Espíritu Santo pejamatabëcuenecaëjëpaeya-exanaejawanë Jesús pijajiwijawabelia
12
Patajamonaemonaemë Cristo pejamatabëcueneta, jitsipajë patacayapëtaeya-exanaejawa pacuenia Dioso pejamatabëcueneta, Espíritu Santo jamatabëcuenecaëjëpaeya-exanapona caejiwi canacujitsia, Jesús pijajiwi, pexanawanapaenexa pejamatabëcuenecaëjëpaeya-exanaecueniatsi. Apojitsipaenë bijiaya panejumetaejawa bajaraxua yabara.
2 Paxamë payapëtaneme baja, itsa abaxë apopasiwanajamatabëcuenecopabimë Jesucristojawabelia, dowathi pacajamatabëcuenematacapona Diosowecua, asiwaya panenawajëcaenexa jumapecataenëanëjawabelia. Bajarapajumecataenëanë apopenatsipaebiwi, apopecuenecaëjëpaewitsinua papecayawenonaenexa.
3 Bajaraxuata, pacayapëtaeya-exanaejitsiatsi mapacueneje. Caejiwi-ata, Espíritu Santo peyajawaponaponaejawatatsi,a apocuenecaëjëpaetsi pejumaitsijawa mapacueniaje: «Jesús raja pijaneconijamatabëcuene tëpa», pejaijawa. Bajarapacuenia itsa jumaitsi, peneta apopeyapëtaeya-exanaeliwaisi Espíritu Santo. Bajarapijinia pacuenia, caejiwi-ata apocuenecaëjëpaetsi pejumaitsijawa: «Jesús raja cajena pepoPetuxanenë», pejaijawa, itsa Espíritu Santo apoyajawaponaponaetsi.
4 Aeconoxae jane baja pacayapëtaeya-exanaenatsi Espíritu Santo pexanaecuenejawanë Jesús pijajiwituatuajëta. Espíritu Santo saicaya jamatabëcuenecaëjëpaeya-exanaponae-ata caejiwi canacujitsia, Jesús pijajiwi, itsiata caenë Espíritu Santo jamatabëcuenecaëjëpaeya-exanapona daxita bajarapamonae.
5 Nexata, saicayacuenia tonacuenebaponae-ata, daxita bajarapamonae caenë wajatuxanenë Jesucristo tonacuenebawanapa pitorobicueniatsi.
6 Jesús pijajiwi nacuenejëpaeya apo-exanawanapae-ata, itsiata caenë Dioso pesaëta yawenonatsi bajarapacuenia daxita petonacuenebawanapaenexa.
7 Nexata, pacujinae Dioso tocopata Espíritu Santo pejamatabëcuenecaëjëpaeya-exanaejawa caejiwi canacujitsia, Jesús pijajiwi, bajarapacuenia exana, namata-enetsia penayawenonaenexa pejamatabëcuenecaëjëpaeya-exanaecueniatsi.
8 Nexata, itsamonae, Jesús pijajiwi, Espíritu Santo jamatabëcuenecaëjëpaeya-exanaponatsi itsamonaejawabelia xaniawaetsia pemuxujiobinexa tsiwajënaecanaëjëtsiaya,b xaniawaetsia pejinawanapaenexa Dioso pitabarata. Itsamonae pijinia jamatabëcuenecaëjëpaeya-exanaponatsi, petsipaebinexa itsamonaejawabelia, xuanë Dioso yapëtaeya-exanatsi.
9 Itsamonae pijinia jamatabëcuenecaëjëpaeya-exanaponatsi ajamatabëcuenesaëya pitaxutuajamatejemanexa Dioso. Itsamonae pijinia jamatabëcuenecaëjëpaeya-exanaponatsi pejamatejemaya-exanaenexa piawitanewi.
