Dioso pexaniajamatabëcuenenëxae, caejamatabëcuene xaina penaneconitsia-exanaenexa pijaneconi pexainaewi
3
Canaëjëtsianatsi mapacueneje: ¿Detsa pitsicuenejawata judíowi naexana bitso penamatamotsiwi Diosojawabelia apojudíowiwecua? ¿Detsa xua yabara toxanepanatsi penabo-upiperabëcaucubijawa?
2 Judíowinexa paliwaisianëta yanamatamota Diosojawabelia apojudíowiwecua, bitso tonawitatsi cajena. Copiaya, apojudíowiwecua namataxainaeya Dioso pejumeliwaisi tonajumecopatatsi pijasalinaiwimijawabelia.
3 Ayaibitsaëto bajarapamonaeyajuwënëwi jume-aebaa baja papexaniacuene Dioso yawenonaeyapaebatsi, nexata apojinawanapae Dioso peliwaisi pitorobicueniatsi. Bajarapamonae apopejumexaniataexae xua Dioso jumaitsi bajayatami, ¿bajaraPonë meta najume-amatamobia-exanaena?
4 ¡Jume cajena! Dioso raja penajumecowë-exanaenë pejumaitsicuenia pexaniajainëxae.b Jiwi rajane banajumetsënëta. Dioso pejumeliwaisibaxutota bajaraxua yabara jumaitsi mapacueniaje:
«Diosomë, daxitajiwi cayapëtaejitsia nexaniajaitsabiabijawa, nenaneconitsia-exanaejawata xaniajaiyac pijaneconi pexainaewi. Bajarapacuenia nexanaejawata, jume-amoneyabianame pamonae cananeconitsia-exana juez-monae pitabarata nexanaecuene yabara», jai David-pijinë Dioso pejumeliwaisibaxutota.d
5 Itsamonae, pajudíowimëyajuwënëwi, jamatabëcuenenawëxaniabiaya jumaitsi tsipae: «Pibisiacuene pata-exanaejawa pejamatabëcuene, daxitajiwi yapëtaejitsipa Dioso pepopianeconijibinëcuene. Bajaraxuata, apopanetsitaxanepanae Dioso patanenaneconitsia-exanaejawa pibisiacuene pata-exanaejawa yabara», jamatabëcuenenawëxaniabiaya jai tsipae.
¿Xaniajai tsipae bajarapacuenia pejumaitsijawa? ¡Jume cajena! Bajarapacuenia itsa cuaicuaijai, najamatabëcuene-itajëta saya mapanacuapijiwi pecanaëjëtsicuenia, Dioso apopecanaëjëtsicuenia.
6 Dioso baja cajena apocopatsi tsane itsajiwi-ata naneconitsia-exanaenejewa pijaneconijamatabëcuene. Itsa Dioso copatsipa judíowi naneconitsia-exanaenejewa pijaneconi xainae-ata, ¿detsa nexata pacuenia naneconitsia-exanaejitsipa apojudíowi pijaneconi pexainaewi? Dioso itsa aponaneconitsia-exanae tsipae pijaneconi pexainaewi, naitajëtsipa penajumetsënëtsinëcuene daxitajiwi pitabarata.
7 Yapëtanetsi baja Dioso pexaniajainëcuene, jiwi pijinia, penajumetsënëtsiwicuene. Belia itsanë, paxamëyajuwënënë, jamatabëcuenenawëxaniabiaya jumaitsi tsipae Dioso pexaniajainëcuene yabara: «Pacujinae najumetsënëtsiaya jumecowënëtajë Diosojawabelia tanaliwaisicajonecuenia, nexata tanajumetsënëtsicuene yabara, jiwi juya pexaniacuenia wënëxaniata Dioso pepopexaniajainëcuene daxitawecua. Bajaraxuata, apoxanepanae Dioso tanenaneconitsia-exanaejawa pibisiacuene ta-exanaejamatabëcuene, tsipaji jiwi Dioso pexaniacuenia wënëcacuaicuaijai tsane, pibisiacuene ta-exanaejawa pejamatabëcueneta», jai tsipae meta itsanë judíowiyajuwënënë jamatabëcuenenawëxaniabiaya.
