Pemuxujiobiliwaisi penawajëcabiabinexa ëDiosojawabelia
10
¡Patajamonaemë Cristo pejamatabëcueneta, panenacueratsiyaniwa pane-exanawanapaejawa Dioso pijacuene, pëtsa panacofënëtame xua tocopiapatatsi paxanë, pajudíowinë, patajasalinaiwimi petusatonacuata! Bajayatami daxita bajarapamonae pënanajetarubena itarërëboa pematacaponaecueniatsi, Moisés-pijinë pebarënajetarucaejawata. Barënicabanuab daxita petaxuta Rojo manuamene-epatuarena.
2 Bajarapamonae manuamene pe-epanicabijawata,c naexana bepenabautizabiwi. Itarërëbo pepënaponaejawata,d najamatabëcuene-itajëta caeliwaisi pexainaejawa Moisés-pijinëjawabelia.
3 Bajarapacuenia-ata caewiriapexaejawa najuaxaenajetarubena, xua Dioso rajutaponatsi,e itsa najetarubena bajarapatusato nacuayarena.
4 Caewiria mera najua-apaenajetarubena, pamera Dioso tocapitsapatsi ibotoxanetojawawerena.f Pa-ibotoxaneto bajarapamonae pëna najetarucatsi, Cristo baja cajena.g Bajarapamera piapaejawata wecua-ajibitsabiabitsi mera pejitsipaejawa.
5 Daxita bajarapacuenia Dioso pexaniacuenia yawenonaponae-atatsi, ayaibitsaëto patajasalinaiwimi jume-aeba pacuenia Dioso najumecapanepaeya jumaitsitsi. Nexata, Dioso aposiwajamatabëcuenebarëyatsi. Bajaraxuata, bajarapamonaemi nacuerata. Nexata, werebiabatsi nacayajatsiaya petusatonacuata, jonenejewa pa-irajawabelia Dioso najumecapanepaeya picani rajutsiapaebatsi.
6 Bajarapitsicuenejawanë tocopiapatatsi bajarapamonaemi, wajanacatsitanacuene-itajëtsinexa wajacuenejëpaeyaniwa. Bajaraxuata, apobe-itajitsipaetsi waja-exanaejawa pitsipibisiacuene exana bajarapamonaemi.
7 Nexata, jumapecataeya pexanaenëanëjawabelia apobe-exanaetsi itsacuenejawa, wajanajamatabëcuene-itajëtsinexa asiwaya wajayaiyataejawa, pacuenia exana bajarapamonaemi. Bajaraxua yabara Dioso pejumeliwaisibaxutota jumaitsi mapacueniaje: «Bajarapamonae penajamatabëcuene-itajëtsinexa, caejamatabëcuene pexainaejawa jumapecataenëjawabelia, ena pexaenexa, piapaenexanua, jumapecataenë pewënëta. Bajaraxuacujinae, nonobapuna naitacanitsiaya peyawajibinexa»,h jai Dioso pejumeliwaisibaxutota.
8 Apobenacuenecajitsipaetsinua wajawitota pibisiacuene wajanawecua-exanaejawa wajanacojiobiwi, pacuenia bajarapamonaemiyajuwënëwi exana. Bajarapitsipibisiacuene pexanaewi Dioso naneconitsiaya tocopata petëpaenexa caematacabita, i veintitrés mil pajiwibeje.
9 Apobejamatabëcuene-ëjëtsitsi, pibisiacuene waja-exanaejawata, wajatuxanenë Cristo, pacuenia bajarapamonaemiyajuwënëwi Dioso jamatabëcuene-ëjëba, pibisiacuene pexanaejawata. Bajarapacuenia pexanaexae, Dioso naneconitsiaya tocopata petëpaenexa jomo pesinicueniatsi.j
10 ¡Pëtsa pibisiacuenia Dioso pabaracuaicuaijamë,k pacuenia judíowi pijasalinaiwimiyajuwënëwi pibisiacuene exana, pecuenebaracuaicuaijaijawata Moisés-pijinë, Aarón-pijinëbejejawabelia! Bajaraxuata, Dioso tsi-itoroba pija-ángelnë, pewerebiabinexatsi bajarapamonaemiyajuwënëwimi.
11 Daxita bajarapacuenejawanë bajarapamonaemi tocopiapatatsi, wajanacayapëtaeya-exanaenexa pacuenia naneconitsia-exanatsi pibisiacuene pexanaexae. Bajarapaliwaisi Dioso yaquinaeya-exana pejumeliwaisibaxutota, wajanacamuxujiobinexa, waxaitsi-ata bajarapacuenia pibisiacuene waja-exanaeyaniwa, nacua pewerewerecae-itabarayota wajajinawanapaewi.
12 ¡Bajaraxuata, paxamë, panenatocanaëjëtsiwi, apopanejopaejawanexa bajarapitsipibisiacuenejawabelia, xania baja, panayajiwitaema panejopaeyaniwa!
