11
¡Xanë pacuenia pacatsita-exanaponatsi, bajarapacuenia necuenejëpaeya itsamonaejawabelia patsita-exanawanapare, pacuenia xanë cuenejëpaeya ponaponajë Cristo pexanaecuene!
Pacuenia Jesús pijajiwi be-exanawanapa culto pexanaejawata, yabara peliwaisi
2 Patajamonaemë Cristo pejamatabëcueneta, pacasiwajamatabëcuenebarëyatsi, tsipaji panejamatabënajinawanapame, pa-exanawanapamenua patacacujarubicuenia.
3 Itsiata, pacatojitsipatsi paneyapëtaenexa mapacueneje. Dioso baja cajena penamatacaitorobinë Cristonexa, bepematabocotocuenia. Nexata, Dioso juya tocopata Cristo penamatacaitorobinënexa caepebi canacujitsia, bepematabocotocuenia. Bajarapijinia pacuenia, Dioso tocopatatsi pebi penamatacaitorobinënexa pijawa, bepematabocotocuenia.
4 Bajaraxuata, cultojawata pebi itsa namata-acatsipa Diosojawabelia penawajëcaejawata, Dioso pejumeliwaisi pepaebijawatanua, najamatabëcuene-itajëta apopeyaiyataejawa pijatuxanenë Cristo, ponë Dioso tocopatatsi peyaiyataenënexa.
5 Petiriwa cultojawata namata-acatsinejewa itsa wajëcaejitsipa Diosojawabelia, paebijitsipanua Dioso peliwaisi, najamatabëcuene-itajëtsipa pamona apopeyaiyataejawa, ponë Dioso copatatsi peyaiyataenënexatsi. Bajarapacuenia itsa exanaejitsipa, pamona yapijiwi-aura tsipaetsi, tsipaji daxitajiwi penacaetuatsijawata taejitsipatsi bepemataxunaewatsi,a pacuene yabara daxita petiriawi baya-aura tsabiabi.
6 Nexata, powa apojitsipae cultojawata penamata-acatsijawa papaëbërëpanayota. Itsiata, itsa namataca-ura tsipae pemataxunaecujinaetsi, nexata namata-acatsi pepanata, Diosojawabelia penawajëcaenexa, Dioso peliwaisi pepaebinexanua, paepatota jiwi nacaetuata Jesús pewënëta.
7 Pebi apobenamata-acatsi, tsipaji Dioso copiaya exanatsi nacuenecataeya. Nexata, pebi cuene-itajëta Dioso ayaijamatabëcuenenëcuene. Petiriwa juya cuene-itajëta pamona pejamatabëcuene-ewetsiwa.
8 Dioso apojutsi pebi petiriwajawawerena. Biji rajane, Dioso cotocaewi exana petiriwa, pebi peyenesitoyajuwënëjawawerena.
9 Orijibia, Dioso baja cajena pebi apo-exanaetsi petiriwa pejamatabëcueneta. Biji rajane, Dioso baja cajena Daxitajiwi exana petiriwa pebi pejamatabëcueneta, penamatawenonaexae pejamatabëcueneyanabiwanexatsi.b
10 Bajarapajamatabëcuenebeje yabara, petiriwa benamata-acata, penajamatabëcuene-itajëtsinexa pamona peyaiyataejawa. Nexata, ángelewi itsa tanetsi pamona peyaiyataejawa, siwajamatabëcuenebarëyatsi.
11 Bajarapacuenia Dioso exanae-ata petiriwa pebinexa, itsiata waxaitsi, Jesús pijajiwitsi, yapëtanetsi pacuenia pebi, petiriwabeje, namata-enetsia nanamatawenonabeje. Nexata, pebi apo-asaë tsipae petiriwanejewa. Petiriwa pijinia apo-asaë tsipae pebinejewa.
12 Nexata, Dioso exanae-ata copiayapijiwa, pebi peyenesitoyajuwënëjawata, bajaraxuacujinae, pebijiwi naexanapona petiriwata. Diosojawawerena baja cajena daxitacuene naexana.
13 ¡Panijacuata pacanaëjëre, itsa xanepanaejitsipa petiriawi cultojawata penawajëcaenexa Diosojawabelia, papaëbërëpanayota namata-acatsinejewa!
