Pemuxujiobiliwaisi penapitsijiwibeje yabara
7
Xua yabara panetoyaquinaremena pataneyanijobinexamë, aeconoxae pacajumecanawiatsianatsi. Paneyanijobame pebi, pijawabeje, penawecuanaperabë-asiwajawabeje yabara. «¿Xaniajai tsaja, apoxanepanae jiwi penacojibijawa?», pajamërena patanetoyaquinaejawatamë. Tajacuataa xanë netsita xanepana picani jiwi apopenacojiobijawa.
2 Itsiata baitsi jane, xanë pacajumaitsitsi mapacueniaje. Mapanacuataje nawita jiwi pewitota pibisiacuene pejitsipaewi pexanaenexa. Bajaraxuayaniwa caepebi canacujitsia pijawa bexainapona. Bajarapijinia pacuenia, caepetiriwa canacujitsia bexainapona pamona. Bajaraxuata, apotoxanepanaetsibeje, pebi, pijawabeje penawecuanaperabë-asiwanexabeje, pacuenia exana itsamonae paxamëtuatuajëta.
3 Pebi, pijawabeje namata-enetsia xaniawaetsia benaewetaponaponabeje. Penapitsixaebeje, tsicarucatsibeje pena-imoxoyobinexabeje paepatota pebi jitsipa pijawajawabelia. Paepatota-ata pijinia petiriwa jitsipa pamonajawabelia.
4 Nexata, petiriwa, penacojiobiwa, pijacuata aponaperabëxainae ëbajarapowanexa. Biji rajane, pamona pijaperabëtocuenia xainatsi. Bajarapijinia itsi pebi-ata. Aponaperabëxainae ëbajaraponënexa. Pijawa pijaperabëtocuenia xainatsi. Nexata, namata-enetsia naperabëxainabeje.
5 Bajaraxuata, apotoxanepanaetsibeje, penapitsijiwibeje bajayajebi penawecuanaperabë-asiwajawabejeb pena-imoxoyobiyaniwabeje. Toxanepanatsi penaperabë-asiwanexabeje, matapania pamatacabimaxëto Diosojawabelia nawajëcaejitsiabeje. Bajarapacuenia exanaenabeje itsa najamatabëcuenejëpabeje penawajëcaenexabeje Diosojawabelia. Itsa baja weretsianabeje Diosojawabelia penawajëcaematacabianëbeje, icatsia baja naimoxoyobianabeje. Itsa tsiteca nawecuanaperabë-asiwabeje tsipae, Satanás jamatabëcueneyamaxë-itojorobijitsipatsibeje, pibisiacuene pexanaenexabeje pewitota, pacuenia picani apobe-exanaebeje penapitsijiwibeje.
6 Bajarapaliwaisita apopaca-itorobitsi daxita panenacojiobinexa. Biji rajane, patacabejiobiataexae, bajarapacuenia pacamuxujiobatsi pibisiacuene pane-exanaeyaniwa panewitota.
7 Xanënexa, netsita pexaniacuene panejinawanapaejawa panacojiobinejewamë. Itsiata baitsi jane, Dioso caejiwi canacujitsia jamatabëcuenecaëjëpaeya-exanapona pacuenia exanawanaponaejitsia. Itsamonae jamatabëcuenecaëjëpaeya-exanatsi penacojiobinexa, itsamonae pijinia imasia pejinawanapaenexa, nacojiobinejewa.
8 Pamonae abaxë apopenacojiobiwi, papetiriawi pamonajiwi pewecuatëpaewitsi-ata, tojitsipajë picani imasia pejinawanapaejawa, pacuenia xanë imasia ponaponajë.
9 Itsiata baitsi jane, itsa apocaëjëpaetsi penajamatabëcuenecataitsijawa pibisiacuene pewitota pexanaeyaniwa, nexata rowialia benacojioba, tsipaji itsa aponacojiobi tsipae, jamatabëcuene-enaejitsipatsi ëpibisiacuene pewitota pexanaenexa. Nexata, najamatabëcuenebijianaponaejitsipa.
10 Itsiata, pamonae penacojiobiwi, itorobajë mapacueniaje. Tajacuata apota-itorobijawa. Wajatuxanenë Jesucristo raja paca-itoroba.c ¡Papetiriawi Jesús peliwaisi jumexaniatane, pëtsa wecuanawiaba pamonajiwi!
11 Itsiata baitsi jane, penacojiobiwa itsa wecuanawiatsipa pamona, nexata imasia beponapona. Apobenacojiobi baja. Itsa jume, benapitabeje icatsia pamonacowënëbeje. Bajarapijinia itsi pebi-ata, Jesús peliwaisi pejumexaniataenë, apobexuabi pijawa.
