Pablo itoroba penawecuacapitsapaenexa Jesús pijajiwituatuajëta, bitso pibisiacuene pexanaponaponaenë
5
Daxitajiwi yapëtane paxamëtuatuajëta peponaponaejawa itsanë pepitaponaponaejawa penawa,a baitsi paxa pijawacowëwa. Bajaraponë papibisiacuene exanapona, bitso piabejejawa. Jesús peliwaisi apopejumexaniataewi-ata, bajarapitsipibisiacuene apo-exanae.
2 Bitso bajarapapiabejecuene exanaponaponae-ata, paxamë apopacuene-itawetsimë. Bitso picani bepayapijiwi-auramë, bajarapapibisiacuene pexanaponaponaexae. Caranata, saya be-ayaijamatabëcuenewi panataneme,b tsipaji jamatabëcuenenawëxaniabiaya panatocanaëjëtame panejamatabëcueneliwaisi naweretsijawac Dioso pijacuenejawata. Apopacatoxanepanae cajena bajarapacuenia panenataejawa. Peneta, itsa Dioso pijacuenejawalia pajamatabëcueneliwaisi naweretsipame, nexata pacatsi-atane tsipae bajaraponë pijaneconi. Bitso payapijiwi-auramënua tsipae. Nexata baja, panawecuacapitsapaejitsipame.
3 Xanë aponaponaponae-atanë paxamëjawata, itsiata tajamatabëcuene ponapona paxamëjawata. Bajarapacuenia tajamatabëcuene peponaponaexae paxamëjawata, nexata naneconitsia-exanajë.
4 Nexata, pacujinaeta panacaetuatsianame bajaraponë pijaliwaisi yabara, bajarapaepatota xanë bepatacayajawa tsane. Panajamatabënapirenua wajatuxanenë Jesucristo-ata pesaë, papecayajawajawa bajarajota. Bajarapacuenia panenacaetuatsijawata, wajatuxanenë Jesucristo pewënëta,
5 paca-itorobatsi panenawecuacapitsapaenexad pibisiacuene pexanaponaponaenë paxamëtuatuajëta. ¡Pacopare pepodowathi, Satanás pecobeyabelia, bepejiobicueneta peponaponaenexa,e bajarapacuenia penacuenecopatsinexa pibisiacuene pexanaejawa! Satanás pecobeyabelia pacopatsi-atamë, itsiata baitsi jane, pejamatabëcujiruyo capanepaenatsi pamatacabi wajatuxanenë Jesús icatsia patsianica.
6 Paxamë picani apopaxainaemë xua yabara ayaijamatabëcuenewi panataejitsiamë, tsipaji bajaraponë papibisiacuene exanaponapona, pacajamatabëcuenebijianaejitsipa.f Bajarapacuene yabara jiwi jumaitsi tsabiabi: «Tsiquirilevadurajawayo-ata bafufunaeya-exana daxita pan pexanaematabënexa, ayaimatabë-ata», jai tsabiabi. Bajarapijinia pacuenia, jiwi pibisiacuene pexanaejawa. Caejiwi pibisiacuene exanae-ata, belia itsiata, yacaëjëpaejitsipa daxita Jesús pijajiwijawa.
7 Bajarapacuenia paca-itorobatsi, panenawecuacapitsapaenexa bajaraponë, padaxitamë papecajamatabëcuene bijianaeyaniwa. Pacuenia paxanë pajudíowinë Pascuafiestamatacabig panawecuapenetabiabajë patajabonëwecua daxita perujumatabë,h levadura pexainaematabëanë, pataxaeyabiabinexa ëpejanamatabë pexanaepan-jawanë, levadura matajërëabinejewa. Bajarapacuenia perujumatabëcuenia panawecuacapitsapaename pibisiacuene pexanaponaponaejiwi, pejanamatabëcuenia levaduramatajërëatsinejewa papecataenexa, aneconijibia panejinawanapaenexa, wajatuxanenë Jesucristo pitabarata. Bajarapacuenia bepa-exaname, tsipaji baja Cristo bewajacordero Pascuafiestanexa. Nexata, ovejacuenia nacasiwatëpa, wajanacawecua-ajibia-exanaenexa wajaneconimi, paneconi Dioso tane belevadura, pexuabijawanexa.
8 Pascuafiesta wajataewicuenia, benajamatabënapitaponatsi wajacordero, Cristo, wajanacacapanepaejawa wajaperujujamatabëcuenewecua. Bajaraxuata, aponacatoxanepanae wajapibisiajamatabëcuene yajawa waja-exanawanapaejawa. Biji rajane, pejanajamatabëcueneta bejinawanapatsi, wajaxaniajaijamatabëcueneta, yamaxë-itojorobinejewatsi.
9 Itsabaxutota baja cajena pacatoyaquinatsi pewitota pibisiacuene pexanaponaewi paneyajawajinawanapaeyaniwa.
10 Bajarapaliwaisi apotoyaquinaenë pamonae mapanacuata pibisiacuene exanawanapa pewitota, pamonae najamatabëxainabiaba ëpamonaenexa ayaijawa pexainaenexa, pamonae nacobetoxotabiaba, pamonae asiwaya nawajëcabiabanua jumapecataeya pexanaenëanëjawabelia. Bajarapitsicuene pexanaewi, itsa panawecuatsatsipame, nexata pepacuene mapanacuawecuaje ëpaneponaenexa tsipae athëbëabetsia, tsipaji daxita bajarapitsicuene pexanaewi yacaëjëpa mapanacuataje.
11 Patacatoyaquinaebaxutota raja paca-itorobatsi paneyajawajinawanapaeyaniwa, pamonae itajara penawënërubiwi Jesús pijajiwi. Bajarapamonae pepacuene pibisiacuene pexanawanapaewi pewitota, ëpamonae penasiwajamatabëxainabiabiwi, asiwaya penawajëcabiabiwi jumapecataeya pexanaenëanëjawabelia,i pibisiacuenia pebaracuaicuaijaiwi Jesús pijajiwiyajuwënëjiwi, pitajibitsabiabiwi, penacobetoxotabiabiwinua. ¡Bajarapitsiwi pëtsa payajawajinawanapame! ¡Pëtsa payajawaxanemenua caejawata, pacajunatsi-ata!
12-13 Dioso aponetocopatsi jiwi pijaneconi tatocanaëjëbinënexa mapanacuapijiwi, pamonae abaxë Jesucristojawabelia apopesiwanajamatabëcuenecopabiwi. Dioso cajena abaxë saicaya pepacuene naneconitsia-exanaena bajarapamonae. Itsiata baitsi jane, paxamë Dioso pacatocopata panecuenecanaëjëtsinexa Jesús pijajiwi, pibisiacuene itsa exana. ¡Nexata, panawecuacapitsapare baja ponë paxamëtuatuajëta pewitota pibisiacuene exanaponapona!