14 Waxaitsi baja cajena, pebijiwitsi, ba-auratsi waja-amatanapiajawa.
15 Juya, petiriwa piamatanapiajawa yajawaxanepana. Asiwayanua tanetsi, piamatanapiajawa yabara. Bajarapacuenia Dioso petiriwa tocopatatsi piamatanapiajawa bepenamata-acatsicuenianexa.c
16 Itsajiwi itsa jamatabëpanejume-anaenota, caejamatabëcuene apopexainaexae petiriawi penamata-acatsijawa yabara, bajarapajiwi beyapëtane mapacueneje. Paxanë pa-apóstolewinë, daxita Jesús pijajiwi-ata, daxita nacuanëjawa pejinawanapaewi, caejamatabëcuene paxainajë bajarapacuenia petiriawi penamata-acatsijawa yabara.
Santa Cena pexanaejawa yabara pemuxujiobiliwaisi
Bijiaya pexanaejawa yabara
17 Paliwaisi aeconoxae pacatoyaquinatsi, apopatacasiwajamatabëcuenebarëyaliwaisi, tsipaji panenacaetuatsijawata bijiaya pa-exanabibame. Culto pane-exanaejawata, xaniawaetsia najamatabëcuenejëpaeya namata-enetsia xaniawaetsia apopanajamatabëcueneyawenonaemë. Caranata, saya panajamatabëcuenebijianaponame Jesús peliwaisi panenajuajumexaniataewijawabelia.
18 Najamatabëxainajë copiaya patacajumaitsinexa mapacueniaje. Pacawënëliwaisitanetsi paxamë panenacaetuatabiabijawata, Jesús papijajiwimë apopanenajamatabëcuenejëpabiabijawa. Pacawënëtanetsinua nawecuanatsanaeya pane-enabiabijawa pacaebitsaëtoximë canacujitsia. Xaniajai raeta baja, bajarapacuenia pa-exanabiabame.
19 Xanë baja netsita xaniajai natsanaeya panenawecua-enabiabijawa. Paxamë, pacaebitsaëtoximë canacujitsia, cowë panatocanaëjëtame panenajamatabëcuene-itajëtsijawa bitso caejamatabëcuene panexainaewi Diosojawabelia itsabitsaëtoxiwecua.d
20 Bajarapacuenia itsa panacaetuatabiabame Cristo papecasiwatëpajawa panenajamatabënapitsinexa nacaemonaecuenia,e nexata pepacujiru Santa Cena yabara apopanacaetuatsimë, tsipaji bajarapapexaejawa Jesús pijajiwi exanabiaba penajamatabëcuene-itajëtsinexa nacaemonaecuenia, caenë Jesucristo pesiwatëpaexaetsi.
21 Itsiata baitsi jane, bajarapacuenia apopa-exanaemë. Panenaxae-epatota,f itsamonae canaxaneta bepijia pija-epato pexaenexa paxaejawanë capata. Apo-ewetabiabi abaxë itsamonae pepatsijawa caecuenia panenajuaxaenexa. Nexata, itsamonae paxamëyajuwënëwi ayaijawa xaeyabiaba. Ayaira, vinora, matawëjëa-apaeyabiabanua. Nexata, wëna-aitajibi tsabiabi. Pamonae baja cotocaewi pepatsiwi, yawerewerecabiaba. Nexata, pijani tsabiabi.
22 Bajarapacuenia pane-exanaejawata, pexaniacuene cajena apopa-exanaemë. Beweliacuenia pataeyabiabame Jesús pijajiwiyajuwënëwi. Orijibia, pa-urababiabame pamonae pexaejawa apoxainae paxamëtuatuajëta. Itsa ayaijawa pajitsipame panexaejawanexa, pane-apaejawanexa-ata, nexata bajarapacuenia panijabonëjawa paxaename. Itsiata, itsa panajuaxaneme panenajamatabëcuene-itajëtsinexa Cristo papecasiwatëpaejawa padaxitamë, daxita caecuenia najëpaeya bepanajuaxaneme. ¿Detsa pacuenia netoxanepanaejitsipa patacajumaitsijawa pane-exanaejawa yabara? ¿Netoxanepana meta pexaniacuenia patacawënëxaniatsijawa? ¡Jume baja cajena! Paxamë saya pananeconitame Diosojawabelia, asiwaya namata-enetsia apopanenataexae.
Pacuenia Cristo tsita-exana pijajiwi penajamatabënapitabiabinexatsi pesiwatëpaejawa, yabara peliwaisi
23 Pacuenia wajatuxanenë Jesús neyapëtaeya-exana pexanaecuene yabara, bajarapijinia pacuenia, pacacujarubatsi Santa Cena pexanaecuene yabara. Pamerawi wajatuxanenë pijawajabitsaë pecobeyabelia canajetsijitsiatsi, bajarapacaniwiyopijipexaejawa petaxuxuabijawata, wajatuxanenë Jesús cobenanuca panbë.
