Apóstolewi, penacuenebawanapaejawa, yabara peliwaisi
4
¡Paxamë saya panataema Cristo papijajiwicuenenë, tsipaji raja bajaraPonë panetsicopata jiwi patatsipaebawanapaejawa, paliwaisi picani Dioso, pepobajayata, muetsia xainabuata!
2 Xua wajatuxanenë Cristo panetsicopata paxanë patato-exanaenexa, bepa-exanawanapajë, patanajamatabëcuene-itajëtsinexa caejamatabëcuene pataxainaejawa bajaraPonëjawabelia.
3 Bajaraxuata, xanë bitso aponebëjaiya-exanae, jiwi tanecuenecanaëjëtsijawa yabara, xua Dioso netsicopata. Tajacuatanua aponacuenecanaëjëtsinë bajaraxua yabara, tsipaji caenë Dioso tsicarucatsi tanecuenecanaëjëtsinexa tatonacuenebijawa.
4 Xanë tanacuenebijawa yabara itsaliwaisi aponatoxainaenë picani, xua yabara meta xaniawaetsia apotonacuenebinë wajatuxanenë. Itsiata, apocanaëjëtsinë ta-aneconijibijawa wajatuxanenë pitabarata, tsipaji caenë, wajatuxanenë, tsicarucatsi itsamatacabijawabelia wajatuxanenë pijacuata xaniawaetsia tanacuenecanaëjëtsijawanexa bajaraxua yabara.
5 Bajaraxuata, paca-itawetatsi panebaracuaicuaijaijawa itsamonae Dioso petonacuenebawanapaewi, wajatuxanenë pepatsiwajënaeya. BajaraPonë rajane pepatsimatacabi, bajarapamonae petonacuenebawanapaejawanëmi cuene-itajëtaponaenatsi muetsia pexanaejawanëmi, bëpënëa penajamatabëxainaejawanëmi-ata. Bajaraxuacujinae, Dioso wënëxaniataponaena caejiwi canacujitsia, petonacuenebijamatabëcuenetsi.
6 Patajamonaemë Cristo pejamatabëcueneta, bajaraxuata pacatoyaquinatsi paxanëbeje, Apolos-beje patacatsitanacuene-itajëtsijawatabeje, patacayapëtaeya-exanaenexa xaniawaetsia pepaebiwi panejumecanaëjëtsinexa ëDioso peliwaisita, pacuenia nacayapëtaeya-exana Dioso pejumeliwaisibaxutota.a Bajarapacuenia pane-exanaejawata, apopataemë tsane itsanë Dioso pejumeliwaisi pepaebinë be-ayaijamatabëcuene pexainaenë. Bajaraxuata, apopacatoxanepanae asiwaya panetaejawa caenë, bewelia panetaenexa itsanë.
7 Dioso cajena caejiwi-ata apopacatocopatsi bijiaya panecuenecanaëjëtsinexa panewënajiwi. Daxita xua paxainame, Dioso baja cajena pacarajuta.b Apopacatoxanepanaenua bepanijacuata panepitsijawa bajaraxuanë, xua yabara be-ayaijamatabëcuenewi panataejitsiamë.
8 Paxamë baja aeconoxae panaexaname bitso panexainaewi. Apopacatosajinae itsacuenejawa panenamatawenonaejawa. Panatanemenua paxanënejewa bepaneyanacua-ewetsiwi daxitajiwi. Bajaraxuata, paxanë, patacacujarubiwi, apopanenamatawenonaemë itsacuenejawa yabara. Itsiata, panijacuata panacuenebaranajume-itacanitame. Bitso picani, xanepanaejitsipa itsa paxaniajamë tsipae panenacuenewajunupaebijawa, tsipaji bajarapacuenia pacayajawayanacua-ewetsipatsic daxita nacuapijiwi.
9 Bajarapacuenia netsita Dioso apopanecopatsi pa-apóstolewinë pata-exanaenexa, pacuenia picani paxamë panacuenebaracacuaicuaijamë. Biji rajane, panecopata patajinawanapaenexa daxitawecua pecotocaewibitsaëtojawatalia, itsapabitsaëtojawata panajetarubenajë patananeconitsiwicuenia patanebeyejebinexa. Nexata, daxitanacuapijiwi, ángelewi-ata, nacaetuata patanetaenexa patanebeyejebijawa.d
10 Paxanë, pa-apóstolewinë, Cristo papijajiwixaenë, itsamonae panetane bepata-ajamatabëcuenecowëbiwi. Paxamë juya pacatane bitso paneyapëtaewicuenia, Dioso papecajamatabëcueneyawenonaexae, Cristo pejamatabëcueneta. Paxanë pijinia Cristo papijajiwixaenë, itsamonae panetane bepata-ajamatabëcuenesaëjibiwi. Paxamë juya pacatane pane-ajamatabëcuenesaëwi. Paxanë itsamonae apopaneyaiyatae, bewelia patanetaexae Cristo pejamatabëcueneta, paxamë juya itsamonae pacayaiyatane.
