4
Dioso baja cajena, patane-itaxutotsoniataexae, panetocopata patatsipaebinexa jiwijawabelia pexanialiwaisi Jesucristo peliwaisi. Bajaraxuata, itsajawata panetsi-ayai tsabiabi-ata, itsiata apopajamatabëcopatsinë patatsipaebabiabijawa Jesucristo peliwaisi. Apopajamatabëcopatsinë, tsipaji baja Dioso panetocopata bajarapacuenia patato-exanawanapaenexa, patane-itaxutotsoniataexae.
2 Nexata, muetsia apopa-exanaenë itsacuenejawa-ata, xua yabara pa-auranëjitsia. Jiwi patayamaxë-itojorobinexa, itsacuenejawa-ata apopa-exanaenë. Apopatsipaebabiabinënua saicayaliwaisi bepexaniajailiwaisicuenia Dioso pejumeliwaisiwecua. Biji rajane, jiwijawabelia ëpexaniajailiwaisi patsipaebabiabajë, tsipaji payapëtaniji Dioso patanenaitaxutuacaewetsijawa. Bajaraxuata, apopaxainaenë itsaneconi Diosojawabelia, jiwijawabelia-ata.
3 Pamonae Diosowecua penaxuabiwinexa, Jesús peliwaisi patsipaebi-atanë, apopanejumeyapëtaeyabiabi. Paxanë xaniawaetsia patsipaebi-atanë peyapëxanepanaejumenëta, itsa apojumeyapëtae bajaraxua baja apopatajamatabëcuene.
4 Baitsi, Jesús peliwaisi pejume-aebixae, mapanacuapijiwije pijadioso, Satanás, ajamatabëcuene-itaquiriaya-exanatsi pejumexaniataeyaniwa bajarapapexanialiwaisi, Cristo peliwaisi. Bajarapaliwaisi nacayapëtaeya-exana Cristo yabara, ponë pinijicotiata jiwi jamatabëcuene-itayotsiana,a itsa jumexaniataena bajarapaliwaisi. Nacayapëtaeya-exanaenanua pacuenia Cristo pejamatabëcuene-itajëtsinë jiwijawabelia, pacuenia Dioso jamatabëcuene-itsi.
5 Paxanë liwaisi itsa pacatsipaebabiabatsi, paxanë apopanaliwaisipaebabiabinë pataneyaiyataenexamë. Biji rajane, wajatuxanenë Jesucristo peliwaisi pacatsipaebabiabatsi. Paxanë saya panataniji bepanijajiwinë, patacajamatabëcueneyawenonabiabinexa, Jesús pata-asiwaxae.
6 Bajayatami, Dioso itoroba penaexanaenexa pitayotsicotia pitaquirijawatab mapanacuataje. Maparucae-ataje, bajaraPonë paxanë panejamatabëcuene-itayota patajamatabëcuene-aitaquirijawami, Jesús peliwaisi patajumexaniataejawata. Bajarapacuenia patanejamatabëcuene-itayotsixae, payapëtaniji Jesucristo itsa itabaraniweniwena,c jamatabëcuene-itajëta paxa Dioso bitso ayaijamatabëcuene pexainaejawa.
Pablo itaxutuajamatejema tsaponaponae pewajënaeyabelia Dioso pejamatabëcueneyawenonaenexatsi, piayapëbejecuene tocopiapatabiabi-atatsi, Dioso pijacuene petonacuenebijawata
7 Pacujinae Dioso panetocopata patatsipaebawanapaenexa jiwijawabelia Jesús peliwaisi, pejamatabëcuene-itayotsiliwaisinexatsi, panetsijamatabëruta bitso penamatamotsiliwaisi, paxanë apopaxainae-atanë piajamatabësaëperabëto. Pacuenia jiwi itsa xaniawaetsipa bitso penamatamotsijawa atsawaxita, bajarapacuenia Dioso xaniawaeta penamatamotsiliwaisi apopiajamatabësaëperabëtota. Bajarapacuenia Dioso itsiata pane-itoroba, patatsipaebabiabinexa bajarapanamatamotsiliwaisi, apopata-ajamatabëcuenesaëwi-ata, patayapëtaeya-exanaenexa jiwijawabelia pacuenia pajamatabëcuenesaënë tsawanapae ëDioso pesaëta.
8 Nexata, Dioso pesaëta pata-ajamatabëcuenesaëxae, nawitsia panetocopiapatabiabi-ata itsacuene, pataneto-ayapëbejecuenejawanë, itsiata apopajamatabëcuenefaefaenaenë, tsipaji Dioso paneyawenonabiaba patawecuapanepaenexa bajarapacuene. Apopayapëtaeyabiabi-atanë pajamatabëcuene yabara panetocopiapata pataneto-ayapëbejecuene, itsiata apopanejamatabëcuene-amoneyabi, patanecopabia-exanaenexa Dioso pata-itaxutuajamatejemajawa.d
9 Itsamonae panebejiobia-exanabiabi-ata Jesús papijiwixaenë, itsiata Dioso apopanecopatsi pataja-epato. Itsamonae ayaicuenia panebeyabiabi-ata, itsiata pepacuene apopanebeyaxuababiabi, Dioso pataneyawenonabiabixae.
