Capítulo 4-6-jawabelia, Pablo yapëtaeya-exana pacuenia Jesús pijajiwi jinawanapaejitsia, itsamonae pecuenetaejawatatsi pexaniacuenia pewënëxaniatsinexa Diosojawabelia
Espíritu Santo pejamatabëcueneta, daxita Jesús pijajiwi najamatabëcuenejëpawanapa
4
Maparucaeje, xanë naneconitsiaponaponajë penaneconitsiwi pejebabiabibota, tajumecowënëtsixae wajatuxanenë Cristo tane-itorobicuenia. Itsiata, Dioso bitso pexaniacuenia wajanacato-exanaexae, asaëyata pacamuxujiobatsi panejinawanapaenexa Dioso papecatojitsipaecuenia,a papecajunatsixae papijajiwinexamë.
2 Dioso pacajunata panexainawanapaenexa beweliajamatabëcuene, pane-asiwajamatabëcuene-ata. ¡Nexata, Jesús papijajiwixaemë bajarapajamatabëcuenebejeb yabara, namata-enetsia pajamatabëcuenesaëmëre tsawanapae, itsamonae Jesús pijajiwiyajuwënëwi bajayajebi paca-itsacueniababiabi-ata!
3 ¡Caebitsaëto papeca-exanaexae Espíritu Santo, pajamatabëcuenesaëmëre tsawanapae najamatabëcuenejëpaeya panejinawanapaejawa! Panajuajinawanaparenua nabarajamatabëcuenexanepanaeya.
4 Bajarapacuenia bejinawanapatsi, tsipaji pajudíowinë, apopajudíowimë-ata, Espíritu Santo naca-exana caeperabëto Jesucristojawabelia. Cae-Espíritu Santo-ata nacatsijamatabëcuene-eca. Paxamë-ata Dioso pacajunata caecuenejawa wajanajuacopia-ewetawanapaenexac wajaxainaejawanexa, wajajamatabëcuene-ewetawanapaenexa xua xainaejitsiatsi itsamatacabijawabelia, Cristo pepatsimatacabita.
5 Caenë Jesús xainatsi wajatuxanenënexa. Caejumexaniataecuene xainatsi, Jesús peliwaisi, Dioso wajanacacapanepaenexa wajaneconiwecua. Caenabautizabicuene xainatsi, wajanajamatabëcuene-itajëtsinexa Jesucristo pijajiwicuenetsi.
6 Caenë rabaja Dioso, paxanuad daxita Jesús pijajiwinexa. Nexata, daxitacuene nacanamatacaitorobaponapona. Nacajamatabëcuenecaëjëpaeya-exana pejitsipaecuenia wajato-exanawanapaenexa. Nacatsijamatabëcueneponaponanua,e Jesús pijajiwixaetsi.
7 Cristo wajanaca-asiwajamatabëcuene, pejitsipaecuenia caejiwitsi canacujitsia saicaya nacajamatabëcuenecaëjëpaeya-exanapona,f bajaraxuanë wajacanacuenebinexa wajanaca-itorobicuenia.
8 Bajaraxuata, Dioso pejumeliwaisibaxutota tajëwelia jumaitsi Cristo yabara mapacueniaje:
«Pepuajamatabëcuene-amoneyabi pitoyawitsi,g petaicaewimitsi-ata pecapanepaecujinae, bajaraPonë bajarapapecananepaewi yajawa, barënawiatsiana athëbëabetsia. Rajutsiananua pexaniajawanëh pijajiwijawabelia»,i jai tajëwelia Dioso pejumeliwaisibaxutota.
9 Bajarapacuenia itsa nacayapëtaeya-exana Cristo penawiatsijawa athëbëabetsia, caecuenia nacayapëtaeya-exananua pacuenia copiaya pepatsijawatsica apanacuayabetsicaje. Pepatsijawa-ata irabëxëpanajawabereca.j
10 Nexata, Ponë patsica mapanacuayabetsicaje, icatsia nawiatsia caewëabetsia tajënacuayabetsia, pecanacopatsinexa ayaijamatabëcuene pexainaenëcuene daxitawecua.
