Pacuenia bajayata Dioso aneconijibia tane Abraham-pijinë, pejumexaniataexae xua Dioso najumecapanepaeya pejumaitsijawatsi, yabara peliwaisi
4
Itsa Dioso aneconijibia tane jiwi pesiwanajamatabëcuenecopabijawata Jesucristojawabelia, ¿detsa nexata pacuenia bajayatami aneconijibia tane Abraham-pijinë, pajudíowinë patajasalinainë?
2 Abraham-pijinë aneconijibia itsa taejitsipatsi pejumecowënëtsixae pacuenia Dioso itorobatsi, nexata bajaraponë xainaejitsipa xua yabara ayaijamatabëcuenenë nataejitsipa. Itsiata, yapëtanetsi pacuenia caejiwi-ata apocuenecaëjëpaetsi ayaijamatabëcuenejiwi penataenexa Dioso pitabarata.
3 Wajayapëtaenexa bajaraxua yabara, canaëjëtsianatsi xua Dioso nacayapëtaeya-exana pejumeliwaisibaxutota Abraham-pijinë yabara. Jumaitsi: «Abraham-pijinë itaxutuajamatejemayaa pejumexaniataexaeb Dioso pejumaitsijawatsi najumecapanepaeya, nexata Dioso aneconijibia tanetsi», jai Dioso pejumeliwaisibaxutota Abraham-pijinë yabara. Nexata, yapëtanetsi Dioso aneconijibia petaejawa bajaraponë, itsacuenejawayo apoto-exanae-ata.
4 Canaëjëtsianatsi: Pajiwiyo itsanë pijajawa tonacuenebaponapona, bajarapajiwiyo xua rajutatsi, amoneya aporajutsitsi. Biji rajane, piamoneyabinëtsi tsicarucatsi pematamotsijawatsi petonacuenebijamatabëcuene.
5 Bajarapacuenia Dioso aneconijibia apotae jiwi. Biji rajane, Dioso aneconijibia tane jiwi, pejumexaniataexae xua Dioso najumecapanepaeya jumaitsi, itsacuene, pexaniacuene, apoto-exanae-ata. Baitsi, wecua-ajibia-exanatsi pibisiacuene pexanaeneconimi, pejumexaniataexae Jesús peliwaisi.
6 Dioso amoneya aneconijibia jiwi petaejawa yabara, bajayata David-pijinë wajunupaeba pacuenia siwajamatabëcuenebarëya pamonae baja Dioso aneconijibia tanetsi, itsacuenejawayo-ata pexaniacuene to-exanaenejewa.
7 David-pijinë tajëwelia jumaitsic mapacueniaje:
«Jamatabëcuenebarëya baja tsawanapae pamonae Dioso siwajamatabëcuenecaewatsi pebara-anaepanaejawatsi pibisiacuene pexanaeneconimiwecua, tsipaji baja pibisiacuene pexanaeneconimi wecua-ajibia-exanatsi.
8 Jamatabëcuenebarëya baja tsaponaponae pajiwi Dioso aneconijibia tanetsi, tsipaji apotocanaëjëtsitsi pijaneconi pexainaejawa», jai mapacueniaje David-pijinë bajayata.
Xaniajai rabaja. Bitso pexaniacuene Dioso amoneya aneconijibia wajanacataejawa, wajajumexaniataexae Jesucristo wajanacasiwatëpaejawa wajaneconi yabara.
Pablo yapëtaeya-exana pacuenia Abraham-pijinë Dioso aneconijibia tanetsi, itsa abaxë aponabo-upiperabëcaucutsia-exanae
9 ¿Detsa pacuenia pacanaëjëtame? Pajamatabëcuenebarëyajawa yabara David-pijinë jumaitsi, ¿ëpenabo-upiperabëcaucubiwinexa yabara jumaitsi? Itsa jume, ¿apopenabo-upiperabëcaucubiwinexa-ata? Jãjã, bajarapamonae-ata yabarajumaitsi. Mapacueniaje: Pacatsipaebatsi baja cajena pacuenia Dioso aneconijibia tane Abraham-pijinë, pejumexaniataexae najumecapanepaeya pejumaitsijawatsi.