8 Bajarapacuenia itsa jumaitsi bajaraponë, jëpa saya jamatabëcuenenawëxaniabiaya bepejumaitsijawa mapacueniaje: «Pibisiacuene waja-exanaejawa xanepana, tsipaji pibisiacuene waja-exanabiabijawa pejamatabëcueneta, daxitajiwi canaëjëtsiana Dioso pibisiacuene apopexanaenëcuene. Nexata, pibisiacuenejawanë nawitsia exanabiabianatsi, jiwi juya, nawitsia pexaniacuenia Dioso pewënëcacuaicuaijaitsabiabinexa», bepejaijawa bajaraponë. Bajarapacuenia pejumaitsiwi, pepocuene neconi natsi-exana Dioso pitabarata.
Bajarapacuenia raja itsamonae xanë yabara najumetsënëtsiaya jumaitsi tsabiabi mapacueniaje: «Pablo raja itorobapona jiwi bajarapacuenia pibisiacuene pexanaenexa, Dioso juya, pexaniacuene peto-exanabiabinexatsi», jai tsabiabi najumetsënëtsiaya xanë yabara. Bajarapacuenia pejumaitsiwi xanë yabara, yapëtanetsi Dioso penaneconitsia-exanaenexatsi.
Pablo yapëtaeya-exana daxitajiwi penaneconitsijawa Diosojawabelia
9 ¿Detsa pacuenia pacanaëjëtame? ¿Ëjudíowitsi tsaja aneconijibia Dioso nacatane daxita mapanacuapijiwiwecuaje? ¡Jume raja! Jumaitsinë baja cajena mapacueniaje. Daxitatsi mapanacuapijiwitsije, judíowi, apojudíowi-ata, najëpaeya pibisiajamatabëcuene nacanamatacaitoroba, pibisiacuene waja-exanawanapaewinexa. Bajaraxuata, daxitatsi Dioso nacananeconitsia-exanaena.
10 Xaniajanë xua pacatsipaebatsi. Daxitatsi pibisiacuene waja-exanawanapaewi. Bajarapijinia pacuenia, bajayatami Diosojumepaebiwimi, profetawi, Dioso pejumeliwaisibaxutota jumaitsi mapacueniaje:
«Pepacujiru caejiwiyo-ata aneconijibia apoponaponaee Dioso pitabarata.
11 »Ajibi peyapëtaejiwi pacuenia Dioso jamatabëcuene-itsi. Ajibi pepacuene pejitsipaejiwi Diosojawabelia caejamatabëcuene pexainaenexa.
12 Daxita Diosowecua naxuabiaya jinawanapa. Daxita ajamatabëcuenebeje. Ajibi pepacuene pexaniacuene pexanabiabijiwi.
13 »Bajarapamonae pecuaibowojoto cuenejëpa petëpaenë pemëthë petuxutsaebijawa, tsipaji cuaicuaijai tsabiabi pepopibisialiwaisianë, jiwi piamuxujitsibiliwaisianë. Pejumeta jiwi yamaxë-itojorobabiaba.f Bajarapamonae pecuaicuaijaijawata capitsapabiaba bitso piatanejumenë.g Pacuenia jomo pecuaibowojotota xaina piatanejawa, bajarajumeliwaisi-itsi bajarapamonae pecuaicuaijaijawata.
14 »Pecuaibowojotota ëpibisialiwaisi wënëcacuaicuaijaih tsabiabi Diosojawabelia. Pewënajiwijawabelia-ata pejumeta tojitsipabiaba pibisiacuene petocopiapatabiabinexatsi. Orijibia, cuaicuaijai tsabiabi piatanejumenë itsamonaejawabelia penajamatabëxainaeya-exanaenexa.
15 »Apotsita-itsacuenetsii bepijia jiwi pebeyaxuabinexa. Nexata, itaxutotsoniataenejewa beyaxuababiaba.
