Xuanë bitso cuenenamatamota Espíritu Santo pejamatabëcuenecaëjëpaeya-exanaejawanë itsajawanëwecua
14
¡Bajarapana-asiwacuene pacasaëmëre tsawanapae, tsipaji apopewerewerecaejawanexa! ¡Panatojitsipare Espíritu Santo pejamatabëcueneta papecajamatabëcuenecaëjëpaeya-exanaenexa! ¡Matatoxenetsia pasiwajamatabëcuenebëjamëre, papecajamatabëcuenecaëjëpaeya-exanaenexa, panetsipaebijawa Dioso papecayapëtaeya-exanaeliwaisia itsamonaejawabelia!
2 Panenacaetuatsijawata, paxamëyajuwënë, itsa cuaicuaijai itsawiriajumeta Espíritu Santo pejamatabëcueneta, bajarapajiwi apojamatabëcueneyawenonae pejumetaewitsi, apopepaebixae pejumetaejumeta. Caenë, Dioso, jumetane xua yabara cuaicuaijai. Pejumetaewitsi juya apoyapëtae xua yabara cuaicuaijai.
3 Itsiata, paxamëyajuwënëjiwi itsa tsipaeba penacaetuatsiwijawabelia paliwaisi Dioso jitsipa pejumetaenexa jiwi pejumetaejumeta, bajarapajiwi jamatabëcueneyawenona pejumetaewitsi pejamatabëcueneliwaisinaweretaponaenexa Dioso pijacuenejawata, pejamatabëcuenebarëyaya-exanaenexa, penajamatabëcuenesaëtsia-exanaenexanua bitso penajamatabëxainaewi.
4 Pajiwi cuaicuaijai itsawiriajumeta Espíritu Santo pejamatabëcueneta, bajarapajiwi najamatabëcuenewitsabia-exana. Itsiata, pajiwi Dioso peyapëtaeya-exanaeliwaisitsi tsipaeba jiwijawabelia, bajarapajiwi jamatabëcuenewitsabia-exanapona daxita Jesús pijajiwi.
5 Netsitaxanepanaejitsipa padaxitamë panecuaicuaijaijawa itsawiriajumeta, Espíritu Santo pejamatabëcueneta. Itsiata, bajaraxuawecua bitso pacatojitsipatsi panetsipaebinexa Dioso paneyapëtaeya-exanaeliwaisi itsamonaejawabelia, tsipaji bajaraxua bitso jamatabëcueneyawenona Jesús pijajiwi. Xanë pacatojitsipaejitsipatsi itsawiriajumeta panecuaicuaijaijawa panenacaetuatsijawata, itsa matapania paxainame itsajiwi papecajumewajunupaebijiwinexa xua pacuaicuaijamë jiwi apopejumetaejumeta. Pejumetaejumeta pacajumewajunupaebijitsipa papecajumetaewijawabelia xua pacuaicuaijamë tsaponae jiwi apopejumetaejumeta. Bajarapacuenia itsa pacajumewajunupaeba pejumetaejumeta, jamatabëcuenewitsabia-exanaena daxita Jesús pijajiwi.
6 Patajamonaemë Cristo pejamatabëcueneta, canaëjëtsianatsi mapacueniaje. Xanë itsa patsipajë paxamëjawata patacatsipaebinexa liwaisi apopanejumetaejumeta, apopacajamatabëcueneyawenonaetsi tsipae caejawayo-ata. Pacajamatabëcueneyawenonaejitsipatsi, matapania itsa pacatsipaebijitsipatsi paliwaisi picani abaxë Dioso apopacayapëtaeya-exanae, itsa jume, paliwaisi Dioso neyapëtaeya-exana, itsa jume, itsa pacacujarubijitsipatsinua itsaliwaisi. Bajarapacuenia itsa exanaejitsipajë, nexata pacajamatabëcuenewitsabia-exanaejitsipatsi Diosojawabelia.
7 Bajarapacuenia nacayapëtaeya-exananua jiwi pecanaxëanaejawanë. Jiwi xaniawaetsia itsa aponajumetsia-exanae tsipae jiwabo pe-obijawata, itsa jume, itsa xaniawaetsia aponajumetsia-exanae tsipae arpa peracatsijawata, nexata itsajiwi-ata apojumeyapëtae tsipae pawaji picani najumetsia-exana.
8 Bajarapacuenia-ata wajabitsaë trompeta piobijawata. Xaniawaetsia itsa aponajumetsia-exanae tsipae pajumeta nacaetuatsia-exanabiaba, nexata wajabitsaë apomuxuna-othopae tsipae, pebarënawajabitsaëtsinexa pijawajabitsaëjawabelia.
