Jesucristo petëpaecujinae, Dioso icatsia piasaëya-exanaejawatsi, yabara peliwaisi
15
Patajamonaemë Cristo pejamatabëcueneta, jitsipajë patacanajamatabënapitsia-exanaenexa paliwaisi imata pacatsipaebatsi, Jesús peliwaisi. Bajarapaliwaisi baja pajumexaniataneme, panesiwanajamatabëcuenecopabinexa Jesucristojawabelia. Panewajënaeyabelia tsiteca bajarapaliwaisi pajumexaniataewanapame.
2 Patacatsipaebicuenia panejumexaniataexae bajarapaliwaisi, Dioso pacacapanepa baja pibisiacuene pane-exanaeneconiwecua. Itsiata baitsi jane, patacatsipaebiliwaisia itsa apopajumexaniataemë tsane panejamatabë-ëthëtojawawetsina, nexata Dioso apopacacapanepae tsane.
3 Copiaya baja cajena pacatsipaebatsi paliwaisi wajatuxanenë Jesucristo pijacuata netsipaeba. Cristo wajanacasiwatëpaejawa pibisiacuene waja-exanaeneconi yabara, pacuenia tajëwelia jumaitsi Dioso pejumeliwaisibaxutota.
4 Cristo petëpaenë pemëthëtsicujinaetsi, acueyabimatacabita, Dioso icatsia asaëya-exanatsi, pacuenia tajëwelia jumaitsi Dioso pejumeliwaisibaxutota Cristo yabara.
5 Nexata, Cristo Dioso piasaëya-exanaecujinaetsi, copiaya Pedrojawabelia tsitanaitajëta. Bajaraxuacujinae, Jesús pijajiwi, doce ponëbeje apóstolewijawabelia, tsitanaitajëta.
6 Bajaraxuacujinae, Jesús pijajiwijawabelia, quinientos pajiwibeje pematatsënëa, penacaetuatsijawata tsitanaitajëta. Bajarapamonaeyajuwënëwimi Jesús petaewitsi itsamonae baja tëpae-ata, itsiata ayaibitsaëtoxaneto abaxë asaë tsawanapae.
7 Bajaraxuacujinae icatsia, Santiagojawabeliab Jesús tsitanaitajëta. Icatsia xuacujinae, tsitanaitajëta daxita apóstolewijawabelia.
8 Daxita apóstolewiwecua bexëajawaberena netsitanaitajëta apóstol-nënë tane-exanaenexa. Xanë nataniji pacuenia pexi pexainaejiwi bexëajawabelia baxaina cotocaewipijinacueto , bajarapacuenia itsinë bajarapamonaewecua, cotocaewi Jesús tanetsitanaitajëtsixae xanëjawaberena.
9 Daxita apóstolewiwecua xanë nataniji beweliajamatabëcuenenënë, tsipaji abaxë xanë Jesús-jawabelia itsa aposiwanajamatabëcuenecopatsinë, Jesús pijajiwi bejiobia-exanabiabajë. Bajaraxuata: «Apóstolnë», tanejainexa-ata, auranë tsabiabi.
10 Itsiata baitsi jane, Dioso tane-itaxutotsoniataexae, nitapeta baja apóstol-nënexanë. Xanëjawaberena Dioso tane-itaxutotsoniataejawa, aponacueratsi. Biji rajane, xanë, daxita bajarapa-apóstolewi matatoxenetsia, bitso Dioso tonacuenebaponaponajë. Itsiata, xanë tajamatabëcuenesaëta apotonacuenebaponaponaenë. Biji rajane, Dioso pesaëta tonacuenebaponaponajë. Nexata, bajarapasaëta nejamatabëcueneyawenonapona bajarapacuenia tatonacuenebaponaponaenexa.
