Pemuxujiobiliwaisi pexijawabelia, paxajiwijawabelia-ata
6
¡Paxamë papeximë, wajatuxanenë Cristo papijajiwixaemë, pane-axajiwi, pane-enajiwi-ata, pajumecowënëtabiabare! Bajarapacuenia pane-exanaejawa Dioso tsitaxanepanatsi.
2 Bajaraxua yabara, Dioso pejumeliwaisibaxutota jumaitsi mapacueniaje: «¡Yaiyataema axa, ena-ata!»,a jai. Bajarapaliwaisi Dioso yajawanajumecopatanua pexaniacuenia peyawenonaenexa, pajiwi jumecowënëta bajarapaliwaisi.
3 Yawenonaeyapaeba xaniawaetsia peponaponaenexa, bajayajebi piasaëtsaponaponaenexanua mapanacuataje.
4 ¡Paxamë pijinia, panexi panexainaewi, pëtsa pa-anaeya-exaname panexi bijiaya pane-ewetsijawata, papecabara-anaepanaeyaniwa! ¡Biji rajane, xaniawaetsia panacoxiwitsare panecuenecujarubijawata, panecuenexanetsijawatanua,b Dioso pejumeliwaisitac papecayapëtaeya-exanaecuenia!
Pemuxujiobiliwaisi petuxanewi, pamonae-ata petonacuenebawanapaewi
5 ¡Paxamë pijinia, itsamonae papijajiwimë, amoneya panetonacuenebawanapaewi,d pacuenia Cristo pajumecowënëtsipame, bajarapijinia pacuenia, pato-exanabiabare panijatuxanewi mapanacuataje papeca-itorobicuenia! Yaiyataeya, xaniawaetsia, patonacuenebianame panijatuxanewi barajitsipaeya.
6 ¡Pacuenia paxamë, patonacuenebijitsipame Cristo, bajarapijinia pacuenia xaniawaetsia patonacuenebabiabare panijatuxanewi caematacabi canacujitsia! ¡Pëtsa xaniawaetsia patonacuenebame papecacuenetaenucaejawata, papecasiwabarëyanexa! ¡Pecowëta-ata pijinia, xaniawaetsia patonacuenebare! ¡Patonacuenebabiabare panijatuxanewi, daxita panejamatabë-ëthëtojawawetsina, Dioso papecatojitsipaecuenia paneto-exanaenexa!
7 ¡Jamatabëcuenebarëyaya, pa-afaetabinejewamë patonacuenebawanapare panijatuxanewi, pacuenia patonacuenebijitsipame Cristo! ¡Pëtsa patonacuenebame, pacuenia mapanacuapijiwije batonacueneba pijatuxanewi!
8 Paxamë rabaja payapëtaneme mapacueneje. Dioso najëpaeya matamotsiana daxita pamonae pexaniacuene to-exana itsamonaejawabelia, pamonae amoneya tonacuenebawanapa itsamonaejawabelia, pamonae-ata pijacuata natonacuenebawanapa.e ¡Nexata, pexaniacuenia patonacuenebawanapare panijatuxanewi!
9 Paxamë pijinia, papijatuxanewimë, pacamuxujiobatsi mapacueniaje. ¡Xaniawaetsia pataema panijajiwi, papecatonacuenebiwi! ¡Pacopare panijajiwi pane-atiobabiabijawa, asaëya papecatonacuenebabiabinexa! ¡Pacanaëjëre pacuenia paxamë-ata, panijajiwi yajawa, paxainame caenë panijatuxanenë Dioso, Ponë eca athëbëtatsia! Bajaraponë saya najëpaeya tane daxita jiwi. Nexata, paneconiwajëto xaina caejiwi canacujitsia, petuxanewi-ata, amoneya petonacuenebiwi-ata, bajarapaneconiwajëtota naneconitsia-exanaponaena. Bajaraxuata, panijajiwi-ata itorobajë xaniawaetsia papecatonacuenebabiabinexa.
Dioso rajuta Jesús pijajiwijawabelia, xuanëta naewetsijitsia, dowathi pejamatabëcuene-ëjëbijawatatsi
10 Tajamonae, icatsia cotocaewi patacatoyaquinaeliwaisita, pacajumaitsitsi mapacueniaje. ¡Pa-ajamatabëcuenesaëmëre tsawanapae wajatuxanenë Cristojawabelia, bajaraPonë pesaëta xaniawaetsia panenayajiwitaewanapaenexa dowathi pijacuene!
