Dioso itoroba Pablo pepaebanajetarucaenexa pexanialiwaisi, Jesucristo peliwaisi, apojudíowijawa
3
Bajarapacuenia Dioso najëpaeya wajanacataexae, nitoroba patacatsipaebinexa Jesús peliwaisi apopajudíowimëjawabelia. Bajaraxuata, xanë, Pablonë, Cristo Jesús pijajiwitonënë, bajarapaliwaisi tatsipaebaponaexae apojudíowijawabelia, nexata tawënajudíowia nenaneconitsia-exanetab penaneconitsiwi pejebabiabibota.
2 Paxamë baja cajena panewënëtaneme tsaena Dioso tane-itorobijawa, patacatsipaebinexa pexanialiwaisi apopajudíowimëjawa, paneyapëtaenexa Dioso papeca-itaxutotsoniataejawa, pexaniacuenia papecayawenonaejawanexanua, pacuenia paxanë paneto-exana pajudíowinëjawaberena.
3 Dioso najëpaeya wajanacataejawa yabara, bajayajawawerenacujinae abaxë apoyapëtaeya-exanae caejiwi-ata bajarapaliwaisi. Itsiata, aeconoxae, matapania baja, Dioso neyapëtaeya-exana. Bajaraxua yabara imata pacatoyaquinatsi petoyaecaeliwaisicuenia.
4 Itsa palebianame mapaliwaisije patacatoyaquinaejawa, payapëtaename pacuenia xanë Dioso neyapëtaeya-exana. Nexata, payapëtaenamenua xua bajaraPonë najamatabëcuenewereta, pexanaenexa jiwijawabelia Cristo pejamatabëcueneta.
5 Bajayata abaxë, itsajiwijawabelia-ata Dioso apoyapëtaeya-exanae bajaraxua yabara. Aeconoxae baja, Espíritu Santo pejamatabëcueneta, Dioso paxanë paneyapëtaeya-exana papija-apóstolewinëjawaberena, pijaprofetawijawabelia-ata.
6 Bajarapacuenia Dioso bajayata najamatabëcuenewereta najëpaeya peyawenonaenexa apojudíowi, judíowi-ata, Cristo Jesús pejamatabëcueneta. Nexata, pacuenia pajudíowinë Dioso panecapanepa patasiwanajamatabëcuenecopabijawata Jesucristojawabelia, bajarapijinia pacuenia apopajudíowimë-ata, Dioso pacacapanepaena, najëpaeya pexaniacuenia wajanacajamatabëcueneyawenonabiabinexa. Najamatabëcueneweretanua Jesucristota becaeperabëto wajanaca-exanaenexa, wajanajua-ewetawanapaenexanua xua Dioso najumecapanepaeya nacarajutsiapaeba wajanacajamatabëcueneyawenonaejawanënexa.
7 Xanë Dioso tane-itaxutotsoniataexae, bajarapapexanialiwaisi netocopata tatsipaebaponaenexac itsamonaejawabelia. Dioso pesaëtanua necaëjëpaeya-exana, xaniawaetsia jiwi tatsipaebaponaenexa bajarapaliwaisi.
8 Bajarapacuenia Dioso neto-exana, bitso beweliajamatabëcuenenënë-atad daxita itsamonae Jesús peliwaisi pejumexaniataewiwecua. Bajaratajamatabëcuene-itsinë-ata, mapapexaniacueneje Dioso netocopata, apojudíowijawa tatsipaebaponaenexa pexanialiwaisi, Jesucristo peliwaisi. Bajarapamonae-ata tayapëtaeya-exanaenexa pacuenia Cristo ayaicuenia yawenonaponatsi,e jiwi pecanaëjëtsijawawecua.
9 Orijibia, Dioso netocopata patacayapëtaeya-exanaponaenexa padaxitamë, pecopiapatsijawa jane baja xua Dioso tajëwelia najamatabëcuenewereta pexanaejawanexa jiwijawabelia Cristo pejamatabëcueneta. Dioso, daxitacuene pexanaenë, tajëwelia najamatabëxaina cajena apopajudíowimë-ata papecacapanepaenexa. Bajarapaliwaisi apoyapëtaeya-exanae bajayajawawerenacujinae itsajiwijawabelia-ata.
