Pitsicuenejawanë Jesucristojawabelia pesiwanajamatabëcuenecopabiwi natotaewanapa, yabara peliwaisi
(Taema nota pebëxëpanayo.)a
5
Dioso baja aneconijibia wajanacataexae Jesucristo pejamatabëcueneta, nexata Dioso nacasiwajamatabëcuenecaewa wajanacabara-anaepanaejawami, pibisiacuene waja-exanaeneconimiwecua.
2 Jesucristo pejamatabëcuenetanua, caejamatabëcuene xainatsi Diosojawabelia. Nexata, pexaniacuene nacato-exanabiaba, wajanaca-itaxutotsoniataexae. Orijibia, jamatabëcuenebarëyaya copia-ewetawanapatsi Dioso wajanacarajutsinexa pitsijamatabëcuene xaina,b pijapeniweniwenaenacuatatsia. Bajarapaliwaisita najamatabësaëtaponatsi, tsipaji yapëtanetsi xaniajai wajanacato-exanaenexa bajarapacuenia, Jesucristo pejamatabëcueneta.
3 Aposiwajamatabëcuenebarëyatsi ëbajaraxua yabara. Biji rajane, yajawasiwajamatabëcuenebarëyatsi mapanacuata wajanacabejiobia-exanaejawanexa,c Jesucristo pijajiwixaetsi, tsipaji yapëtanetsi bajaraxua pejamatabëcueneta wajanacajamatabëcuene-asaëya-exanaponaejawa Diosojawabelia. Nexata, nacajamatabëcuenecaëjëpaeya-exanaena wajanajamatabëcuenesaëtsinexa, daxita apowajajitsipaecuene nacatocopiapatsi-ata.
4 Pacujinae nacatocopiapata wajanacabejiobitsicuene najamatabëcuenesaëtatsi, tsipaji yapëtanetsi Dioso wajanacasiwajamatabëcuenebarëyajawa. Yapëtanetsinua pepacuene wajaxainaejawanexa pitsijamatabëcuene Dioso xaina, xua abaxë copia-ewetawanapatsid wajaxainaenexa.
5 Wajacopia-ewetawanapaejawata, yapëtanetsi pepacuene Dioso wajanacato-exanaenexa, apowajasiwanacueratsijawanexanua, tsipaji Dioso nacayapëtaeya-exana bitso wajanaca-asiwajawa. Dioso ayaicuenia wajanaca-asiwajawae nacayapëtaeya-exanabiaba, Espíritu Santo pejamatabëcueneta; Ponë nacarajuta wajanacatsijamatabë-ecaenexa.
6 Yapëtanetsi pepacuene Dioso wajanacato-exanaenexa pacuenia copia-ewetawanapatsi, tsipaji paepatota bitso aponacacuenecaëjëpae wajacuata wajanacapanepaejawa Diosojawabelia, pecaëjëtsimatacabita jane baja, Cristo nacasiwatëpa pibisiacuene waja-exanaeneconi wajanacaneconimatamotsinexa.
7 Pacuenia Dioso nacato-exana Jesucristota, bajaraxua acuene-itothia jiwi pena-asiwacuenewecua. Mapanacuataje jiwi ba-aponacaewetsi piasiwajamatabëcuene penabeyaxuabia-exanaenexa itsanë pijaneconi yabara. Pebeyaxuabinënexatsi aneconijibi-ata tsipae, tsiteca aponacaewetsi tsipae petëpaenexa bajaraponë yabara. Matapania itsa pebeyaxuabinënexatsi bitso pexaniacuene peto-exanaenë tsipae itsamonaejawabelia, belia meta bajaraxua yabara itsajiwiyo nacaewetsipa penabeyaxuabia-exanaenexa bajaraponë pejamatabëcuene.
8 Itsiata baitsi jane, bajarapacuenia Dioso aponacato-exanae. Paepatota abaxë waxaitsi bitso pibisiacuene exanawanapatsi Dioso pitabarata, bajarapaepatota Dioso pexënato athëbëwetsica itorobica wajanacasiwatëpaenexa. Bajarapacuenia pexanaejawata, Dioso nacatsitanajamatabëcuene-itajëta bitso wajanaca-asiwajawa.