Pacuenia itsamatacabi Dioso icatsia asaëya-exanaena petëpaewimi, yabara peliwaisi
11 Bajarapacuenia Dioso tonacuenebaponaponae-atanë, xanë, caenënë, aponataenë taliwaisi namatamotsijawa. Itsa-apóstolewi-ata liwaisi namatamota, tsipaji paxanë caeliwaisi pacanajuatsipaebatsi, Jesús petëpaecujinae icatsia penamatacotsijawa yabara. Bajarapaliwaisic paxamë baja pajumexaniataneme.
12 Itsa pacatsipaebatsi Cristo petëpaecujinae Dioso icatsia piasaëya-exanaejawatsi, ¿detsa xuajitsia itsamonae paxamëyajuwënëwi jamatabëcuenenawëxaniabiaya jumaitsi tsabiabi: «Jiwi rabaja petëpaecujinae ajibi icatsia piasaëjawanexa», jai tsabiabi?
13 Bajarapacuenia apobejumaitsi bajarapamonae, tsipaji peneta, itsa pepacuene ajibi tsipae petëpaewi icatsia piasaëjawanexa, nexata baja Cristo-ata Dioso icatsia apo-asaëya-exanaetsi tsipae petëpaecujinae.
14 Itsa baja Cristo petëpaecujinae Dioso icatsia apo-asaëya-exanaetsi tsipae, nexata paliwaisianë pacatsipaebawanapatsi, amatamobi tsipae. Bajarapacuenia-ata paxamë panesiwanajamatabëcuenecopabijawa Cristojawabelia, Dioso papecacapanepaenexa panijaneconiwecua, pacato-amatamobi tsipae.
15 Paxanë pa-apóstolewinë pawajunupaebanajetarubenajë daxitajawa Cristo petëpaecujinae Dioso icatsia piasaëya-exanaejawatsi. Nexata, jiwi icatsia itsa apo-asaëjitsia tsipae petëpaecujinae, paxanë panajumetsënëtsipajë Dioso piasaëya-exanaejawa Cristo.
16 Itsa peneta pepacuene ajibi tsipae petëpaewi icatsia piasaëjawanexa, nexata Cristo-ata petëpaecujinae Dioso baja icatsia apo-asaëya-exanaetsi tsipae.
17 Nexata, Cristo petëpaecujinae, Dioso baja icatsia itsa apo-asaëya-exanaetsi tsipae, nexata paxamë-ata, panesiwanajamatabëcuenecopabijawa Cristojawabelia Dioso papecacapanepaejawanexa panijaneconiwecua, saya panacueratsipame. Tsiteca abaxë panijaneconi paxainaejitsipame.
18 Bajarapacuenia itsa itsi tsipae, nexata baja pamonaemi tëpa Cristojawabelia pepuapesiwanajamatabëcuenecopabiwi, bajarapamonaemi-ata baja naxuabijitsipa.
19 Itsa waxaitsi siwanajamatabëcuenecopabijitsipatsi Cristojawabelia, Dioso wajanacayawenonabiabinexa saya ëwajajinawanapae-epatod mapanacuataje, ayaicuenia nacueratsipatsi. Apoxainaetsinua tsipae matacabi apopewerewerecaejawa Dioso pijanacuatatsia wajatëpaecujinae. Nexata, itsamonae nacasiwacanaëjëtsipa bitso wajajamatabëcuenenaxuabiwicuene.
20 Itsiata baitsi jane, paxaniajanë cajena. Cristo petëpaecujinae, Dioso baja icatsia asaëya-exanatsi. BajaraPonë copiaya Dioso asaëya-exanatsi daxita petëpaewimi piasaëya-exanaewajënaeyatsi. Nexata, Cristo namataxainaeya icatsia penamatacotsixae petëpaejawawecua, yapëtanetsi pexaniajaijawa daxitatsi Dioso icatsia wajanaca-asaëya-exanaejawanexa wajatëpaecujinae.