16 »Itsabelia ponabiaba, jiwi bejiobia-exanabiaba. Pecobecowëjawanë tobijianabiabanua.
17 »Bajarapamonae apoyapëtae xaniawaetsia jiwi aliwaisijibia peyajawajinawanapaejawa.
18 »Bajarapamonae caeto-ata apoxainae peyaiyataejamatabëcuene Diosoj», jai mapacueniaje profetawi Dioso pejumeliwaisibaxutota, daxitatsi mapanacuapijiwitsi wajaneconi wajaxainaejawa yabara.
19-20 Nexata, waxaitsi, daxita nacuapijiwitsi, yapëtanetsi pacuenia paliwaisi Dioso tonajumecopata Moisés-pijinëta, bajarapaliwaisi tonajumecopata ëjudíowinexa, pejumecowënëtawanapaenexa pacuenia itorobatsi. Itsiata, bajarapamonae apocuenecaëjëpaetsi pejumecowënëtsicapanepaejawa bajarapaliwaisi. Nexata, naneconita Diosojawabelia. Dioso penajumecopatsiliwasi Moisés-pijinëta pejumecowënëtsijamatabëcueneta, caejiwi-ata, judíowi, apojudíowi-ata Dioso aneconijibia apotae. Bajaraxuata, caejiwi-ata acuenebi pejumaitsinexa: «Xanë cajena apotonaneconitsinë Dioso», pejainexa. Dioso najumecopata bajarapaliwaisi, daxita mapanacuapijiwi penatoyapëtaenexa pibisiacuene pexanawanapaewicuene, Dioso penaneconitsia-exanaejawanexanua, bajarapaliwaisi apopejumecowënëtsixae.
Pablo yapëtaeya-exana pacuenia Dioso aneconijibia taejitsia ëpejumexaniataewi Jesús peliwaisi
21 Daxita jiwi apocuenecaëjëpaetsi pejumecowënëtsicapanepaejawa paliwaisi Dioso najumecopata Moisés-pijinëta. Nexata, aeconoxae Dioso jane baja, mapamatacabitaje nacayapëtaeya-exana pacuenia aneconijibia nacataejitsia, jumecowënëtsinejewatsi bajarapaliwaisi. Bajaraxua yabara, bajayata profetawi tajëwelia yaquina Dioso pejumeliwaisibaxutota, pacuenia Dioso wecua-ajibia-exanaejitsia pijaneconi pexainaewimi.
22 Pajiwi jumexaniatane, itaxutuajamatejemanua, Jesucristo cruzata pesiwatëpaejawatsi, Dioso wecua-ajibia-exanak bajarapajiwi pibisiacuene pexanaeneconi. Ëbajarapajamatabëcueneta Dioso wecua-ajibia-exanaena daxita pijaneconi pexainaewi, judíowi, apojudíowi-ata, tsipaji Dioso najëpaeya tane.
23 Daxitajiwi pibisiacuene pexanawanapaexae, nexata naxuabiaya Diosowecua jinawanapa, tsipaji caejiwi-ata Dioso pejitsipaecuenia apotoponaponae, pacuenia picani copiayami nacuenecataeyal aneconijibia exanatsi.m
24 Daxitajiwi pijaneconi xainae-ata, itsiata Dioso pinijicuenia piasiwaxae, bajarapamonae aneconijibia tane Cristo Jesúsn pejamatabëcueneta. Jiwi aponamatawenonae pijacuata penaneconimatamotsinexa Diosojawabelia, tsipaji baja Jesucristo amoneya tomatamotatsi pibisiacuene pexanaeneconimi, pesiwatëpaejawatatsi cruzata. Nexata, daxita pamonae siwanajamatabëcuenecopaba Jesucristojawabelia, cruzata pesiwatëpaejawatsi pijaneconi yabara, bajarapamonae Dioso aneconijibia tanetsi. Capanepatsinuao pijaneconijamatabëcuene penaneconitsia-exanaejawaminexatsiwecua.