10 Itsabelia paponajë, itsamonae jamatabëpanebeyejebabiaba Jesús papijajiwixaenë, pacuenia Jesús pijawajabitsaë beyaxuabatsi. Itsiata, apopanebeyejebicapanepae, jiwi peyapëtaenexa Jesús piasaëtsaponaponaejawa pebeyaxuabicujinaetsi, pataneyawenonabiabijawata, patapanepaenexa patatëpaejawaminexawecua.
11 Daxitamatacabi, patajinawanapaematacabianë, panetsi-ayai tsabiabi, itsamonae patanebeyejebinexa Jesús papijajiwixaenë. Bajarapacuenia panetocopiapatabiaba jiwi pataneyapëtaenexa Jesús pataneyajawaponaponaejawa pata-ajamatabëcuenesaënexa, pewerewerecaeperabëto payajawajinawanapae-atanë.
12 Patacatsipaebabiabixae Jesús peliwaisi, paxanë pacopia-ewetawanapajë patatëpaejawa. Paxamë juya, panejumexaniataexae patacatsipaebiliwaisi, Dioso pacarajuta pitawajamatabëcuene daxitamatacabijawabelianexa.
13 Paxanë pajamatabëcuenejëpajë ponë yaquina Dioso pejumeliwaisibaxutota mapacueniaje: «Jumexaniataniji Dioso pejumaitsijawa. Nexata, tsipaebajë jiwijawabelia bajarapaliwaisi», pejainë. Bajaraxuata, patajumexaniataexae Jesús peliwaisi, patsipaebaponajë jiwijawabelia bajarapaliwaisi.
14 Pajumexaniataniji wajatuxanenë Jesús petëpaecujinae, Dioso icatsia piasaëya-exanaejawatsi. Bajaraxuata, payapëtaniji baja pexaniajaicuene Dioso icatsia paxanë, paxamë-ata, wajanaca-asaëya-exanaejawanexa wajatëpaecujinae, wajanacayajawaponaponaenexa pijanacuatatsia.
15 Daxita bajaraxuanë panetocopiapatapona paxanë, Jesús peliwaisi patatsipaebabiabiwi, pexaniacuene papecatocopiapatsinexa paxamë. Bajarapacuenia patatsipaebaponaejawata, ayaibitsaëto baja tsaponae jumexaniataeponanua Dioso pitaxutotsoniataejawatsi Jesucristo pejamatabëcueneta. Nexata, bajarapamonae pexaniajamatabëcuene rajutapona Diosojawabelia, pewënëxaniatsinexa bajaraPonë, ayaijamatabëcuene pexainaejawa yabara.
16 Bajarapacuenia ayaibitsaëto pejumexaniataeponaexae, paxanë apopajamatabëcopatsinë jiwi patatsipaebabiabijawa pexaniajailiwaisi, itsamonae panebejiobia-exanabiabi-ata bajaraxua yabara. Xaniajai, pataperabëto asaëjibi tsaponae patanebejiobia-exanaponaexae. Itsiata, patawajënaeyabelia, caematacabi canacujitsia, Dioso panejamatabëcuene-asaëya-exanapona, pejitsipaecuenia patatonacuenebawanapaenexa.
17 Bajarapacuenia patawajënaeyabelia patonacuenebawanapajë Dioso, tsipaji payapëtaniji xua panetocopiapatabiaba patajinawanapae-epato mapanacuataje, itsamonae patanebejiobia-exanabiabijawa, saya cae-epatoyonexa, apobajayajebinexa. Payapëtanijinua patanetsiwajënaexaniawaetsijawa bitso pexaniacuenejawanë, patacabarëyanexa Dioso pijanacuatatsia, itsamonae patanebejiobia-exanaejamatabëcuene.
18 Bajaraxuata, apopanasiwabëjanë bitso, papiayapëbejejawanë panetocopiapatabiaba mapanacuataje, tsipaji bajaraxuanë bepijiayo ajibi tsane. Biji rajane, pajamatabënajinawanapajë patanetocopiapatsinexa, xuanë jiwi apocuenecaëjëpaetsi petaejawa, Dioso patanerajutsijawanënexa, tsipaji bajaraxuanë bitso tsitecaena daxitamatacabijawabelianexa. Baitsi, xua jiwi cuenecaëjëpatsi petaejawa, bajaraxua werewerecaena. Itsiata baitsi jane, xua jiwi apocuenecaëjëpaetsi petaejawa, daxitamatacabijawabelianexa apowerewerecae tsane.