Jesús peliwaisi pejumexaniataewi, pacuenia benatoxaneba liwaisi penatoxainaejawata, yabara peliwaisi
6
Paxamë, Dioso papecatocopatsixae, panecuenecanaëjëtsinexa Jesús pijajiwi, nexata itsa paca-itsacueniaba itsajiwi paxamëyajuwënënë, Jesús peliwaisi pejumexaniataenë, pacatoxanepana paxamë panijacuata panenatoxanebijawa. ¡Pëtsa paponame pamonae nacua-ewetsiwijawabeliaa papecaliwaisixanebinexa, tsipaji bajarapamonae Dioso apopeyapëtaewi! Nexata, ëmapanacuapijiwi pecanaëjëtsicuenia,b pacatoxanebijitsipa Dioso peliwaisinejewa.
2 ¿Paxamë tsaja apopayapëtaemë itsamatacabijawabelia daxitatsi Jesús pijajiwitsi wajananeconitsia-exanaenexa mapanacuapijiwi pijaneconi pexainaewi? Bajarapacuenia itsa nacacuenecaëjëpaejitsia itsamatacabi wajananeconitsia-exanaenexa pijaneconi pexainaewi, ¿detsa xuajitsia apopacacuenecaëjëpae tsipae panexanebinexa tsiquirineconiliwaisixi-ata, Jesús pijajiwituatuajëta?
3 Bajarapamatacabi waxaitsi tocanaëjëtsianatsinua ángelewi-ata pijaneconi. Nexata, abaxë aeconoxae panejinawanapae-epato mapanacuataje, paxamë pacacuenecaëjëpanua paneliwaisixanebinexa paneconi exana itsajiwi panetuatuajëta.
4 Paxamëyajuwënë panetuatuajëta liwaisi itsanatsixaina, ¿detsa xuajitsia pacaponabiabame juez-monaejawabelia papecaliwaisixanebinexa pamonae Dioso peliwaisi apopeyapëtaewijawabelia? Caranata, pacatoxanepana panejunatsijawa pajiwi pacatsita bitso beweliajamatabëcuene pexainaejiwi Jesús pijajiwituatuajëta, papecaliwaisixanebinexa.
5 ¿Ajibi tsabaja caenë-ata paxamëtuatuajëta pexanialiwaisi peyapëtaenë, papecaliwaisixanebinexa? Bajarapacuenia pacajumaitsitsi pataca-urabinexa, tsipaji yapëtaniji Jesús pijajiwituatuajëta pejinawanapaejawa pexanialiwaisi pecanaëjëtsiwi.
6 Itsiata, bajarapamonae apopajaitsimë papecaliwaisixanebinexa cajena, Jesús papijajiwimëtuatuajëta. Biji rajane, panewënajumexaniataejiwi Jesús peliwaisi paneconitabiabame mapanacuapijiwi pewetsiwijawabelia, Dioso apopeyapëtaewi, papecaliwaisixanebinexa Dioso peliwaisinejewa. ¡Abeje cajena bajarapacuenia pane-exanaejawa!
7 Paxamë rabaja panacaemonaemë panaexaname Cristo pejamatabëcueneta. Nexata, apopacatoxanepanae cajena liwaisi panenato-exanaejawa. Bajarapacuenia itsa pa-exaname, panatobijianame panena-asiwajamatabëcuenemi. Pacatoxanepana picani panenajamatabëcataitsijawa piabejecuene pacato-exanae-ata, bajarapacuenia yamaxë-itojorobiaya pacawecuanacobetoxotsi-ata.
8 Itsiata baitsi jane, paxamë caranata namata-enetsia, piabejecuene panato-exanabiabame, yamaxë-itojorobiaya pawecuanacobetoxotabiabamenua, panewënajumexaniataejiwi Jesús peliwaisi, mapanacuapijiwi pewetsiwi papecamuxujiobiliwaisi panejumecowënëtsixae.
9-10 ¡Abeje cajena bajaraxua! ¡Pëtsa panayamaxë-itojorobame! Payapëtaneme rabaja piabejecuene pexanawanapaewi apopejonejawanexa itsamatacabi Dioso peyanacua-ewetsinacuajawabelia. Apojone tsane pamonae mapitsicuene pexanawanapaewije: pewitota pibisiacuene pexanawanapaewi, jumapecataeya pexanaenëanëjawabelia pesiwanajamatabëcuenecopatabiabiwi, penanotsiwi penawecuanamatayajitawanapaewi, penaperabëcanajetawanapaewi, nacaewënapebijiwi penaquenetsiataewanapaewi, nacaewënapetiriawi-ata penaquenetsiataewanapaewi, penacobetoxotawanapaewi, ëpamonaenexa pexainaecuene penatojitsipawanapaewi, pitajibicuene pejitsipawanapaewi, pamonae-ata itsajiwi pibisiacuenia pecuenebaracuaicuaijaiwi. Daxita bajarapitsicuene pexanawanapaewi apoyajawajinawanapaetsi tsane Dioso peyanacua-ewetsinacuata.