12 Aeconoxae itsaliwaisi xainajë tatsipaebinexa itsamonaejawabelia, tajacuata tatocanaëjëtsicuenia. Apotane-itorobicuenia wajatuxanenë Jesucristo. Jumaitsinë mapacueniaje: «Paxamë tuatuajëta, itsanë itsa pitaponapona baja Jesús peliwaisi apopejumexaniataewa, itsa bajarapowa jitsipa peponaponaejawa bajaraponëjawabelia, nexata pijawa apobenawecua-itawetsi, pexuabinexa.
13 Bajarapijinia pacuenia, itsi petiriwa-ata. Itsa pamona, apopejumexaniataenë Jesús peliwaisi, itsiata bajaraponë itsa jitsipa peponaponaejawa bajarapowajawabelia, nexata pamona apobenawecua-itawetsi pexuabinexa», janë tacanaëjëtsicuenia.
14 Bajarapacuenia jumaitsinë, tsipaji petiriwa, Jesús peliwaisi pejumexaniataewa, itsa pita Jesús peliwaisi pejume-aebinë, bajarapajiwibeje itsiata, Dioso yaiyatanetsibejed penapitaponaponaejawabeje yabara. Bajarapijinia pacuenia, itsi pebi, Jesús peliwaisi pejumexaniataenë. Itsa pita Jesús peliwaisi pejume-aebiwa, bajarapajiwibeje itsiata, Dioso yaiyatanetsibeje penapitaponaponaejawabeje yabara. Bajarapacuenia Dioso itsa apo-exanae tsipae, nexata totaejitsipatsibeje pexi bejowibonacuetoxi. Itsiata, Dioso totanetsi pepopexicuenia.
15 Itsiata, Jesús peliwaisi apopejumexaniataejiwi, pijacuata itsa ajamatabëcuenesaë pewecuanawiatsijawa, nexata apobecuenecaranatsi pewecuanawiatsiyaniwatsi. Benacopatabeje rowialia. Nexata, Jesús peliwaisi pejumexaniataejiwi, pebi, petiriwa-ata penawecuanawiatsiliwaisi apotsicarucaetsibeje. Bajaraxua yabara pijaneconi apoxainaebeje Diosojawabelia, tsipaji Dioso nacajunata jamatabëcuenexanepanaeya wajajinawanapaenexa.
16 Bajarapacuenia pacamuxujiobatsi xaniawaetsia panenabarëjinawanapaenexa panenanotsiwi. Paxamë papetiriawimë, itsa jume, papebijiwimë, Dioso pejitsipaecuene panetsita-exanaejawata, pajitsipaeya-exanaejitsipame pejume-aebijiwi, pejumexaniataenexa Dioso peliwaisi. Belia bajarapacuenia Jesús peliwaisi apopejumexaniataejiwi-ata, nasiwanajamatabëcuenecopatsipa Jesucristojawabelia, paxamë xaniawaetsia panetsitajinawanapaexae.
17 Pacaejiwimë canacujitsia, pitsicuenejawatae Dioso pacajunata papijajiwinexamë, bajarapacuenia tsitecaeya bepacanacopatame, panesiwanajamatabëcuenecopatsicujinae Jesucristojawabelia. Bajarapacuenia itorobaponajë daxita Jesús pijajiwijawabelia, panacuanëjawa tsipaebanajetarucajë.
18 Nexata, paxamëyajuwënënë, itsa nabo-upiperabëcaucutsia-exana pewajënaeya, Jesucristo siwanajamatabëcuenecopatsinejewa, tsitecaeya ponaponae bajarapacuenia pesiwanajamatabëcuenecopatsicujinae. ¡Bajarapijinia pacuenia-ata, ponë apopenabo-upiperabëcaucutsia-exanaenë, pëtsa pa-itorobame penabo-upiperabëcaucutsia-exanaenexa, pesiwanajamatabëcuenecopatsicujinae Jesucristojawabelia!
19 Bajarapacuenia paca-itorobatsi, tsipaji Dioso aposiwabëjai jiwi penabo-upiperabëcaucutsijawa yabara, apopenabo-upiperabëcaucutsijawa-ata yabara, caejamatabëcuene pexainaenexa Diosojawabelia. Biji rajane, siwajamatabëcuenebëjai jiwi pejumecowënëtsijawatsi pacuenia itoroba.