11 Bajarapacuenia patanetaexae, tsitecaeya apopacopatsinë nabejiobitsiaya patajinawanapaejawa. Nexata, itsajawata patajani tsabiabi. Mera pajitsipabiabajë. Apopaxainabiabinë patanaxatabijawa. Jiwi panebejiobia-exanabiaba, pecobeta patanebecuenia. Apopaxainaenë pepacuene patajabonë.
12 Pacueranabiabajë bitso, patanacuenebabiabixae patacobeta,e patana-ewetsinexa. Jiwi pibisiacuenia itsa panebijataeyabiaba, paxanë itsiata, patojitsipabiabajë bajarapamonae Dioso pexaniacuenia peyawenonabiabinexatsi. Pa-ajamatabëcuenesaënë tsabiabi itsamonae panebejiobia-exanabiabi-ata.
13 Pibisiacuenia panebaracuaicuaijai-ata itsamonaejawabelia, itsiata jamatabëcuenexanepanaeya pajumecanawiatabiabajë. Orijibia, Jesús peliwaisi patatsipaebanajetarubenaexae, ajena, mapamatacabijawaberena-ataje, mapanacuapijiwi panetaeyabiaba bepenapenetsijawanë.
14 Apopacatoyaquinaetsi mapacueniaje pataca-urabinexa, biji rajane, taxicuenia xaniawaetsia patacamuxujiobinexa, pataca-asiwaxae.
15 Paxainae-atamë tsipae diez mil ponëbeje papecacujarubiwinexa, Cristo peliwaisi, Jesús papijajiwixaemë. Itsiata, caenënë panexainame pane-axanëcuenia, patacatsipaebixae Cristo peliwaisi, panesiwanajamatabëcuenecopabinexa Jesucristojawabelia. Bajaraxuata, xanë bepane-axanë panetaneme, tsipaji Cristo peliwaisita pacawitsatatsi.
16 Bajaraxuata, asaëyata pacamuxujiobatsi, patacatsita-exanaponaponaecueniaf baja necuenejëpaeya panejinawanapaenexa.
17 Bajarapajamatabëcuene yabara, Timoteo pacato-itorobaliatsi paxamëjawabelia. Bajaraponë bitso ta-asiwanë; betaxënato tataenë Cristo pejamatabëcueneta. Caejamatabëcuene pexainaenë Diosojawabelia. Nexata, itsa patsialia, bajaraponë pacanajamatabënapitsia-exanaena, pacuenia xanë ponaponajë, Jesucristo pijajiwitonëxaenë, paxamëtuatuajëta.g Pacanajamatabënapitsia-exanaenanua patacacujarubiliwaisimi, paliwaisi cujarubanajetarucajë daxita Jesús pijajiwijawabelia, panacuanëjawa jinawanapa.
18 Itsamonae paxamëyajuwënëwi, be-ayaijamatabëcuenewi natane xanëwecua. Bajarapamonae jamatabëcuenenawëxaniabiaya jamatabëjumaitsi: «Pablo rabaja apopatsi tsane, patanecuenexanetsinexa», jamatabëjai xanë yabara.
19 Itsiata baitsi jane, Dioso itsa netocopatsiana patacataenexa, ponaenajë bepijiayo paxamëjawabelia. Bajarapacuenia tajacuata taenajë, pacuenia jamatabëcuene-itsi tsawanapae pamonae, be-ayaijamatabëcuenewi penataewi. Yapëtaenajë itsa bajarapamonae pepacuene ajamatabëcuenesaë, pexanaenexa pacuenia jumaitsi, itsa xaniajai penacuenecacuaicuaijaicuenia exanawanapa.
20 Pamonae penacajonewi Dioso peyanacua-ewetsicuenejawalia, peneta nacuene-itajëtawanapa pejinawanapaejawata Dioso pesaëta; apo-ëpenacuenewajunupaebicuenia.
21 ¿Detsa pacuenia pajitsipame patacasiwaxainaejawa? ¿Pajitsipame anaeyacuenia patacananeconitsia-exanaejawa? Itsa jume, ¿Asiwaya, patacataejawa jamatabëcuenexanepanaeya? ¡Panacuenecanaëjëre nexata!