10 ¿Abraham-pijinë tsabaja pepuanabo-upiperabëcaucutsia-exanae, Dioso aneconijibia tanetsi? ¡Jume raja! Abaxë apobo-upiperabëcaucutsi-atatsi, aneconijibia baja tanetsi, pejumexaniataexae Dioso najumecapanepaeya pejumaitsijawatsi.
11 Dioso baja aneconijibia pepuatae Abraham-pijinë, ayaibexëacujinae,d bo-upiperabëcaucutatsi, pecuene-itajëtsinexatsi Dioso aneconijibia petaejawatsi. Bajaraxuata, Abraham-pijinë tonaexana bepijasalinainënexa daxita pamonae apojudíowi, apopenabo-upiperabëcaucubiwi-ata, pejumexaniataexae Jesús peliwaisi, pesiwanajamatabëcuenecopabijawata Jesucristojawabelia. Bajarapacuenia, caejumexaniataecuene pexainaejawa yabara bajarapamonae, Dioso tane Abraham-pijinë bepemomoxi.
12 Bajarapacuenia-ata pijinia, Dioso tane Abraham-pijinë pemomoxicueniae daxita pajudíowi bo-upiperabëcaucubatsi, itsa jamatabëcueneliwaisijëpa Abraham-pijinë pejumexaniataejawa xua Dioso najumecapanepaeya jumaitsitsi, itsa abaxë apobo-upiperabëcaucutsitsi.
Xuanë tocopiapatsijitsiatsi pajiwi jumexaniatane Dioso najumecapanepaeya peto-exanaeyapaebijawanexatsi
13 Abraham-pijinë peliwaisi nacayapëtaeya-exana xua jiwi canacopatsijitsia, Dioso najumecapanepaeya perajutsiapaebijawa, pejumexaniataejamatabëcuene. Bajayata, Dioso najumecapanepaeya itsa jumaitsi Abraham-pijinëjawabeliaf pemomoxi pecanacopatsijawanexa pija-iracuenia daxita mapanacuaje,g bajarapacuenia Dioso aporajutsiapaebi Abraham-pijinëjawabelia pejumecowënëtsicapanepaexae Dioso penajumecopatsiliwaisi Moisés-pijinëta.h Biji rajane, rajutsiapaebatsi, tsipaji bajaraponë jumexaniatanei Dioso peto-exanaejawanexatsi, pacuenia najumecapanepaeya jumaitsi.
14 Tajamonae, Abraham-pijinë pemomoxi canacopata daxita xua Dioso najumecapanepaeya rajutsiapaebatsi,j Dioso pejumaitsicuenia. Baitsi, bajarapamonae itsa rajutsipatsi pejumecowënëtsijamatabëcuene Dioso penajumecopatsiliwaisi Moisés-pijinëta, nexata najumecapanepaeya pejumaitsijawami najume-amatamobia-exanaejitsipa. Abraham-pijinë-ata nacueratsipa pejumexaniataejawa bajarapaliwaisi.
15 Yapëtanetsi xaniajai apopitsi bajaraxua pejumecowënëtsicapanepaexae Dioso penajumecopatsiliwaisi Moisés-pijinëta, tsipaji bajarapaliwaisi nacayapëtaeya-exana wajananeconitaponaejawa Diosojawabelia, tsipaji caejiwi-ata apojumecowënëtsicapanepae bajarapaliwaisi. Itsa ajibi tsipae pitawetsiliwaisi,k nexata pijinia, ajibi tsipae jiwi peyabarananeconitsia-exanaejawanexatsi. Itsiata, bajarapaliwaisi penajumecopatsixae Moisés-pijinëta, daxita jiwi natoyapëtane Dioso penaneconitsia-exanaejawanexatsi, apopejumecowënëtsixae bajarapaliwaisi.
16 Bajaraxuata, pejumenaxuabiyaniwa xua najumecapanepaeya jumaitsi Abraham-pijinëjawabelia, Dioso amoneya rajuta bajaraxua pamonae siwanajamatabëcuenecopabatsi, matamowënëjonaenejewa. Bajaraxua yabara apojumaitsi ëpamonae jumecowënëta Dioso penajumecopatsiliwaisi Moisés-pijinëta. Biji rajane, yabarajumaitsinua pamonae Dioso tane Abraham-pijinë bepemomoxicuenia. Bajaraxuata, bajarapamonae canacopatsiana xua Dioso rajutsiapaebatsi pesiwanajamatabëcuenecopabixae Jesucristojawabelia, pacuenia Abraham-pijinë itaxutuajamatejemaya jumexaniatane Dioso pejumaitsijawatsi. Caejumexaniataecuene pexainaexae Abraham-pijinëjawabelia, nexata bajaraponë tonaexana bepijasalinainënexa, pamonae jumexaniatane Jesús peliwaisi.
