exanabiaba pibisiacuene ta-exanaenexa», jamatabëjai meta tsipae. ¡Jume raja! Biji rajane, bajarapaliwaisi bitso pexanialiwaisi, tsipaji bajarapaliwaisi itsa ajibi tsipae, xanë aponacueneyapëtaenë tsipae xua Dioso tsitapibisiacuenetsi. Dioso penajumecopatsiliwaisi Moisés-pijinëta jumaitsi mapacueniaje: «¡Pëtsa to-itajitsipame itsajiwi pexainaejawanë!»,e pejaijawa. Nexata, bajarapaepatota jane baja, natoyapëtaniji pibisiacuene ta-exanaejawa, bajarapacuenia ta-exanaejawata.
8 Itsiata, tajapibisiajamatabëcuene canacueneba bajarapaliwaisi, ayaicuenia tane-itajitsipaeya-exanaenexa itsamonae pecobecowë. Pamatacabi apojumeyapëtaenë abaxë xaniawaetsia Dioso penajumecopatsiliwaisi Moisés-pijinëta, tajapibisiajamatabëcuene nasaëtabiaba bajarapaliwaisita, pibisiacuene tanejitsipaeya-exanaenexa. Itsiata, bajarapa-itawetsiliwaisi, itsa ajibi tsipae, nexata tajapibisiajamatabëcuene asaëjibi tsipae tanejitsipaeya-exanaenexa tane-itawetsijawami.
9 Bajayata, abaxë copiaya itsa ponaponajë yapëtaenejewanë Dioso penajumecopatsiliwaisi Moisés-pijinëta, aponasiwabëjanë tananeconitsijawanexa xua yabara exanaponaponajë. Itsiata, pamatacabi jumetaniji bajarapaliwaisi tane-itawetsijawa tato-itajitsipaejawa itsamonae pecobecowë, nexata tajapibisiajamatabëcuene nasaëta bajarapaliwaisita, ayaicuenia tato-itajitsipaejawaf itsamonae pecobecowë. Nexata, bajarapaliwaisi pejamatabëcueneta natoyapëtaniji naxuabiaya Diosowecua tatëpaejawanexa.
10 Nexata, yapëtaniji paliwaisita picani natocanaëjëtajë tawecuapanepaenexa Dioso tanenaneconitsia-exanaejawaminexa, Dioso yajawa ta-asaëtsaponaponaenexanua daxitamatacabijawabelia, bajarapacuenia caranata aponeto-exanae. Biji rajane, netocaëjëta naxuabiaya Dioso tawecuatëpaejawanexa tajaneconijamatabëcuene. Nexata, bitso nasiwanajamatabëxainajë,
11 tsipaji papibisiajamatabëcuene xainajë tajamatabë-ëthëtota canacueneba bajarapa-itawetsiliwaisi pibisiacuene tane-exanaeya-exanabiabinexa. Paliwaisi picani jitsipajë tanejamatabëcueneyawenonaenexa pibisiacuene ta-exanaeyaniwa, caranata netonaexana betaneyamaxë-itojorobiliwaisi, tsipaji betanejitsipaeya-exanaeliwaisi netonaexana pibisiacuene ta-exanaenexa. Nexata, tane-itawetsiliwaisi apotajumecowënëtsijamatabëcuene, netonaexana tanenaneconitsia-exanaeliwaisi, Diosowecua tanaxuabinexa.
12 Bajarapacuenia netocopiapatsi-ata tayapëtaecujinae bajarapaliwaisi, Dioso penajumecopatsiliwaisi Moisés-pijinëta caeto-ata aponitorobi picani pibisiacuene ta-exanaenexa. Bajarapaliwaisi pexanepanaeliwaisi cajena. Nexata, xua naca-itoroba pepopexaniacuene, pexanepanaecuene-ata waja-exanawanapaenexa.
13 Belia, bajarapaliwaisi yabara paxamëyajuwënënë jamatabëjumaitsi tsipae: «¿Dioso tsaeta nacatonajumecopata bajarapapexanialiwaisi, ëwajanacatëpaeyabinexa bajaraPonëwecua apowajajumecowënëtsixae?», jamatabëjai meta tsipae jamatabëcuenenawëxaniabiaya. ¡Jume baja cajena! Biji rajane, Dioso penajumecopatsiliwaisi Moisés-pijinëta, pexanialiwaisi-ata picani, tajapibisiajamatabëcuene canacueneba bajarapapexanialiwaisi, pibisiacuene tane-exanaeya-exanaenexa, naxuabiaya Diosowecua taponaponaenexa. Nexata, bajarapaliwaisi pejamatabëcueneta, yapëtaniji pexaniajaijawa ayaicuenia tananeconitsijawa Diosojawabelia. Natoyapëtanijinua xua picani xanë netsitapexaniacuene ta-exanaenexa, bajaraxua juya, Dioso tsitapibisiacuenetsi. Nexata, bajarapaliwaisi pejamatabëcueneta, yapëtanetsi pacuenia bitso abeje pibisiacuene waja-exanaejawa Dioso pitabarata.
Pablo yapëtaeya-exana apopejamatabëcueneyawenonaejawatsi peyajawanaitajëtsijamatabëcuene, Dioso pejitsipaecuenia peponaponaenexa
14 Yapëtanetsi paliwaisi Dioso najumecopata Moisés-pijinëta jiwi pejumecowënëtsinexa pexanepanaeliwaisi tsipaji Espíritu Santo pejamatabëcuenetag peyaquinaeliwaisi. Itsiata baitsi jane, jiwitonëxaenë, ajamatabëcuenesaëjibinë tajumecowënëtsinexa bajarapaliwaisi, tsipaji pibisiajamatabëcuene tayajawanaitajëtsijawa nenaxainaeyaba betajatuxanenëcuenia, tane-itorobinexa, pibisiacuene ta-exanabiabinexa pejitsipaecuenia.
