Efesios
Mapabaxutoje Apóstolnë Pablo toyaquina Jesús peliwaisi pejumexaniataewi, Éfeso tomarata pejinawanapaewijawabelia
Pablo pebajacobiliwaisi
1
Xanë, Pablonë, Dioso pejitsipaecuenia nitapeta, Jesucristo pija-apóstol-nënexanë. Nitoroba jiwijawabelia pexanialiwaisi tatsipaebaponaenexa, Jesucristo peliwaisi. Pacatoyaquinatsi mapabaxutoje, paxamë Dioso papijajiwimë papeca-itapetsiwi,a Éfeso tomarata panejinawanapaewi. Caejamatabëcuene paxamë panexainawanapaewi pane-itaxutuajamatejemajawa Cristo Jesús.
2 Pexaniacuenia pacatojitsipatsi, waxa Dioso, wajatuxanenë Jesucristobeje, papecajamatabëwënëtsijawa piasiwajamatabëcuene, pebarajamatabëxanepanaejamatabëcuene-ata, jamatabëcuenexanepanaeya panenajuajinawanapaenexa.
Dioso tajëwelia siwanajamatabëcuenewereta papexaniacuenejawanëta yawenonaejitsia pijajiwijawabelia
3 Pexaniajamatabëcuene rajutsianatsi Dioso, wajatuxanenë Jesucristo, paxajawabelia, tsipaji Cristo pejamatabëcueneta bitso pexaniacuenia nacayawenonabiaba. Pematatsënëa, Dioso nacarajutanua baja daxitacuenewiria pexaniacuenejawanë, pija-athëbënacuapijicuenejawanë.b Bajarapacuenejawanëta daxitacuenejawabelia nacajamatabëcueneyawenonaena, wajajamatabëcuene-asaënexa Dioso pijacuenejawabelia.
4 Orijibia, Dioso nacua pexanaewajënaeya, naca-itapeta pijajiwitsi wajanaca-exanaenexa Cristo pejamatabëcueneta, aneconijibia wajajinawanapaenexa bajaraPonë pitabarata.
5 Dioso bitso wajanaca-asiwaxae, najamatabëcuenewereta pijacuata penatojitsipaecuenia, pepopexitsi wajanaca-exanaenexa, Jesucristo pejamatabëcueneta.
6 Bajarapacuenia daxita nacato-exana, Pexënato, piasiwanë, pijajiwixaetsi, wajawënëxaniatabiabinexa Dioso wajanaca-itaxutotsoniataejawa, wajanaca- asiwajawa-ata yabara, wajanaca-asiwajawa-ata yabara.
7 Cristo wajanacasiwatëpaexae cruzata, pejanarunaejawata nacaneconimatamota pibisiacuene waja-exanaeneconimi. Nexata, Dioso pinijicuenia wajanaca-itaxutotsoniataexae, bajarapaneconimi nacasiwajamatabëcuenecaewa baja.
8 Orijibia, wajanaca-itaxutotsoniataejamatabëcuene, nacatsijamatabëcuenewënëta wajaxainaenexa wajacanaëjëtsijamatabëcuene, wajayapëtaejamatabëcuene-ata.
9 Nacayapëtaeya-exananua, xua picani abaxë itsajiwi-ata apoyapëtae, papexaniacuene Dioso tajëwelia siwanajamatabëcuenewereta, pexanaenexa Cristojawata.
10 Mapacueniaje tsiwajënaenajamatabëcuenewereta baja. Pamatacabi copiajopaena Dioso pecaëjëtsimatacabi, pecaetuatsijawanexa daxitajiwi, daxita mapanacuapijicueneje, athëbëpijicuene-ata, petocopatsinexa jane baja Cristo pewetsijawa.
11 Cristo pejamatabëcueneta, Dioso pane-itapeta paxanë, pajudíowinë, papijajiwinexanë, patacanacopatsinexanuac daxita xua najumecapanepaeya panerajutsiapaeba. Xaniajai, bajarapacuenia exanabiaba daxita xua Dioso siwanajamatabëcuenewereta pexanabiabinexa petsitaxanepanaecueniatsi.
12 Paxanë pajudíowinë patawajënae-ewetawanapaewi bajayajawawerenacujinae, Dioso panetojitsipa patawënëxaniatsinexa bajaraPonë, bitso pexaniacuene pataneto-exanaexae, copiaya patasiwanajamatabëcuenecopabixae Jesucristojawabelia.
