Pacuenia Pablo itoroba ofrenda pexanaenexa Jesús pijajiwi, Corinto tomarata pejinawanapaewi, yabara peliwaisi,
16
Aeconoxae pacajumecanawiatsijitsiatsi xua paneyanijobame ofrenda panecaetuatsijawa yabara, xua pa-itorobijitsiamë Jesús pijajiwijawabelia, Jerusalén tomarata pejinawanapaewinexa. Xaniawaetsia pacayapëtaeya-exanatsi pacuenia pa-exanaejitsiamë. ¡Pa-exanare pacuenia itorobajë daxita Jesús pijajiwi, caebitsaëto canacujitsia, Galacia nacuata pejinawanapaewijawabelia, ofrenda pecaetuataponaejawanexa!
2 Caedomingo canacujitsia, panenacanabipalatayajuwënëjawa pacaejiwimë canacujitsia, xuawajëtoa papitaponame, pajebaponaename saicaya ofrendanexa. Nexata, tapatsimatacabi paxamëjawabelia, palata apopacaetuataponaemë tsane ofrendanexa.
3 Nexata, pamatacabi paxamëjawabelia patsianajë, pa-itapetsianame pecaponaewinexa bajarapapalata Jerusalén tomarapijiwijawabelia. Bajarapamonae caponaena tatsicobeyaquinaebaxuto, xaniawaetsia pecopiapitsinexatsi Jesús pijajiwi, Jerusalén tomarata pejinawanapaewi, petocaponaewi panecaetuatsi-ofrenda.
4 Itsa paxamë pacatsitaxanepana bajarapamonae tapëta penaponaejawa, nexata xanë yajawaponaenajë.
Xua Pablo tajëwelia siwanajamatabëxaina pexanaejawanexa, yabara peliwaisi
5 Itsa ponaenajë paxamëjawabelia, copiaya patsianajë Macedonia nacuajawata. Bajaraxuacujinae jane baja, ponaenajë paxamëjawabelia, tapatsinexa Corinto tomarata.
6 Ponaponaenajë meta paxamëjawata bajayajebi; daxita emarapaejuametonë. Nexata, bajaraxuacujinae, paneyawenonaename tajanamutonexa, itsabelia icatsia jitsipajë taponaenexa.
7 Mapanamutotaje, cae-epatoyo saya apojitsipaenë taponaponatabinexa paxamëjawata. Biji rajane, jitsipajë bajayajebi taponaponaenexa paxamëjawata, itsa wajatuxanenë Jesucristo bajarapacuenia netojitsipa.
8 Itsiata baitsi jane, abaxë aeconoxae ponaponaenajë majotaje Éfeso tomarata, pepanepaejawabelia Pentecostés fiesta. Bajarajane xuacujinae, wecuaponaenajë Éfeso tomara.
9 Majotaje nacopatsianajë, tsipaji aeconoxae netoyapëxanepana tatsipaebaponaenexa Dioso pejumeliwaisi ayaibitsaëto mapatomarapijiwijawabelia. Bajarapamonae bitso jitsipapona pejumetaenexa bajarapaliwaisi. Itsamonae picani jamatabënecuenecaranatabiaba, bajarapaliwaisi tatsipaebiyaniwa. Jamatabëcopabia-exanaponanua jiwi pejumexaniataejawa bajarapaliwaisi.
10 Timoteo itsa patsiana paxamëjawabelia, pacopiapitsianame xaniawaetsia, jamatabëcuenebarëyaya peponaponaenexa paxamëjawata, tsipaji pacuenia xanë wajatuxanenë Jesucristo pejamatabëcueneta tonacuenebaponaponajë, bajarapijinia pacuenia, bajaraponë-ata tonacuenebaponapona.
11 ¡Bajaraxuata, pëtsa itsajiwi-ata pacopatame beweliacuenia petaenexatsi! Biji rajane, payawenonaename pijanamutonexa, jamatabëcuenexanepanaeya pepatsinexa xanëjawaberena. Xanë, itsamonae yajawa, barëwajënae-ewetaponaponajë Timoteo, pepatsinexa xanëjawaberena.
