Pablo yapëtaeya-exana pacuenia Dioso naneconitsia-exanaejitsia caejiwiyo canacujitsia
2
Paxamë, pajudíowimë, pabaracuaicuaijamë tsabiabi bajarapitsipibisiacuene pexanaewi, tsipaji pacatsitaxanepana Dioso penaneconitsia-exanaenexa. Paxaniajamë, tsipaji yapëtanetsi Dioso bajaraxua pexanaejawanexa. Itsiata, bajarapacuenia panejumaitsijawata payajawananeconitame, tsipaji paxamë-ata bajarapitsipibisiacuene pa-exanawanapame.
2 Bajaraxuata, paxamë-ata Dioso pacananeconitsia-exanaena, pamatacabi naneconitsia-exanaena daxita pijaneconi pexainaewi. Bajarapamatacabita, caejiwi canacujitsia, paneconiwajëto xaina, bajarapaneconiwajëtota Dioso naneconitsia-exanaponaena, judíowi, apojudíowi-ata.
3 Nexata, paxamë pajudíowimë-ata, pibisiacuene itsa pa-exanawanapaename, ¿detsa nexata pacuenia pawecuapanepaenamea Dioso papecananeconitsia-exanaejawaminexa? Ajibi cajena, tsipaji Dioso najëpaeya naneconitsia-exanaena daxita pijaneconi pexainaewi,b judíowi, apojudíowi-ata.
4 Paxamë bewelia pataneme Dioso papeca-itaxutobejiobiataejawa, papecasiwanajamatabëcuenecataitsijawac papecananeconitsia-exanaeyaniwa, papecasiwa-ajamatabëcuenesaëjawanua pibisiacuene pa-exanabiabi-atanë. Paxamë xaniawaetsia bepacanaëjëtame xua yabara Dioso bepijia apopacananeconitsia-exanae panijaneconi paxainae-atamë. Bajarapacuenia exana, tsipaji abaxë pacajamatabëcuene-ewetaponapona pibisiacuene pane-exanaejawawecua panenajamatabëcuenepënëyorotsinexa bajaraPonëjawabelia.
5 Itsiata, paxamë bitso pajamatabëcuenetajamë. Apopajitsipaemë panenajamatabëcuenepënëyorotsijawa. Nexata, apopajamatabëcopatsimë pibisiacuene pane-exanaejawa. Bajaraxuata, ayaineconi panatsi-exanaponame panewajënaeyabelia. Nexata, paxamë-ata Dioso pacayajawananeconitsia-exanaena apojudíowi, pamatacabi naneconitsia-exanaena daxita pijaneconi pexainaewi.
Dioso najëpaeya neconi canaëjëtsiana judíowi, apojudíowi-ata
6 Nexata, pamatacabid Dioso tocanaëjëbianae caejiwi canacujitsia pexanaecuenemi, tocaëjëtsiananua pacuenia matamotsijitsia caejiwi canacujitsia pexanaecuene yabara.f Nexata, daxita pijaneconi pexainaewi naneconitsia-exanaena, paneconiwajëtota naneconitaponapona. Bajarapijinia pacuenia, pajiwi pexaniacuene exanaponapona, bajarapapexaniacuene pexanaejamatabëcuene matamotsianatsi.
7 Dioso rajutsipatsi matacabi apopewerewerecaejawa, pamonae casaë tsawanapae tsipae ëpexaniacuene pexanawanapaejawa,g pejitsipaewi Dioso pewënëcacuaicuaijainexatsih pexaniajamatabëcuenewicuenia, peyaiyataewitsicuenia-ata.i
8 Itsiata baitsi jane, penatojitsipaewi ëbajarapamonaenexa apopejitsipaewi pejumexaniataejawa Dioso peliwaisi, pejitsipaewi tsitecaeya pibisiacuene pexanawanapaejawa-ata, daxita bajarapamonae ayaicuenia Dioso anaeya naneconitsia-exanaenatsi.
