Pablo apóstol-nëxae, toxanepanatsi Jesús pijajiwi perajutsinexatsi penamatawenonaejawa
9
Payapëtaneme rabaja xanë tajamatabëcueneliwaisi naweretsinë Dioso pijacuenejawata. Nexata, tanejamatabëcueneliwaisi caranatsijawa . Xanë raja apóstol-nënë tataenë wajatuxanenë Jesucristo, pacuenia itsa-apóstolemonae. Orijibia, xanë patacatsipaebicuenia paxamë pasiwanajamatabëcuenecopabame Jesucristojawabelia.
2 Itsamonae aponetae-ata apóstol-nëcuenia, itsiata paxamë paneyapëtaneme apóstol-nëcuenenë, tsipaji pasiwanajamatabëcuenecopabame Jesucristojawabelia, patacatsipaebixae pexanialiwaisi, Jesús peliwaisi. Bajarapacuenia nacuene-itajëtajë apóstol-nëcuenenë.
3 Marapacuenia nayapijiwi jumecanawiatabiabajë pamonae pibisiacuenia nebaracuaicuaijai Jesús peliwaisi tatsipaebanajetarucaejawaa yabara.
4 Paxanëbeje, Bernabébeje-ata, pacatsicaruca picani patanerajutsinexamëbeje pataxaejawanexa, pata-apaeranënexabeje-ata, Jesús peliwaisi patatsipaebanajetarucaexaebeje, pacuenia pato-exanabiabame itsamonae apóstolewi.
5 Itsa patajawa pataxainaenëbeje tsipae, paxanëbeje-ata patabarëponaenexabeje Jesús peliwaisi pejumexaniataewabeje. Bajarapacuenia tsipaji, exanawanapa itsamonae apóstolewi, wajatuxanenë Jesucristo pejuyapijiwi,b apóstolnë Pedro-ata.
6 Paxamë tsaena itsacuenia panetocanaëjëtamebeje itsa-apóstolewiwecua, pataneyawenonaeyaniwamëbeje. Panetocanaëjëtamebeje, ëpaxanëbeje patajacuatabeje patanatocuenebicuenia patana-ewetsinexabeje.
7 Pacayanijobatsi: ¿Detsa pawajabitsaënë pijacuata natomatamotaponapona pijapalatata, daxita penamatawenonaejawanë penawajabitsaëtsijawata? ¡Ajibi cajena! Pitorobinëtsi tomatamotaponatsi. ¿Detsa pajiwi uvabacabo pe-ubicujinae itsa tonacuaitatsi apoxae? Banacujumaxane. ¡Ajibi cajena! ¿ Jipatsa pewetsijiwi pijadajubi apo-mileche apae? ¡Ajibi cajena! Bajarapacuenia pacatoxanepana picani pataneto-exanaejawanexamëbeje.
Pacuenia Dioso itoroba Jesús pijajiwi pematamotabiabinexa Dioso peliwaisi pepaebiwi, yabara peliwaisi
8 Itsa xanë pacamuxujiobatsi xaniawaetsia pane-ewetsinexa Jesús peliwaisi papecatsipaebiwi, ¿bajarapacuenia tsaja pacamuxujiobatsi jiwi pecanaëjëtsicuenia? ¡Jume baja cajena! Dioso penajumecopatsiliwaisi Moisés-pijinëta bajarapacuenia itoroba.
9 Jumaitsi mapacueniaje: «¡Pabueyu pacanacuenebame trigoxu petanabataxuabinexa, pëtsa papumuxatatame,c trigoxu pexaeyaniwa papecatotanabataxuabijawata! ¡Biji rajane, pacopare pexaeponaenexa!», jai Dioso pejumeliwaisibaxutota. Bajarapacuenia itsa jumaitsi, ëbueyu yabara apojumaitsi.
10 Biji rajane, bajarapacuenia jumaitsi, tsipaji Dioso nacasiwajamatabëcuenebëjai waxaitsi yabara, wajanacueratsiyaniwa wajanacuenebijawata. Bajaraxuata, ponë canacueneba iracuemo, trigoxu pe-ubinexa, bajarapijinia pacuenia, ponë tanabataxuaba bajarapatrigoxu penaweretsicujinae, bajaraponëbeje jamatabëcuene-ewetaponaponabeje najëpaeya pepitsinexabeje bajarapaxuyajuwënëjawa, penacuenebijamatabëcuene.