9 Bajarapijinia pacuenia, paxamë-ata panecuaicuaijaijawata. Itsa pacuaicuaijamë jiwijawabelia apopejumetaejumeta, ¿detsa pacuenia pacajumetaejitsipa? Pajumenaxuabijitsipame saya, bajarapaliwaisi panetsipaebijawa.
10 Xaniajai. Mapanacuataje bitso nawita daxitawiriajumenë. Nexata, caewiriajume canacujitsia saicaya xainapona pecuaicuaijaicuene.
11 Itsiata, tajanacuapijinë-ata, itsa nebarëcuaicuaijai tsipae itsawiriawi pijajumeta, apotajumetaejumeta, nexata bepasaicayanacuapijinënëbeje panataejitsipajëbeje.
12 ¡Nexata, paxamë ayaicuenia panejitsipaexae, Dioso papecajamatabëcuenecaëjëpaeya-exanaejawa, Espíritu Santo pejamatabëcueneta, panecanacuenebijawanënexa, panatojitsipare Dioso nawitsia papecajamatabëcuenecaëjëpaeya-exanaenexa, xuanëta pajamatabëcueneyawenonaejitsiamë daxita Jesús pijajiwi pejamatabëcueneliwaisiwitsabinexa Dioso pijacuenejawata, piajamatabëcuenesaënexanua Diosojawabelia!
13 Nexata, xaniawaetsia pejamatabëcueneyawenonaenexa daxita Jesús pijajiwi, pajiwi Espíritu Santo jamatabëcuenecaëjëpaeya-exanatsi itsawiriajumeta pecuaicuaijaijawa, bajarapajiwi bewajëta Diosojawabelia caecuenia peyawenonaenexatsinua jiwi pejumetaejumeta penajumewajunupaebinexa bajarapaliwaisi.
14 Bajarapacuenia xanë-ata, wajëcae-atanë tsipae Diosojawabelia, tacuaicuaijainexa itsawiriajumeta, apotajumetaejumeta, nexata saya Espíritu Santo necuaicuaijaiya-exanaejitsipa tawajëtsijawata taja-espíritu. Itsiata, aponajumeyapëtaenë tsipae xua wajëtajë Diosojawabelia.
15 Bajaraxua yabara, ¿detsa xua nexata be-exanajë? Xanë, itsa wajëtajë Diosojawabelia Espíritu Santo nejamatabëcueneyawenonaeya, bewajëtajë tanajumeyapëtaecuenia. Itsa naxëanajë Espíritu Santo nejamatabëcueneyawenonaeya, benaxëanajë tanajumeyapëtaecuenia.
16 Bajarapacuenia-ata, itsa paxamë Espíritu Santo pacajamatabëcueneyawenonaejitsipa, pexaniajamatabëcuene panerajutsinexa Diosojawabelia penacaetuatsiwi apopejumetaejumeta, bajarapamonae apocuenecaëjëpaetsi tsipae yawenonaeya pexaniajamatabëcuene panenajuarajutsinexa Diosojawabelia, Espíritu Santo papecacuaicuaijaiya-exanaexae itsawiriajumeta.
17 Bitso pexaniacuenia pawënëxaniatsi-atamë tsipae Diosojawabelia, pexaniacuene papecato-exanaejawa yabara, itsiata, panecuaicuaijaixae penacaetuatsiwi apopejumetaejumeta, pexaniacuenia panetsipaebijawa apojamatabëcueneyawenonae tsipae caejiwi-ata.
18 Pexaniajamatabëcuenecuene rajutajë Diosojawabelia, Espíritu Santo tanejamatabëcuenecaëjëpaeya-exanaexae tacuaicuaijainexa itsawiriajumenëta padaxitamëwecua.
19 Itsiata baitsi jane, Jesús pijajiwi penacaetuatsijawata, netoxanepana caejumebeje tatsipaebijawa jiwi pejumetaejumeta, tatsipaebijawawecua ayailiwaisi jiwi apopejumetaejumeta, tsipaji tsiquiriliwaisiyo-ata paebi-atanë tsipae jiwi pejumetaejumeta, xaniawaetsia cujarubijitsipajë.
20 ¡Patajamonaemë Cristo pejamatabëcueneta, pëtsa pajamatabëcuenejëpame pejewaxi Espíritu Santo papecajamatabëcuenecaëjëpaeya-exanaejawanë yabara! Biji rajane, pacatoxanepana bepejewaxijamatabëcuene panexainaejawa, pibisiacuene pane-exanaeyaniwa. Bajaraxuata, penaweretsiwicuenia pacanaëjëtsianame daxita bajaraxuanë yabara.