9 Wajanaca-asiwajamatabëcueneta itsa Dioso aneconijibia nacatane, Jesucristo pejamatabëcueneta, orijibia yapëtanetsi wajanacacapanepaejawanexa wajanacananeconitsia-exanaejawaminexawecua, pamatacabi naneconitsia-exanaena daxita pijaneconi pexainaewi, nacua pecopiarucaematacabita.
10 Yapëtanetsi pepacuene wajanacacapanepaejawanexanua, tsipaji itsa abaxë Dioso pijawajabitsaëwitsicuenia nacatane, Dioso copata Pexënato wajanacasiwatëpaenexa, wajanacawecua-ajibia-exanaenexa pijawajabitsaëwitsi wajanacataejawami, juya caejamatabëcuene wajaxainaenexa Diosojawabelia. Jesucristo wajanacasiwatëpaejawataf Dioso baja nacasiwajamatabëcuenexanepana. Jesús penamatacotsixaeg petëpaejawawecua, icatsia piasaëtsaponaponaenexa, yapëtanetsi pepacuene wajanacacapanepaejawanexa Dioso wajanacananeconitsia-exanaejawaminexawecua.
11 Bajarapacuenia wajanacato-exanaexae, caenë Jesucristo pejamatabëcueneta, Dioso baja bitso pexaniacuenia nacabarajamatabëcuenexanepana wajanacabara-anaepanaejawamiwecua. Nexata, waxaitsi bitso jamatabëcuenebarëyatsi Diosojawabelia, namata-enetsia caejamatabëcuene wajaxainaexae.
Pacuenia Adán, Cristobeje, nawecua-acuene-itothiabeje, yabara peliwaisi
12 Xaniawaetsia paneyapëtaenexa caenë pexanaecuenejawata yabara daxitajiwi petsijumajopaejawanexatsi, pacatsitajëtatsi mapacueniaje: Bajayatami copiaya caenë, Adán-pijinë, pibisiacuene exana. Nexata, mapanacuataje daxitajiwi pibisiacuene pexanaejawanexa taxuxuaba. Taxuxuabanua jiwi petëpaejawanexa, pibisiacuene pexanaejamatabëcueneta. Nexata, jiwi petëpaejawa, yacaëjëpa daxitanacuanëjawa, tsipaji daxitanacuanëpijiwi pibisiacuene exana.
13 Xaniajai, Dioso penajumecopatsiliwaisi Moisés-pijinëta pewajënaeya jiwi pibisiacuene exanawanapa. Nexata, acuenebi jiwi penaneconitsijawa, tsipaji ajibi abaxë pitawetsiliwaisi.
14 Pitawetsiliwaisi ajibi-ata, itsiata yapëtanetsi pibisiacuene pexanawanapaejawah bajarapamonae, tsipaji daxita jiwi tëpapona Adán-pijinëjawawerenacujinae, Moisés-pijinë peponaponaematacabijawaberena-ata. Bajarapacuenia Dioso tocaëjëta jiwi petëpaejawanexa, apocuenejëpae-ata Adán-pijinë papibisiacuene exana.i Pacuenia Adán-pijinë pijaneconi tsijumaxuaba daxitanacuanëpijiwijawabelia, bajaraxua copiaya nacatocuene-itajëta Cristo pexanaejawanexa itsamatacabijawabelia Adán-pijinëcujinae.
15 Itsiata baitsi jane, papibisiacuene Adán-pijinë exana, aponajëpaebeje Dioso papexaniacuene nacato-exana Jesucristo pejamatabëcueneta. Caenë, Adán-pijinë, pibisiacuene pexanaejawa pejamatabëcueneta, daxitajiwi tëpapona. Biji rajane, papexaniacuene Dioso amoneya nacato-exana wajanaca-asiwaxae,j caenë Jesucristo pejamatabëcueneta, bajaraxua bitso matatoxenetsia pexaniacuenejawa Adán-pijinë pexanaecuenewecua. Orijibia, jiwi ayaibitsaëtoxaneto natoyapëtaena bajarapapexaniacuene peto-exanaejawa, Dioso pecapanepaejawatatsi Jesucristo pejamatabëcueneta.