10 Itsamonae pijinia jamatabëcuenecaëjëpaeya-exanaponatsi Dioso pesaëta pinijicuene pexanaejawanë petsita-exanaponaenexa. Itsamonae pijinia jamatabëcuenecaëjëpaeya-exanaponatsi, petsipaebinexa Dioso pewënëtac itsamonaejawabelia, paliwaisi jitsipa pejumetaenexa. Itsamonae pijinia jamatabëcuenecaëjëpaeya-exanaponatsi pejumeliwaisiyapëtaenexa pepaebijiwi itsa pepacujiru Espíritu Santojawawerena pepitsapaeliwaisi, itsa jume, itsa dowathijawawerena najetaruca. Itsamonae pijinia jamatabëcuenecaëjëpaeya-exanaponatsi pecuaicuaijainexa apopejumetaejumenëta.d Itsamonae pijinia jamatabëcuenecaëjëpaeya-exanaponatsi pejumeyapëtaenexa bajarapajumenë, juya pejumewajunupaebaponaenexa itsamonaejawabelia pecuaicuaijaijumenëta.
11 Jesús pijajiwi saicaeyacuenia jamatabëcuenecaëjëpaeya-exanae-atatsi, itsiata caenë, Espíritu Santo, bajarapacuenia exana. BajaraPonë to-itapetapona caejiwi canacujitsia pacuenia jamatabëcuenecaëjëpaeya-exanaponaejitsia.
Espíritu Santo saicayacuenia jamatabëcuenecaëjëpaeya-exanapona caejiwi canacujitsia, namata-enetsia penayawenonabiabinexa
12 Jiwi peperabëtojawata xaina saicaeya pewënëanë. Xainanua caewito canacujitsia pexanaejawanexa. Itsiata baitsi jane, caeperabëto naexana. Bajarapijinia itsitsi Cristo pijajiwitsijawata.
13 Daxitatsi waxaitsi wajasiwanajamatabëcuenecopabiwi Jesucristojawabelia, caenë, Espíritu Santo, bewajanacabautizabiwie naca-exanaeya-exana becaeperabëto Cristojawabelia. Nexata, itsamonae judíowi-ata, apojudíowi-ata, itsamonae amoneya petonacuenebawanapaewi-ata pijatuxanewi, amoneya apopetonacuenebawanapaewi-ata, daxitatsi, caenë, Espíritu Santo, nacatsijamatabë-eca,f wajanaca-exanaenexa becaeperabëto Cristojawabelia, namata-enetsia wajana-ewetsinexa.
14 Jiwi perabëtota caewënëwiriawijawa apoxainae. Biji rajane, nawitsia xania. Bajarapijinia pacuenia, Cristojawabelia becaeperabëto penaexanaewi, caenacuenebicuene apoxainae. Nawitsia pexanaecuene xainanua.
15 Nexata, jiwi petaxu itsa meta jumaitsi tsipae: «Apopecobenëxae, nexata apopeperabëtoyajuwënëjawanë», jai-ata tsipae pejumeta, itsiata aponawecua-ajibia-exanae tsipae, tsitecaeya bajarapaperabëtoyajuwënëjawa tsipae. Pejumeta saya aponaexanae tsipae saicayajawa.
16 Bajarapacuenia jiwi pemuxuyoroto-ata, itsa meta jumaitsi tsipae: «Apopitaxutonëxae, nexata apopeperabëtoyajuwënëjawanëje», jai-ata tsipae pejumeta, itsiata aponawecua-ajibia-exanae tsipae, tsitecaeya bajarapaperabëtoyajuwënëjawa tsipae. Itsiata baitsi jane, tsitecaeya bajarapaperabëtoyajuwënëjawa tsipae.
17 ¡Pacanaëjëre! Jiwi daxitanë peperabëtuareca itsa xainaejitsipa ëpitaxutonë, ¿detsa nexata pacuenia jumetaejitsipa? Acuenebi tsipae. Daxitanë peperabëtuareca itsa xainaejitsipa ëpemuxuwojoto, ¿detsa nexata pacuenia tuxunijitsipa? Acuenebi tsipae.
18 Bajarapacuenia Dioso apo-exanae jiwi peperabëto pexanaejawata. BajaraPonë wënërutapona itsajota jitsipa caewiriawito canacujitsia perucaenexa.
19 Jiwi peperabëtota itsa xainaejitsipa caewiriawitoreca, aitothia tsipae. Nexata, aponayapëtae tsipae peperabëtocuene.
20 Xaniajanë. Jiwi peperabëtuareca nawitsia xainae-ata saicaya caewënëwito canacujitsia, itsiata saya caeperabëtoreca.
21 Orijibia, acuenebi tsipae pitaxutobeje pejumaitsinexabeje pecobebejejawabelia: «Apopacanamatawenonaetsibeje cajena», pejainexabeje. Jiwi pematabocoto-ata acuenebi tsipae pejumaitsinexa petaxubejejawabelia: «Apopacanamatawenonaetsibeje cajena», pejainexa, tsipaji daxita pawi xainatsi wajaperabëtota, namatawenonatsi.