21 Dioso pejumeliwaisibaxutota, profeta Isaías-pijinë tajëwelia jumaitsi mapacueniaje judíowi yabara: «Itsamatacabijawabelia tajumeliwaisi yapëtaeya-exanaenajë Israel-pijinë pemomoxijawabelia apopejumetaejumeta, itsanacuawerena pepatsiwi saicayajume pecuaicuaijaiwi pejamatabëcueneta. Itsiata baitsi jane, bajarapamonae tsiteca apojumecowënëtsi tsaneb tajumeliwaisi»,c jai Isaías-pijinë, tajëwelia Dioso pejumeliwaisibaxutota judíowi Dioso apopejumecowënëtsijawanexa yabara.
22 Bajaraxuata, yapëtanetsi Espíritu Santo itsa jamatabëcuenecaëjëpaeya-exanapona Jesús pijajiwiyajuwënëwi pecuaicuaijainexa jiwi apopejumetaejumeta, bajaraxua copiapata Jesús peliwaisi pejume-aebiwi peyapëtaenexa pexaniaxaniajaicuened pepaebiliwaisi, pejumexaniataenexa. Pamonae pijinia pejumexaniataewi Jesús peliwaisi, itsawiriajume pejumetaejawa apojamatabëcueneyawenonaetsi caejawayo-ata. Itsiata, pejumetaejawa itsajiwi petsipaebijawatsi Dioso peyapëtaeya-exanaeliwaisitsi, bitso jamatabëcueneyawenonatsi. Pamonae pijinia apopesiwanajamatabëcuenecopabiwi Jesucristojawabelia, bajarapaliwaisi aponamatawenonae.
23 Nexata, paxamë, Jesús papijajiwimë, panenacaetuatsijawata padaxitamë itsa pacuaicuaijamë tsipae itsawiriajumenëta, itsa napata itsajiwi, Jesucristojawabelia apopesiwanajamatabëcuenecopatsijiwi, itsa jume, apopeyapëtaejiwi xua yabara bajarapacuenia pa-exaname, bajarapajiwi pacabarajamatabëjumaitsi tsipae: «Mara pamonaeje saya pematajemabiwitsije», pacabarajamatabëjai tsipae, apopejumetaexae paliwaisi patsipaebame.
24 Itsiata, padaxitamë itsa patsipaebijitsipame Dioso pewënëta, paliwaisi jitsipa pejumetaenexa, nexata bajarapajiwi itsa pacajumetaejitsipa pijajumeta panetsipaebijawa, natoyapëtaejitsipa penaneconitsijawa Diosojawabelia.
25 Papecajumetaejawata, Dioso yapëtaeya-exanaena bajarapajiwi papibisiacuene muetsia najamatabëxainabiaba pexanaenexa. Natoyapëtaenanua penaneconitsijawa Diosojawabelia. Nexata, bajarapajiwi pematabacabëta nucaena. Cuenewënëxaniatsiaya pejumaitsinexa Diosojawabelia mapacueniaje: «¡Diosomë, bitso baja cajena ayaijamatabëcuenenëmë!», pejainexa Diosojawabelia. Orijibia, yapëtaena Dioso papecayajawaponaponaejawa.
Pablo yapëtaeya-exana Jesús pijajiwi culto pexanaecuene yabara
26 Patajamonaemë Cristo pejamatabëcueneta, itsa panacaetuatame culto pane-exanaenexa, daxita xua pa-exaname, bajaraxua bejamatabëcueneyawenona panenajuanacaetuatsiwi. Nexata, panenacaetuatsijawata itsamonae meta naxëanaena waji. Itsamonae meta cujarubiana Dioso peliwaisi. Itsa jume, Dioso pewënëta paebiana paliwaisi jitsipa pejumetaenexa. Itsamonae meta cuaicuaijai tsane itsawiriajumeta, penacaetuatsiwi apopejumetaejumeta. Itsajiwi meta pijinia jumewajunupaebiana jiwi pejumetaejumeta, xua itsajiwi cuaicuaijai itsawiriajumeta.
27 Itsiata, panenacaetuatsijawata, itsajiwi itsa cuaicuaijai tsipae itsawiriajumeta, penacaetuatsiwi apopejumetaejumeta, Dioso tocopatatsi petsipaebinexa anijajiwibeje, acueyabi pajiwibeje-ata. Itsiata, caecuenia apobenajuacuaicuaijai. Biji rajane, caejiwiyo canacujitsia becuaicuaijai tsaponae, penajumeweretsicujinae copiaya pecuaicuaijaijiwi. Xuacujinae, bejumewajunupaeba jiwi pejumetaejumeta, xua Espíritu Santo cuaicuaijaiya-exana pecuaicuaijainë itsawiriajumeta. Bajaraxuacujinae, itsanë betaxuxuaba pepaebijawa.
28 Itsiata baitsi jane, itsa ajibi itsajiwi, pejumewajunupaebijiwinexatsie jiwi pejumetaejumeta, daxitajiwi peyapëtaenexa xua cuaicuaijai itsawiriajumeta Espíritu Santo pejamatabëcueneta, nexata bajarapamonae moya be-ena. Bëpënëa saya pejamatabë-ëthëtota becuaicuaijai tsenae Diosojawabelia.