16 Copiaya caenë, Adán-pijinë, caepibisiacuene pexanaejamatabëcueneta, daxita mapanacuapijiwije naexana pibisiacuene pexanawanapaewinexa. Nexata, Dioso tocaëjëta penaneconitsia-exanaejawanexa pijaneconijamatabëcuene. Itsiata baitsi jane, mapanacuapijiwi bajayajebi pibisiacuene nawitsia pexanawanapaexae, cotocaewi caenë, Jesucristo, caeto siwatëpa daxitajiwi pijaneconijamatabëcuene. Nexata, Dioso wecua-ajibia-exana pijaneconimi, pamonae siwanajamatabëcuenecopaba Jesucristojawabelia, cruzata pesiwatëpaejawatsi pijaneconi yabara.
17 Nexata, caenë, caeto pibisiacuene pexanaejamatabëcuene, daxitajiwi itsa canacopata petëpaejawanexa, nacua pexanaematacabijawawerenacujinae mapamatacabijawaberena-ataje. Yapëtanetsi bitso matatoxenetsia Dioso pexaniacuene wajanacato-exanaejawa caenë, Jesucristo, caeto wajanacasiwatëpaexae. Nexata, Jesucristo pejamatabëcueneta Dioso aneconijibia nacatane, nacarajutanua waja-asaëjamatabëcuene daxitamatacabijawabelianexa. Itsacuenejawayo-ata Dioso apoto-exanae-atatsi, ayaicuenia asiwaya wajanaca-itaxutotsoniataexae, Dioso pexaniacuenia nacayawenona, pamonaetsi siwanajamatabëcuenecopabatsi Jesucristojawabelia, wajanacasiwatëpaejawa wajaneconi yabara.
18 Nexata, pacuenia Dioso tocaëjëta daxitajiwi penaneconitsia-exanaenexa caenë, Adán-pijinë, caepibisiacuene pexanaejamatabëcueneta, bajarapijinia pacuenia, caenë, Jesucristo, caepexaniacuene pexanaejamatabëcueneta, Dioso tocaëjëta pewecua-ajibia-exanaenexa pijaneconi, daxita pamonae siwanajamatabëcuenecopaba Jesucristojawabelia, pesiwatëpaejawatsi pibisiacuene pexanaeneconi yabara. Orijibia, rajutsianatsinua matacabi apopewerewerecaejawak pexainaenexa.
19 Pacuenia caenë, Adán-pijinë, apopejumecowënëtsixae Dioso pitorobicueniatsi, jiwi ayaibitsaëtoxaneto naexana pibisiacuene pexanawanapaewinexa, bajarapijinia pacuenia, bexëajawabelia caenë, Jesucristo, xaniawaetsia pejumecowënëtsicapanepaexae Dioso pitorobicueniatsi, jiwi ayaibitsaëtoxaneto Dioso aneconijibia taenatsi.
20 Jiwi pibisiacuene exanawanapae-ata Dioso penajumecopatsiliwaisi Moisés-pijinëta pewajënaeya, Dioso najumecopata bajarapaliwaisi jiwi peyapëtaenexa bitso penaneconitsijawa bajaraPonë pitabarata. Paepatota mapanacuapijiwije matatoxenetsia pewajënaeyabelia pibisiacuene exanapona, bajarapaepatota Dioso itsiata bitso matatoxenetsia najamatabëcuene-itajëta ayaicuenia pitaxutotsoniataejawa penaneconitsia-exanaejawanexawecua.
21 Bajarapacuenia wajanaca-itaxutotsoniataexae, Dioso aneconijibia nacatane daxitamatacabijawabelianexa wajatuxanenë Jesucristo pejamatabëcueneta. Daxita jiwi canacopata petëpaejawanexa Diosowecua Adán-pijinëjawawerenacujinae ajena pamatacabijawaberena-ataje bajaraponë pibisiacuene pexanaejamatabëcuene. Nexata, pacuenia daxitajiwi canacopata petëpaejawanexa caenë Adán pejamatabëcueneta, bajarapijinia pacuenia Dioso nacatocaëjëta Jesucristo pejamatabëcueneta, wajacanacopatsinexa caejamatabëcuene wajaxainaejawanexa Diosojawabelia daxitamatacabijawabelianexa wajanaca-itaxutotsoniataejawata.