13 Xua baja aeconoxae pataeponame, papecajamatabëcuene-ëjëtsijawa,l bajaraxua daxita jiwi tocopiapataponatsi mapanacuataje. ¡Itsiata baitsi jane, paxamë, Jesús papijajiwimë, pa-itaxutuajamatejemamëre Diosojawabelia papecayawenonaponaenexa! BajaraPonë caejamatabëcuene xaina papecayawenonaenexa papecajamatabëcuene-ëjëtsijawata. Nexata, apopacacopatsi tsane papecajamatabëcuene-amoneyabinexa pane-ajamatabëcuenesaëjawawecua. Biji rajane, Dioso pacayawenonaponaena, panewecuapanepaponaenexam pibisiacuene pane-exanaeyaniwa.
14 Bajaraxuata, patajamonaemë pataca-asiwawi, pacamuxujiobatsi panewecuanajetabijirawinexa jumapecataeya pexanaenëanëjawabelia penawajëcaejawawecua.
15 Paxamë pacatanetsi panejumeyapëtaewicuenia. Nexata, pacajamatabëcuenecaëjëpa baja panejumeyapëtaenexa patacatsipaebiliwaisi, pexaniajailiwaisicuene.
16 ¡Nexata, pacanaëjëre mapaliwaisije itsa pacatsitaxaniajai!: Itsa nacaetuanatsi wajanajamatabënapitsinexa xua yabara Cristo nacasiwatëpa, wajamatawejëa-apaera yabara pexaniajamatabëcuene rajutatsi Diosojawabelia. Nexata, itsa najua-apatsi najamatabëcuene-itajëtatsi caejamatabëcuene wajaxainaejawa Jesús wajanacasiwatëpaejawa yabara. Bajarapijinia pacuenia, itsa daxitatsi najuaxanetsi caepan, najamatabëcuene-itajëtatsi caejamatabëcuene wajaxainaejawa becaeperabëto wajanaexanaejawa Jesucristojawabelia.
17 Ayaibitsaëtoxaneto-atatsi, caepan itsiata wajanajuaxaexae, najamatabëcuene-itajëtatsi becaeperabëto wajanaexanaejawa Jesucristojawabelia.
18 Bajarapijinia pacuenia, Israel-pijinë pemomoxi. Bajarapamonae itsa capata dajubi pebeyajebinexa, bajarapayajuwënëwijawa tajuita altar-jumata Diosojawabelia.n Penacopabiwijawa bajarapamonae najuaxane, penajamatabëcuene-itajëtsinexa caejamatabëcuene pexainaejawa Diosojawabelia, nacaemonaecuenia-ata penataejawa.
19 Bajarapaliwaisibeje yabara canaëjëtsianatsi. Apojumaitsinë jumapecataenë yabara, perajutsiyajuwënëwijawa-ata tanamatamotsia-exanaenexa. Biji rajane, bajarapacuenejawabeje najua-amatamobibeje Dioso pitabarata.
20 Bajarapacuenia jumaitsinë xaniawaetsia panecanaëjëtsinexa. Padajubiwi jiwi rajuta ofrendacuenia jumapecataeya pexanaenëanëjawabelia, bajarapawi pepacujiru rajuta dowathimonaejawabelia. ApoDiosonexa cajena. Bajaraxuata, apopacatojitsipaetsi caejamatabëcuene panexainaenexa, panenaxaejawata bajaraparajutsiwiyajuwënëjawa, bajarapadowathimonaejawabelia.
21 Apopacatoxanepanae anijacuenebeje caecuenia pane-exanaejawa, wajatuxanenë Jesucristo peca-apaejawata,o panenaca-apaenexa, icatsia, xuacujinae, jumapecataeya pexanaenëanëp pewënëta peca-apaejawanë, panenaca-apaejawa panenajamatabëcuene-itajëtsiyaniwa caejamatabëcuene panexainaejawa dowathimonaejawabelia. Bajarapijinia pacuenia, apopacatoxanepanaenua panenajuaxaejawa pan panenajamatabëcuene-itajëtsinexa becaeperabëto panexainaejawa Jesucristojawabelia, xuacujinae icatsia, panenaxaejawa jumapecataeya pexanaenëanëjawabelia perajutsiyajuwënëwijawa, panenajamatabëcuene-itajëtsinexa caejamatabëcuene panexainaejawa dowathimonaejawabelia. ¡Bajarapacuene bitso cajena abeje pane-exanaejawa!
22 Waxaitsi bajarapacuene waja-exanaejawata, anaeya-exanatsi wajatuxanenë Jesucristo. Waxaitsi baja cajena, beweliasaë wajaxainaewi bajaraPonë pitabarata. Nexata, apowecuapanepaetsi tsane itsa nacananeconitsia-exanaena, caejamatabëcuene wajaxainaexae dowathimonaejawabelia.
