Pamonae siwanajamatabëcuenecopaba Jesucristojawabelia, bajarapamonae Cristo capanepatsi pijaperujujamatabëcuene penamatacaitorobisaëtsiwecua
6
Jiwi pejumetaexae Dioso asiwaya pitaxutotsoniataejawa yabara mapanacuapijiwi, ¿detsa nexata bejamatabëjumaitsitsi? ¿Xanepana tsaja meta wajawajënaeyabelia pibisiacuene waja-exanawanapaejawa, Dioso penajamatabëcuene-itajëtsinexa orijibia wajanaca-itaxutotsoniataejawa?
2 ¡Jume raja! Waxaitsi rabaja pibisiacuene pematatsënëa apobe-exanawanapaetsi, tsipaji baja pibisiacuene wajanacajitsipaeya-exanaejamatabëcuenemi bewajawecuatëpaewi. Yapëtanetsi baja cajena pacuenia petëpaenë aponajamatabëxainae pibisiacuene pexanaenexa. Bajarapacuenia waxaitsi-ata pematatsënëa baja apobenajamatabëxainaetsi pibisiacuene waja-exanawanapaenexa.
3 Bepayapëtaneme mapacueneje: Pacujinae nabautizabatsia Cristo Jesúsb pewënëta, najamatabëcuene-itajëtatsi Jesucristojawabelia Espíritu Santo becaeperabëtoc wajanaca-exanaejawa. Becaeperabëto wajanaca-exanaexae Jesucristojawabelia, nexata benatoyapëtanetsi bewajanacayajawatëpaejawad bajaraPonë, pacujinae tëpa cruzata.
4 Jesucristo petëpaecujinae, itsa mëthëtatsi petëpaenë, waxaitsi-ata bewajanacayajawamëthëtsi.e Nexata, bewajanacayajawamëthëtsixae, pacujinae Dioso, ayaijamatabëcuenenë, pesaëta namatacotsia-exanatsi Cristo, pejanacuenia piasaëtsaponaponaenexa, waxaitsi-ata bewajanacayajawanamatacotsif pejanajamatabëcuenewicuenia wajajinawanapaenexa, Dioso pejitsipaecuenia waja-exanawanapaenexa.g
5 Becaeperabëto wajanaca-exanaexae baja Jesucristojawabelia, daxitatsi Jesucristo cruzata bewajanacayajawatëpae. Nexata, Jesucristo petëpaecujinae, Dioso icatsia itsa asaëya-exanatsi, najëpaeyah bewajanacayajawa-asaëya-exanae.
6 Jesucristo itsa cobematabiabarutatsi cruzajawata pebeyaxuabinexatsi, wajaperujujamatabëcuenemi yajawarutatsii wajanacawecua-ajibia-exanaenexa, pibisiacuene wajanaca-exanaeya-exanaejamatabëcuene wajanacanamatacaitorobijawami. Nexata, bajarapajamatabëcuenemi nacawecua-asaëjibia-exana baja, pematatsënëa wajanaca-itorobiyaniwa pibisiacuene waja-exanaeyaniwa. Bajaraxuata, caewëalia apobenajamatabëcuenecaewitsitsi icatsia wajapibisiajamatabëcuenemijawabelia, wajanacajamatabëcuene-itorobiyaniwa pibisiacuene waja-exanawanapaeyaniwa, tsipaji baja nacawecuacopiaruca bajarapajamatabëcuenemi.
7 Bajarapajamatabëcuenemi baja wecuatëpatsi bewajanacayajawatëpaexae Cristo, pacuenia baja petëpaenë pibisiacuene apo-exanaponaponae petëpaecujinae, bajarapijinia pacuenia pibisiacuene wajanacanamatacaitorobicuenemi nacawecua-ajibi baja.
8 Cristo cruzata bewajanacayajawatëpaejawa wajayapëtaexae, jumexaniatanetsi wajayajawajinawanapaenexa Cristo daxitamatacabijawabelianexa.
9 Yapëtanetsi bajaraxua pexaniajaijawa, tsipaji Cristo, Dioso icatsia piasaëya-exanaecujinaetsi petëpaejawawecua, pematatsënëa baja apotëpae tsane, tsipaji petëpaecuene asaëjibi bajaraPonëjawabelia.