11 ¡Pacuenia wajabitsaënë banayajiwinaxatata piatajajawa pijawajabitsaënë pejorojoronaeyaniwatsi, bajarapijinia pacuenia, paxamë-ata panayajiwinajamatabëcuenexatare Dioso papecarajutsijawanëta, panecanawajabitsaëtsinexa dowathi panejamatabëcuenematatoxenetsinexa, paepatota pacajamatabëcuene-ëjëba! Nexata, dowathi pawecua-ajamatabëcuenesaëmë tsane,f papecajamatabëcueneyamaxë-itojorobiyaniwa.
12 Bajarapacuenia bepa-exaname, tsipaji raja apoxainaetsi wajanacabarënawajabitsaëtsinënexa wajawënajiwitonë. Biji rajane, ayaibitsaëtoxaneto barënawajabitsaëtaponatsi apowajataecapanepaewi, itaboxojawa pejinawanapaedowathiwijawabelia, bajarapabitsaëtotuatuajëta itsamonae ayaijamatabëcuenewi. Pamonae mapanacuataje namatacaitorobabiaba daxita pitaquirijamatabëcuene pexainaewi, pibisiacuene pexanaeya-exanaenexa. Nexata, itsa nacatsimaxëpatabiaba, jaita wajanacajitsipaeya-exanaejawa, pibisiacuene waja-exanaenexa.
13 ¡Nexata, papecajamatabëcueneyamaxë-itojorobiyaniwa dowathi, Dioso papecarajutsijawanëta panecanawajabitsaëtsinexa panayajiwijamatabëcuenexatare pane-ajamatabëcuenesaënexa! Pamatacabi pacatsimaxëpatsiana papecajamatabëcuene-ëjëbinexa, itsa jume, pibisiacuenejawa papecatocopiapatsinexa, apopacayamaxë-itojorobicapanepae tsane. Biji rajane, panijawajabitsaënë dowathi pawecua-ajamatabëcuenesaëmë tsane.
14 ¡Nexata, pajamatabëcuenesaëmëre panenajamatabëcuenexatatsixae Dioso pijacuenejawanëta, pacuenia wajabitsaënë piatajajawa nayajiwinaxatatabiaba pebarënawajabitsaëtsiwajënaeya! Wajabitsaënë penayajiwinaxatatsicujinae, caecowëta banuca, natixitsinejewa pecowëwecua pijawajabitsaënë pebarënawajabitsaëtsijawata. Wajabitsaënë bana-epacëtag penawajabitsaëtsiwajënaeya. ¡Bajarapijinia pacuenia panajamatabëcuenexatare Dioso pijapexaniajailiwaisita, dowathi papecayamaxë-itojorobiyaniwa penajumetsënëtsiliwaisita! Wajabitsaënë piatajajawa banamipabëxatata.h ¡Bajarapacuenia Dioso pijapexaniacuenejawanëta panajamatabëcuenexatare pexaniacuenejawanë pane-exanawanapaenexa, dowathi papecajitsipaeya-exanaeyaniwa pibisiacuene pane-exanaenexa!
15 Wajabitsaënë banataxuxatatai pijazapato. ¡Bajarapacuenia panajamatabëcuenewerere pexanialiwaisi, Jesús peliwaisi, jiwi panetsipaebawanapaenexa, daxita pejumexaniataewi bajarapaliwaisi, jamatabëcuenexanepanaeya pejinawanapaenexa Diosojawabelia!
16 Daxitacuenewecua, wajabitsaënë escudopana banamaxëcëta, penacaranatsinexa pe-upaxuabiyaniwatsi pijawajabitsaënë. ¡Bajarapacuenia panewajënaeyabelia pa-ajamatabësaëmëre pane-itaxutuajamatejemajawa Dioso pepecayawenonaenexa! Nexata, pacacuenecaëjëpaena panewecuanajamatabëcuenecaranatsinexa, dowathi papecajamatabëcuene-upaxuabiyaniwaj penajumetsënëtsiliwaisianëta.