11 Nexata, paxanëbeje,d patacacujarubixaebeje Cristo peliwaisi, bepata-ubinëbeje panejamatabë-ëthëtota Dioso pejumeliwaisi. Nexata, juya paxamë pacatoxanepana patanerajutsinexamë patanamatawenonaejawabeje. Bajarapacuenia itsa paneyawenonamebeje, bepatanacujumanotsinëbeje pata-ubijawabeje panejamatabë-ëthëtota. ¿Pacatsita pinijicuene tsaja tsipae bajarapacuene?
12 Itsa paxamë bajarapacuenia pa-ewetabiabame itsamonae Dioso peliwaisi papecacujarubiwi, ¿bajarapacuenia tsaja apopacatsicarucae patane-ewetsinexamëbeje, Bernabébeje? Jãjã cajena.
Pacatsicarucae-ata picani bajarapacuenia pataneyawenonaenexamëbeje, itsiata paxanëbeje apopacawajëcaetsibeje. Biji rajane, panajamatabësaëtajëbeje bejiobicueneta paponaponae-atanëbeje patanamatawenonaejawabeje yabara. Bajarapacuenia apopacajamatabë-itonotsitsibeje, tsipaji apopajitsipaenëbeje Jesús peliwaisi bijiaya panetaejawa, panejumexaniataeyaniwa.
13 Payapëtaneme rabaja mapacueneje. Dioso pijatemplobota petonacuenebiwi, tocopatatsi pexaenexa ofrendacuenia pecapatabiabijawanë. Nexata, pajiwi tajuitabiaba altar-jumata pecapatabiabidajubiwijawanë, bajarapajiwi bajarapayajuwënëwijawa pitabiaba pexaenexa.
14 Bajarapijinia pacuenia, wajatuxanenë Jesucristo tocopata pamonae pejumeliwaisi pepaebanajetarubenaewi, peyawenonaenexatsi pamonae baja, jumexaniatane petsipaebiliwaisitsi.
15 Itsiata baitsi jane, xanë bajarapacuenia netocopatsi-ata, apopacawajëcaetsi itsacuenejawayo-ata patanerajutsinexamë. Orijibia, mapabaxutoje apopacatoyaquinaetsi patanerajutaponaenexamë itsacuenejawaxi tanamatawenonaexae. Biji rajane, ayaicuenia jamatabëcuenebarëyanë Jesús peliwaisi tapaebanajetarucaexae, itsajiwi neyawenonaenejewa. Nexata, netoxanepanaejitsipa tatëpaejawa itsajiwi newecua-ajibia-exanaenejewa tanasiwajamatabëcuene barëyajawa, tatsipaebanajetarucaejawa yabara Jesús peliwaisi, itsajiwi nematamotsinejewa.
16 Xanë Jesús peliwaisi tatsipaebanajetarucaexae, aponataenë be-ayaijamatabëcuenenënë. Biji rajane, bajarapaliwaisi aponejamatabëcuenecaëjëpae tanawecua-ajibia-exanaejawa. Bitso meta naneconitsipajë Diosojawabelia, jiwi itsa apotsipaebinë tsipae bajarapaliwaisi.
17 Xanë itsa tajitsipaejamatabëcuene jiwi tsipaebaponaejitsipajë Jesús peliwaisi, nexata jamatabëcuene-ewetabiabijitsipajë patanerajutsinexamë itsacuenejawa patacatsipaebijamatabëcuene. Itsiata baitsi jane, apotsipaebaponaenë tajitsipaejamatabëcuene. Biji rajane, wajatuxanenë Jesucristo tanetocopatsicuenia pacatsipaebaponatsi.
18 Bajarapacuenia ta-exanaexae, aponaca-ëjëtsinë tapitsijawa itsacuenejawa paxamëjawata. Biji rajane, bitso siwajamatabëcuenebarëyanë tapitsijawanexa amoneya patacatsipaebixae Jesús peliwaisi, pacawajëcaenejewatsi xua pacatsicaruca picani patanerajutsinexamë, apóstol-nëxaenë.
19 Xanë, itsajiwi apopijajiwitonënë-ata, amoneya tatonacuenebaponaponaenexa, itsiata tajacuata naexanajë daxita jiwi bepijajiwitonënë, amoneya tatsipaebanajetarucaenexa Jesús peliwaisi, ayaibitsaëtoxaneto pesiwanajamatabëcuenecopabinexa Cristojawabelia.
20 Bajaraxuata, itsa tsipaebaponaponajë Jesús peliwaisi judíowijawa, judíowinëcuenia ponaponajë, tajumexaniataeya-exanaenexa bajarapaliwaisi. Bajarapijinia pacuenia, itsa tsipaebaponaponajë pamonae peca-asaëwi Dioso penajumecopatsiliwaisi Moisés-pijinëta, bajarapaliwaisi jumecowënëtsiaponaponajë, tajumexaniataeya-exanaenexa Jesús peliwaisi, aponetsicarucae-ata tajumecowënëtsijawa Dioso penajumecopatsiliwaisi Moisés-pijinëta, aneconijibia tanetaenexa.