21 Caenë, Adán-pijinë, pibisiacuene pexanaejawa pejamatabëcueneta, taxuxuaba jiwi petëpaejawa mapanacuataje. Bajarapijinia pacuenia, caenë, Cristo, jiwi pesiwatëpaejawa pejamatabëcueneta, taxuxuaba Jesús pijajiwi petëpaewimi itsamatacabi Dioso icatsia piasaëya-exanaejawanexatsi.
22 Daxitajiwi tëpapona Adán-pijinë pemomoxixae. Bajarapijinia pacuenia, daxita pamonae, Cristo pijajiwi, Dioso icatsia asaëya-exanaenatsi, pacuenia Cristo asaëya-exanatsi.
23 Dioso, pejitsipaecuenia, icatsia asaëyaexanaponaena petëpaewimi. Namataxainaeya Cristo asaëya-exanatsi petëpaecujinae, daxita petëpaewimiwecua. Bajaraxuacujinae, Cristo pijajiwi, icatsia asaëya-exanaenatsi petëpaejawawecua, pamatacabi Cristo patsianica.
24 Pepatsicujinae, bajaraPonë copiapatsiana jane baja daxitacuene pecopiarucaeya-exanaejawanexa. Nexata, Cristo capanepaeya pecuene-amoneyabicujinae daxita pijawajabitsaëwi,e pamonae petuxanewi, penamatacaitorobisaë pexainaewi, daxitacuene pesaë pexainaejawanë-ata, bajaraxuacujinae, Dioso tocopatsiana Cristo pewetsinexa. Icatsia, itsamatacabijawabelia bajarapa-ewetsicuene tocanawiatsiana paxa Diosojawabelia.
25 Cristo yanacua-ewetaponaponaena daxita pijawajabitsaëwi pecuene-amoneyabicujinae.
26 Pepocotocaewijawa jane baja, Cristo matapania copiarucaeya-exanaena jiwi petëpaecuenemi.
27 Dioso pejumeliwaisibaxutota tajëwelia jumaitsi mapacueniaje: «Dioso itsamatacabi pexënato Cristo tocopatsiana daxitacuenewiria peto-ewetsinexatsi»,f jai Dioso pejumeliwaisibaxutota. Itsiata baitsi jane, bajarapacuenia jumaitsi-ata, Dioso aponacopatsi Pexënato pewetsinexatsi, tsipaji Dioso Pexënato tocopata peto-ewetsinexatsi daxitacuene.
28 Pamatacabi Dioso tocopatsiana daxitacuene Cristo peyanacua-ewetsinexa, bajaraPonë nacopatsiana pejamatabëcuene-ewetsinexa paxa Dioso pitorobicueniatsi pexanaenexa. Itsiata baitsi jane, Dioso penamatacaitorobinë tsane daxitanacuanëjawa, daxitacuenewiria-ata, penamatacaitorobinë tsane.
29 Petëpaewimi Dioso icatsia itsa apo-asaëya-exanaejitsiatsi tsipae ¿detsa xua yabara paxamëyajuwënëwi itsamonae jamatabëcuenenawëxaniabiaya nabautizabia-exanapona pijamonaemi, petëpaewi pewënëta,g beJesús pijajiwicuenia Dioso petotaenexatsi?
30 Bajarapacuenia Dioso itsa apo-exanaejitsia tsipae petëpaewimi, nexata pa-apóstolewinë bajarapaliwaisi apopatsipaebanajetarubenaenë tsipae, tsipaji daxitamatacabi panetsi-ayai tsabiabi-ata, patatsipaebixae.
31 Patajamonaemë Cristo pejamatabëcueneta, paxamë baja xaniawaetsia payapëtaneme daxitamatacabi tanetsi-ayai tsabiabijawa, tsipaji itsamonae picani jamatabënebeyaxuababiaba. Xaniajanënua cajena patacayapëtaeya-exanaejawa patacasiwajamatabëcuenebarëyajawa, wajatuxanenë Jesucristojawabelia panesiwanajamatabëcuenecopabixae.