24 Pexaniajamatabëcuene perajutsicujinae Diosojawabelia pan yabara, epatsënëca jane baja. Xuacujinae rajuta pijajiwijawabelia. Nexata jumaitsi: «Mara papan tawije,g tanacaewetsijawanexa paxamë yabara, betajiobicueneta patacasiwatëpaenexa. Bajarapacuenia tacowëta pa-exanawanapaename, patanenajamatabënapitabiabinexamë patacasiwatëpaejawa», jai wajatuxanenë Jesús pijajiwijawabelia.
25 Pexaeweretsicujinae, bajara-icatsia Jesús cobenanuca peca-apaejawa. Nexata icatsia jumaitsi: «Pora eca mapapeca-apaejawata tajana raja, pajana itajëtsiana tanewecuarunaejawata Dioso pejanacuenia penajumeliwaisicajonejawanexah mapanacuapijiwijawabelia. Bajarapajana pejamatabëcueneta Dioso aneconijibia taena mapanacuapijiwi, pijaneconi tatomatamotsixae tasiwatëpaejawata. Bajarapacuenia pane-apaeponaejawata, panenajamatabënapitabiabianame», jai wajatuxanenë Jesús pijajiwijawabelia.
26 Nexata, paxamë caepaxaecanacujitsiamë, mapapanje, mapamatawëjëa-apaera pane-apaejawatanua, pawajunupaebabiabianame itsamonaejawabelia wajatuxanenë Jesús wajanacasiwatëpaejawa cruzata. ¡Bajarapacuenia pa-exanabiabare wajatuxanenë icatsia pepatsimatacabitsicajawabelianexa!
Pacuenia Jesús pijajiwi benaxaniawaeta, Santa Cena pexanaewajënaeya
27 Jesús bajarapacuenia pejumaitsixae, pijajiwiyajuwënëjiwi itsa yaneconiaya naxaejitsipa mapapan-jawaje, itsa yaneconiaya na-apaejitsipanua mapamatawëjëa-apaeraje, bajarapajiwi naneconitsipai wajatuxanenëjawabelia, apopeyaiyataexae wajatuxanenë pewito, pejana-ata.
28 Bajaraxuayaniwa caejiwi canacujitsia xaniawaetsia benajamatabëcuenejaita, pecaxitajarabinexa paneconi xaina Dioso pitabarata,j pan penaxaewajënaeya, pematawëjëa-apaera-ata pena-apaewajënaeya.
29 Nexata, Jesús pijajiwiyajuwënëjiwi itsa naxaejitsipa, na-apaejitsipanua yaiyataenejewa Cristo peperabëto, pejana-ata, bajarapajiwi pijacuata neconinatsi-exanaejitsipa Diosojawabelia.
30 Bajarapacuenia yaneconiaya pane-exanaexae, paxamë ayaibitsaëto payajuwënë-awitanemë, payajuwënëcueranamenua. Itsamonae payajuwënëtëpame baja.
31 Itsiata, xaniawaetsia wajacuata itsa najamatabëcuenejaitsipatsi wajaneconi yabara, Santa Cena waja-exanaewajënaeya, nexata Dioso aponacananeconitsia-exanae tsipae.
32 Itsiata, wajatuxanenë itsa nacananeconitsia-exana wajanacacuenexanetsinexa, bajarapacuenia naca-exana wajanacayajawananeconitsia-exanaeyaniwa daxita mapanacuapijiwije, Cristo peliwaisi pejume-aebiwi.
33 ¡Patajamonaemë Cristo pejamatabëcueneta, itsa panacaetuatame, abaxë pana-ewetabiabare daxita pepatsijawa caecuenia panenajuaxaenexa,k panenajamatabënapitsinexa xua yabara Cristo pacasiwatëpa!
34 Panepatsiwajënaeya, pajiwi piajani, copiaya bexane pijabota xua xaina, pecanaxanetsiyaniwa piajanijamatabëcuene. Nexata, panenacaetuatsijawata, bajarapajiwi neconi aponatsi-exanae tsane Diosojawabelia, itsamonae, Jesús pijajiwi, beweliacuenia petaexae.
Itsajamatabëcuenejawaxi pematatsënëa xua yabara paneyanijobame, abaxë apopacatoyaquinaetsi mapabaxutotaje. Pamatacabi ponaenajë paxamëjawabelia, bajarajotalia xaniawaetsia pacatsipaebianatsi.