21 Bajarapijinia pacuenia, itsa tsipaebaponaponajë apojudíowijawa, apopeyapëtaewi Dioso penajumecopatsiliwaisi Moisés-pijinëta, cuenejëpaeya naponaponabiabajë,e be-apotayapëtaenëcuenia bajarapaliwaisi. Be-apotayapëtaenëcuenia naponaponabiabi-atanë, itsiata apocopatsinë tajumecowënëtsijawa Dioso penajumecopatsiliwaisi Moisés-pijinëta, saicaya tajitsipaecuenia taponaponaenexa. ¡Jume baja cajena! Biji rajane, jumecowënëtsiaponaponajë Cristo tane-itorobicuenia. Bajarapacuenia exanaponaponajë, tajumexaniataeya-exanaenexa Cristo peliwaisi itsa tsipaebajë, pesiwanajamatabëcuenecopatsinexa Cristojawabelia.
22 Itsa naponaponajë pamonae penacuene-ewetsiwi tuatuajëta, jamatabëcuenejëpaeya naponaponabiabajë, ta-exanaeyaniwa xua tsitapibisiacuenetsi bajarapamonae. Bajarapacuenia exanajë, tajamatabëcueneyawenonaenexa pewajënaeyabelia, pejumexaniataenexa Cristo peliwaisi, xaniawaetsia pitaxutuajamatejemanexa Cristojawabelia.
23 Bajarapacuenia exanaponaponajë baja jiwi pejumexaniataenexa Jesús peliwaisi, jiwi pecapanepaeliwaisinexatsi Diosojawabelia, bajarapamonae yajawa patanajuabarëyanexa pesiwanajamatabëcuenecopabijawata Jesucristojawabelia.
24 Panenacueratsiyaniwa xua Jesucristo pacarajutsiapaeba panetonacuenebijamatabëcuene,f payapëtaneme rabaja mapacueneje. Penayacopia-ucubiwi pecujinaejinaejawata, banajuacujinaejina daxita, caecujinaejinaecuene exanae-ata penayacopia-ucubinexa. Itsiata baitsi jane, ponë bitsojina daxitawecua pecujinaejinaejawata, bajaraponë, caenë, bapita xua tsipaebatsi perajutsinexatsi pecujinaejinaematamo, premiowënëjawa. ¡Bajarapijinia pacuenia, paxamë-ata, pacaenëmë canacujitsia, panenayacopia-ucubiwicuenia daxita panesaëta panewajënaeyabelia patonacuenebawanapare, panepitsinexa Jesucristo xua pacarajutsiapaeba!
25 Xaniawaetsia pepitsinexa premiojawa, daxita pamonae penayacopia-ucubiwinexa, pecujinaejinaejawata, tajëwelia banacuenexaniawaetawanapa, pebitsojinaenexa itsamonae matatoxenetsia. Orijibia, penacuenexaniawaetsimatacabianëjawa, nawecuatsata daxita xua yabijianaejitsipatsi penayacopia-ucubimatacabi. Bajarapacuenia exana pepitsinexa tsiquirinaemaxëranaxita pequiobicoronajawa, bepijiayo pebaxutsaquenaejawa. Biji rajane, waxaitsi Jesús peliwaisi wajajumexaniataewi, Dioso nacatoxaniawaetag bitso pexaniajawa athëbëtatsia wajanacarajutsinexa, apopewerewerecaejawanexa. Bajaraxuata, pacatoxanepana bitso panenacuenexaniawaetsijawa, panenayajiwitaenexa xuanë pacacuenebijianaejitsipa,h xaniawaetsia panetonacuenebawanapaejawa wajatuxanenë Jesucristo.
26 Xanë apotonacuenebaponaponaenë jemacuenia pacuenia cujinaejinaejitsipa pitaxutotsëcënaenë. Bajarapacuenia-ata penabenënexa jemacuenia apocawetsi tsipae pija-epatota.
27 Biji rajane, tanacueratsiyaniwa, najamatabëcuenexaniawaetaponaponajë, pacuenia peyanacopia-ucubinënexa naperabëxaniawaeta piajumalisaënexa. Bitso ajamatabëcuenesaëya jitsipajë wajatuxanenë Jesucristo xaniawaetsia tatonacuenebaponaponaenexa, tsipaji belia tacujarubinë-ata tsipae itsamonae Jesús peliwaisi, nacueratsipajë.