32 Itsa Dioso icatsia apo-asaëya-exanaejitsia tsipae Jesús pijajiwi petëpaecujinae, nexata xanë nacueratsipajë pacujinae netsi-ayai-ata, jiwi tatsipaebaponaejawa Dioso pejumeliwaisi. Éfeso tomarapijiwi jamatabënebeyaxuaba picani. Bajarapamonae benewëthëjamatabëcuene pexainaewi.h Tsiquirijawayota wecuapanepajë. Wajatëpaecujinae icatsia Dioso itsa aponaca-asaëya-exanaejitsia tsipae, nexata xaniawaetsia jumecowënëtsipatsi pamonae jamatabëcuenenawëxaniabiaya nacatsipaeba mapacuenia pejumaitsiliwaisije:i «Ayaijawanë wajaxaejawa xaeyabiabianatsi. Aitajibitsinua tsabiabi tsane wajabarëyatsabiabinexa, tsipaji raja bepijia tëpaenatsi», pejailiwaisi wajanacatsipaebiwi jumecowënëtsipatsi.
33 ¡Itsiata baitsi jane, pëtsa panacopatame papecayamaxë-itojorobinexa bajarapacuenia pejumaitsiwi, tsipaji raja itsamonae bajumaitsi!: «Itsa yajawaponaponaejitsipame pibisiajamatabëcuenewi, belia pexaniacuene ne-exanabiabijawami cacuenebijianaejitsipa. Nexata, bajarapamonae cuenejëpaeya ponaponaejitsipame»,j bajai itsamonae.
34 ¡Panajamatabëcuene-aitawamëre, xaniawaetsia panenajamatabëxainaenexa pane-exanawanapaejawa! ¡Pëtsa baja pematatsënëa pibisiacuene pa-exaname! Bajarapacuenia paca-itorobatsi, tsipaji itsamonae paxamëyajuwënëwi caejamatabëcuene apoxainaek Diosojawabelia. Nexata, Dioso pejitsipaecuenia apojinawanapae. Mapacuenia pacajumaitsitsije pane-auranexa.
Pacuenia Dioso petëpaewimi perabë-itothianaena, icatsia piasaëya-exanaecujinaetsi, yabara peliwaisi
35 Itsamonae meta yanijobiana petëpaewimi icatsia Dioso piasaëya-exanaejawanexatsi yabara. Jumaitsi meta tsane bajarapamonae: «¿Detsa meta pacuenia petëpaewimi namatacobiana petëpaejawawecua? ¿Detsa meta nexata pitsiperabëto icatsia xainaena bajarapamonae?», jai meta tsane bajarapamonae.
36 Bajarapacuenia jamatabëcuenenawëxaniabiaya yanijobijitsipa, canaëjëtsinejewa. Waja-ubijawa, pexuto itsa ubatsi, pejuwicujinae bajarapaxutomi batsabana, pepitsapaenexa pejananae. Pexu itsa apotsabanae tsipae, ajibi tsipae pejananae.
37 Arroz-xuto, itsawiriaxutoxi-ata, pexu saya ubatsi. Apomëthëcaetsi pepabotonë.
38 Pe-ubixu, caewiriaxu canacujitsia, pe-ubicujinae capitsapapona pijawiriabotonë, pijawiriabaxu yajawa, Dioso baja cajena pecopatsicuenia.
39 Mapanacuataje Dioso copatsi-ata daxitacuenewiriawi pejinawanapaenexa, itsiata aponaperabëjëpae. Jiwi saicaya itsawiriaperabëto xaina. Itsawiriaperabëto saicaya xainapona, unupijidujuai, pepunaewi, menepijidujuai-ata.
40 Bajarapijinia itsi athëbëtatsia pejinawanapaewi, mapanacuata pejinawanapaewi-ata, nawecuaperabë-itothia. Athëbëtatsia pejinawanapaewi saicaya xaina pexaniaperabëto. Mapanacuata pejinawanapaewi-ata xaina saicayacuenia pexaniaperabëto.
