Jiwi namata-enetsia pena-asiwajawa, bitso penamatamotsijawa itsajawanëwecua
13
Dioso nejamatabëcuenecaëjëpaeya-exanae-ata tsipae tacuaicuaijainexa itsawiriawi pejumenëta, apotanatsipaebijumemi, itsa jume, ángelewi-ata pijajumeta, itsamonae itsa asiwaya apotaenë tsipae, bajaraxua neto-amatamobi Dioso pitabarata. Biji rajane, jumejëpaejitsipajë penajumetsijawa tambor, itsa jume, penajumetsia-exanaeplatojawanë, xuanë pecobeta najumetsia-exana. Bajaraxuanë najumetsi-exanae-ata, apojamatabëcueneyawenonae pejumetaewi. Bajarapijinia cuene-itsinë tsipae, itsa cuaicuaijanë itsajumenëta, asiwaya taenejewanë itsajiwi-ata.
2 Dioso nejamatabëcuenecaëjëpaeya-exanae-ata tsipae tatsipaebinexa Dioso taneyapëtaeya-exanaeliwaisi itsamonaejawabelia, nejamatabëcuenecaëjëpaeya-exanae-ata tsipae tayapëtaenexa xuanë Dioso abaxë apoyapëtaeya-exanae itsajiwijawabelia, tayapëtaenexa daxita Dioso pijacuene-ata, nejamatabëcaëjëpaeya-exanae-ata tsipae bajaraPonëjawabelia tasiwanajamatabëcuenecopatsinexa, tanecuenecaëjëpaeya-exanaenexanua tajumeta petsuto tanatixitsia-exanaenexa, bajaraxuanë neto-amatamobi Dioso pitabarata, itsamonae asiwaya itsa apotaenë tsipae.
3 Rajutaponae-atanë tsipae daxita taxainaejawaximi bepejiobiwijawabelia, bajarapacuenia nacaewetsi-atanë tsipae dajubicuenia tanetajuitsinexaa itsajiwi pejamatabëcuene, bajaraxuanë neto-amatamobi Dioso pitabarata itsamonae asiwaya itsa apotaenë tsipae. Bajarapijinia pacuenia, paxamë-ata pacuene-amatamobimë tsipae, Jesús pijajiwi asiwaya itsa apopataemë.
4 Pajiwi pepacuene asiwa itsamonae-ata, ajamatabëcuenesaë, cuenecanawiatsinejewa, bajayajebi itsacueniabi-atatsi, pexaniacuene to-exanabiabanua. Pajiwi asiwa itsamonae-ata, apocueneca-ëbi. Be-ayaijamatabëcuenejiwi aponatae, aponayabaracuaicuaijai-ata itsamonaewecua.
5 Pajiwi asiwa itsamonae-ata, bajarapajiwi apojumejemabitsi. Daxita xua xanepana, ëponënexa aponatonajamatabëxainaenua. Pajiwi asiwa itsamonae-ata, bajarapajiwi bepijia apo-anaepanae, apojamatabëcuenetsitecaenua juya pecuenecanawiatsinexa.
6 Pajiwi asiwa itsamonae-ata, aposiwajamatabëcuenebarëya pecuenetaejawata piabejecuene pexanaejawa. Biji rajane, siwajamatabëcuenebarëya pecuenetaejawata Dioso pejitsipaecuenia pexanaejawa.
7 Pajiwi asiwa itsamonae-ata itsacueniababiabi-atatsi, bajarapajiwi najamatabëcuenecataitabiaba. Nexata, copia-ewetabiaba ëpexaniacuene petocopiapatsinexatsi, xaniawaetsia jamatabëcuene-ewetaponapona petocopiapatsinexatsinua. Daxita xua tocopiapatabiabatsi, xaniawaetsia natocopiapitabiaba, jamatabëcuenebëjainejewa. Bajarapacuene pexanaewi najamatabëcuene-itajëta pepacuene piasiwajawa itsamonae-ata.
8 Jiwi pena-asiwacuene tsitecaena daxitamatacabijawabelia. Itsiata baitsi jane, Espíritu Santo pejamatabëcuenecaëjëpaeya-exanaponaejawa petsipaebinexa Dioso peyapëtaeya-exanaeliwaisitsi itsamonaejawabelia, itsamatacabijawabelia ajibi tsane. Itsawiriajumenëta Jesús pijajiwi pecuaicuaijaicuene itsamatacabijawabelia ajibi tsane. Espíritu Santo pejamatabëcuenecaëjëpaeya-exanaponaejawa itsajiwi peyapëtaeya-exanaejawa xuanë Dioso abaxë apoyapëtaeya-exanae itsajiwijawabelia, itsamatacabijawabelia amatamobi tsane.
9 Maparucaeje, xua Dioso nacajamatabëcuenecaëjëpaeya-exana wajayapëtaenexa, epatua nacayapëtaeya-exana; apodaxita. Paliwaisi-ata tsipaebatsi itsamonaejawabelia Dioso pewënëta, daxita apotsipaebicapanepaetsi.
10 Itsiata, pamatacabi icatsia Cristo patsianica, daxitacuene peyapëtaenëxae, copiarucaeya-exanaena daxita epatua wajayapëtaejawanëmi.
11 Pamatacabi abaxë pejewaxinëyonë, cuaicuaijanë pejewaxinëyonëcuenia. Najamatabëxainajë pejewaxinëyonëcuenia. Liwaisi canaëjëtajënua abaxë pejewaxinëyonëcuenia. Itsiata, tanaweretsicujinae, pejewaxijamatabëcuenemi baja copatajë.
12 Bajarapijinia pacuenia, waxaitsi jamatabëcuene-itsitsi, Dioso pecuene yabara. Maparucaeje xaniawaetsia daxitacuene apoyapëtaetsi. Pacuenia jiwi xaniawaetsia apobenajumapetae pitatsëcënaetsaxuta, bajarapacuenia bijiaya abaxë Dioso jamatabëcueneyapëtanetsi. Itsiata baitsi jane, itsamatacabijawabelia Dioso xaniawaetsia jamatabëcueneyapëtaenatsi, bewajanaitabarataenëcuenia, pacuenia aeconoxae baja Dioso xaniawaetsia nacajamatabëcueneyapëtane.
13 Mapa-acueyabixuabeje daxitamatacabijawabelia petsitecaejawanënexaje. Apowerewerecae tsane waxaitsi waja-itaxutuajamatejematsawanapaejawa. Dioso, wajawajënaeyabelia wajacopia-ewetawanapaejawab Dioso wajanacato-exanaenexa najumecapanepaeya pejumaitsicuenia, waja-asiwajawanua itsamonae-ata. Itsiata baitsi jane, bajarapa-acueyabi xuabejetuatuajëta, matatoxenetsia namatamota pena-asiwajamatabëcuene.