11 Bajayata paxamëyajuwënëwi bajarapacuenia picani exanawanapa. Itsiata baitsi jane, Jesucristojawabelia panesiwanajamatabëcuenecopabixae, Dioso pacacapanepa baja bajarapapibisiajamatabëcuenewecua. Pacawecua-ajibia-exana baja pibisiacuene pane-exanaeneconimi. Espíritu Santo pesaëta. Wajatuxanenë Jesucristo pejamatabëcuenetanua, pacatsata baja mapanacuapijiwiwecua papijajiwinexamë, itsajamatabëcuene panexainawanapaenexa. Aneconijibia baja pacatanenua.c Bajaraxuata, apopacatoxanepanae pane-exanawanapaejawa, pacuenia bajayatami pa-exanawanapame.
Pacuenia Jesús pijajiwi xaniawaetsia bejinawanapa Dioso pitabarata, yabara peliwaisi
12 Paxamë Dioso papecacapanepaejawa yabara asiwaya apopataemë. Nexata, itsamonae jumaitsi tsabiabi: «Xanë daxita xua jamatabë-exanajë,d aponecuenecaranatsi ta-exanaeyaniwa», jai tsabiabi itsamonae. Xaniajai-ata tsipae, itsiata baitsi jane, daxita waja-exanaecuene, aponacajamatabëcueneyawenonae wajajamatabëcuenesaëjawa Diosojawabelia, bajarapacuenia itsamonae-ata apojamatabëcueneyawenonaetsi. Xua exanatsinua apobenacopatsitsi wajanacajamatabëcuenenamatacaitorobinexa.
13 Paxamëyajuwënëwi apotsitaneconicuenetsie daxita xua exana peperabëtota, nexata jumaitsi tsabiabi: «Wajaxaejawa saya wajacotsorotonexa. Wajacotsoroto pijinia wajaxaejawa pe-ecaenexa», jai tsabiabi. ¡Xaniajai baja cajena picani! Itsiata baitsi jane, itsamatacabi Dioso bajaraxuanë werewerecaeya-exanaena. Dioso, nacatocopatsi-ata wajaperabëto wajaxainaenexa, itsiata aponacatocopatsi pibisiacuene itaxutejema waja-exanawanapaenexa wajawitota,f pajiwijawabelia jamatabë-exanatsi. Biji rajane, wajaperabëto Dioso nacatocopata waja-exanawanapaenexa wajatuxanenë Jesucristo pejitsipaecuenia.
14 Nexata, pacuenia Dioso icatsia asaëya-exanatsi wajatuxanenë petëpaecujinae, bajarapijinia pacuenia, waxaitsi-ata itsamatacabi Dioso pesaëta naca-asaëya-exanaenag wajatëpaecujinae.
15 Waxaitsi baja cajena yapëtanetsi pacuenia Cristojawabelia becaeperabëto naca-exana. Nexata, xua exanatsi wajaperabëtota, Cristo yajawa bewaja-exanaewi. ¿Netoxanepana tsaja Cristojawabelia caepeperabëto tanaexanaecujinae, pibisiacuene ta-exanaenexa tawitota penaperabëcanejetsiwajawabelia? ¡Jume baja cajena! Bajarapacuenia itsa exanaejitsipajë, Cristo betayajawa-exanae tsipae.
16 Bajarapacuenia pacajumaitsitsi, tsipaji Dioso pejumeliwaisibaxutota jumaitsi mapacueniaje: «Anijajiwimibeje naexana becaejiwi peperabëtocuenia», jai. Nexata, pebi itsa imoxoyoba penaperabëcanajetsiwajawabelia, becaejiwi naexanabeje.
17 Nexata pijinia, pajiwi siwanajamatabëcuenecopata wajatuxanenë Jesucristojawabelia, bajarapajiwi becaejiwi naexana wajatuxanenë Jesucristojawabelia.
18 ¡Bajaraxuata, nayajiwiponare daxita pibisiacuene ne-exanaejawa newitota, tsipaji pibisiacuene pexanaejawa pewitota jiwi napërabëbijiana pijacueneta!h Bitso najamatabëcuenebijiana, itsaneconi pexanaejawawecua.
19 Payapëtaneme rabaja mapacueneje. Paxamë Dioso papijatemplobomë, Espíritu Santo papecatsijamatabë-ecaexae, Dioso papecarajutsijamatabëcuene. Nexata, paneperabëto baja cajena Dioso pijajawa. Bajaraxuata, apobepacanacuenebawanapaemë panijacuata panenatojitsipaecuenia.
20 Dioso itsa pacacapanepa panijaperujujamatabëcuene papecanamatacaitorobisaëwecua, ayaimatamotai pacacomuata.j ¡Bajaraxuata, yaiyataeya paneperabëtota panacuenebawanapare Dioso pejitsipaecuenia, papecasiwajamatabëcuenebarëyanexa daxita xua pa-exanawanapame paneperabëtota!