29 Bajarapijinia pacuenia, Dioso tocopata itsamonae-ata jiwijawabelia petsipaebinexa bajaraPonë pewënëta, jiwi pejumetaejumeta, paliwaisi Dioso yapëtaeya-exanatsi, anijajiwibeje, acueyabi pajiwibeje-ata. Nexata, petsipaebijawata, itsamonae xaniawaetsia benamuxuna-ewetena, pejumeyapëtaenexa itsa xaniajai paliwaisi tsipaebatsi Dioso pewënëta.
30 Nexata, bajarapamonae liwaisi petsipaebaponaejawata, bajarapaepatota penamuxuna-ewetenaewituatuajëta, itsajiwi Dioso pejamatabëcueneta liwaisi itsa yapëtaeya-exanatsi, nexata petsipaebaponaenë benajumecopata, juya cotocaewi peyapëtaeya-exanaenëtsi daxitajiwijawabelia, petsipaebinexa paliwaisi Dioso yapëtaeya-exanatsi.
31 Bajarapacuenia caenë canacujitsia paebaponaena paliwaisi Dioso yapëtaeya-exanatsi petsipaebinexa jiwijawabelia. Dioso pacatocopata panepaebijawata, daxita jiwi panejamatabëcuene-asaëya-exanaenexa bajarapaliwaisianëta.
32 Pamonae Dioso pewënëta tsipaeba daxitajiwijawabelia, paliwaisi Dioso yapëtaeya-exanatsi, bajarapamonae yapëtane paepatota najumecopatsijitsia, tsipaji Espíritu Santo pejamatabë-ëthëtota itorobatsi bajarapacuenia. Nexata, itsa najumecopata bajaraponë, juya itsanë petsipaebinexa daxitajiwijawabelia.
33 Bajarapacuenia Dioso pacatocopata pane-exanaenexa, bijiaya pane-exanaeyaniwa, xaniawaetsia jiwi pejumetaenexa, tsipaji Dioso xaniawaetsia pexanaenë.
Pacatsipaebijitsiatsi pacuenia exanabiaba daxita Jesús pijajiwi penacaetuatsijawata petiriawi yabara.
34 Petiriawi moya be-enaf Jesús pijajiwi penacaetuatsijawata, tsipaji Dioso apotocopatsitsi bajapaepatota pecuaicuaijaitsenaenexa. Petiriawi pamonajiwi yaiyataeya bejinawanapa, pacuenia Dioso pejumeliwaisibaxutota itorobatsi.g
35 Petiriwa itsa jamatabëyanijoba itsaliwaisiyo, nexata bota beyanijoba pamonajawabelia. Pia-uracuene exanaejitsipa Jesús pijajiwi penacaetuatsijawata, petiriwa itsa cuaicuaijai tsecae tsipae.
36 Paxamë bepanatoyapëtaneme pacuenia Dioso peliwaisi apotaxuxuabi paxamëjawata. Paxamë pacaemonaemë apopacatsipaebi bajarapaliwaisi. Itsamonae-ata baja cajena.
37 Pajiwi nataeyabiaba Espíritu Santo pejamatabëcuenecaëjëpaeya-exanaejawatsi, pepaebijiwinexa Dioso peyapëtaeya-exanaeliwaisitsi itsamonaejawabelia, itsa jume, peyapëtaeya-exanaejiwitsi, bajarapajiwi beyapëtane paliwaisianë pacatoyaquinatsi mapabaxutotaje, wajatuxanenë Jesucristo papeca-itorobiliwaisi panejumecowënëtsinexa.
38 ¡Itsiata, pajiwi tajumaitsiliwaisi apotsitapexaniajailiwaisitsi, nexata pëtsa pataneme Dioso pewënëta pepaebinëcuene! ¡Pëtsa pepaebiliwaisi-ata pajumexaniataneme!
39 ¡Bajaraxuata, asaëyata panatojitsipare Dioso papecajamatabëcuenecaëjëpaeya-exanaenexa Espíritu Santo pejamatabëcueneta panetsipaebinexa Dioso pewënëta daxitajiwijawabelia paliwaisi jitsipa pejumetaenexa! ¡Itsiata baitsi jane, pëtsa pajume-itawetame itsamonae pecuaicuaijaijawa itsawiriajumenëta, Espíritu Santo pecuaicuaijaiya-exanaecueniatsi!
40 ¡Itsiata, daxita xuanë pa-exanaename panenacaetuatsijawata, xaniawaetsia pa-exanaponare, wajatuxanenë Jesucristo papeca-itorobicuenia, bijiaya pane-exanaeyaniwa!