3
Itsa pacanawajunupaebatsi paneyapëtaenexa Dioso patane-itorobijawa Cristo peliwaisi patacatsipaebinexa, apopanawënëxaniatsinë paxamë patanetaenexamë ayaijamatabëcuenewicuenia. Paxamë xaniajaiya payapëtaneme Dioso pijacuene patatonacuenebijawa. Nexata, pacuenia itsamonae wajëca petsicobeyaquinaenexatsi, itsa jume pacawajëta panetsicobeyaquinaenexa cuyalato,a itsamonae xaniawaetsia panecopiapitsinexa Dioso pitorobiwitsicuenia, bajarapacuenia paxanë apopanamatawenonaenë itsamonae patanetsicobeyaquinaenexa patajacuene yabara,
2 Paxanë baja cajena patajacuata bepatanatsicobeyaquinaebaxuto patajamatabë-ëthëtota. Paxamë panejinawanapaecuene Jesucristojawabelia panesiwanajamatabëcuenecopatsicujinae, daxitajiwi papecataejawata bepapecacuenelebijawa. Bajarapacuenia daxitajiwi yapëtane xaniawaetsia patanacuenebijawa Dioso pijacuene paxamëtuatuajëta.
3 Paxamë xaniawaetsia panejinawanapaexae Cristo pejitsipaecuenia, itsamonae, apopataneyapëtaewi-ata, yapëtane Dioso patane-itorobiwicuene, Cristo peliwaisi patatsipaebinexa. BeCristo patanetsicobeyaquinaebaxuto panacopatame itsamonae pitabarata. Itsiata, pabaxuto Cristo panetsicobeyaquina, apoyaquinae itsacuene-itanetota pebaxutota, ibotota-ata. Biji rajane, piasaëtsaponaponaenë, Espíritu Santo, bepatanetsicobeyaquinaebaxuto paxamë panejamatabë-ëthëtota, pacajamatabëcuenecaëjëpaeya-exanabiaba xaniawaetsia panetsitajinawanapaenexa Cristo pejitsipaecuenia, jiwi peyapëtaenexa xaniajai Dioso patane-itorobiwicuene.
4 Paxanë payapëtaniji Dioso pepacuene patane-itorobijawa, Cristo peliwaisi jiwi patatsipaebawanapaenexa, tsipaji baja pa-itaxutuajamatejemanë Dioso pataneyawenonabiabinexa, Jesucristo pejamatabëcueneta.
5 Paxanë patasaëta Dioso patatonacuenebinexa, apopanejamatabëcuenecaëjëpae. Nexata, xua Dioso pato-exanawanapajë, Dioso baja cajena paneyawenonabiaba.
6 Dioso baja cajena, panecuenecujaruba xaniawaetsia pacuenia papijajiwinë patonacuenebawanapaejitsianë Dioso pejanacuenia penajumeliwaisicajonejawa jiwijawabelia, Jesucristo pejamatabëcueneta, pecapanepaenexatsi penaneconitsia-exanaejawaminexatsiwecua. Nexata, bajarapapejanaliwaisita apotonajumecopatsi pitorobiliwaisianë jiwi pejumecowënëtabiabinexa, aneconijibia petaenexatsi. Biji rajane, jiwi patsipaebabiabajë pacuenia Espíritu Santo jamatabëcuene-asaëya-exanaejitsiatsi. Paliwaisi bajayata Dioso najumecopata Moisés-pijinëta, itoroba pebeyaxuababiabinexa pajiwi apojumecowënëtsi bajarapaliwaisi. Itsiata baitsi jane, pajiwi jumexaniatane papejanaliwaisi jiwi patsipaebabiabajë, pesiwanajamatabëcuenecopabinexa Jesucristojawabelia, nexata Espíritu Santo bajarapajiwi rajutabiaba pitawajamatabëcuene.
Dioso pejanaliwaisita, najumecajunua jiwijawabelia pecapanepaejawanexa
7 Pacujinae Dioso najumecopata Moisés-pijinëta, bajarapaliwaisi Dioso yaquina ibopanabejejumata. Bajarapaliwaisita Dioso itorobi-ata pebeyaxuabinexatsi pajiwi apojumecowënëtsi, itsiata bajarapaliwaisi perajutsijawatatsi, Moisés-pijinë itabaraniweniwena bitso.b Nexata, Israel-pijinë pemomoxi apocuenecaëjëpaetsi pitabarataecapanepaejawa, itsiata bexëajawabelia itabaracotiacaewapona baja, Sinaítsutojawawetsica perunaecujinaetsica.
8 Dioso penajumeliwaisirajutsijawata Moisés-pijinëta, yajawa-itabaraniweniwenaeya-exana, jiwi asiwaya petaenexa penamatamotsiliwaisicuenia. Bajarapaliwaisijawata najamatabëcuene-itajëta jiwi pijaneconijamatabëcuene petocaëjëtsijawa petëpaenexa. Itsiata, matatoxenetsia bitso pijinicuene xua Espíritu Santo nacato-exanaejitsia mapamatacabitaje, wajajumexaniataexae papejanaliwaisi Dioso nacanajumeliwaisicajunua wajanacacapanepaenexa.
