Pacuenia Pablo muxujioba jumapecataeya pexanaenëanëjawabelia perajutsiyajuwënëwijawanë, yabara peliwaisi
8
Aeconoxae pacajumecanawiatsijitsiatsi xua paneyanijobame pexaejawanë, jumapecataeya pexanaenëanëjawabelia perajutsiyajuwënëwijawanë yabara. Xaniajai rabaja daxitatsi yapëtanetsi bajarapacuene piamatamobijawa. Nexata, bajarapayajuwënëwi xae-atatsi, aponacajamatabëcueneyawenonae,a aponacajamatabëcuenebijianae-ata. Xaniajai-ata, itsiata ëwajayapëtaecuene,b be-ayaijamatabëcuenewi nacanataeya-exana itsamonaewecua. Biji rajane, namata-enetsia wajana-asiwajawa wajanajuajumexaniataewi Jesús peliwaisi, nacajamatabëcuene-asaëya-exana.
2 Pajiwi natocanaëjëta bitso peyapëtaejawa daxitacuene itsamonaewecua, bajarapajiwi jemajai. Apoyapëtae. Abaxë tosajinatsi xaniawaetsia peyapëtaejawa.
3 Itsiata baitsi jane, pajiwi asiwa Dioso, juya bajarapajiwi Dioso jamatabëcueneyapëtanetsi piasiwajawatsi.
4 Matapania jane baja, pacayapëtaeya-exanaenatsi perajutsiyajuwënëwijawanë yabara jumapecataeya pexanaenëanëjawabelia. Waxaitsi baja cajena yapëtanetsi jumapecataeya pexanaenëanë piamatamobijawa, tsipaji saya jiwi pecobeta pexanaejawanë. Yapëtanetsinua baja cajena, caenë Dioso peponaponaejawa.
5 Xaniajai. Mapanacuapijiwije, ayaibitsaëto, nawitsia xaina pijadiosowi, pesiwanajamatabëcuenecopatabiabinexa bajaraponëanëjawabelia peyawenonaenexatsi. Itsanëanë athëbëtatsia pejinawanapaenëanë. Itsanëanë pijinia iratatsica pejinawanapaenëanë. Xainanua pamonae natowënëruba petuxanewi.c
6 Itsiata baitsi jane, waxaitsi yapëtanetsi caenë waxa Dioso peponaponaejawa,d ponë daxitacuene pexanaenë.e Nexata, yaiyataeya tojinawanapatsinua waja-asiwaxae. Yapëtanetsinua caenë wajaxainaejawa pepowajatuxanenë Jesucristo,f ponë Dioso pejamatabëcueneta exana daxitacuene.g Bajaraponë pejamatabëcuenetanua asaë tsawanapaetsi, wajatojinawanapaenexa Dioso,h wajanacacapanepaexae wajaneconiwecua.
7 Itsiata, itsamonae Jesús pijajiwiyajuwënëwi xaniawaetsia abaxë apoyapëtae jumapecataeya pexanaenëanë Dioso pitabarata piamatamobijawa. Bajarapamonae pesiwanajamatabëcuenecopatsiwajënaeya Jesucristojawabelia, asiwaya nawajëcawanapa jumapecataeya pexanaenëanëjawabelia, peyawenonaenexatsi, tsipaji tsitapexaniajaidiosowitsi. Maparucae-ataje tsiteca tsitatsi pesaë pexainaewi.i Bajaraxuata, itsa xaeyabiaba perajutsiyajuwënëwijawanë jumapecataenëjawabelia, natonacanaëjëta caejamatabëcuene pexainaejawa bajarapajumapecataenëjawabelia. Nexata, natocanaëjëta pexaejawata penajamatabëcuenebijianaejawa.j
8 Yapëtanetsi rabaja waxaitsi, wajaxaejawa yabarak mapacueniaje. Apoxae-ata tsipaetsi, Dioso aponacasiwajamatabëcuenebarëya, itsa jume, xae-ata tsipaetsi aponacajamatabëcuenebijianae bajaraPonëwecua. Bajaraxuata, xae-atatsi, apoxae-atatsinua, caecuene xainabeje; Dioso apowajanacawënananeconitsia-exanaejawanexa.
9 Itsiata baitsi jane, apopacawënananeconitsia-exanae-ata, apopacatoxanepanae itaxutejema panetsitaxaejawa abaxë bewelia pejamatabëcuenenaweretsiwi pitabarata, tsipaji belia pajopaeya-exanaejitsipamel pitaxutuajamatejemajawa Dioso peliwaisiwecua. ¡Xania baja tsane bitso bepaneyapëtaewi panenaexanaewi, bajarapitsicuene pane-exanaeyaniwa!
10 Nexata, paxamë, bitso paneyapëtaewi Jesús peliwaisi, bewelia pejamatabëcuenenaweretsijiwi, itsa pacataejitsipa panexaeyenaejawa perajutsiyajuwënëwijawa jumapecataeya pexanaenëanë pijatemplobota, belia bajarapajiwi-ata naxaejitsipa papecacuenetaejawata, natoyapëtae-ata picani penajamatabëcuenebijianaejawanexa.
11 Bajarapacuenia panetsita-exanaejawata, bitso paneyapëtaewi Jesús peliwaisi panenataexae, pajamatabëcuenebijianaejitsipame pajiwi abaxë bewelia jamatabëcueneliwaisinawereta Dioso pijacuenejawalia. Apopacatoxanepanae cajena bajarapacuenia pane-exanaejawa, tsipaji baja cajena bajarapajiwinexa-ata Cristo siwatëpatsi, pacuenia paxamë pacasiwatëpa.
12 Bajarapacuenia itsa pajamatabëcuenebijianaejitsipame panenajuajumexaniataewi, pibisiacuene apopato-exanaemë tsipae ëpanewënajiwitonëjawabelia. Biji rajane, pepacujiru pananeconitsipame Cristojawabelia.
13 Bajaraxuata, xanë caeto-ata apotsita-exanaenë tsane itsacuenejawa, apotsitaxaenënua tsane xua yabara jopaeya-exanaejitsipajë Jesús pijajiwiyajuwënëjiwi, pibisiacuene pexanaeyaniwa.