11 Nexata, ayaijamatabëcuenenëxae daxitawecua, nato-itapeta itsamonae apóstolewinexa,k itsamonae profetawinexa,l itsamonae petsipaebaponaewinexa abaxë apopeyapëtaewi Jesucristo peliwaisi, itsamonae peto-ewetsiwinexatsi pijajiwi, itsamonae-ata xaniawaetsia pecujarubiwinexa Dioso peliwaisi. Daxita bajarapamonae Espíritu Santo saicayacuenia jamatabëcuenecaëjëpaeya-exanapona,m xaniawaetsia penacuenebinexa Cristo pijajiwituatuajëta.
12 Bajarapacuenia exana bajarapapitapetsiwijawabelia,n xaniawaetsia petocuenecujarubinexa daxita Jesús pijajiwi, peyabaracuenecujuaninexatsi Dioso pijacuene petonacuenebawanapaejawa. Petocuenecujarubinexanua becaeperabëto penaexanaewi Cristojawata, pewajënaeyabelia pejamatabëcueneliwaisinaweretaponaenexao Dioso pijacuenejawata.
13 Cuenecujarubijitsianua Jesús pijajiwi, peyabaracujuaninexatsi caejamatabëcuene penajuaxainawanapaejawa, pitaxutuajamatejemajawap Jesucristojawabelia, xaniawaetsia pecueneyapëtaejawanuaq wajatuxanenë, Dioso pexënato. Cuenecujarubaponanua pejamatabëcuenenaweretsia-exanaenexa, pejamatabëcuenejëpaejawabelia pacuenia Cristo jamatabëcuene-itsi.
14 Waxaitsi, Jesús pijajiwitsi, itsa jamatabëcuenejëpatsi Cristo, apojamatabëcuenejëpaetsi pejewaxi, pacuenia caejamatabëcuene apoxainae pejumexaniataeliwaisi yabara. Nexata, pamonae petsiyapëtaewi peyamaxë-itojorobinexa, bepexaniajailiwaisicuenia petsipaebiwi, apocuenecaëjëpaetsi tsane pexaniajailiwaisiwecua wajanacayamaxë-itojorobinexa.
15 Biji rajane, bajarapapexaniajailiwaisi wajajumexaniataewanapaewi, asiwaya betsipaebaponatsi itsamonaejawabelia. Bajarapacuenia asiwaya waja-exanawanapaejawata, jamatabëcuenenaweretaponaenatsi, daxitacuenejawalia wajajamatabëcuenejëpaenexa Cristo. BajaraPonë bewajamatabocotonëxae nacanamatacaitorobabiaba. Nexata, waxaitsi bepeperabëtoxaetsi, be-exanabiabatsi pacuenia naca-itorobabiaba.
16 Cristo pejamatabëcueneta, daxita pijajiwitsi xaniawaetsia namata-enetsia nayawenonatsi. Nacanasaërajutanua. Pacuenia wajaperabëtota caewito canacujitsia, itsa exanapona petsicarucaecueniatsi, nayawenona daxita penacuenebixanepanaenexa, bajarapijinia pacuenia Cristo pijajiwitsi wajanacuenebixanepanaenexa namata-enetsia benayawenonatsi. Bajarapacuenia nexata, itsa exanawanapaenatsi, xaniawaetsia najuajamatabëcueneliwaisinaweretaponaenatsi Dioso pijacuenejawata. Namata-enetsia cuenenaweretaponaenatsinua wajana-asiwacuenejawata.
Bejinawanapatsi papejanajamatabëcueneta nacarajuta Cristo
17 Wajatuxanenë Cristo pewënëta, paca-itawetatsi Dioso apopeyapëtaewicuenia panejinawanapaeyaniwa. Bajarapamonae najamatabëxainawanapa pexanaenexa piamatamobicuenejawanë Dioso pitabarata.
18 Bajarapamonae ajamatabëcuene-itaquiri tsawanapae. Piajamatabëcuenetajaxae, najamatabëcuenewereta apopejitsipaejawanexa Dioso. Aponatoyapëtaenua pejamatabëcuene-aitawaya-exanaejawatsi. Nexata, naxuabiaya jinawanapa Diosowecua.