9 Paliwaisi Dioso najumecopata Moisés-pijinëta pexanialiwaisi cajena, tsipaji bajarapaliwaisi apopejumecowënëtsijamatabëcuene jiwi yapëtane penaneconitsijawa Diosojawabelia. Bajarapaliwaisiwecua, bitso xanepana papejanaliwaisi pejamatabëcueneta, Dioso aneconijibia nacataejitsia, wajanacacapanepaenexa.
10 Paliwaisi bajayata Dioso Moisés-pijinëta najumecopata, pexanialiwaisi cajena picani. Itsiata baitsi jane, papejanaliwaisi Dioso cotocaewi najumecopata, bajarapaliwaisi bitso pexaniajawa copiayapijiliwaisiwecua. Bajaraxuata, paliwaisimi copiaya Dioso najumecopata Moisés-pijinëta, wajajumecowënëtsinexa, aeconoxae baja yapëtanetsi piajumematamobicuene,c Dioso aneconijibia wajanacataenexa.
11 Nexata, itsa copiayapijiliwaisi xanepana, pewerewerecaeliwaisinexa-ata, matatoxenetsia bitso xanepana papejanaliwaisi cotocaewi Dioso najumecopata, tsipaji daxitamatacabijawabelianexa tsitecaena.
12 Patayapëtaexae apopewerewerecaejawanexa bajarapapejanaliwaisi, apopajumejunawabiabinë patatsipaebinexa jiwijawabelia.
13 Nexata, paxanë apopa-exanawanapaenë pacuenia bajayata exana Moisés-pijinë itsa itabaraniweniwena, naitabara-acata papabërëpanata, jiwi pitabarataeyaniwatsi pitabaracotiacaewaponaejawa. Bajarapacuenia apopanaitabara-acatsinë, tsipaji pejanaliwaisi apo-ajumematamobi tsaponaejitsia, pacuenia itsi Dioso penajumecopatsiliwaisi Moisés-pijinëta.
14 Itsiata baitsi jane, Israel-pijinë pemomoxi bajarapamatacabita apoyapëtae piajumematamobijawanexa bajarapaliwaisi, pejumecowënëtsijawata Dioso aneconijibia petaenexatsi. Bajarapijinia pacuenia, ajena mapamatacabijawaberena-ataje, itsa tsimuxulebatsi Dioso penajumecopatsiliwaisimi Moisés-pijinëta, tsiteca apojumeyapëtaeyabiabi pajamatabëcueneliwaisi xaina, tsipaji bajarapaliwaisi bepitaxuto-acatsijawa, bajarapamonae pejumexaniataeyaniwa Cristo peliwaisi. Bajarapamonae itsa jumexaniataejitsipa Cristo pesiwatëpaejawatsi, nexata matapania jumeyapëtaejitsipa pajamatabëcueneliwaisi xaina paliwaisi bajayata Moisés-pijinë tsipaebabiaba.
15 Xaniajanë. Ajena mapamatacabijawaberena-ataje, judíowi penacaetuatabiabibota itsa lebabiaba Dioso penajumecopatsiliwaisimi Moisés-pijinëta, apojumeyapëtaeyabiabi pajamatabëcueneliwaisi xaina. Bajarapaliwaisi pejumeyapëtaeyaniwa, jamatabë caranatatsi, tsipaji tonaexanatsi bepitaxuto-acatsipanatsi.
16 Itsiata baitsi jane, pajiwi siwanajamatabëcuenecopata wajatuxanenë Jesucristojawabelia, bajarapajiwi Dioso wecua-ajibia-exanatsi bajarapajamatabëcuenecaranatsijawatsi, xaniawaetsia pejumeyapëtaenexa pajamatabëcueneliwaisi xaina bajayata Moisés-pijinë paliwaisi tsipaebabiaba.
17 Wajatuxanenë Jesucristo, Espíritu Santobeje, najamatabëcuenejëpabeje. Nexata, Espíritu Santo wajananacatsijamatabë-ecaexae, nacajamatabëcueneyawenonapona, Cristo pejitsipaecuenia wajajinawanapaenexa, nacawecua-ajibia-exananua wajajumecowënëtsijawami Dioso penajumecopatsiliwaisi Moisés-pijinëta, aneconijibia wajanacataenexa.
18 Nexata, daxitatsi wajanacawecua-ajibia-exanaewi bajarapajamatabëcuenecaranatsiliwaisi, Jesucristo pejamatabëcueneta, Espíritu Santo nacajamatabëcueneyawenona, wajajamatabëcuenejëpaenexad pacuenia Cristo jamatabëcuene-itsi. Bajarapacuenia wajajamatabëcuenejëpaexae, tsitanacuene-itajëtatsi jiwijawabelia Cristo ayaijamatabëcuene pexainaenëcuene. Bajarapacuenia nacacuenecaëjëpa wajatsitanacuene-itajëtsinexa, Espíritu Santo wajanacajamatabëcueneyawenonaponaexae.