41 Bajarapacuenia athëbëtatsia perubenaejawanë saicayacuenia pexania-itayotsicuene xaina. Nexata, matacabipijijuameto saicaya itayota, merawipijijuametowecua. Tulupu-ata saicayacuenia itayota bajarapajuametobejewecua. Orijibia, caetuluputo canacujitsia saicayacuenia nawecua-itayotapona.
42 Bajarapijinia pacuenia, nacawecua-itsi tsane petëpaewimi, Dioso icatsia itsa asaëya-exanaenatsi. Saicayaperabëto nacawecuaxainaena. Petëpaejiwi irabelia itsa mëthëtatsi, tsabana baja. Bajaraxuacujinae, Dioso icatsia itsa asaëya-exanaenatsi Jesús pijajiwi, apopetsabanaeperabëtonexa jane baja xainaena.
43 Petëpaejiwi mëthëtatsi waja-ataejitsibiperabëto yajawa. Bajaraxuacujinae, Dioso icatsia itsa asaëya-exanaenatsi, pexaniapeniweniwenaeperabëto jane baja xainaena. Petëpaejiwi mëthëtatsi pecueranaeperabëtomi yajawa. Bajaraxuacujinae, Dioso icatsia itsa asaëya-exanaenatsi, daxita matacabijawabelianexa jane baja pesaë pexainaeperabëto xainaena.
44 Petëpaejiwi mëthëtatsi mapanacuapijiperabëto yajawa. Bajaraxuacujinae, Dioso icatsia itsa asaëya-exanaenatsi, athëbënacuapijiperabëto xainaena. Itsawiriaperabëto abaxë aeconoxae xainatsi, mapanacuata wajajinawanapae-epatoje. Bajara-icatsia pacuenia itsamatacabi itsawiriaperabëto xainaenatsi, athëbënacuatatsia wajayajawajinawanapaeperabëtonexa.
45 Dioso pejumeliwaisibaxutota jumaitsi mapacueniaje: «Adán-pijinë Dioso copiaya pexanaenëtsi atsatota, asaë tsaponaponae pepumu-uxunicueniatsi», jai Dioso pejumeliwaisibaxutota. Itsiata baitsi jane, Cristo, cotocaewi naexana jiwitonëcuenia, penacopatsinexa cotocaewi Adán-cuenia.l Cristo acuene-itothia copiayapiji-Adán-wecua, tsipaji bajaraPonë jiwi piasaëya-exanaenë, Espíritu Santo pejamatabëcueneta. Nexata, bajarapacuenia wajanacato-exanaexae, waxaitsi, pijajiwitsi, jamatabëcuene-aitawatsi Diosojawabelia. Xainatsinua matacabi apopewerewerecaejawa.
46 Paperabëto xainatsi maparucaeje, saya mapanacuapijiperabëto, copiaya pexanaecuenia. Nexata, paperabëto Dioso itsamatacabi nacarajutsiana Espíritu Santo pecanacuenebinexa, abaxë aeconoxaeta bajarapaperabëto copia-ewetawanapatsi, wajaxainaenexa.
47 Adán-pijinë copiaya Dioso exanatsi mapanacuataje, atsabenota. Bajaraxuacujinae, bexëajawabelia, cotocaewi Cristo patsica athëbëwetsica jiwitonëcuenia.
48 Daxitatsi waxaitsi, mapanacuapijiwitsije, perabëjëpatsi Adán-pijinë, atsabenota pexanaenëtsi. Itsiata baitsi jane, itsamatacabi daxitatsi, Cristo pijajiwitsi, perabëjëpaenatsi bajaraPonë.
49 Nexata, pacuenia aeconoxae perabëjëpatsi Adán-pijinë, ponë atsabenota pexanaenëtsi, bajara-icatsia pacuenia itsamatacabi Cristo perabëjëpaenatsi, ponë athëbëwetsica pepatsinë, athëbënacuapijiperabëto wajaxainaenexa.
