2 Corintios
Mapabaxutoje apóstolnë Pablo cotocaewi toyaquina Jesús peliwaisi pejumexaniataewi, Corinto tomarata pejinawanapaewijawabelia
Pebajacobiliwaisi
1
Xanë, Pablonë, Dioso pejitsipaecuenia nitapeta, Jesucristo pija-apóstol-nënexanë. Nexata, pacatoyaquinatsibeje, wajabananë Timoteobeje, mapaliwaisije, Jesús papijajiwimë panejinawanapaewi Corinto tomarata, Acaya nacuajawa-ata.
2 Pexaniacuenia pacatojitsipatsi, waxa Dioso, wajatuxanenë Jesucristobeje, papecajamatabëwënëtsinexa papeca-asiwajamatabëcuene, papecabarajamatabëxanepanaejamatabëcuene-ata, jamatabëcuenexanepanaeya panenajuajinawanapaenexa.
Pablo yapëtaeya-exana pacuenia Dioso jamatabëcueneyawenonabiaba pijajiwi peto-ayapëbejejawatatsi
3 Nacatoxanepana ayaicuenia wajawënëxaniatsinexa waxa Dioso, wajatuxanenë Jesucristo paxa, tsipaji Dioso wajanaca-itaxutotsoniataeyabiabinë, wajanacajamatabëcueneyawenonabiabinënua, bitso wajanajamatabëxainaejawata.
4 Bajarapacuenia Dioso paneto-exanabeje pamatacabi panetocopiapatabiababeje daxita xua bitso panenajamatabëxainaeya-exanabeje. Bajarapijinia pacuenia, panejamatabëcuenecaëjëpaeya-exanabeje, itsamonae juya patajamatabëcueneyawenonaenexabeje, pamatacabi tocopiapatatsi bajarapitsinajamatabëxainaecuene.
5 Paxanëbeje itsamonae bitso panebejiobia-exanabiababeje Jesucristo peliwaisi yabara, pacuenia wajatuxanenë copiaya bejiobia-exanatsi. Itsiata baitsi jane, bajarapacuenia panebejiobia-exanae-atabeje, Cristo pejamatabëcueneta, Dioso ayaicuenia panejamatabëcuenebarëyaya-exanabiababeje, bitso patanajamatabëxainaeyaniwabeje.
6 Paxanëbeje, itsamonae panebejiobia-exanaponabeje Jesús peliwaisi patatsipaebixaebeje. Bajarapacuenia pataponaponaejawatabeje pajumetaneme Jesús peliwaisi, papecacapanepaeliwaisinexa, Dioso papecajamatabëbarëyaya-exanaenexa. Paxanëbeje Dioso panejamatabëcuenebarëyaya-exanabeje patanebejiobia-exanaejawatabeje, juya patacajamatabëcueneyawenonaenexabeje, papecabejiobia-exanaejawata panejamatabëcuenebarëyanexa. Nexata, paepatota itsamonae pacabejiobia-exanabiabiana Jesús papijajiwixaemë, bajayajebi pajamatabëcuenesaëmë tsane Dioso pane-itaxutuajamatejemajawa, matapania bajaraPonë papecacapanepaejawabelianexa.
7 Paxanëbeje payapëtanijibeje, pane-ajamatabëcuenesaëjawanexa itsamonae papecabejiobia-exanaejawata, tsipaji Dioso pacajamatabëcueneyawenonaena, pacuenia paneto-exanabiababeje, itsamonae patanebejiobia-exanabiabijawatabeje. Daxitatsi Jesús pijajiwixaetsi, najëpaeya itsamonae nacabejiobia-exanabiaba. Najëpaeyanua Dioso nacajamatabëcueneyawenonaena, wajajamatabëcuenebarëyanexa icatsia.
