Wajanaca-itaxutotsoniataexae, Dioso nacacapanepa baja Cristo pejamatabëcueneta wajatëpaejamatabëcuenejawamiwecua
2
Paxamë, apopajudíowimë, bajayata Dioso pitabarata pajamatabëcuenetëpawanapame panijaneconijamatabëcuene, pibisiacuene pane-exanaexae.
2 Bajarapajamatabëcuene copiayami pacajinawanapame, mapanacuapijiwi pecanaëjëtsiliwaisicuenia pibisiacuene pane-exanawanapaenexa. Nexata, pajumecowënëtawanapame dowathi, ponë namatacaitorobaponapona daxita apowajataecapanepaewi, itaboxojawa pejinawanapaewi.a Bajaraponë jamatabëcuenenamatacaitorobab Jesús peliwaisi pejume-aebiwi, pibisiacuene pexanaenexa.
3 Daxitatsi picani najëpaeya jinawanapatsi. Nexata, exanawanapatsi wajaperujujamatabëcuene wajanaca-itorobicuenia. Bajarapacuenia waja-exanawanapaexae, ewetawanapatsi Dioso wajanacananeconitsia-exanaenexa, wajanacabara-anaepanaexae wajaneconijamatabëcuene.
4 Itsiata baitsi jane, Dioso bitso jiwi pitaxutotsoniataenëxae, najamatabëcuene-itajëta ayaicuenia wajanaca-asiwajawa wajanacajamatabëcuene-aitawaya-exanaejawata.
5 Paepatota jamatabëcuenetëpawanapatsi wajaneconijamatabëcuene, bajarapaepatota Dioso nacajamatabëcuene-aitawaya-exana, Cristo penamatacotsia-exanaejawatatsi petëpaejawawecua. (Tajamonae, Dioso pacacapanepa ëpapeca-itaxutotsoniataejamatabëcueneta.)
6 Pacujinae Dioso itsa asaëya-exana Cristo petëpaejawawecua, waxaitsi-ata bewajanacayajawa-asaë, wajaxainaenexa pitawajamatabëcuene. Orijibia, Dioso itsa ecaeya-exana Cristo Jesús athëbëtatsia, waxaitsi-ata bewajanacayajawa-ecae bajarajotatsia, daxitacuene wajanacabarë-ewetsinexa.
7 Bajarapacuenia Dioso nacato-exana, penajamatabëcuene-itajëtsinexa pamonae jinawanapaejitsia itsamatacabijawabelia, peyapëtaeya-exanaenexa waxaitsi ayaicuenia wajanaca-asiwajawa, wajanaca-itaxutotsoniataejawanua Cristo Jesús pejamatabëcueneta.
8 Xaniajai. Dioso cajena paca-asiwa. Nexata, papeca-itaxutotsoniataexae,c pacacapanepa baja panijaneconiwecua, Jesucristojawabelia panesiwanajamatabëcuenecopabijawata.d Paxamë panijacuata apopanacapanepaemë, Dioso papecananeconitsia-exanaejawaminexawecua. Biji rajane, Dioso amoneya pacacapanepa baja, ayaicuenia papeca-itaxutotsoniataexae.
9 Bajarapacuenia Dioso pacacapanepa, itsacuenejawa apopato-exanae-atamë.e Bajaraxuata itsajiwi-ata be-ayaijamatabëcuenejiwi apobenatae itsamonaewecua Dioso pecapanepaejawatsi yabara.
10 Waxaitsi Dioso pecobecowëwixaetsi icatsia pejanacueniaf naca-exana, Cristo Jesús pejamatabëcueneta, bitso pexaniajawa.g Bajarapacuenia naca-exana, pexaniacuenejawanë waja-exanawanapaenexa, Dioso tajëwelia wajanacasiwanajamatabëxainaecuenia.
Dioso aeconoxae najëpaeya tane apojudíowi, judíowi-ata, caebitsaëto pexanaexaetsi Jesucristo pejamatabëcueneta
11 ¡Paxamë apopajudíowimë panajamatabënapire mapacueneje! Bajayata, pajudíowinë pacawënëjonabiabatsi: «Apopenabo-upiperabëcaucubiwi, Dioso apopeyapëtaewinua», pacajaitsi tsabiabi. Paxanë, pajudíowinë patanabo-upiperabëcaucubiwixae, ayaijamatabëcuenewi panataeyabiabajë paxamëwecua. Itsiata, panabo-upiperabëcaucubi-atanë, bajaraxua apopanejamatabëcueneyawenonae, tsipaji saya naniapijicuenejawa.
12 Bajarapamatacabita, paxamë pajinawanapame Cristonejewa. Pacato-acuenebi panenacajonejawa, Israel nacuapijiwicuenia papecataenexa. Abaxë apopayapëtaemë Dioso penaliwaisicajonejawamibeje, najumecapanepaeya patanejumaitsiliwaisimi, pataneyawenonaeyapaebijawa pajudíowinëjawaberena. Bajarapacuenia Diosonejewa panejinawanapaexae, mapanacuataje apopacopia-ewetawanapaemë papecacapanepaejawanexa.