10 Nexata, Cristo itsa siwatëpa daxitajiwi pibisiacuene pexanaeneconi yabara, caecuenia caeto siwatëpa daxitamatacabijawabelianexa. Bajaraxuata baja, Cristo icatsia pematatsënëa aposiwatëpae tsane pijaneconi pexainaewi. Nexata, jiwi pesiwatëpaejawata, caecuenia jamatabëcuene-amoneyabanua pibisiajamatabëcuene penamatacaitorobisaëmitsi. Bajaraxuacujinae, Jesucristo piasaëcujinae petëpaejawawecua, daxitamatacabijawabelia ponaponaj Dioso pejitsipaecuenia.
11 ¡Bajarapacuenia paxamë-ata panewajënaeyabelia panatocanaëjëre panenawecuatëpaeyabijawa panijaperujujamatabëcuene papecajamatabëcuenenamatacaitorobisaëwecua, juya panenatocanaëjëtsinexa pane-asaëtsawanapaejawa Cristo Jesúsk pejamatabëcueneta! Bajarapacuenia pane-asaëtsawanapaexae, Dioso pejitsipaecuenia pa-exanawanapaename, pacuenia wajatuxanenë Jesucristo exanaponapona.
12 ¡Tajamonae, pëtsa baja orijibia panajamatabëcuenecaewetame panijaperujujamatabëcuenejawabelia, icatsia papeca-itorobabiabinexa pibisiacuene pane-exanaenexa, panijacuata panenatojitsipaecuenia! Xua-ata paneperabëto jitsipa pexanaenexa, bajaraxua piamatamobijawa, tsipaji paneperabëto werewerecaena.
13 ¡Bajaraxuata, pëtsa panacopatame pewerewerecaeperabëto papibisiacuene jitsipa pane-exanaenexa, pacuenia pa-exanabiabame panejamatabëcuene-aitawawajënaeya Diosojawabelia! ¡Biji rajane, patonajamatabëcuenecaewetawanapare Diosojawabelia, paneto-exanawanapaenexa papeca-itorobicuenia! Bajarapacuenia itsa pa-exanaename, panaperabëcopatsianame Dioso papecaperabëcanacuenebinexa pane-exanaejawata pexaniacuenejawanë.
14 Nexata, panijaperujujamatabëcuene baja apoxainae tsane papecanamatacaitorobinexa pematatsënëa, tsipaji apopajinawanapaemënua tsane Dioso penajumecopatsiliwaisi Moisés-pijinëta papeca-itorobicuenia, aneconijibia Dioso papecataenexa. Biji rajane, Dioso papeca-itaxutotsoniataejamatabëcueneta panejinawanapaexae, Jesucristo pejamatabëcueneta aneconijibia pacatane.
Pablo tsitajëta jiwijawabelia pacuenia xuajawabelia najamatabëcuenecaewetabiaba pitorobicueniatsi pexanaenexa, bajaraxuanë bepetonaexanaejawatsi pijatuxanenë
15 Itsamonae jamatabëcuenenawëxaniabiaya jamatabëjumaitsi meta tsipae Dioso wajanaca-itaxutotsoniataejawa yabara: «Aponamatawenonaetsi baja pematatsënëa wajajumecowënëtsijawa Dioso penajumecopatsiliwaisi Moisés-pijinëta. Dioso baja wajanaca-itaxutotsoniataejawata, aneconijibia nacatane, Jesucristo pejamatabëcueneta, jumecowënëtsinejewatsi bajarapaliwaisi. Nexata, pibisiacuene exanawanapae-atatsi tsipae, Dioso tsitecaeya aneconijibia nacataena Jesús pejamatabëcueneta», jamatabëjai meta tsipae jamatabëcuenenawëxaniabiaya. ¡Jume baja cajena! Pibisiacuene apobe-exanawanapaetsi,
16 tsipaji yapëtanetsi pajiwi nacopata pijapibisiajamatabëcuenejawabelia,l pitorobicueniatsi pejumecowënëtabiabinexa, bajarapapibisiajamatabëcuene tonaexanatsi bepijatuxanenë, ëpibisiacuene pexanabiabinexa. Bajarapacuenia pexanaewi Dioso tocaëjëtatsi naxuabiaya pejinawanapaenexa bajaraPonëwecua. Pajiwi pijinia, nacopata Diosojawabelia, pitorobicueniatsi pexanabiabinexa, bajarapajiwi Dioso tonaexanatsi pijatuxanenë, pexaniacuene pexanaponaponaenexa. Nexata, ponaponaena Dioso pejitsipaecuenia.m
17 Bajarapacuenia paxamë bajayatami picani panijapibisiajamatabëcuene bepapijajiwimëcuenia patojinawanapame, pane-exanawanapaenexa papeca-itorobicuenia, pibisiacuene. Aeconoxae baja, bajarapacuenia apopajinawanapaemë maparucaeje. Biji rajane, panejamatabë-ëthëtojawawetsina pajumecowënëtawanapamen baja daxita papexaniajailiwaisianë itsamonae pacacujaruba. Bajaraxuata, xanë pexaniajamatabëcuene rajutabiabajë Diosojawabelia paxamë yabara, ayaicuenia papecayawenonaexae.