19 Apoyapëtae pia-uracuenejawanë. Nexata, acuene-urajibia exanawanapa. Casaë bitso pexanaenexa daxita xua pibisiacuene.
20 Itsiata baitsi jane, panejumexaniataejawata Cristo peliwaisi, apopanacuenecujarubimë cajena pibisiacuene pane-exanawanapaenexa.
21 Panejumetaexae bajarapaliwaisi Cristo yabara, payapëtaneme pexaniajailiwaisi. Nexata, bajarapapexaniajailiwaisi pacacujaruba pacuenia pajinawanapaejitsiamë Cristo papecatojitsipaecuenia.
22 ¡Pacuenia panajumajonojitsipame piaxuira-eseto, bajarapacuenia pacopabare baja panijaperujujamatabëcuene papecanamatacaitorobabiabijawa! Bajarapajamatabëcuene baja cajena bitso abeje,tsipaji pacayamaxë-itojorobabiaba pexaniajailiwaisiwecua.
23 ¡Biji rajane, panajamatabëcuenecaewere pejanacuenia Espíritu Santo papecajamatabëcuenexanebaponaenexa!
24 ¡Dioso pejamatabëcueneta panexainaexae bajarapapejanajamatabëcuene, pajinawanapare aneconijibia, pexaniajaicuenia-ata, pacuenia Dioso, papeca-exanaenë, cuene-itsi, panecuenejëpawanapaenexa!
25 ¡Bajaraxuata, pëtsa baja pematatsënëa panajumetsënëtawanapame!r ¡Biji rajane, namata-enetsia panatsipaebare pexaniajailiwaisi, tsipaji daxitatsi caenë Jesucristo pijajiwitsi!
26 ¡Itsa pa-anaepaname, pëtsa panacopatame pane-anaepanaejawa pibisiacuene papeca-exanaeya-exanaenexa! ¡Pëtsa pasiwajamatabëcuenetsitecame itsamatacabijawabelia-ata panebara-anaepanaejawa!
27 ¡Bajarapacuenia pëtsa panacopatame, dowathi papecayamaxë-itojorobinexa!
28 Pajiwi nacobetoxotabiaba, copatsi baja penacobetoxotabiabijawa. Juya, nacuenebi, pepitsinexa xua namatawenona, peyawenonaenexanua bepejiobiwijawabelia.
29 ¡Pëtsa baja pacuaicuaijamë pibisialiwaisi, pia-uraliwaisi-ata! ¡Biji rajane, pacuaicuaijamëre pexanialiwaisi, papecajumetaewi panejamatabëcueneyawenonaenexa, pane-ajamatabëcuenesaëya-exanaenexanua Diosojawabelia!
30 ¡Pëtsa Espíritu Santo panajamatabëxainaeya-exaname, itsacuene pane-exanaejawata, panecuaicuaijaijawatanua! Dioso pacatsijamatabë-ecaeya-exana pija-Espíritu Santo, panenayapëtaenexas pepacuene Dioso papijajiwimëcuene, papecacapanepaejawanexanua.t
31 ¡Pacopabare bajayajebi bëpënëa panebarajamatabëcuene-anaepanabiabijawa, jema bitso pane-anaepanabiabijawa, anaeya panenabijataeyabiabijawa-ata! ¡Pacopabarenua pibisiacuenia itsamonae panebaracuaicuaijaijawa, itsamonaejawabelia-ata pibisiacuenejawanë paneto-exanabiabijawa!
32 ¡Biji rajane, Jesús papijajiwixaemë, namata-enetsia pexaniajamatabëcuene panatoxainare! ¡Pana-itaxutobejiobiataemanua! ¡Pacuenia Dioso pacabarajamatabëcuenexanepana Cristo pejamatabëcueneta, pibisiacuene pane-exanaewi-ata, bajarapijinia pacuenia namata-enetsia panabarajamatabëcuenexanepanawanapare!