Gálatas
Mapabaxutoje apóstolnë Pablo toyaquina Jesús peliwaisi pejumexaniataewi, Galacia nacuata pejinawanapaewijawabelia
Pablo pebajacobiliwaisi
1
1-2 Xanë, Pablonë, pacatoyaquinatsi mapabaxutoje Jesús papijajiwimë, Galacia nacuata panejinawanapaewi. Daxita pamonae yajawaponaponajë, Jesús pijajiwi, pacabajacobalia.
Apóstol-nënexanëa nitapeta Jesucristo, paxa Diosobeje. Xanë jiwi aponitapetsi. Aponitorobinua tatsipaebanajetarucaenexa Jesús peliwaisi. Biji rajane, nitapeta Dioso, Ponë asaëya-exana Jesucristo petëpaecujinae.
3 Pexaniacuenia pacatojitsipatsi, waxa Dioso, wajatuxanenë Jesucristobeje, papecajamatabëwënëtsinexa papeca-asiwajamatabëcuene, papecabarajamatabëxanepanaejamatabëcuene-ata, jamatabëcuenexanepanaeya panenajuajinawanapaenexa.
4 ¡Bajarapacuenia pajinawanapare, tsipaji wajatuxanenë Jesucristo pijacuata nacaeweta waxa Dioso petojitsipaecueniatsi pebeyaxuabinexatsi, pibisiacuene waja-exanaeneconi yabara! Nacacapanepanuab wajapibisiajamatabëcuene wajanacanamatacaitorobiabijawami mapanacuataje.
5 Bajaraxuata, daxitajiwi tojitsipajë pewënëxaniatabiabinexa Dioso ayaijamatabëcuene pexainaejawa yabara. Bajara-itsi tsane.
Jesús peliwaisiwecua ajibi baja pematatsënëa itsaliwaisi jiwi pecapanepaeliwaisinexatsi
6 Itsa xanë pacawënëliwaisitanetsi itsaliwaisi panejumecowënëtsijawa, bitso pacasiwajamatabëcuenenabenajacatsi, tsipaji bepijiayo panawecuacopabame panejumexaniataejawa patacatsipaebiliwaisi, Jesús taneyapëtaeya-exanaeliwaisi.c Bitso cajena, bajaraxua yabara pacasiwajamatabëcuenenabenajacatsi. Pacawënëtanetsi bepijiayo panenawecuacopabaponaejawa panejumexaniataejawami Jesús peliwaisi. Dioso pexaniacuene pacato-exana, papecajunatsijawata papecacapanepaenexa papecananeconitsia-exanaejawaminexawecua. Nexata pacatsitanajamatabëcuene-itajëta papeca-asiwajawa. Itsiata baitsi jane, jamatabëcuenenawëxaniabiaya pajumexaniataneme saicayaliwaisi Jesús peliwaisiwecua,d bepapecapanepaeliwaisinexa, itajara panejumetaejawata.
7 Itsiata baitsi jane, pematatsënëa ajibi baja cajena itsaliwaisie jiwi pecacapanepaeliwaisinexatsi Jesús peliwaisiwecua. Itsamonae pata Jerusalén tomarawerena, paxamë papecatsipaebinexa Jesús bepeliwaisicuenia. Itsiata, itsaliwaisi yajawa pematatsënëa paca-itorobapona panejumecowënëtsinexa. Nexata, bajarapaliwaisita pacajamatabëcuenena-epatajërërëcaeya-exana, panecopabinexa panejumexaniataejawami pexanialiwaisi, Cristo peliwaisi.
8 Copiaya paliwaisi paxanë pacatsipaebatsi, pexaniajailiwaisi baja cajena Cristo yabara. Bajaraxuata, itsa patsipa ángelnë, paxanëyajuwënënë-ata, papecatsipaebinexa saicayaliwaisi Jesucristo peliwaisiwecua, bajarapajiwi baja jema Dioso naneconitsia-exanaetsi.
9 Copiaya baja cajena pacuenia pacatsipaebatsi, bajara-icatsia pacuenia aeconoxae-ata pacatsipaebatsi. Pajiwi pacatsipaebiana saicayaliwaisi Jesucristo peliwaisiwecua, bajarapajiwi baja jema Dioso naneconitsia-exanaetsi.
Pablo yapëtaeya-exana pexaniajailiwaisicuene paliwaisi paebanajetaruca
(Gál. 1:10—2:21)
Jesús yapëtaeya-exana Pablo paliwaisi paebanajetarucaejitsia
10 Bajarapacuenia itsa pacatsipaebatsi Jesús peliwaisi, apopacatsipaebitsi saya jiwi tanesiwajamatabëcuenebarëyanexa, pacuenia itsamonaef xanë yabara jumaitsi. ¡Jume baja cajena! Biji rajane, jitsipajë Dioso tanesiwajamatabëcuenebarëyajawa. Saya jema Jesús peliwaisi itsa tsipaebijitsipajë jiwi tanesiwabarëyanexa, nexata naitajëtsipajë Cristo apopijajiwitonëcuenenë.