25 Dioso copata Jesucristo petëpaenexa cruzata, daxitajiwi peneconimatamotsinexa, pibisiacuene pexanaeneconi yabara. Nexata, bajarapacuenia Jesucristo capanepaeya neconimatamota baja daxitajiwi, maparucaeje pejinawanapaewi, pepobajayata pejinawanapaewimi-ata. Bajarapacuenia peneconimatamotsixae jiwi pijaneconi, nexata Dioso siwajamatabëcuenecaewa pebara-anaepanaejawami, pajiwi siwanajamatabëcuenecopata Jesucristojawabelia, cruzata pesiwatëpaejawatsi. Bajarapacuenia pexanaexae, yapëtanetsi Dioso pianeconijibinëcuene bajayatami itsa najamatabëcuenecataitap penaneconitsia-exanaejawaminexa pamonae pijaneconi pexainaewi, Cristo pepatsiwajënaeya.
26 Bajarapacuenia najamatabëcuenecataita, tsipaji jitsipa mapamatacabijawaberenaje penajamatabëcuene-itajëtsinexa pexaniajamatabëcuene pexainaenëcuene, wajanacayapëtaeya-exanaejawata pacuenia jiwi wecua-ajibia-exanaejitsia pijaneconi pexainaewi, Jesucristo pejamatabëcueneta. Nexata, pajiwi siwanajamatabëcuenecopata Jesucristojawabelia cruzata pesiwatëpaejawatsi pijaneconi yabara, Dioso wecua-ajibia-exanatsi pijaneconi. Aneconijibia tanetsi, pacuenia bajaraPonë aneconijibi.
27 Nexata, Dioso itsa wecua-ajibia-exana jiwi pijaneconimi pesiwanajamatabëcuenecopatsixae Jesucristojawabelia, caejiwiyo-ata apoxainae xua yabara ayaijamatabëcuenejiwi nataejitsia. To-acuenebitsi, tsipaji Dioso apowecua-ajibia-exanae jiwi pijaneconimi, pejumecowënëtsicapanepaexae Dioso penajumecopatsiliwaisi Moisés-pijinëta. Biji rajane, Dioso jiwi aneconijibia tane pesiwanajamatabëcuenecopatsixae Jesucristojawabelia. Ajibi cajena itsacuenejawa xua yabara Dioso jiwi aneconijibia taejitsia, itsa aposiwanajamatabëcuenecopatsi Jesucristojawabelia.
28 Bajarapaliwaisi yabara yapëtanetsi pacuenia jiwi pijaneconi apowecua-ajibia-exanaetsi pejumecowënëtsixae Dioso penajumecopatsiliwaisi Moisés-pijinëta. Biji rajane, Dioso jiwi pijaneconi wecua-ajibia-exana pesiwanajamatabëcuenecopatsijawataq Jesucristojawabelia, pesiwatëpaexaetsi pijaneconi yabara.
29 Dioso raja ëjudíowi apopijaDioso. Dioso raja apojudíowi-ata pijaDioso.
30 Caenë rabaja Dioso. Pematatsënëa baja ajibi itsaDioso. Bajaraxuata, najëpaeya caecuenia wecua-ajibia-exanaena pijaneconi pexainaewi judíowi, apojudíowi-ata,r pamonae siwanajamatabëcuenecopaba Jesucristojawabelia, pesiwatëpaejawatsi cruzata pijaneconi yabara.
31 Dioso itsa wajaneconi nacawecua-ajibia-exana wajasiwanajamatabëcuenecopatsixae Jesucristojawabelia, wajaneconi wajanacatomatamotsijawa cruzata wajanacasiwatëpaejawata, ¿wajajumexaniataejawata tsaja amatamobia-exanatsi Dioso penajumecopatsiliwaisi Moisés-pijinëta? ¡Jume baja cajena! Biji rajane, Jesucristojawabelia wajasiwanajamatabëcuenecopatsijawata liwaisi namatamotsia-exanatsi xua nacacujaruba bajarapaliwaisi wajaneconi wajaxainaejawa yabara.