2
Nexata, patacanajamatabëxainaeya-exanaeyaniwa patacabijataejawata, najamatabëcopatajë baja taponaejawa paxamëjawabelia.
2 Jitsipajë picani paxamë patanejamatabëcuenebarëyaya-exanaejawamë patacasiwaxainaejawata. Itsiata, itsa pacanajamatabëxainaeya-exanaejitsipatsi, nexata apopajamatabëcuenebarëyamë tsipae. Nexata, ¿jipatsa nejamatabëcuenebarëyaya-exanaejitsipa, patacanajamatabëxainaeya-exanaecujinae? Ajibi tsipae.
3 Bajaraxuata, taponaewajënaeya paxamëjawabelia, copiata pacatoyaquinaliatsi itsabaxuto, patacayapëtaeya-exanaenexa tapatsiwajënaeyalia pacuenia bepa-exaname, patanenajamatabëxainaeya-exanaeyaniwamë. Jitsipajë picani paxamë patanejamatabëcuenebarëyaya-exanaejawamë, tsipaji yapëtaniji bajarapacuenia pataneto-exanabiabijawamë, panejamatabëcuenebarëyajawata.
4 Apojitsipaenë picani patacatoyaquinaenexa bajarapabaxuto, bitso pacayapëtaeya-exanatsi. Nexata, patacatoyaquinaejawata, bitso jamatabëcuenebëjaiya tajamatabë-ëthëtowetsina, pacatoyaquinatsi najamatabëxainaeya. Nuajënua paxamëjitsia. Itsiata, apopacatoyaquinaetsi patacanajamatabëxainaeya-exanaenexa, biji rajane, patacayapëtaeya-exanaenexa ayaicuenia pataca-asiwajawa.
Pablo itoroba Jesús pijajiwi, Corinto tomarapijiwi, pebarajamatabëcuenexanepanaenexa pibisiacuene pexanaponaponaenëmi, yabara peliwaisi
5 Aeconoxae pacamuxujiobianatsi pibisiacuene pexanaponaponaenëmia yabara, paxamëtuatuajëta. Bajaraponë, caenënë xanë aponenajamatabëxainaeya-exanae. Daxita paxamë-ata bajarapacuenia pacanajamatabëxainaeya-exana.
6 Paxamë pane-exanaexae pacuenia pacatoyaquinatsi itsabaxutota, panenawecuacapitsapaenexa paxamëtuatuajëta pibisiacuene pexanaenë, nexata baja bajaraponë belia copata pibisiacuene pexanaejawa. Xanepana rabaja. ¡Pëtsa baja pematatsënëa icatsia panawecua-itawetame bajarapacuenia!
7 ¡Biji rajane, aeconoxae baja pasiwajamatabëcuenecaeware, pabarajamatabëcuenexanepanarenua bajaraponë pibisiacuene pexanaejawami! ¡Pajamatabëcueneyawenonare pia-urayaniwa, pejamatabëcuene matatoxenetsiyaniwatsi bitso pejamatabëcuenebëjaijawa pijaneconi yabara!
8 Bajaraxuata, bitso pacatojitsipatsi bajaraponë panetsitanajamatabëcuene-itajëtsinexa pane-asiwajawa.
9 Copiayapijibaxutota pacatoyaquinatsi bajaraponë pecuene yabara, patacajamatabëcuene-ëjëtsinexa, xaniawaetsia tayapëtaejawa itsa panejumecowënëtsijitsiamë daxita pataca-itorobicuenia, panija-apóstol-nëxaenë.
10 Nexata baja, itsa pasiwajamatabëcuenecaewame papibisiacuene picani exana bajaraponë paxamëtuatuajëta, xanë-ata baja siwajamatabëcuenecaewajë. Pacujinae siwajamatabëcuenecaewajë itsajiwi pijaneconi yabara, exanajë Cristo tane-itorobicuenia. Bajarapacuenia exanajë, daxita paxamë caejamatabëcuene icatsia panenajuaxainaenexa, nabarajamatabëcuenexanepanaeya panenajuajinawanapaenexa.
11 Nacatoxanepana wajasiwajamatabëcuenecaewijawa itsajiwi pijaneconi yabara, Satanás wajanacaliwaisi canacuenebiyaniwa. Waxaitsi baja Satanás cueneyapëtanetsi papibisiajamatabëcuene xaina, liwaisi wajanacatocapitsapabiabinexa, nabarajamatabëcuenexanepanaeya wajanajuajinawanapaeyaniwa.