17 Bajaraxua yabara, Dioso pejumeliwaisibaxutota nacayapëtaeya-exana tajëwelia xua jumaitsi Abraham-pijinëjawabelia. Jumaitsi mapacueniaje: «Ayaibitsaëto itsanacuanëpijiwi bepijasalinainëmël ca-exanaenatsi», jai Dioso tajëwelia Abraham-pijinëjawabelia, waxaitsi Jesús peliwaisi wajajumexaniataewi yabara. Nexata, yapëtanetsi xaniajai Abraham-pijinë bewajasalinainë tsaponaponae, aponacaewiriawi-atatsi, wajanajua-itaxutuajamatejemaxae Diosojawabelia, Ponë piasaëya-exanaenë petëpaewimi,m pecuenecaëjëpaenëtsi-ata daxitacuene pexanaenexa, piajibijawata itsacuenejawan pecanacuenebinexa.
18 Abraham-pijinë pejumexaniataexae Dioso najumecapanepaeya perajutsiapaebijawatsi, itaxutuajamatejemaya Diosojawabelia copia-ewetaponapona, pexënato pexainaejawanexa, tsi-ayapëbeje-atatsi picani. Itsiata, ewetaponapona jiwi ayaibitsaëtoxaneto pamocuenia penaexanaenexa, pamonae jumexaniatane pacuenia Dioso najumecapanepaeya jumaitsi.
19 Abraham-pijinë itsa xaina cien pawaibeje,o pijawa bitso perujuwa-ata picani, bajaraponë apojamatabëcuenefaefaenae Diosojawabelia. Tsiteca ajamatabëcuenesaë pejumexaniataejawa Dioso peto-exanaejawanexatsi pacuenia najumecapanepaeya jumaitsitsi. Bajarapacuenia exana, pijawa mawecowa-ata, bajaraponë nayapëtae-ata petëpaejawanexa perujunëjamatabëcuene yabara.
20 Apojume-aebi pacuenia Dioso najumecapanepaeya jumaitsi. Bitso biji, pewajënaeyabelia jumexaniataeya jamatabëcuene-ewetaponapona xua Dioso najumecapanepaeya jumaitsi petocopiapatsinexatsi. Nexata, Abraham-pijinë pecopia-ewetaponaponaejawata, pexënato bepexainaenëcuenia, wënëxaniatabiaba Dioso ayaijamatabëcuenenë yabara, apopejumenaxuabinëcuene yabara-ata,
21 tsipaji cueneyapëtane Dioso bitso piacuenesaënëcuene, pecuenecaëjëpaenëtsinua peto-exanaenexatsi daxita pacuenia najumecapanepaeya jumaitsitsi.
22 Bajarapacuenia itaxutuajamatejemaya pejumexaniataexae, Dioso aneconijibia tanetsi.
23 Dioso pejumeliwaisibaxutota nacayapëtaeya-exana pacuenia Abraham-pijinë Dioso aneconijibia tanetsi, pejumexaniataexae najumecapanepaeya pejumaitsicueniatsi. Itsiata, bajarapacuenia aponacayapëtaeya-exanae ëwajayapëtaejawanexa Abraham-pijinë peliwaisi.
24 Biji rajane, nacayapëtaeya-exana pacuenia waxaitsi-ata aneconijibia nacatane, itsa siwanajamatabëcuenecopatatsi Diosojawabelia, Ponë wajatuxanenë Jesucristo icatsia asaëya-exanatsi petëpaecujinae.
25 Dioso raja athëbëwetsica itorobica Jesús, cruzata wajanacasiwatëpaenexa, pibisiacuene waja-exanaeneconimi wajanacaneconimatamotsinexa. Xuacujinae, icatsia asaëya-exanatsi petëpaejawawecua, wajanacawecua-ajibia-exanaenexa wajaneconimi. Nexata, daxita bajarapacuenia itsa jumexaniataenatsi, Dioso aneconijibia nacataena Jesús pejamatabëcueneta.