20 Pacaejiwimë canacujitsia pitsicuenejawata Dioso pacajunata papijajiwinexamë, bajarapacuenia tsitecaeya bepacanacopatame, panesiwanajamatabëcuenecopatsicujinae Jesucristojawabelia.
21 ¡Nexata, pajiwi paxamëyajuwënëjiwi amoneya tonacuenebaponapona itsanë, Jesucristojawabelia siwanajamatabëcuenecopatsinejewa, pëtsa nasiwajamatabëcuenebëjai! Itsa pasiwanajamatabëcuenecopatame Jesucristojawabelia, Jesús baja papijajiwimë panaexanaename.f ¡Jamatejema saya patonacuenebawanapareg panijatuxanewi! Itsiata baitsi jane, itsa pacacuenecaëjëpa panewecuapitsapaejawa,h nexata bepanawecuapitsapame.
22 Pajiwi pijatuxanenë amoneya petonacuenebaponaponaejawata, Dioso junatatsi pesiwanajamatabëcuenecopatsinexa Jesucristojawabelia, bajarapajiwi baja Dioso capanepatsii Satanás pecobewecua. Bajarapajiwi juya nacopata wajatuxanenë Jesucristo petonacuenebaponaponaenexa. Bajarapijinia itsi pajiwi-ata apocanajetsitsi itsajiwijawabelia, amoneya petonacuenebaponaponaenexa, itsa siwanajamatabëcuenecopata Cristojawabelia. Naexana baja Cristo pijajiwitonë.
23 Dioso baja cajena pacacomuata ayaimatamota, ëpapeca-itorobicuenia pane-exanawanapaenexa. ¡Bajaraxuata, pëtsa baja panacopatame mapanacuapijiwiyajuwënëjiwijawabelia, papeca-itorobinexa pejitsipaecuenia bepapijajiwimëcuenia!j
24 Patajamonaemë Cristo pejamatabëcueneta, pacaejiwimë canacujitsia pitsicuenejawata Dioso pacajunata papijajiwinexamë, bajarapacuenia tsitecaeya bepacanacopatame, panesiwanajamatabëcuenecopatsicujinae Jesucristojawabelia.
25 Aeconoxae pacajumecanawiatsianatsi xua paneyanijobame abaxë apopenacojiobiwi yabara. Bajaraxua yabara apoyapëtaenë pacuenia wajatuxanenë Jesucristo pitorobiliwaisi bajarapitsiwi yabara. Itsiata baitsi jane, pacuenia siwanajamatabëxainajë bajarapitsiwi yabara, pacatoyaquinatsi, pacuenia Dioso neyapëtaeya-exana tane-itaxutotsoniataexae. Nexata, pacuenia pacamuxujiobatsi, pacatoxanepana panejumecowënëtsinexa.
26 Maparucaeje pitsipiayapëbejeliwaisitak wajajinawanapaexae, nexata xanë netsitaxanepana pamonae apopenacojiobiwi, pejinawanapaenexa nacojiobinejewa.
27 Itsa baja ponë capanepaeya nacojioba, apoxanepanae pijawa pexuabetsijawa. ¡Itsiata baitsi jane, itsa abaxë aponacojiobi, pëtsa jaita pijawanexa!
28 Ponë baja capanepaeya nacojioba, pibisiacuene apo-exanae. Petiriwa-ata, pejanawa, itsa baja nacojioba, pibisiacuene apo-exanae. Itsiata, piayainacuata wajajinawanapaexae, pacamuxujiobatsi panenacojiobiyaniwa paxamë abaxë apopanenacojiobiwi, piayapëbejeliwaisi papecatocopiapatsiyaniwa.
29 Patajamonaemë Cristo pejamatabëcueneta, bajarapacuenia pacajumaitsitsi, tsipaji imoxoyo rabaja pewajënae wajatuxanenë icatsia pepatsijawanexatsica. Bajaraxuata, pijawajiwi pexainaewi, apobenajamatabëcuene-enayabi penacojiobijamatabëcuene. Biji rajane, benajamatabëcuene-enayaba Dioso pijacuene petonacuenebawanapaenexa, pijawajiwi apobepexainaewicuenia.