Pacuenia Pablo bitso siwanajamatabëxaina Tito, yabara peliwaisi
12 Copiayabaxuto Titota patacato-itorobicujinae,b ponajë Troas tomarajawabelia tatsipaebinexa Cristo peliwaisi. Bajarapatomarata tapatsicujinae, taniji Wajatuxanenë tanetoyapëxanepanaeya-exanaejawa tatsipaebinexa Jesús peliwaisi bajarapatomarata. Nexata, Troas tomarata itsa tsipaebabiabajë Jesús peliwaisi, bajarapatomarapijiwi nenamuxuna-ewetabiaba xaniawaetsia.
13 Itsiata baitsi jane, bajarajota abaxë apojamatabëcuenebarëyanë, tsipaji abaxë wajabananë Tito apopatsi Macedonia nacuawerena, taneyapëtaeya-exanaenexa paxamë yabara. Nexata baja, napëjiobajë Jesús pijajiwi, Troas tomarapijiwi, taponaenexa jane baja, Macedonia nacuayabelia, tacopiajaitsinë Tito.c
Pablo pexaniajamatabëcuene rajuta Diosojawabelia, pijajiwi pejamatabëcueneyawenonabiabixae Cristo pejamatabëcueneta
14 Pexaniajamatabëcuene parajutabiabajë Diosojawabelia, tsipaji paxanë, patatonacuenebiwi Cristo, panejamatabëcueneyawenonabiaba, patacuene-amoneyababiabinexa daxita xuanë panecuenecaranatabiaba. Nexata, Dioso paneyajawaponabiaba, patacuene-amoneyabinexa xaniawaetsia patatsipaebinexa Jesús peliwaisi itsamonaejawabelia. Nexata, daxitajawa itsa paponajë, pamonae jumexaniatane bajarapaliwaisi, tsitapexanialiwaisitsi bitso.
15 Pacuenia pexaniatuxujuwijawa yacaëjëpa daxitajawa, daxitajiwi petuxuninexa, bajarapacuenia Jesús peliwaisi patatsipaebijawa yacaëjëpapona daxitajawa, daxitajiwi pejumetaenexa. Nexata, Dioso panesiwajamatabëcuenebarëya bajaraxua yabara. Pamonae jumexaniataena bajarapaliwaisi, Dioso capanepaenatsi. Itsiata, pamonae jume-aebiana Cristo peliwaisi, Diosowecua naxuabiana.
16 Pamonae penaxuabiwinexa Diosowecua, patatsipaebiliwaisi tsitapetuxutsaebiliwaisitsi, tsipaji yapëtaeya-exanatsi Diosowecua penaxuabijawanexa, pejume-aebixae Cristo peliwaisi. Pamonae Dioso pecapanepaewinexatsi patatsipaebiliwaisi tsitapexaniatuxujuwiliwaisitsi, tsipaji jumexaniatane Cristo peliwiaisi. Yapëtaeya-exanatsinua Dioso pecapanepaejawanexatsi piasaëtsawanapaenexa daxitamatacabijawabelia. Tasiwacanaëjëtsijawata bajarapanamatamotsiliwaisi yabara, nayanijobabiabajë: «¿Jipatsa meta cuenecaëjëpatsi petsipaebinexa bajarapaliwaisi Dioso yawenonaenejewatsi?d Ajibi cajena», jamatabëjanë. Paxanë, pa-apóstolewinë, Dioso paneyawenonabiaba, patatsipaebabiabinexa pexanialiwaisi, Cristo peliwaisi, jiwi pecapanepaeliwaisinexatsi.
17 Itsamonae, ayaibitsaëtonë, paebanajetarubena yamaxë-itojorobiaya beCristo peliwaisicuenia, pebarëyajamatabëcuene pematamotsinexatsi. Bajarapacuenia paxanë apopacuene-itsinë. Biji rajane, bajarapaliwaisi patsipaebabiabajë Cristo patane-itorobicuenia, itsajamatabëcuene-ata pasiwanajamatabëxainaenejewanë, tsipaji payapëtaniji Dioso patanenaitaxutocaewetsijawa.