22 Itsa nacatosajinaejitsipa caewënëwijawa wajaperabëtota, ayaicuenia cajena nacatsisajinaejitsipa. Bajaraxuata, wajaperabëtota pawijawanë nacatsita beweliasaë pexainaejawa,g bajarapawi bitso pepacuene namatawenonatsi itsawiwecua wajaperabëtota.
23 Pawijawanë waxaitsi bewelia tanetsi, naperabëcaranatatsi naitabëtsiaya. Pawijawanë ca-auratsi jiwi petaeyaniwa, xaniawaetsia, asiwaya, naperabëcaranatatsi.
24 Itsiata, pawijawanë aponaperabëca-uratsi, aposiwabëjaitsi bitso wajanaperabëcaranatsinexa. Bajarapacuenia Dioso nacatorutapona caewi canacujitsia wajaperabëtota, matatoxenetsia asiwaya wajayaiyataejawanexa, pawijawanë ca-auratsi.
25 Nexata pawi wajaperabëtota xainatsi, aponawecuanatsanae. Bajaraxuata, daxita pawi xainatsi wajaperabëtota, namata-enetsia naeweta.
26 Nexata, wajaperabëtota caewito itsa atane, daxita itsawijawabelia-ata ba-atane. Caewito-ata pijinia itsa naitabëtsianaxatatatsi, nexata daxita perabëtotsireca bayajawabarëyatsi.
27 Bajarapacuenia pacatsipaebatsi wajaperabëtopijicuene yabara, tsipaji daxita paxamë, pacaejiwimë canacujitsia, caenë Cristo bepeperabëto panaexaname, namata-enetsia panenayawenonaenexa. Bajaraxuata, saicayacuenia panacuenebawanapame Cristo pijajiwituatuajëta.
28 Dioso pejitsipaexae, itsamonae mapacuenejawanëje pexanawanapaewinexa Jesús pijajiwi tuatuajëta, Espíritu Santo jamatabëcuenecaëjëpaeya-exana Jesús pijajiwi mapacueniaje: Copiayah itapeta apóstolewinexa. Cotocaewi itapeta itsamonae petsipaebiwinexa Dioso pewënëta itsamonaejawabelia, paliwaisi jitsipa pejumetaenexa. Acueyabijawata itapeta itsamonae pecujarubiwinexa. Bajaraxuacujinae, jamatabëcuenecaëjëpaeya-exanapona itsamonae Dioso pesaëta pinijicuenejawanë petsita-exanaenexa, itsamonae piawitanewi pejamatejemaya-exanaewinexa, itsamonae pijinia peyawenonaewinexai itsamonaejawabelia, itsamonae canaëjëtsiaya penamatacaitorobiwinexa, itsamonae-ata itsawiriajumenë pecuaicuaijaiwinexa.j
29 Nexata, Jesús pijajiwi daxita apo-ë-apóstolewi, daxita apo-ëpetsipaebiwi Dioso pewënëta itsamonaejawabelia, paliwaisi jitsipa pejumetaenexa, daxita apo-ëpecujarubiwi, daxita Dioso pesaëta apo-ëpetsita-exanaponaewi pinijicuene pexanaejawanë,
30 daxita piawitanewi apo-ëpejamatejemaya-exanaewi, daxita itsawiriajumenëta apo-ëpecuaicuaijaiwi, daxita apo-ëpejumeyapëtaeya-exanaewi-ata bajarapajumenë pecuaicuaijaijawa pajamatabëcuene xaina.
31 Xanepana picani panesiwajamatabëcuenebëjaijawa Espíritu Santo papecajamatabëcuenecaëjëpaeya-exanaejawa yabara, itsiata bepasiwajamatabëcuenebëjamë papecajamatabëcuenecaëjëpaeya-exanaponaejawa xuanëta payawenonaejitsiamë itsamonae itsacuenejawanëwecua.