30 Pamonae-ata bitso najamatabëxaina peyajuwënëtëpaexae, bajarapamonae apobenajamatabëcuene-enayabi penajamatabëxainaecuene. Biji rajane, benajamatabëcuene-enayaba Dioso pijacuene petonacuenebawanapaenexa, pacuenia pejamatabëcuenebarëyawi tonacuenebawanapaejitsipa. Pamonae-ata jamatabëcuenebarëya tsawanapae, bajarapamonae apobenajamatabëcuene-enayabi pebarëyajamatabëcuene. Biji rajane, benajamatabëcuene-enayaba Dioso pijacuene petonacuenebawanapaenexa, pacuenia tonacuenebawanapaejitsipa bitso apopejamatabëcuenebarëyawi. Pamonae-ata pecomuacaewi pexainaejawanexa, bajarapamonae apobenajamatabëcuene-enayabi pecomuacaejawanëta. Biji rajane, benajamatabëcuene-enayaba Dioso pijacuene petonacuenebaponaponaenexa, asiwaya apobetae xua natocomuaca.
31 Pamonae-ata, mapanacuapijicuenejawanëta canacuenebawanapa, bajarapamonae apobenajamatabëcuene-enayabi bajaraxuanë pecanacuenebijawa. Biji rajane, benajamatabëcuene-enayaba Dioso pijacuene petonacuenebawanapaenexa, apobepecanacuenebawanapaewicuenia. Bajarapacuenia pacamuxujiobatsi panenajamatabëcuene-enayabiyaniwa, tsipaji daxita bajaraxuanë werewerecaponaena, mapanacuapijicuenejawanëxae.
32 Xanë pacatojitsipatsi panejamatabëcuenesajinaejawa, papecajamatabëcuene-enaejawawecua mapanacuapijicueneje. Ponë abaxë imasia ponapona, jamatabëcuene-enabiabatsi ëwajatuxanenë Jesucristo pijacuene pexanaponaponaejawa. Siwanajamatabëxainabiabanua pesiwajamatabëcuenebarëyanexatsi.
33 Itsiata baitsi jane, penacojiobinë caejamatabëcuene apoxainae Dioso pijacuenejawalia. Yajawajamatabëcuene-enabiabatsi pewetsinexa pijawa, pesiwajamatabëcuenebarëyanexatsi.
34 Bajarapijinia pacuenia, jamatabëcuene-itsi pimasiarucaewa, powa-ata pamona pewecuatëpaewatsi. Bajarapitsipetiriawi, pamona apopexainaexae, jamatabëcuene-enabiabatsi ëwajatuxanenë Jesucristo pijacuene. Nexata, xaniawaetsia najamatabëcuenecaeweta, naperabëcaewetanua ëDioso pijacuene pexanawanapaenexa, pesiwajamatabëcuenebarëyanexatsi. Itsiata baitsi jane, penacojiobiwa, caejamatabëcuene apoxainae Dioso pijacuenejawalia. Yajawajamatabëcuene-enabiabatsi pewetsinexa pamona, pesiwajamatabëcuenebarëyanexatsi.
35 Bajarapacuenia pacamuxujiobatsi, patacajamatabëcueneyawenonaenexa, tsipaji baja imoxoyo pewajënae wajatuxanenë Jesucristo pepatsijawanexatsica. Nexata, apojitsipaenë panenajamatabëcuene-enayabijawa itsacuenejawa wajatuxanenë pijacuenewecua. Itsiata, apopaca-itawetsitsi panenacojiobijawa.
36 Nexata, ponë, pijajarawal pexainaenë, itsa tsitaxanepanatsi pepitsinexa, caecuenia bepita, tsipaji baja yapëtane penaweretsiwacuene. Napitsi-atabeje, pibisiacuene apo-exanaebeje.
37 Ponë pijinia pijacuata apojitsipae penacojiobijawa, cuenecaëjëpatsinua penajamatabëcuene-ewetsijawa, itsa aponacojiobi, pexaniacuene exana.
38 Nexata, ponë aponacojiobi bitso pexaniacuene exana, ponë pijajarawa pepitsinëwecua, tsipaji apopenacojiobinë caejamatabëcuene xaina wajatuxanenë Jesucristo pijacuene pexanaenexa.
39 Powa baja nacojioba acuenebi pewecuanawiatsinexa pamona piasaëtsaponaponae-epato. Itsiata baitsi jane, pamona itsa wecuatëpatsi, bajarapowa tocopatatsi icatsia penacojiobinexa ponëjawabelia jamatabënacojioba, itsa bajaraponë-ata Jesús peliwaisi pejumexaniataenë.
40 Itsiata, xanë netsita matatoxenetsia jamatabëcuenebarëyam tsaponaponae tsipae, itsa bajarapowa, pamona pewecuatëpaecujinaetsi, nacojiobinejewa ponapona. Bajarapacuenia tajacuata najamatabëxainajë bajarapacuene yabara, itsiata netsita Espíritu Santo neyajawacuaicuaijai bajaraxua.