8 Patajamonaemë Cristo pejamatabëcueneta, pajitsipajëbeje patacayapëtaeya-exanaenexabeje itsamonae Asia nacuata patanebejiobia-exanaejawabeje. Ayaicuenia bitso patanebejiobia-exanabiabixaebeje, nexata baja picani, pa-asaëjibinëbeje tsaponae. Apopanecaëjëpaebeje baja picani patawajënaeyabelia pataponaenexabeje. Belia panatotanijibeje patatëpaejawanexabeje.
9 «Pepacuene raeta baja panebeyaxuabianabeje», pajamatabëjanëbeje tsabiabi. Itsiata baitsi jane, bajarapacuenia patanebejiobia-exanabiabijawatabeje, panecujarubabeje pata-itaxutuajamatatejemanexabeje Dioso, patana-itaxutuajamatejemajawabejewecua, tsipaji raja, caenë Dioso icatsia jiwi piasaëya-exanaenë, petëpaejawawecua.
10 Dioso jane baja, panecapanepabeje bajarapamonae patanebeyaxuabiyaniwabeje. Orijibia, itsamatacabi itsamonae itsa panebejiobia-exanaenabeje, Dioso icatsia panecapanepaenabeje bajarapapiayaicuenewecua. BajaraPonëjawabelia pa-itaxutuajamatejemanëbeje, patawajënaeyabelia pataneyawenonabiabinexabeje.
11 Bajarapacuenia Dioso patawajënaeyabelia paneyawenonaenabeje, paxamë itsa paneyawenonaeyawajëtaponaename bajaraPonëjawabelia, pataneyawenonabiabinexabeje. Nexata, pa-ayaibitsaëtoxanetomë itsa panetowajëtaponaename Diosojawabelia, ayaibitsaëto pijinia pexaniajamatabëcuene rajutsiana Diosojawabelia, bajaraPonë ayaicuenia pataneyawenonaexaebeje patanebeyaxuabijawaminexabejewecua, paxamë patanetowajëcaexaemë tsane Diosojawabelia.
Pajamatabëcuene yabara Pablo apoponae Corinto tomarabelia pacuenia picani natocaëjëta, yabara peliwaisi
12 Itsamonae tsaena bijiaya panecuenecanaëjëtabeje, apopatapatsixaebeje paxamëjawabelia patacajumaitsicuenia.a Biji rajane, Dioso asiwaya panejamatabëcueneyawenonabeje, bajarapacuenia patacayapëtaeya-exanaenexabeje. Bajaraxuata, panasiwajamatabëcuenebarëyanëbeje bitso, tsipaji mapanacuapijiliwaisita pecanaëjëtsicuenia apopacanawajunupaebitsibeje.
13 Paliwaisianë baja pacatoyaquinabiabatsibeje, caeliwaisita anijajamatabëcueneliwaisibeje apoxainaponae. Saya caejamatabëcueneliwaisi xainapona. Apopacatoyaquinaetsibeje piayapëbejejumenëta. Nexata, panelebijawata, xaniawaetsia pajumeyapëtaeyabiabame xua pacatoyaquinatsibeje. Itsiata, apopanejumeyapëtae-atamëbeje, xua yabara apopapatsinëbeje paxamëjawata, pacatojitsipatsibeje xaniawaetsia paneyapëtaejawanexa itsamatacabijawabelia.
14 Nexata, xua abaxë aeconoxae apopajumeyapëtaemë, patapatsijawabejenexa paxamëjawabelia, pamatacabi wajatuxanenë Jesús icatsia patsianica xaniawaetsia baja pajumeyapëtaename. Nexata, paxamë panesiwajamatabëcuenebarëyamë tsane, bajarapacuenia paxanëbeje-ata pacasiwajamatabëcuenebarëyatsibeje tsane.
15 Tayapëtaexae patanesiwajamatabëcuenebarëyajawamë, xanë canaëjëtajë picani anijatobeje patacasiwaxainaejawata, patacabarëyaya-exanaejawa.