9 Bajaraxuata, daxita pibisiacuene pexanawanapaewi, Dioso najëpaeya tocopatsianatsi bitso penabejiobitsicuenia pejinawanapaenexa, pejamatabëcuenebëjaicuenia-ata pijaneconijamatabëcuene. Bajaraxua Dioso to-exanaena judíowijawabelia, tsipaji copiaya bajarapamonae apojumecowënëtsi Dioso peliwaisi. Bajarapacuenia-ata to-exanaena apojudíowijawabelia, apopejumecowënëtsixae bajarapaliwaisi.
10 Itsiata baitsi jane, pamonae ëpexaniacuene pexanawanapaewi, Dioso rajutsianatsi ayaijamatabëcuene pexainaenexa, peyaiyataejamatabëcuenetsi pexainaenexa, jamatabëcuenexanepanaeya peponaponaenexa-ata. Bajaraxua Dioso to-exanaena copiaya judíowijawabelia, tsipaji bajarapamonae nato-itapeta pijajiwinexa. Bajarapacuenia-ata to-exanaena apojudíowijawabelia,
11 tsipaji Dioso apoxainae caejiwi penato-itapetsijamatabëcuene. Biji rajane, daxitajiwi pexanaecuene najëpaeya tane.
Mapanacuajiwi naneconitsiaya jinawanapa Dioso pitabarata, tsipaji caejiwiyo-ata apopejumecowënëtsicapanepaexae Dioso penajumecopatsiliwaisi Moisés-pijinëta
12 Daxita pamonae pibisiacuene exanawanapa jumetaenejewa Dioso penajumecopatsiliwaisi Moisés-pijinëta, bajarapamonae itsiata tëpaena Diosowecua pijaneconijamatabëcuene. Daxita pamonae pibisiacuene exanawanapa pejumetaecujinae Dioso penajumecopatsiliwaisi Moisés-pijinëta bajarapamonae naneconitsia-exanaenatsi bajarapaliwaisi apopejumecowënëtsixae.
13 Bajaraxuata Dioso apotae aneconijibia judíowi pejumetaejamatabëcuene Dioso penajumecopatsiliwaisi Moisés-pijinëta. Biji rajane, matapania aneconijibia tanej pajiwi jumecowënëtsicapanepa bajarapaliwaisi.
14-15 Apojudíowi apoxainae-ata bajarapayaquinaeliwaisibaxuto, Dioso itsiata tsijamatabëcuenerutatsi pitorobiliwaisi, penajumecopatsiliwaisi Moisés-pijinëta pejëpaeliwaisi, jamatejema bajarapamonae peyapëtaenexa pejamatabë-ëthëtota pacuenia be-exanawanapa. Nexata, bajarapamonae apoxainae-ata bajarapayaquinaebaxuto, itsa exanawanapaejitsipa Dioso penajumecopatsiliwaisi Moisés-pijinëta pitorobicueniatsi, najamatabëcuene-itajëtsipa Dioso petsijamatabëcuenerutsijawatsi bajarapaliwaisi. Najamatabëcuene-itajëtsipanua peyapëtaejawa pejamatabë-ëthëtota xua pibisiacuene pexanaeyaniwa, xua-ata pexaniacuene pexanaenexa. Bajaraxuata, Dioso naneconitsia-exanaena apojudíowi itsa apo-exanawanapae pitorobicueniatsi petsijamatabëcuenerutsiliwaisitsicuenia. Bajaraxuata, yapëtanetsi Dioso najëpaeya penaneconitsia-exanaejawanexa judíowi, apojudíowi-ata, tsipaji najëpaeya naneconita bajaraPonëjawabelia.
16 Nexata, Dioso pecaëjëtsimatacabi daxita pijaneconi pexainaewi, penaneconitsia-exanaenexa judíowi, apojudíowi-ata, bajarapamatacabi jane baja, Jesucristo tocopatsianatsi petocanaëjëtsinexa jiwi pijaneconi, xuanë-ata muetsia siwanajamatabëxainawanapa pexanaenexa. Bajarapaneconijawanë yabara, Dioso petonajumecopatsicueniatsi, Jesucristo najëpaeya naneconitsia-exanaena pijaneconi pexainaewi. Pamatacabi tsipaebanajetarucajë Jesucristo peliwaisi, jiwi pecapanepaeliwaisinexatsi, bajarapacuenia jiwijawabelia yajawatsipaebaponajë.