18 Nexata, Dioso papecacapanepaexae panijapibisiajamatabëcuenemi papecanamatacaitorobijawawecua, Jesús pejamatabëcueneta, paxamë baja, paxainame itsanë panijatuxanenënexa, bajaraPonë papeca-itorobicuenia ëpexaniacuene pane-exanawanapaenexa.
19 Paxamë abaxë apopanejamatabëcueneliwaisinaweretsixae Dioso pijacuenejawalia, peyapëxanepanaeliwaisicuenia pacatocuenecatanetsi panejumeyapëtaenexa. Baitsi, cuenecataeya canacuenebajë anijanëbeje petuxanenëbeje, pijajiwitonëbeje, petonacuenebijawatsi peliwaisicuenia. Bajayatami picani panacopatame panijapibisiajamatabëcuenejawabelia, pibisiacuene pane-exanawanapaenexa papeca-itorobabiabicuenia. Nexata, pibisiajamatabëcuene bepapijajiwimë tsawanapae.o Paneperabëto pejitsipaecuenia paca-exanaeya-exanabiaba bitso pia-uracuenejawanë, pepopiabejejawanë-ata. ¡Bajarapacuenia aeconoxae panajamatabëcuenerajure Diosojawabelia, ëpexaniacuene pane-exanawanapaenexa panewajënaeyabelia!
20 Panacuenecanaëjëtsianame panejinawanapaecuenemi yabara. Pamatacabi picani abaxë paxainame panijapibisiajamatabëcuene, bepanijatuxanenë pacatonaexana, jumecowënëtsiaya ëpibisiacuene pane-exanawanapaenexa. Nexata, apopacatsitanamatamotsi Dioso papecatojitsipaecuenia, ëpexaniacuene pane-exanawanapaenexa.
21 Bajarapacuenia panejinawanapaejawa yabara, apopacayawenonae caejawa-ata, tsipaji maparucaeje paya-auramë tsabiabi bajarapapibisiacuene pane-exanaejawami yabara. Payapëtanemenua bajarapacuenia pane-exanawanapaexae, Diosowecua naxuabiaya picani panejinawanapaejawa daxitamatacabijawabelianexa.
22 Itsiata, maparucaeje Dioso papecawecua-ajibia-exanaexae pibisiajamatabëcuene papecanamatacaitorobisaë, juya paca-exana Dioso papijajiwinexamë, pane-exanawanapaenexa papeca-itorobicuenia. Bitso pacatoxanepana Dioso papeca-itorobicuenia panejinawanapaejawa, tsipaji bajarapacuenejawanë pacajamatabëcueneyawenonaena aneconijibia panejinawanapaenexa Dioso pitabarata, pecopiarucaematacabita-ata paxainaename matacabi apopewerewerecaejawa Dioso yajawa.
23 Pajiwi pibisiacuene exana, natopitsiana petëpaejawa penaneconimatamotsinexa, Diosowecua penaxuabinexa daxitamatacabijawabelia. Pajiwi pijinia, jumexaniatane wajatuxanenë Cristo Jesúsp pesiwatëpaejawatsi pijaneconi yabara, bajarapajiwi Dioso amoneya rajutsianatsi pexainaenexa matacabi apopewerewerecaejawa.