Jesús pijajiwi apobetsita-exanae xua penajuajumexaniataewi Jesús peliwaisi jamatabëcuenebijianaejitsipatsi
23 Daxitacuene nawita waja-exanaenexa, xua jamatabë-exanatsi. Itsiata, daxitacuene waja-exanaejawa aponacacueneyawenonae. Aponacajamatabëcuene naweretsia-exanaenua Dioso pijacuenejawabelia. Bajarapacuenia pexanaejawata apojamatabëcueneyawenonaenua itsajiwi-ata.
24 Apoxanepanae wajanasiwajamatabëcuenebëjaijawa wajacuata. Biji rajane, nacatoxanepana itsamonae yabara, Jesús pijajiwi, wajasiwajamatabëcuenebëjaijawa wajajamatabëcueneyawenonaenexa.q
25 Dioso baja cajena nacatocopata wajaxaenexa itaxutejema daxitawiriawijawanë. ¡Nexata, paxamë itsa panatocomuatame pewi pecanajetabiabibonëjawata, pëtsa payanijobame pecanajetsiwijawabelia, bajarapawi yabara, itsa jumapecataeya pexanaenëanëjawabelia perajutsiyajuwënëwijawa! Itsa xaniawaetsia apopayapëtaemë tsipae jumapecataeya pexanaenëanëjawabelia perajutsiyajuwënëwijawa, nexata panexaejawata, apopanajamatabëcuenebijianaemë tsipae Diosojawabelia. ¡Saya pacomuare payanijobinejewamë!
26 Wajatuxanenë Jesucristo baja cajena pacatocopata itaxutejema panexaenexa, tsipaji daxita mapanacuaje, daxita mapanacuapijicuene-ataje, bajaraPonë baja cajena pijajawa.r
27 ¡Nexata, Jesús peliwaisi pejume-aebinë, itsa pacajunata panenaxaenexa pijaboyabelia, panaponare panenajuaxaenexa itsa pajitsipame! ¡Xua paca-abata, itaxutejema paxaema, payanijobinejewamë itsa jumapecataeya pexanaenëanëjawabelia peyajuwënërajutsiwijawa, panenajamatabëcuenebijianaeyaniwa Diosojawabelia!
28 ¡Itsiata, itsanë itsa pacajumaitsi tsipae: «Mara pawije jumapecataeya pexanaenëanëjawabelia ofrendacuenia perajutsiyajuwënëwijawaje», itsa pacajai tsipae, pëtsa patsitaxaneme, penajamatabëcuenebijianaeyaniwa bajaraponë!
29 Mapaliwaisije jumaitsinë pamonae abaxë natocanaëjëta bajaraxua yabara neconicuene. Apojumaitsinë paxamë yabara, panenatoyapëtaewi baja aponeconicuene. Itsiata, itsamonae bepasiwajamatabëcuenebëjamë papecacuenetaewi yabara. ¡Bajaraxuata, pëtsa pa-exaname itsajawa, xua yabara itsajiwi pacaneconitsipa pibisiacuene pane-exanaewicuenia!
30 Pexaniajamatabëcuene rajutsi-atanë tsipae Diosojawabelia taxaejawa yabara, ¿detsa xuajitsia tsitaxaejitsipajë tanetaewi xua tsitapibisiacuenetsi tanebaracuaicuaijainexa? Bajaraxuata, aponetoxanepanae bajarapacuenia tajamatabëcuenebijianaejawa itsajiwijawabelia, pexaniacuene rajutsi-atanë Diosojawabelia bajaraxua yabara.
31 Bajaraxuata, daxita xua pa-exaname, panexaejawa yabara, pane-apaejawa-ata yabara, patsita-exanaename papecacuenetaewi pexaniacuenia pewënëxaniatsinexa Dioso.
32 ¡Pëtsa patsita-exaname itsacuenejawayo-ata, xua yabara pacuenecaranatsipame, judíowi, apojudíowi-ata pesiwanajamatabëcuenecopabiyaniwa Jesucristojawabelia! ¡Bajarapijinia pacuenia, pëtsa patsita-exaname itsacuenejawayo-ata, xua yabara pajamatabëcuenebijianaejitsipame Jesús pijajiwiyajuwënëjiwi!
33 Mapacueniaje exanaponaponajë xanë. Daxita xua tsita-exanaponaponajë, bajarapacuenia exanajë itsamonae tanesiwajamatabëcuenebarëyanexa. Aponajamatabëxainabiabinë ta-exanaenexa xua ëxanënexa netoxanepana. Biji rajane, najamatabëxainabiabajë ta-exanaejawa xua toxanepanatsi itsamonae-ata, ayaibitsaëto pesiwanajamatabëcuenecopabinexa Jesucristojawabelia.