13 Bajarapijinia pacuenia, paxamë-ata, apopajudíowimë panejumetaexae pexaniajailiwaisi, Jesús peliwaisi, papecacapanepaeliwaisinexa, panejumexaniataneme bajarapaliwaisi. Nexata, pasiwanajamatabëcuenecopabame Jesucristojawabelia. Nexata, pacuenia jiwi itaneruta sellojawata cataitsiaya pebaxutojawabelia, peyapëtaeya-exanaenexa pexaniajaijawa,d bajarapijinia pacuenia Dioso pacatsijamatabëcuene-ecaeya-exana Espíritu Santo,e najumecapanepaeya pejumaitsicuenia, xaniajaiya panenayapëtaenexa Jesucristo papijajiwicuenemë.
14 Bajarapacuenia Espíritu Santo, wajanacayacajebixae, nacatsijamatabëcuene-eca, nexata nayapëtanetsi pepacuene wajaxainaejawanexa daxita xua najumecapanepaeya nacarajutsiapaeba, Cristo pejamatabëcueneta. Dioso wajanacacomuatsiwi, pepacuene xainaenatsi daxita bajaraxuanë, pamatacabita nacacaponaena pijanacuajawabetsia. Bajarapacuenia Dioso wajanacatsijamatabëcuene-ecaeya-exanaexae Espíritu Santo, nacacuenecaëjëpa pexaniacuenia wajawënëxaniatsinexa Dioso.
Pablo towajëta Diosojawabelia pejamatabëcueneyawenonaenexa Jesús peliwaisi pejumexaniataewi, Éfeso tomarata pejinawanapaewi
15 Bajarapacuenia pacawënëliwaisitanetsi xaniawaetsia pane-itaxutuajamatejemajawa wajatuxanenë Jesús-jawabelia, asiwayanuaf panetaejawa daxita Jesús peliwaisi pejumexaniataewi.
16 Bajarapacuenia itsa pacawënëliwaisitanetsi paxamë yabara, apocopatsinë pexaniajamatabëcuene tarajutabiabijawa Diosojawabelia, tawajëtabiabijawata.
17 Patacatowajëtabiabatsi wajatuxanenë Jesucristo paxa Dioso ayaijamatabëcuenenëjawabelia, Espíritu Santo papecarajutsinexa panecanaëjëtsijamatabëcuene, paneyapëtaejamatabëcuenenua, Dioso yabara xaniawaetsia paneyapëtaenexa pacuenia Dioso jamatabëcuene-itsi.
18 Pacatowajëtabiabatsinua Diosojawabelia papecajamatabëcuene-itayotsinexa pexaniajailiwaisita, xaniawaetsia paneyapëtaeponaenexa panewajënaeyabelia pitsicuenejawanë pacopia-ewetawanapameg Dioso papecato-exanaenexa papecajunatsiwi. Paneyapëtaeponaenexanua papexaniacuenejawanë pacatoxaniawaeta pijanacuatatsia, nawitsia papecarajutsijawanënexa, xuanë-ata pacanacopabijitsiamëh Jesús papijajiwixaemë.
19 Pacatowajëtatsinua Diosojawabelia, paneyapëtaeponaenexa bajaraPonë papinijicuenesaë xaina. Bajarapasaëta nacayawenonabiaba waxaitsi, waja-itaxutuajamatejematsawanapaewi Cristojawabelia. Bajarapapinijicuenesaë cajena apoxainae pecopiarucaecuene.
20 Bajarapasaëta, Dioso baja cajena Cristo asaëya-exanatsi petëpaecujinae, athëbëtatsia pemuxuneneta pe-ecaeya-exanaenexatsi pecujuanenia, penajua-ewetsinexabeje daxitacuene.
21 Nexata, Dioso tocopata bajarapasaë Cristojawabelia, pewetsinexa daxitacuene. Nexata, jamatabëcuenematatoxenetai daxitacuenewiria ayaijamatabëcuenewi,j pamonae pepopenamatacaitorobiwi, pitorobiwi, penamatacaitorobisaë pexainaewi, petuxanewi, pewënëjonewi-ata ayaijamatabëcuenewi yabara. Cristo ayaijamatabëcuene pexainaejawa wënëjoneponapona mapamatacabitaje. Tsiteca canacopatsiana bajarapa-ayaijamatabëcuenejawa pejananacua pexanaecujinae-ata.
22 Bajarapacuenia Dioso tocopata Cristo daxitacuene penamatacaitorobinexa pewetsijawata. Orijibia, tocopata baja Cristo pijajiwituatuajëta bepematabocotonë, penamatacaitorobinexa.k
23 Daxita Cristo pijajiwi, bajarapamonae naexana Cristo bepeperabëto. Nexata, pacuenia jiwi peperabëto xaniawaetsia nacueneba pematabocoto pejamatabëcueneta, bajarapijinia pacuenia Cristo jamatabëcuenecaëjëpaeya-exana pijajiwi, pejitsipaecuenia pexanawanapaenexa. Cristo pasaëta eweta daxitacuene, bajarapasaëta pijinia yawenona pijajiwi.