15 Bajaraxuata, jamatabëcuenenabenajacajë ta-exanaecuene yabara. Papexaniacuene jamatabë-exanabiabajë picani, bajaraxua apo-exanabiabinë. Biji saya caranata, papibisiacuene bitso itoyanë ta-exanaeyaniwa, bajaraxua juya exanabiabajë. «¿Detsaeta xuajitsia bajarapacuenia exanabiabajë?», jamatabëjanë belia.
16 Itsa exanabiabajë papibisiacuene picani apojitsipaenë ta-exanaejawa, natoyapëtaniji pexanialiwaisicuene Dioso penajumecopatsiliwaisi Moisés-pijinëta, tsipaji bajarapaliwaisita Dioso neyapëtaeya-exana xua tsitapibisiacuenetsi.
17 Bajarapacuenia itsa exanabiabajë, yapëtaniji xanë apota-exanaejawa tajitsipaejamatabëcuene. Biji rajane, papibisiajamatabëcuene abaxë xainajë tajamatabë-ëthëtota, ne-exanaeya-exanapona.
18 Bajaraxua yabara xanë natoyapëtaniji apotaxainaejawa caejawayo-ata pexaniajamatabëcuene tayajawanaitajëtsijamatabëcuene. Biji rajane, bajarapajamatabëcuene bitso cajena abeje. Asaëjibinua tanejamatabëcueneyawenonaenexa pexaniacuene ta-exanaenexa. Bajaraxuata, jitsipae-atanë pexaniacuene ta-exanaejawa, aponejamatabëcuenecaëjëpabiabi.h
19 Nexata, papexaniacuene picani jitsipajë ta-exanabiabinexa picani, apo-exanabiabinë. Caranata saya, exanabiabajë papibisiacuene apojitsipaenë picani ta-exanaejawa.
20 Papibisiacuene picani apojitsipaenë ta-exanaejawa, itsa exanabiabajë, bajarajota natoyapëtaniji xanë tajacuata apota-exanaejawa. Biji rajane, papibisiajamatabëcuene yajawanaitajëtajë pajamatabëcueneta exanajë bajaraxua, tsipaji abaxë xainajë tajamatabë-ëthëtota tane-exanaeya-exanaponaenexa.
21 Nexata jane baja, itsa nacuenecanaëjëtajë ta-exanaecuene yabara, natocaxitajarabajë pacuenia jamatabëcuene-itsinë tayajawanaitajëtsijamatabëcuene. Bajaraxuata, paepatota picani jitsipajë pexaniacuene ta-exanaejawa, bajarapaepatota, neyacaranatabiaba papibisiajamatabëcuene abaxë yajawaponaponajë, tsipaji tayajawanaitajëtsijamatabëcuene nitorobabiaba ëpibisiacuene ta-exanabiabinexa.
22 Tajamatabëcuenewetsina itsa canaëjëtajë, netsitaxanepana picani bitso Dioso penajumecopatsiliwaisi Moisés-pijinëta.
23 Itsiata, tayajawanaitajëtsijamatabëcuenejawata caxitajarabajë xua pejamatabëcueneta neyacaranatabiaba tajumecowënëtsiyaniwa bajarapaliwaisi, tsipaji bajarapajamatabëcuene itoya tsabiabi Dioso penajumecopatsiliwaisi Moisés-pijinëta. Daxita xua taperabëtopijijawanë, caejamatabëcuene najuaxainabiaba tayajawanaitajëtsijamatabëcuenejawabelia, pibisiacuene tane-exanaeya-exanaenexa. Bajarapapibisiajamatabëcuene pejamatabëcueneta, nataniji pibisiacuene betanejamatabëcuene-amoneyabinëcuenia, pibisiacuene tane-exanaeya-exanaenexa.
24 Ta-exanaecuene yabara itsa nacuenecanaëjëtajë, jamatabëjumaitsinë: «¡Xanë raja bitso bejiobinë! ¡Bajarapajamatabëcuene bitso abeje! ¿Detsa pajiwi meta newecua-ajibia-exanaena tayajawanaitajëtsijamatabëcuene tanenamatacaitorobisaëwecua?, tsipaji bajarapajamatabëcuene nematacapona tatëpaejawanexa Diosowecua», jamatabëjanë.
25 Bajaraxua yabara pexaniajamatabëcuene rajutajë Diosojawabelia, tsipaji caenë Dioso baja cajena necapanepai bajarapajamatabëcuenewecua, wajatuxanenë Jesucristo pejamatabëcueneta.
Pacuenia xanë natotaniji tayajawanaitajëtsijamatabëcuene pejamatabëcueneta tanaxuabijawa, paxamë-ata tsaena bajarapacuenia panajamatabëcueneyapëtaneme. Bajaraxuata, beyapëtanetsi mapacueneje. Wajajamatabë-ëthëtojawawetsina jamatabëjumecowënëtsijitsipae-atatsi Dioso penajumecopatsiliwaisi Moisés-pijinëta, itsiata, wajayajawanaitajëtsijamatabëcuene aponacacopatsi bajarapacuenia waja-exanawanapaenexa. Biji saya caranata naca-itorobabiaba pibisiacuene waja-exanabiabinexa.