11 Xanë paliwaisi tsipaebaponajë Jesucristo yabara, jiwi pecapanepaeliwaisinexatsi Diosojawabelia, bajarapaliwaisi jiwi pejamatabëcueneta apopecapitsapaeliwaisi.
12 Biji rajane, itsajiwi-ata cajena bajarapaliwaisi aponetsipaebi. Aponecujarubi-ata. Jesucristo raja pijacujaya neyapëtaeya-exana bajarapaliwaisi. Nexata, nitoroba jiwi tatsipaebanajetarucaenexa bajarapaliwaisi.
13 Tajamonae, paxamë rabaja panewënëliwaisitaneme copiayami pacuenia ponaponajë, pamatacabi abaxë jumecowënëtsiaponaponajë Dioso penajumecopatsiliwaisi Moisés-pijinëta. Asaëyata bajarapaliwaisi tajumecowënëtsixae, tawënajudíowicuenia itoyanë bitso Jesús peliwaisi pejumexaniataewi. Nexata, bajarapamonae barajinabiabajë itaxutobejiobiataenejewanë. Jamatabëwerebiaxuababiabajënua.
14 Bajarapamatacabi xanë asaëyata jumecowënëtaponaponajë Dioso penajumecopatsiliwaisi Moisés-pijinëta, tajamonae judíowi pejumecowënëtsijawawecua, caewai patanajuaxainaewi-ata, tsipaji bajarapamonae matatoxenetsia casaënë tsaponaponae tajumecowënëtsijawa judíowi pijasalinailiwaisianë.
15-16 Xanë tanaexanaewajënaeya, Dioso tane-itaxutotsoniataexae, nitapeta Jesucristo pija-apóstol-nënexanë. Nexata, bajarapacuenia barajinae-atanëg Jesús pijajiwi, Dioso tane-asiwajamatabëcuene nejunata taneyapëtaeya-exanaenexa pexënato, Jesucristo, peliwaisi. Nexata, nitoroba tatsipaebanajetarucaenexa apojudíowijawa. Bajarapaliwaisi Dioso taneyapëtaeya-exanaecujinae, xanë apoponaenë itsajiwijawabelia-ata tayanijobinexa Dioso pexënato, Jesús, peliwaisi yabara.
17 Itsiata, aponawiatecaenë Jerusalén tomarabelia tayanijobinexa pamonaejawabelia xanëwecua copiaya exanatsi apóstolewi. Biji rajane, caecuenia xanë rowia ponajë Arabia nacuayabelia.h Nexata, bajarapatusatonacuata, Dioso xaniawaetsia neyapëtaeya-exanapona pexënato peliwaisi. Bajaraxuacujinae, icatsia, bexëai Arabia nacuawerena nawiarenajë Damasco tomaraberena.
18 Bajaraxuacujinae, tapuaxainae baja acueyabi pawaibeje tajumexaniataecujinae Dioso pexënato, Jesús, peliwaisi, matapania ponajë jane baja Jerusalén tomarabelia, tasiwaxainaenexaj apóstolnë Pedro. Nexata, Jerusalén tomarata, Pedrojawata, naponaponajë quince pamatacabibeje.
19 Itsiata, Jerusalén tomarata pematatsënëa itsa-apóstolnë apotaenë. Caenë saya Santiagok taniji, wajatuxanenë pejuyapijinë. Bajaraponëbeje saya siwaxainajë.
20 Paliwaisi pacatoyaquinatsi pexaniajailiwaisi Jesús yabara. Dioso-ata yapëtane apotanajumetsënëtsijawa.
21 Jerusalén tomarata taponaponaecujinae, bexëajawabelia rowia ponajë icatsia Siria nacuayabelia, Cilicia nacuayabelia-ata, Jesucristo peliwaisi jiwi tatsipaebaponaenexa.
22 Rowia taponaexae, Judea nacuapijiwi, Jesús pijajiwi, aponeyapëtae. Bajarapamonae-ata aponecujarubil Jesús peliwaisi.
23 Bajarapamonae saya newënëliwaisitane itsamonae xanë yabara pejumaitsijawa: «Ponë copiayami nacabarajinabiaba, wajanacawerebiabinexa Jesucristo peliwaisi wajajumexaniataewi, aeconoxae baja bajaraponë-ata siwanajamatabëcuenecopata Jesucristojawabelia. Nexata, pina itsamonae-ata pejumexaniataenexa Jesucristo peliwaisi, bajaraponë tsipaebanajetaruca», pejaijawa xanë yabara, newënëliwaisitane Jesucristo peliwaisi pejumexaniataewi, Judea nacuata pejinawanapaewi.
24 Bajarapacuenia xanë tanewënëliwaisitaexae, Jesús pijajiwi Judea nacuajawa pejinawanapaewi, wënëxaniatabiaba Dioso tanejamatabëcuene-itothianaejawa yabara.