12 Paxamë payanijobamenua wajabananë Apolos yabara. Bajaraponë peliwaisi pacatsipaebianatsi. Xanë picani napëna-itorobaponajë, itsamonae Jesús pijajiwi pepëta, penaponaenexa paxamëjawabelia papecataenexa. Itsiata baitsi jane, aeconoxae abaxë apojamatabëponae. Ponaena meta itsiata, itsajota cuenecaëjëpatsi.
Pacotocaewiliwaisi Pablo toyaquina Jesús pijajiwi, Corinto tomarata pejinawanapaewijawabelia
13 ¡Nayajiwitaeya pajinawanapare, itsajiwi papecayamaxë-itojorobiyaniwa Dioso peliwaisiwecua! ¡Pajamatabëcuenesaëmëre tsawanapae, panejumexaniataejawa Jesús peliwaisi! ¡Pajamatabëcuene-aitatsacamëre, Dioso pejitsipaecuene pane-exanawanapaenexa! ¡Pajamatabëcuenesaëmëre tsawanapaenua, Dioso pijacuene pane-exanawanapaenexa, itsajamatabëcuene paxainaenejewamë!
14 ¡Daxita xua pa-exanawanapame, asiwaya pa-exanawanapare itsamonaejawabelia-ata!
15 Patajamonaemë Cristo pejamatabëcueneta, payapëtaneme rabaja mapacueneje. Estéfanas pijabopijiwi, itsamonaewecua copiaya barëjumexaniatane Jesús peliwaisi, Acaya nacuata. Nexata, bajarapamonae jamatabëcuene-enabiabatsi ëDioso pijacuene. Bajaraxuata, asaëyata bitso yawenonabiaba itsamonae, Jesús pijajiwi.
16 Pacatojitsipatsi xaniawaetsia panejumecowënëtsinexa xua paca-itoroba Estéfanas-bana. ¡Pajumecowënërenua pamonae-ata jamatabëcuene-enabiabatsi, ëDioso pijacuene pexanaenexa, pacuenia exana Estéfanas-bana!
17 Bitso siwajamatabëcuenebarëyanë, paxamëjawawerena pepatsixae Estéfanas, Fortunato, Acaicobana, tsipaji bajarapamonae pexaniacuenia neyawenonabiaba, pacuenia paxamë paneyawenonaejitsipame, itsa papatsiparemena.
18 Pacuenia nejamatabëcueneyawenona tabëjaijawami tajamatabëcuenecaewinexa, bajarapijinia pacuenia, paxamë-ata pacajamatabëcueneyawenonaena, penawiabicujinae paxamëjawabelia. ¡Bajarapitsiwi xaniawaetsia pataema! ¡Payaiyataemanua!
Pebajacobiliwaisianë, penapëjiobiliwaisi-ata
19 Daxita Jesús pijajiwi, caebitsaëto canacujitsia, Asia nacuata pejinawanapaewi, pacabajacobalia. Aquila, pijawa Priscilabeje, asiwaya pacabajacobaliabejenua wajatuxanenë Jesucristo pewënëta, daxita Jesús peliwaisi pejumexaniataewi yajawa, penacaetuatsiwi bajarapajiwibeje pijabota.
20 Daxita Jesús pijajiwi, majotaje pejinawanapaewi, pacabajacobalia. ¡Paxamë-ata Jesús papijajiwimë, xaniawaetsia namata-enetsia bitso nasiwaya panabajacobabiabare!
21 Xanë Pablonë, tajacuata tacobeta pacatoyaquinatsi patacabajacobiliwaisi. Apo-itorobinë taneyawenonabiabinë tanetoyaquinaenexa.
22 Pajiwi apo-asiwa wajatuxanenë Jesucristo, bajarapajiwi naneconitsi, Diosowecua penaxuabinexa. Xanë juya jumaitsinë Jesucristojawabelia: «Patajatuxanenëmë Jesucristo bepijiayo patsianimica», janë.