13 Itsiata baitsi jane, aeconoxae baja paxamë, apopajudíowimë, saicaya tajë Diosowecua panejinawanapaewimi-ata, caenëjawabelia wajanajuasiwanajamatabëcuenecopabixae Cristojawabelia, Cristo pejana pejamatabëcueneta, nacana-imoxotsia-exana. Caebitsaëtotsinua naca-exana baja.
14 Cristo raja wajanaca-wecua-ajibia-exanaenë namata-enetsia wajanacuene-itoyajawami. Nexata, paxamë apopajudíowimë, paxanë pajudíowinë-ata, caebitsaëto naca-exana baja. BajaraPonë wajanacasiwatëpaejawata, nacawecua-ajibia-exana pajamatabëcuene picani nacayacaranata, asiwaya nacaemonaecuenia wajanataeyaniwa. Bajaraxuata, aeconoxae Cristo pejamatabëcueneta, daxitatsi namata-enetsia na-asiwa tsawanapaetsi benacaemonaetsi.
15 BajaraPonë wajanacasiwatëpaejawata, nacawecuacopiarucaeya-exana baja namata-enetsia wajanacuene-itoyajawami,h tsipaji baja, amatamobia-exanai jiwi pejumecowënëtsijawami daxita paliwaisimi bajayata Dioso najumecopata Moisés-pijinëta, aneconijibia petaenexatsi. Bajarapacuenia amatamobia-exana, caebitsaëtotsi wajanaca-exanaenexa paxanë pajudíowinë, paxamë apopajudíowimë-ata, namata-enetsia nabarajamatabëcuenexanepanaeya wajanajuajinawanapaenexa.
16 Cristo wajanacasiwatëpaejawata, anijabitsaëtotsibeje nacanabarajamatabëcuenexanepanaeya-exana Diosojawabelia, wajaneconimi wajanacatomatamotsixae. Namata-enetsia wajanabara-anaepanaejamatabëcuenemi wajanacawecua-ajibia-exanaexae, anijabitsaëtomitsibeje becaeperabëtoj naca-exana.
17 Cristo baja nacatocapatajopaica mapanacuayabetsicaje, pexanialiwaisi wajanacatsipaebinexa, paxamë apopajudíowimë, Dioso apopaneyapëtaewimijawabelia, paxanë pajudíowinë-ata, Dioso patayapëtaewijawaberena.
18 Nexata, Cristo pejamatabëcueneta, anijabitsaëtomitsibeje cae-Espíritu Santo wajanacayawenonaexae, caejamatabëcuene xainatsi waja-imoxoyotsinexak waxa Diosojawabelia.
19 Bajaraxuata, paxamë, apopajudíowimë, Dioso bepasaicayawimë apopacatae, paxanë, pajudíowinëwecua. Biji rajane, aeconoxae baja, wajanajuajumexaniataewi Jesús peliwaisi, Dioso naca-exana benacaenacuapijiwitsi, benacaemonaetsinua, Cristo pejamatabëcueneta. Bajaraxuata, be-itsanacuawerena panepatsiwicuenia apopacatae baja cajena.
20 Jesús pecanacuenebixae profetawi, apóstolewi-ata petsipaebiliwaisianë, anijabitsaëtomibeje caebitsaëto exana, Dioso petaenexa xaniawaetsia bepenacuenebetsiboxaneto, peponaponaenexa bajarapamonaetuatuajëta. Profetawi, apóstolewi-ata,l petsipaebiliwaisi, nacatocuenejëpa piatajajawa bepetsiwajënaebuatsijawa, boyenepana pebabatanucaenexa. Bajarapijinia cuene-itsi bajarapamonae pepaebiliwaisi, jiwi piajamatabëcuenesaëya-exanaenexa Diosojawabelia. Boyenepanatotsotota, copiaya pebuatatsi-ibotom piatajajawa petsiwajënaebuatsijawajumawereca, bajarapa-iboto itajëta itsaxuayo catsanaponaejitsia itsa-ibotonë. Copiaya pa-ibota buata cuene-itajëta Jesucristo. Cotocaewi pijinia pecatsanaponae-ibotonë cuene-itajëta Jesús pijajiwi, judíowi, apojudíowi-ata, pejumexaniataewi Jesús peliwaisi.
21 Pacuenia bo pexanaenë cae-iboto canacujitsia, n jumanamatajëpaeya-exanapona, xaniawaetsia ibotobeje penacataitsinexa, bajarapijinia pacuenia Cristo pejamatabëcueneta Dioso nacanacuenejëpaeya-exana, xaniawaetsia wajanajuajinawanapaenexa. Bajarapacuenia nacato-exana, daxita bitsaëtotsi, wajanacopatsinexa bepexaniatemplobotsi, pataxunaeta ponaponaejitsia bajaraPonë.
22 Bajarapacuenia paxamë, apopajudíowimë, pajudíowinë-ata, Cristojawabelia wajanajuasiwanajamatabëcuenecopabiwi, wajatuxanenë pejamatabëcueneta, caebitsaëto naca-exana Dioso pexitsi. Nexata, bepexaniatemplobotsi naca-exana, itsajota Dioso pija-Espíritu Santo ponaponaejitsia.o