10 Bajarapaliwaisi nacayapëtaeya-exana Dioso pexainaejawa nawitsia pecanaëjëtsicuene pexanaejawanexa. Bajaraxuata, Dioso anijabitsaëtomibeje, pena-itoyawimibeje-ata, caebitsaëto exana Jesús pijajiwinexa, namata-enetsia pena-asiwatsawanapaenexa. Bajarapacuenia, ángelewi, pamonae-ata, ayaijamatabëcuenewi apowajataecapanepaewi tuatuajëta, itaboxojawa pejinawanapaewi,f bajarapamonae Jesús pijajiwi pecuenetaejawata cueneyapëtaena Dioso pexaniacuenia pecanaëjëtsinë daxitacuene pexanaenexa.
11 Dioso tajëwelia pesiwacanaëjëtsicuenia pexanaejawanexa, bajarapacuenia baja exana, wajatuxanenë Cristo Jesús pejamatabëcueneta.
12 Cristojawabelia wajasiwanajamatabëcuenecopabixae, itaxutuajamatejematsi Dioso. Nexata, apocuenejunawitsinua. Biji saya jamatejema wajacuata wajëtabiabatsi bajaraPonëjawabelia.
13 Bajaraxuata, pacawajëtatsi patanesiwajamatabëcuenecueranaeyaniwamë, tanebejiobia-exanaejawag yabara tawënajudíowi, patacatsipaebaponaexae apopajudíowimëjawa Jesús peliwaisi. ¡Biji rajane, panasiwajamatabëcuenebarëyamëre, tsipaji tanebejiobia-exanaejamatabëcueneta, paxamë panatoyapëtaename bitso panenamatamotsijawa Dioso pitabarata!
Pablo towajëta Diosojawabelia Jesús pijajiwi pejamatabëcuenewitsabinexa, Éfeso tomarata pejinawanapaewi
14 Daxita bajarapacuenia Dioso papecato-exanaexae Cristo pejamatabëcueneta, tamatabacabëta nucabiabajë, asaëyata patacatowajëtsinexa wajatuxanenë Jesucristo paxa Diosojawabelia.
15 Daxita Jesús pijajiwi, pamonae jinawanapa athëbëtatsia, pamonae-ata abaxë jinawanapa mapanacuataje, Dioso tane benacaemonae. Nexata, bajarapamonae caenë paxa Dioso najua-exana.
16 Nacaemonae papeca-exanaexae, pacatowajëtabiabatsi Dioso ayaijamatabëcuenenëjawabelia, pesaëta papecajamatabëcuene-asaëya-exanaenexa, Espíritu Santo pejamatabëcueneta, tsipaji bajaraPonë athëbëtatsia nawitsia xaina daxitacuene papecajamatabëcueneyawenonaenexa.
17 Pacatowajëtabiabatsinua Cristo papecatsijamatabë-ecaenexa, pane-itaxutuajamatejemaxae. Pacatojitsipatsinua pane-asiwajawa Dioso, itsamonae-ata, panenajuajumexaniataewi Jesús peliwaisi.
18 Bajarapacuenia paxamë pacacuenecaëjëpaena, daxita Jesús pijajiwi yajawa, paneyapëtaeponaejawa panewajënaeyabelia ayaicuenia Cristo bitso papeca-asiwajawa.
19 Cristo pijajiwi pena-asiwacuene bitso pinijicuene cajena, apowajayapëtaecapanepaejawa xaniawaetsia. Nexata, bajarapa-asiwacuene panexainaexae, pacatowajëtabiabatsinua Diosojawabelia, papecajamatabëcuenewënëcaeya-exanaenexa daxita xua pacatoxaina papecajamatabëcuenecaëjëpaeya-exanaenexa. Dioso pajamatabëcuene xaina.
20 Bitso pexaniacuenia wënëxaniatsianatsi Dioso, pexainaenëxae ayaijamatabëcuene, tsipaji bitso pecuenecaëjëpaenëtsi pesaëta daxitacuene pexanaejawa, wajawajëtsijawawecua, wajacanaëjëtsijawawecua-ata. Bajarapasaë wajanacatsijamatabëcuene-ecaexae, bajarapacuenia nacato-exana wajanacayawenonaenexa.
21 Bajarapacuenia Dioso wajanacayawenonabiabixae Cristo Jesús pejamatabëcueneta, nacatoxanepana Jesús pijajiwitsi, wajawënëxaniatabiabijawa Dioso daxitamatacabijawabelianexa, bitso ayaijamatabëcuene pexainaenëcuene yabara. Bajara-itsi tsane.