Pablo muxujioba judíowi, apopejumecowënëtsixae Dioso penajumecopatsiliwaisi Moisés-pijinëta, Dioso pexaniacuenia yawenonabiabi-atatsi
17 Paxamë, judíowi papecawënërubiwi, xaniajai paxainamek Dioso penajumecopatsiliwaisi Moisés-pijinëta. Bajaraxua yabara panatocanaëjëtame panepanepaejawanexa, Dioso papijajiwixaemë, papecananeconitsia-exanaejawawecua. Orijibia, panataneme be-ayaijamatabëcuenewi itsamonaewecua bajaraxuabeje yabara.
18 Panexainaexae Dioso penajumecopatsiliwaisi Moisés-pijinëta, payapëtaneme baja cajena xua Dioso pacatojitsipa pane-exanaenexa. Bajarapaliwaisi panenacujarubixaenua, xaniawaetsia payapëtaneme xua bitso pexaniacuenejawa pane-exanawanapaenexa. Bajaraxua paneyapëtaexae, bepanato-itapetame picani ëpexaniacuenejawanë pane-exanawanapaenexa.
19 Paxamë paneyapëtaexae xaniawaetsia bajarapaliwaisi, pana-itaxutuajamatejemamë panematacaponaenexa panecujarubijawata Dioso pejumeliwaisiwecua bepitaxutotsëcënaewijawabelia, panejamatabëcuene-itayotsinexanua Dioso peliwaisi panetsipaebijawata piajamatabëcuene-itaquiriwijawabelia Dioso pejumeliwaisiwecua.
20 Orijibia, panaexanamenua panecujarubiwinexa apopeyapëtaewijawabelia Dioso peliwaisi. Pacujarubabiabamenua pejanajumecowënëtsiwi Dioso peliwaisi, xaniawaetsia pexanawanapaenexa pacuenia itorobatsi Dioso penajumecopatsiliwaisi Moisés-pijinëta. Bitso paneyapëtaewicuenia panataeyabiabame itsamonaewecua, panexainaexae pexaniajailiwaisi, Dioso penajumecopatsiliwaisi Moisés-pijinëta.
21 ¡Panacuenecanaëjëre pane-exanaejawa yabara! Paxamë, pajudíowimë, pacujarubabiabi-atamë itsamonaejawabelia Dioso penajumecopatsiliwaisi Moisés-pijinëta, apopacuenejëpawanapaemë bajarapaliwaisi pitorobicuenia. Biji rajane, copiaya pacatoxanepana panijacuata panenacujarubijawa panejumecowënëtsinexa, tsipaji pacuene-itawetsi-atamë itsamonae penacobetoxotsiyaniwa, itsiata paxamë caranata panacobetoxotabiabame.
22 Paxamë, pacuene-itawetsi-atamë, pijawawecua pibisiacuene pexanaeyaniwa itsa petiriwajawabelia, itsiata paxamë panijawajiwiwecua, pibisiacuene pa-exanabiabame itsapetiriawijawabelia. Pacuene-itawetabiabamenua, penawajëcaeyaniwa jumapecataenëanëjawabelia. Itsiata, paxamë jumapecataenëanë penubenaebota pajoneyabiabame,l penamatamotsijawanë ofrendacuenia pejebijawanë, panenacobetoxotabiabinexa.m Bajarapacuenia pane-exanaejawata Dioso apopayaiyataemë.