17 Wajabitsaënë banamataxatata piatajacascowënëjawa.k ¡Bajarapacuenia panayajiwinajamatabëcuenexatare asaëyata panejumexaniataejawa Dioso papecacapanepaejawa baja panijaneconiwecua! Orijibia, wajabitsaënë pija-espada banayajiwicapona. ¡Bajarapacuenia panayajiwicaponare Dioso pejumeliwaisi, panebarënawajabitsaëtsinexa panijawajabitsaënë dowathijawabelia! Bajarapaliwaisita Espíritu Santo pacayapëtaeya-exanaena pexaniajailiwaisi, dowathi papecayamaxë-itojorobiyaniwal papecajamatabëcuene-ëjëbijawata. Daxita bajarapacuenejawanëta itsa panajamatabëcuenexatatsianame, pacacuenecaëjëpaena panejamatabëcuenesaënexa dowathiwecua panatixitsinejewamë papecajamatabëcuene-ëjëbijawata, panecuene-amoneyabijawabelia.
18 Daxita matacabi pawajëcaponaename Diosojawabelia, pane-ajamatabëcuenesaëtsawanapaenexa, papecayawenonaenexa, itsamonae-ata peyawenonaenexatsi. ¡Patonacopare Espíritu Santo papecajamatabëcuenenamatacaponaenexa, panewajëcaponaejawata Diosojawabelia! ¡Pa-ajamatabëcuene-itatsacamëre tsawanapae, pacopatsinejewamë panewajëcabiabijawata, pane-ajamatabëcuenesaënexa Diosojawabelia, dowathi papecajamatabëcueneyamaxë-itojorobiyaniwa! ¡Bajarapacuenia-ata daxita Jesús pijajiwi yabara payajiwiwajëtabiabare Diosojawabelia!
19 ¡Xanë-ata panetowajëtabiabare, Dioso taneyapëtaeya-exanaenexa pacuenia paebijitsianë, liwaisi tatsipaebijawata jiwijawabelia! Panetowajëtabiabarenua tanejamatabëcuenecaëjëpaeya-exanaenexa, ajume-urajibia jiwijawabelia tatsipaebabiabinexa Jesús peliwaisi, Dioso pecapanepaeliwaisinexa judíowi, apojudíowi-ata. Bajarapaliwaisi picani Dioso bajayata apoyapëtaeya-exanae itsajiwijawabelia-ata!
20 Itsiata maparucaeje, bajarapapexanialiwaisi Dioso necopata ajume-urajibia tatsipaebanajetarucaenexa itsamonaejawabelia. Nexata, tatsipaebabiabixae bajarapaliwaisi, ajena naneconitsiaponaponajë majotaje, penaneconitsiwi pejebabiabibota. ¡Bajaraxuata, Diosojawabelia panetowajëtabiabare, naneconitsiaponaponae-atanë, ajume-urajibia tsiteca jiwijawabelia tatsipaebabiabinexa bajarapaliwaisi pacuenia Dioso netocopata!
Pablo penapëjiobiliwaisi
21 Wajabananë Tíquico, bitso waja-asiwanë, itsa patsiana paxamëjawabelia, pacatsipaebiana daxita xuanë necuenetane. Bajaraponë xaniawaetsia paneyawenonabiaba, itsa patonacuenebabiabajë pacuene wajatuxanenë pane-itoroba.
22 Bajaraxuata, bajaraponë pacato-itorobatsi baja paxamëjawabelia, papecatsipaebinexa pacuenia pajinawanapajë, panemuxuna-ajamatabëcuenesaënexa panejumetaejawata.
23 Bitso pacatojitsipatsi waxa Dioso, wajatuxanenë Jesucristo-ata, papecayawenonaenexa jamatabëcuenexanepanaeya panejinawanapaenexa. Bajaraxuata, pacatowajëcabiabatsi namata-enetsia panena-asiwanexa, Jesucristojawabelia panenajuasiwanajamatabëcuenecopabixae.
24 Pacatowajëcabiabatsinua Dioso asiwaya papecayawenonabiabinexa, paxamë pane-asiwatsawanapaewi wajatuxanenë Jesucristo pacopatsinejewamë. Bajara-itsi tsane.