16 Nexata, pamatacabi ponajë Macedonia nacuayabelia, talianë picani copiaya bajaraxuayo jamatabëpacataeponatsi. Bajaraxuacujinae, tanawiatsinërena, canaëjëtajë picani tapatsinexanua paxamëjawabelia, pataneyawenonaenexamë tajanamutonexa, Judea nacuayabelia taponaenë.
17 Paxamë meta picani pacanaëjëtame xaniawaetsia canaëjëtsinejewanë patacajumaitsijawa taponaejawa yabara paxamëjawabelia, itsa jume, anijajamatabëcuenebeje betaxainaejawa. Bajarapacuenia itsiata xanë apojamatabëcuene-itsinë. Paxamë baja cajena panecueneyapëtaneme.
18 Dioso-ata baja cajena panejamatabëcueneyapëtanebeje pataxaniajaijawabeje yabara. Xua pajumaitsinëbeje, pa-exanabiabajëbeje. Nexata, itsa pa-exanaejitsianëbeje, «jãjã», pajanëbeje. Itsa pijinia apopa-exanaejitsianëbeje, «jume», pajanëbeje tsabiabi.
19 Paxamë payapëtaneme, pacuenia Jesucristo, Dioso pexënato, caejamatabëcuene xainabiaba, ponë yabara pacatsipaebabiabatsi xanë, Pablonë, Silvano, Timoteo-ata. Nexata, caejamatabëcuene pexainaenëxae, caecuenia «jãjã», «jume», apojai cajena. Biji rajane, Dioso, «jãjã», jai tsabiabi, Jesucristo pejamatabëcueneta.
20 Bajaraxuata, Dioso najumecapanepaeya pejumaitsijawa wajanacato-exanaenexa, pepacuene nacatocopiapatapona Jesús pejamatabëcueneta. Bajaraxuata, wajawënëxaniatsijawata Diosojawabelia, jumaitsitsi tsabiabi: «¡Xaniajai! ¡Xamë Diosomë nenajumecowë-exanaenë!», jaitsi tsabiabi.
21 Paxanëbeje, paxamë-ata, caënë Dioso, caebitsaëto naca-exana Cristojawabelia, wajawajënaeyabelia nacajamatabëcueneyawenonapona, wajawajënaeyabelia nacajamatabëcueneyawenonapona, wajawajënaeyabelia nacajamatabëcueneyawenonapona, waja-ajamatabëcuenesaëtsaponaenexa-ata. Daxitatsi Dioso naca-itapetanua Jesucristo pijajiwinexatsi, Dioso pijacuene wajatonacuenebawanapaenexa.
22 Orijibia, wajanayapëtaenexa pepacuene Dioso pexicuenetsi, pexaniajaijawanua wajanacato-exanaejawanexa najumecapanepaeya pejumaitsicuenia, Dioso baja cajena nacayacajebiayab Espíritu Santo nacatsijamatabë-ecaeya-exana.
23 Dioso yapëtane apotanajumetsënëtsijawa mapacuenia itsa pacajumaitsitsije. Pamatacabi picani jamatabëponabiabajë paxamëjawabelia, caecuenia itsa ponaejitsipajë, nexata pacabijataejitsipatsi, tsipaji abaxë apopa-exanawanapaemë pataca-itorobicuenia. Bajaraxuata, abaxë aponayajiwiponaenë paxamëjawabelia, itsa pacabijatanetsi, bitso panenajamatabëxainaeyaniwa.
24 Nexata, apopajitsipaenëbeje bitso pataca-itorobaponaejawabeje pacuenia bepa-exanawanapame, pane-itaxutuajamatejematsaponaenexa Dioso, tsipaji baja xaniawaetsia Jesucristojawabelia pasiwanajamatabëcuenecopabame. Biji rajane, pajitsipajëbeje patacajamatabëcueneyawenonaejawabeje, panejamatabëcuenebarëyatsawanapaejawa, matatoxenetsia icatsia panejamatabëcuenebarëyanexa Diosojawabelia.