23 Paxamë pajudíowimë be-ayaijamatabëcuenewi panataeyabiabame, Dioso penajumecopatsiliwaisi Moisés-pijinëta panexainaexae itsamonaewecua. Pacatsitapexaniacuene-ata panexainaejawa bajarapaliwaisi, itsiata panajamatabëcuene-itajëtabiabame apopaneyaiyataejawa bajaraPonë apopanejumecowënëtsijawata bajarapaliwaisi. Bajarapacuenia pane-exanawanapaexae itsamonae apoyaiyatae Dioso.
24 Bajaraxua yabara itsaprofetanë bajayatami yaquina baja Dioso pejumeliwaisibaxutota. Jumaitsi mapacueniaje: «Pamonae apojudíowi pibisiacuenia Dioso wënëbaracuaicuaijai tsabiabi, paxamë pajudíowimë xaniawaetsia apopanejumecowënëtabiabixae, pawajunupaebabiabi-atamë panijaDiosonëcuene»,n jai Dioso pejumeliwaisibaxutota.
25 Orijibia, pacanaëjëre: Paxamë, pajudíowimë, papebijiwimë, papecabo-upiperabëcaucubijawa, panenacuene-itajëtsinexa Dioso papijajiwimëcuene, pacatonamatamota matapania itsa pajumecowënëtawanapame Dioso penajumecopatsiliwaisi Moisés-pijinëta. Papecabo-upiperabëcaucubiwi-ata, apopacatonamatamotsi itsa apopajumecowënëtsimë bajarapaliwaisi. Nexata, Dioso-ata pacatane be-apopanenabo-upiperabëcaucubiwi.o
26 Bajarapijinia pacuenia, pamonae apojudíowi, apopenabo-upiperabëcaucubiwi-ata, itsa xaniawaetsia jumecowënëtawanapaejitsipa pitorobicuenia Dioso penajumecopatsiliwaisi Moisés-pijinëta, nexata Dioso taejitsipa bepenabo-upiperabëcaucubiwi.p
27 Pamonae apojudíowi, apopenabo-upiperabëcaucubiwi-ata, itsiata jumecowënëta Dioso penajumecopatsiliwaisi Moisés-pijinëta, pacananeconitsia-exanaena paxamë pajudíowimë Diosojawabelia, tsipaji panenabo-upiperabëcaucubiwi-ata, panexainaewi-atanua Dioso penajumecopatsiliwaisi Moisés-pijinëta, apopajumecowënëtawanapaemë bajarapaliwaisi. Bajaraxuata, Dioso pacayajawananeconitsia-exanaena pajudíowimë, pamatacabi naneconitsia-exanaena daxita pijaneconi pexainaewi.
28 Bepayapëtaneme mapacueneje: Jiwi aponaexanae pepojudíonë saya peperabëcaucutsijawatatsi, penacopatsinexa Dioso pijajiwitonëcuenia. ¡Jume baja cajena! Baitsi, xua jiwi exana naniawelia peperabëtota amatamobi, itsa apojumecowënëtsi Dioso penajumecopatsiliwaisi Moisés-pijinëta.
29 Biji rajane, pajiwi pejamatabë-ëthëtojawawetsina Dioso jumecowënëta, bajarapajiwi naexana pepacuene judíojiwi. Bajarapijinia pacuenia, jiwi aponaexanae pepacuene penabo-upiperabëcaucutsia-exanaewi Dioso pitabarata, bajarapananiapijicuene pexanaexae. Biji rajane, pajiwi Espíritu Santo bepewecuacaucutsijiwitsi pijaperujujamatabëcuenemiq pewecuaxuabinexatsi,r peponaponaenexa Dioso pijajiwitonëcuenia, bajarapajiwi naexana penabo-upiperabëcaucutsia-exanaewi Dioso pitabarata. Bajarapacuenia aponaexanae pijajiwinexa, saya naniapijicuene pexanaexae,s pejumecowënëtsixaenua Dioso penajumecopatsiliwaisi Moisés-pijinëta. Dioso siwajamatabëcuenebarëya xua Espíritu Santo to-exana jiwijawabelia, Dioso pijajiwi pexanaenexatsi. Itsiata jiwi siwajamatabëcuenebarëya tsabiabi naniapijicuene yabara.