50 Patajamonaemë Cristo pejamatabëcueneta, jitsipajë patacatsipaebinexa mapacueneje. Acuenebi caejiwi-ata mapanacuapijiperabëto yajawa, pejonenexa Dioso pijanacuayabetsia, tsipaji bajarapaperabëto saya petsabanaejawanexa, apopiajamatabësaëjawa, daxita matacabijawabelianexa.
51 Nexata, pacatsipaebianatsi paliwaisi Dioso bajayata muetsia xainabuata, yapëtaeya-exanaenejewa abaxë itsajiwijawabelia. BajaraPonë neyapëtaeya-exana pacuenia daxitatsi waxaitsi Cristo icatsia pepatsimatacabitsica pewajënaeya, apotëpaetsi tsane. Itsiata baitsi jane, apotëpae-atatsi tsane, pamatacabi Cristo patsianica, daxitatsi nacaperabë-itothianaena Dioso.
52 Itsa najumetsiana cotocaewi trompeta piobijawa, bepijiayo tsatabi tsane, paepatoyowajëto banaitatsaquetajarabatsi, bajarapaepatoyowajëtota Dioso petëpaewi icatsia asaëya-exanaena athëbëpijiperabëto yajawa, daxitamatacabijawabelia jane baja piasaëtsawanapaenexa. Waxaitsi pijinia, waja-asaëtsawanapaewi, nacaperabë-itothianajonena.
53 Baitsi, waxaitsi waja-asaëtsawanapaewi abaxë, Dioso nacaperabë-itothianaena, apopewerewerecaeperabëto wajaxainaenexa. Pewerewerecaeperabëtomi baja nacato-ajibi tsane.
54 Nexata, paepatota bajarapacuenia nacaperabë-itothianajonena, copiajopaena jane baja pacuenia Dioso pejumeliwaisibaxutota tajëwelia jumaitsi: «Dioso pinijicuenia copiarucaeya-exanaenam jiwi petëpaecuenemi. Nexata baja, pematatsënëa apojamatabëcuene-amoneyabi tsanetsi jiwi petëpaecuenemi.
55 Ajibi baja tsane, witanecuene, petëpaecuene-ata»,n jai Dioso tajewelia.
56 Pibisiacuene waja-exanaeneconi yabara tëpaenatsi. Dioso penajumecopatsiliwaisio Moisés-pijinëta nacayapëtaeya-exana wajananeconitsiwicuene Diosojawabelia. Bajarapaliwaisi wajanaca-itawetsiliwaisi-ata picani, nacatonaexana bewajanaca-itorobiliwaisip matatoxenetsia pibisiacuene waja-exanaenexa. Nexata, bajarapaliwaisi bepenasaërajutsi wajapibisiacuenejamatabëcuenejawabelia, pibisiacuene waja-exanawanapaenexa, bajarapacuenia wajatëpaenexa wajaneconijamatabëcuene.
57 Bitso pexaniajamatabëcuene berajutatsi Diosojawabelia, tsipaji cajena bitso pexaniacuene nacato-exana. Wajatuxanenë Jesucristo pejamatabëcueneta, Dioso baja nacacapanepa q bajaraPonë wajawecuanaxuabijawaminexa, wajaperujujamatabëcuene wajanacajamatabëcuenenamatacaitorobisaëwecua-ata.
58 Patajamonaemë Cristo pejamatabëcueneta, bitso pataca-asiwawi. ¡Bajarapacuenia Dioso wajanacato-exanaexae, panewajënaeyabelia ajamatabëcuenesaëya patonacuenebawanapare jamatabëcuenebarëyaya wajatuxanenë Jesucristo! Pacatsitecawanaparenua panejumexaniataejawa xua Dioso nacato-exana Jesucristo pejamatabëcueneta. Paxamë payapëtaneme baja pacuenia apopanacueratsimë tsane, daxita xua patonacuenebawanapame wajatuxanenë Jesucristo.